1 Cronica16mbb_wbt

1Insavuk eni David haaza is Kavan te Kebpekid-uyun te Megbevayà dutun te seled te tulda he mibeelan ni David he edsevukan din dutun te Kavan. Ne nemuhat dan diyà te Nengazen te menge pemuhat he edtutungen wey menge pemuhat he para te meupiya he kedepità.2Hein nepasad is kebpemuhat dan dutun, ne mibpenubtuvazan ni David is menge etew pinaaǥi te ngazan te Nengazen.3Ne is kada sevaha he Israilihanen, maama wey vahi, ne mibeǥayan din te supas, usa, wey menge pasas.4Mibpilì dutun si David te menge Levihanen he ebpenilbi etuvangan dutun te Kavan te Nengazen pinaaǥi te ked-ampù, te kebpeselamat, wey kedalig te Nengazen, kes Megbevayà te Israel.5Si Asaf is nengulu kandan wey tigpezaǥing te menge simbal. Ne iyan sunud kandin si Zacarias, ne nesunuzan eni Jiel, Shemiramot, Jehiel, Matitia, Eliab, Benaya, Obed Edom, wey si Jiel. Iyan heini menge peretukar te menge lira wey menge alpa.6Ne is menge memumuhat he si Benaya wey si Jahaziel ne iyan tigpezaǥing layun te menge trumpita zutun te etuvangan te Kavan te Kebpekid-uyun te Megbevayà.

Is Kanta ni David te Kebpeselamat

7Haazà he andew te nehuna he timpu, imbeǥey ni David diyà te ki Asaf wey ziyà te zuma zin he menge Levihanen heini is kanta te kebpeselamat diyà te Nengazen:8Peselemati niw is Nengazen;simbaha niw sikandin!Tudtula niw ziyà te menge etew is menge vaal zin.9Kentahi niw sikandin te menge kedalig;ipenudtul niw is langun he egkein-inuwan he menge vaal zin.10Deliǥa niw is kegkewaǥas din.Kelipey kew is midangep diyà te kandin.11Sarig kew te Nengazen wey te zesen din.Layun kew zangep diyà te kandin.
12Sikiyu is menge pinilì te Megbevayà wey menge kevuwazan ni Israel he suluǥuen te Megbevayà, he iyan si Jacob,tentenuzi niw is menge egkein-inuwan he menge vaal zin, wey is menge kedhukum din.14Iyan sikandin kes Nengazen he Megbevayè tew,ne edhukuman din is tivuuk he kelibutan.15Edtentenuzan din layun is kebpekid-uyun din.Kenè din edlipatan is menge saad din taman te taman.16Heini is kebpekid-uyun din, midhimu zin diyà te ki Abraham ne insaad din daan diyà te ki Isaac.17Ne impelaus din heini he kebpekid-uyun din diyà te ki Jacob, he migngezanan daan ki Israel,ne heini is kebpekid-uyun din ebpedayun te taman te taman.18Migkaǥi sikandin diyà te kada sevaha kandan te,“Ibeǥey ku kenikew is tanà he Canaan ne egkepengevilin nu heini wey te menge kevuwazan nu.”
19Dengan deisey zà is menge etew te Megbevayà,ne menge lumelengyawè pa sikandan diyà te tanà he Canaan.20Midhalinhalin sikandan diyà te menge nasyun wey menge ginhedian.21Piru wazà medtuǥut is Megbevayà he edèdaaǥen sikandan.Para mepengelangi sikandan, midawey zin is menge hadì he ebpekigkuntada kandan.Migkaǥi sikandin te,22“Kenè niw kevuta is menge pinilì ku he menge suluǥuen;kenè niw pesipelahi is menge ebpeneuven ku.”
23Sikiyu is menge etew te tivuuk he kelibutan, kentahi niw is Nengazen.Tudtula niw kada andew is mehitenged te kedlibriya zin kenitew.24Ipetueni niw ziyà te langun he menge etew ziyà te menge nasyun is kegkemekeǥeǥehem din wey is egkein-inuwan he menge vaal zin.25Su mekeǥeǥehem is Nengazen, ne ereg sikandin he edeliǥen.Dait sikandin he edtehuzen lavew te langun he zuma he menge ed-ezapen,26su is langun he menge ed-ezapen te menge etew ziyà te zuma he menge nasyun, ne menge ledawan he mibeelan dan dà,piru iyan is Nengazen mibaal te langit.27Diyà te kandin is kegkemekeǥeǥehem wey kegkelavew,ne is desen wey kelipey ne ziyà te ubpeey zin.
28Sikiyu is menge etew ziyà te menge nasyun, deliǥa niw is Nengazen.Deliǥa niw is gehem din wey zesen din.29Deliǥa niw is kegkemeǥeǥehem din,ne uwit kew te pemuhat diyà te etuvangan din.Azap kew kandin diyà te segradu he etuvangan din.30Sikiyu is menge etew kayi te tivuuk he kelibutan, medtahud kew kandin diyà te etuvangan din.Melig-en is kedsevuka zin te kelibutan ne kenà heini egkewaleng.31Medlipey is langit wey is kelibutan.Penudtula zan diyà te menge nasyun is “Midhadì is Nengazen.”32Mebpurung daan medlipey is menge zaǥat, menge vevesukà, wey is langun he netaǥù kayi.33Is menge kayu ziyà te ketelunan megkanta te kelipey ziyà te etuvangan te Nengazen.Su ebpekeuma sikandin is edhukum te menge etew kayi te kelibutan.34Peselemati is Nengazen te keupiya zin;wazà pidtemanan te gaǥew zin.35Hangyù kew te, “Libriya key, Megbevayà he Menluluwas dey;geuza key puun te menge nasyun ne umana key tiǥuma ziyà te tanè dey,su para mekepeselamat key wey mekezalig key te kegkewaǥas nu.36Edeliǥen is Nengazen he Megbevayà te Israel te wazà pidtemanan.”Ne midtavak dutun is langun he menge etew zutun te, “Amen.” Ne midalig dan is Nengazen.37Insarig ni David ki Asaf wey ziyà te menge iring din he Levihanen is kebpenilbi layun dutun te etuvangan te Kavan te Kebpekid-uyun te Nengazen, sumalà te buluhaten dutun kada andew.38Ragkes daan kayi si Obed Edom he anak ni Jedutun, si Hosa, wey 68 pa he menge Levihanen, he iyan ebantey te ǥemawan te Tulda.39Insarig daan ni David ki Zadok he memumuhat wey te menge iring din he menge memumuhat is Tulda te Nengazen diyà te metikang he lugar ziyà te Gibeon.40Iyan sikandan layun ebpemuhat te pemuhat he edtutungen dutun te pemuhatà maandew wey mezukilem, sumalà te langun he ingkesurat duen te kesuǥuan te Nengazen he imbeǥey zin te Israel.41Duma zan daan dutun si Heman, si Jedutun, wey is duma he nepilì he egkanta, te kebpeselamati te Nengazen tenged te gaǥew zin he wazà pidtemanan.42Ketengdanan ni Heman wey ni Jedutun is kebpezaǥing te menge trumpita, wey menge simbal, wey is duma pa he menge gamit he egemiten te kegkanta te menge kentahan para te Nengazen. Is menge anak ni Jedutun iyan impevantey zutun te ǥemawan.43Ne nemen-ulì is langun diyà te menge valey zan, ne si David ne mid-ulì daan su mibpenuvazan din is pemilya zin.
expand_more
Search