Read ኔሄሚያ ማፃኣፖ 11

ኔሄሚያ ማፃኣፖ11mdy_twf

ዬሩሳላሜይዳ ናንጋ ዴሮ

¹ሱኡጋ ፔኤኮ ናንጎ ቤዞ ዬሩሳላሜይዳ ማሄኔ፤ ሃንጎ ዓቴ ዴሮ ባኣካፓ ታጶ ማኣሪ ዓሲዳፓ ፔቴማ ፆኦሲም ዱማዼ ዬሩሳላሜ ካታሞይዳ ናንጋንዳጉዲ ዒፃ ዓጊሢና ዶኦሪንቴኔ፤ ሃንጎ ዓቴ ዴራ ጋዓንቴ ሜሌ ጉርዶና ካታሞናይዳ ቢያ ናንጎ ፔኤኮ ማሄኔ።²ዴራ ዒማና ዬሩሳላሜይዳ ፔ ማሊሢና ናሽኪ ናንጋኒ ማሊፃ ዓኣ ዓሶ ቢያ ጋላቴኔ።³ጊንሣ ሃሣ ሜሌ ጉርዶና ካታሞናይዳ ናንጋ ዒስራዔኤሌ ዴራ ቄኤሶንታ ሌዊ ዓሶንታ ጌኤዦ ማኣራ ማዻ ዓሶንታ ሴሎሞኔም ማዾ ማዻ ዓሶ ዜርፆንታ ፔኤኮ ጉርዳኣ ጉርዳ ዔያቶኮ ዓኣ ቤዛ ናንጌኔ። ዬሩሳላሜይዳ ናንጋ ዪሁዳ ዓጮ ሱኡጎኮ ሱንፃ ሃካፓ ዴማ ዓኣ ጎይፆኬ፤

⁴ዪሁዳ ዜርፆ ዓሳ፦ ዛካሪያሴ ናኣዚ ናዖ ማዔ፥ ዑዚያ ናኣዚ ዓታያ፤ ሜሌ ዒዛኮ ቤርታኣ ማዖንሢ ማዔ ዪሁዳ ናኣዚ ፓሬሴ ዜርፆ ማዔዞንሢ ዓማሪያ፥ ሼፓፂያንታ ሜሃላሊዔሌንታኬ።⁵ኮልሆዜኮ ናኣዚ ናዖ ባሩኬ ናኣዚ ማዒሴያ፤ ሜሌ ዒዛኮ ቤርታኣ ዓዶንሢ ማዔ ዪሁዳ ናኣዚ ሼኤላ ዜርፆንሢ ሃዛያ፥ ዓዳያ፥ ዮያሪቤንታ ዛካሪያሴንታኬ።⁶ፓርሴ ዜርፆ ባኣካፓ ዖልዚና ዔርቴያ ማዔ ዖይዶ ፄኤታና ላሂታሚ ሳሊ ዓሲ ዬሩሳላሜይዳ ናንጌኔ።

⁷ቢኢኒያሜ ዜርፆ ዓሳ፦ ዮዳሄኮ ናኣዚ ናዖ ሜሹላሜ ናኣዚ ሳሉ፤ ዒዛኮ ቤርታሳ ማዖንሢ፦ ፔዳያ፥ ቆላያ፥ ማዒሴያ፥ ዒቲዔኤሌንታ ሻዒያንታኬ።⁸ሳሉኮ ዑኬ ዒጊኖ ማዔ ዓሳ፦ ጋባዬና ሳላዬና፤ ዔያታ ዎሊ ዑፃ ታዞጳ ፄኤታና ላማታሚ ሳሊ ማዓ ቢኢኒያሜ ዓሲ ዬሩሳላሜይዳ ናንጋኔ።⁹ዚኪሪ ናኣዚ ዒዩዔኤሌ ዔያቶኮ ሱኡጋሢ ማዓዛ፥ ሃሴኑዓ ናኣዚ ዪሁዳ ዒዛኮ ዴማ ላምዓሳሢ ማዓ ቢታንቶ ዓኣያኬ።

¹⁰ቄኤሳ፦ ዮያሪቤ ናኣዚ፥ ያኪኔ ናኣዚ፥ ዪዳዒያ፤¹¹ሜሹላሜኮ ናኣዚ ናዖ ሂልቂያ ናኣዚ ሴራያ፤ ዒዛኮ ቤርታኣ ዓዶንሢ ፃዾቂኔ፥ ሜራዮቴንታ ቄኤሶ ቢያኮ ዑፃሢ ማዔ ዓሂፁቤንታኬ።¹²ዬኖ ቶኦኮይዳፓ ዎሊ ዑፃ ሳሊ ፄኤታና ላማታሚ ላምዖ ዓሲ ጌኤዦ ማኣሮይዳ ማዻኔ። ፔላሊያኮ ናኣዚ ናዖ ዬሮሆሜ ናኣዚ ዓዳያ፤ ዒዛኮ ቤርታኣ ማዖንሢ ዓሞፂኔ፥ ዛካሪያሴ፥ ፓሽሁሬንታ ማልኪያንታኬ።¹³ዬኖ ቶኦኮይዳፓ ዎሊ ዑፃ ላምዖ ፄኤታና ዖይዲታሚ ላምዖ ዓሲ ዔያቶኮ ማኣሮ ዓሶ ሱኡጎኬ። ዓህዛዬኮ ናኣዚ ናዖ ማዔ ዓዛርዔኤሌ ናኣዚ ዓማሽሳዬ፤ ዒዛኮ ቤርታኣ ማዖንሢ ሜሺሌሞቴና ዒሜሬናኬ።¹⁴ዒዛኮ ጌርሲንሢ ዶኦሪንታኣና ዔርቴ ፖኦሊሴ ማዔ ዓሶንሢኮ ሚርጉማ ፄኤታና ላማታሚ ሳሊኬ፤ ዔያቶኮ ሱኡጋሢ ሃጌዶሊሜ ናኣዚ ዛብዲዔኤሌኬ።

¹⁵ሌዊ ዓሳ፦ ዓዝሪቃሜኮ ናኣዚ ሃሹቤ ናዖ ሼማዒያ፤ ዒዛኮ ቤርታኣ ማዖንሢ ሃሻቢያንታ ቡኒንታኬ።¹⁶ሻቤታዬና ዮዛባዴ ጌይንታ ሌዊ ዓሶኮ ሱኡጋ ጌኤዦ ማኣራቱዋንቴ ዙላ ማዺንታ ባኮኮ ቢያ ሱኡጎንሢኬ።¹⁷ዓሳኣፔ ዜርፆ ዒጊናፓ ሾይንቴ ዛብዲኮ ናዖ ሚካ ናኣዚ ማታኒያ ጌኤዦ ማኣሮይዳ ጋላቶ ሺኢጲፆ ሺኢቂ ዓይኑሞ ዓይናዻ ዓሶኮ ሱኡጋሢኬ፤ ባቅቡቄ ጎዖሢ ማታኒያኮ ዴማ ማዒ ማዻያኬ፤ ሜሌሢ ሃሣ ዪዱቱኔ ዜርፃፓ ሾይንቴ ጋላሌኮ ናዖ ሻሙዓ ናኣዚ ዓብዳኬ፤¹⁸ሌዊ ዓሶ ዒጊናፓ ዎሊ ዑፃ ላምዖ ፄኤታና ሳሊታሚ ዖይዶ ዓሲ ፆኦሲም ዱማዼ ካታሜሎ ዬሩሳላሜይዳ ናንጋኔ።

¹⁹ጌኤዦ ማኣሮ ካፓ ዓሳ፦ዓቁቤ፥ ፃልሞኔንታ ዔያቶኮ ዒጊና ዎሊ ዑፃ ፄኤታና ላንካይታሚ ላምዖኬ።²⁰ዓቴ ዒስራዔኤሌ ዴሮንታ ቄኤሶንታ ሌዊ ዓሳኣ ዓቱዋዖ ዓኣ ዔያቶኮ ዓጮ ዓርቄ ጎይሣ ማዒ ሃንጎ ዪሁዳ ካታሞይዳ ናንጋኔ።²¹ጌኤዦ ማኣሮይዳ ማዻ ዓሳ ዬሩሳላሜ ካታሞኮ ፔቴ ዛላ ዖፔሌ ጌይንታ ጌሜራ ናንጋኔ፤ ፂሃና ጊሽፓ ጌይንታ ዓሳ ዔያቶ ዛጊ ማዾ ማዺሻኔ።²²ዬሩሳላሜይዳ ናንጋ ሌዊ ዓሶ ሱኡጋሢ ሃሻቢያኮ ናኣዚ ባኒ ናዖ ዑዚኬ፤ ዒዛኮ ቤርታኣ ዓዶንሢ ማታኒያንታ ሚካንታኬ፤ ዒዚ ጌኤዦ ማኣሮይዳ ዓይኑሞ ዓይናዻ ዓሶ ሱኡጋሢ ዓሳኣፔ ዜርሢኬ።²³ቢያ ኬላ ኬላ ዓይናዺንታ ዓይኑማ ዎሊ ሄሊ ሄሊ ማዓንዳጉዲ ካኣቲ ዓይሤ ዓይሥሢ ዓኣኔ።²⁴ዪሁዳ ፃጳፓ ዛራሄ ቶኦኪ ማዔ ሜሼዛቤሌ ናኣዚ ፔታህያ ዒስራዔኤሌ ዴሮ ዛሎ ፓርሴ ካኣቲ ጌሤም ጌስታ ዓሲኬ።

ሃንጎ ጉርዶና ካታሞናይዳ ናንጋ ዴሮ

²⁵ዴሮይዳፓ ሚርጌሢ ናንጋሢ ጎዦኮ ዑኬ ዓኣ ጉርዶይዳኬ፤ ዬያሮ ዪሁዳ ዜርፆ ማዔዞንሢዳፓ ፔቴ ፔቴዞንሢ ዓርባዒ ካታሞና ኮይላ ዓኣ ጉርዶናይዳ፤ ጊቦኔና ዪቄብፂዔኤሌ ጌይንታ ካታሞንሢና ኮራ ዓኣ ጉርዶናይዳ ናንጋኔ፤²⁶ዬያጉዲ ሃሣ ዒያሱ፥ ሞላዳ፥ ቤትጳሌፄና²⁷ሃፃርሹዓሌ ጌይንታ ካታሞንሢዳ ናንጋኔ፤ ዬያ ሌሊቱዋንቴ ቤርሳቤና ኮሮይዳ ዓኣ ጉርዳ ዔያቶኮ ናንጎ ቤዞኬ፤²⁸ፂቅላጌ ካታማ፥ ሜኮናና ኮሮይዳ ዓኣ ጉርዶ፥²⁹ዔንሪሞኔ፥ ፄሪዓ፥ ያርሙቴ፥³⁰ዛኖሃንታ ዓዱላሜንታ ጌይንታ ዬንሢ ካታሞንሢና ኮይላ ዓኣ ጉርዶናይዳ ናንጋኔ፤ ሃሣ ላኪሼና ኮይሎይዳ ዓኣ ጎዦ ቤዞ፥ ዓዜቃና ኮይሎይዳ ዓኣ ጉርዳ ቢያ ዔያቶኮ ናንጎ ቤዞኬ፤ ዬያይዲ ዪሁዳ ዴሮኮ ናንጎ ቤዛ ዾኦሎ ዛሎና ቤርሳቤፓ ኬዶ ዛሎና ሄኖሜ ዶኦጫ ማሃዛ ዓኣ ቤዞ ጋሮይዳኬ።³¹ቢኢኒያሜ ዴራ ናንጋ ቤዛ ሃሣ፦ ጌባዔ፥ ሚክማሴ፥ ዓዬ፥ ቤኤቴኤሌና ኮይሎይዳ ዓኣ ጉርዶይዳኬ፤³²ጊንሣ ሃሣ ዓናቶቴ፥ ኖቤ፥ ዓናኒያ፥³³ሃፆሬ፥ ራማ፥ ጊታይሜ፥³⁴ሃዲዴ፥ ፆቦዒሜ፥ ኔባላፄ፥³⁵ሎዴና፥ ዖኖ፤ ዬያጉዲ ሃሣ «ጊታሢ ዶኦጮ» ጌይንታ ቤዛ ቢያ ዔያቶኮ ናንጎ ቤዞኬ።³⁶ዪሁዳ ዓጮይዳ ናንጋ ሌዊ ዓሶ ባኣካፓ ፔቴ ፔቴዞንሢ ቢኢኒያሜ ዴሮና ዎላ ናንጋንዳጉዲ ማሆናኔ።

ኔሄሚያ ማፃኣፖ 11 / mdy_twf

ዬሩሳላሜይዳ ናንጋ ዴሮ

ሃንጎ ጉርዶና ካታሞናይዳ ናንጋ ዴሮ

ኔሄሚያ ማፃኣፖ11mdy_twf