Read Apocalipsis 1

Apocalipsis1

Yek'b'il tu'n Jesukrist

¹A yek'b'il ja'lu tzaj tq'o'n Dyos te Jesukrist, tu'n kytzaj tyek'u'n tkyaqil ti'xti' nojqelan tu'n kyulkanun kyeju' tmajin. Tzaj tyek'u'n Jesukrist tu'nel tanjl tzaj tchq'o'n tk'etz Xwan ju' tmajin,²tzaj tma'n tkyaqilju' ax oje til, ex kanli tyol Dyos twitz, q'manjtzxi'xtl te tu'n Jesukrist.

³K'i'wla'nte' njaw ẍch'inte tpakb'al b'a'n q'ma'n toju' u'j lu, exju' nb'inte ajtjaw ẍch'et, qu'n matxi' tzul lq'e tq'ijlalil tu'n kyjapun. Q'olb'eb'l kye wuq k'loj okslal

⁴Ayine' Xwan, nche'x nq'olb'e'ne' wuq k'loj okslal toj tx'otx' Asya. Tenxwit xtalb'il ex nak'b'il kyeye' tu'n Qman Dyos aku'xi'x, atitltoq atxi'x ojtxi' ex tzultl, ex kyu'n wuq xewb'aj ate' twitz tq'uqb'il,⁵ex tu'n Jesukrist, b'a'n tziyal, ju' nejtl tjaw anq'in ex ati toklen kyib'aj nimaqkawil twitz tx'otx'. K'u'jla'nqo' tu'n Krist, ex maqo tkol toj qil tu'nju' tchk'el elqojli,⁶maqo oktq'o'n kse'nqe' nimaqkawil; ex kse'nqe' pale tu'n qajb'en te Dyos Manb'aj. ¡Jawxwit ajwali'n ex kawinxwit tejumajx! Ikyxwitju'.

⁷¡Tzul Krist toj muj! Kykyaqil xjal che okyel ka'yinte. expe' k'okyel ka'yi'n kyu'n e'ok xyunte; ex kykyaqil xjal twitz tx'otx' che oq'el ti'j ajtokkyka'yi'n. Ikyte kb'ajelju', Ikyxwitju'.

⁸Ayine' tnejel ex b'ajsb'il techtz'ib', chi Qman Dyos nimtipumal, aju' itz', ati ojtxi' ex tzul. Til Xwan Jesukrist kse'n toj witzik'

⁹Ayine' Xwan, kytzike' toj Qajaw, ex tu'nju' mujb'ab'l tuk'i'l Jesus antine' kyuk'i'le' toj tkawb'il Dyos, nchin yajtiye' kse'nxkye, ex q'o'n wipumale' tu'n Dyos tu'n tik'x wu'ne'. Tu'ntzun npakb'a'ne' tyol Dyos q'ma'nxi'x tu'n Jesus, antintoqe' toju' swejtx'otx' Patmos tb'i.¹⁰Tojtzun jun tq'ij Qajaw ten tipumal Xewb'aj Xjan wib'aje', ex nb'iye' jun kuw tzaj yolin ttze'lwi'je', naku'j tq'ojq'ojel chun,¹¹tma kjalu: Tz'ib'anku'ya k'okyel tka'yi'na tojun u'j, ex smanxa kyeju' wuq k'loj okslal toju' tx'otx' Asya: kyoj Epeso, Esmirna, Perkamo, Tyatira, Sardes, Piladelpya ex Laodisya, chij.

¹²Tetzunj tanj miltz'uj nwitze' ka'yilte alkye nyolin weye'; wile' wuq kykb'el kantil q'anpwaq,¹³wile' jun wnaq naku'j a Qajaw kyxolju' wuq kykb'el kantil, tok jun t-xb'alun ku'j kupomnix t-xe tqan, ex tok tk'alb'il q'anpwaq tk'u'j.¹⁴Saq t-xya'mal twi' naku'j saq noq', mujqa kse'n txun che'w, aye'tzu'n twitz naku'j tqantaq' q'aq'.¹⁵Intoq che qoptz'aju' tqan naku'j q'ank'uxb'il ẍtilsa'n, b'unsa'n toj chuj; iky toj twi' kse'n tq'ojq'ojel nin a' njukyin.¹⁶Ate'toq wuq che'w toj tb'a'nq'ob', intoq netz jun k'uẍtx'e'nb'il ch'ut kab'e' plaj twitzte toj ttzi. Intoq qoptz'aj twitz kse'n q'ij inxi'x qoptz'aj.

¹⁷Majx nkub' tz'aqe' t-xe tqan naku'j nkyime' tej nlonteye'. Atzunte kub' tq'o'n tb'anq'ob' toj nwi'ye', ex tzaj tma'n: Lalun xob'a; ayinweye' t-xetnejel ex te b'ajsb'il,¹⁸itz'qine'. Inkyime', atzu'n ja'lo itz'qine' tejumajx. Ex toj nq'ob'e' ta'ju' tal ja te kamik.¹⁹Tz'ib'anku'ya matxi' tila: aju' nb'aj ja'lo exju' tzul yajxi'tl.²⁰Kxe'l nma'ne' teya ti' tz'elpuna' wuq che'w xtila toj nb'anq'ob'e', exqe' wuq kykb'el kantil q'anpwaqqe': aye' wuq che'w a tz'elpuna' wuq anjl kyxolju' wuq b'yoj okslal, aye'tzu'n wuq kykb'el kantil a tz'elpuna' wuq k'loj okslal. Tpakb'al kye okslal aj Epeso

¹Tz'ib'anxa teju' anjl kyxol okslal aj Epeso kyjalu: Intma'nju' ate' wuq che'w toj tb'a'nq'ob' ex nb'et kyxolju' wuq kykb'el kantil q'anpwaqqe', kjalu:²Wojtzqi'ne' tkyaqilju' ntb'incha'na; wojtzqi'ne' nxi'x aq'unana nim ex ljo'n tu'na, ex wojtzqi'ne' min nche tk'mo'na b'inchal taq'wix. Ex wojtzqi'ne' matxi' tzik'twitza kyi'ju' nok kyq'o'n kyib' te apostl extzun mya apostlqe', matz'el tnik'a kyi'j chalyolqe'.³Matxi' tz'ok tilil tu'na ex matxi' yajtiya tu'n npaje', ex min nsiktiya.⁴Naqtzun o'kxju' ati jun tila nwitze': mixti'tlju' tk'u'jlalila atitoq tnejel.⁵Qu'mtzun na'ntza jaxkub'a tz'aqa, kutanjtz ti'j tanmiya ex b'inchamtla ntoq tb'incha'na tnejel. Qatzun min, chin ule' ti'ja ex k'elel wiq'i'ne' kykb'el tkantila jata'ya.⁶Ajun b'a'n ntb'incha'na, in nel tik'u'na kyb'inchb'aju' nikolayit, ikxwe' nel wik'u'ne'.⁷¡Alkyete ati t-ẍkyin, b'imju' ntma'n Xewb'aj Xjan kye okslal! Alkyete makub'ti'j tu'n, kxe'l nq'o'ne' anb'il te tu'n twan ti'ju' tze te chwinqlal ati toj tnajb'il Dyos, chiku'ya, chij. Tpakb'al kye okslal aj Esmirna

⁸Tz'ib'anxa te anjl ati kyxol okslal aj Esmirna kjalu: Intma'nju' T-xetnejel ex te B'ajsb'il, aju' kyim ex jaw anq'in, kjalu:⁹Wojtzqi'ne' yajb'il ex prowil nik'xtu'na, q'inun tzunta. Ex kanli nwitze' myab'a'n kyyolju' nok kyq'o'n kyib' te aj Juda ti'ja, extzun jun k'loj ajb'elqe' te tajaw il.¹⁰Lalun xob'a teju' tzul ti'ja, qu'n che okyex jpu'n junjunkye' tu'n tajaw il, tu'n kyokye' kykyaqile' toj joyb'ilkyi'je'; ex che yajtel lajoj q'ije'. Qama tz'okqe kyk'u'je' wi'je' tzmax ajkykyime', kxe'l nq'o'ne' kykanb'ab'le' aju' chwinqlal tejumajx.¹¹¡Alkyete ati t-ẍkyin, b'imju' ntma'n Xewb'aj Xjan kye okslal! Alkyetzunte makub'ti'j tu'n lay yajtitl tu'n tkab' kamik, chiku'ya, chij. Tpakb'al kye okslal aj Perkamo

¹²Tz'ib'anxa te anjl kyxol okslal aj Perkamo kjalu: Intma'n q'i'n tk'uẍtx'e'nb'il ch'ut te kab'e' plaj twitzte, kjalu:¹³Kanli nwitze' najliya toju' tnam jata' tq'uqb'il tajaw il; ex luya q'uqli tk'u'ja wi'je'. Min nkub' tewa'na tokslab'la wi'je', tk'i'xpe'wt tej tkub' b'yo'n Antipas tziyalxi'x wi'je' toju' nintnam lu janajla' tajaw il.¹⁴Naq o'kx junjun tilju'ya nwitze': ate' junjun kyxole' min nkyej kykoli'n t-xnaq'tzb'il B'alaam, ju' q'onte tnab'l B'alak tu'n kyxitq'o'n aj Israel toj il tej kyok tchq'o'n tu'n t-xikywan wab'j kub'ni q'o'n kywitz witzleb' ex tu'n tel kypa'n kyib' ti'j Dyos.¹⁵Ex ate' junjun kyxole' min nkyej kykoli'n kyxnaq'tzb'il nikolayit.¹⁶Qu'mtzun kutanjtz ti'j tanmiya; qatzun min, lwiyxi'x chin ule' ti'ja, ex chin q'ojile' kyi'je' tuk'i'l k'uẍtx'e'nb'il netz toj ntziye'.¹⁷¡Alkyete ati t-ẍkyin, b'imju' ntma'n Xewb'aj Xjan kye okslal! Alkyete makub'ti'j tu'n, kxe'l nq'o'ne' twa ti'ju' wab'j e'wa'n te toj kya'j; ex kxel nq'o'ne' jun saq ab'j te, jatz'ib'a'nka' jun ak'a'j b'iyj mix-a'lo' ojtzqilte, o'kx ojtzqilteju' mak'monte, chiku'ya, chij. Tpakb'al kye okslal aj Tyatira

¹⁸Tz'ib'anxa te anjl ati kyxol okslal aj Tyatira kjalu: Luju' Tk'wal Dyos, ikyqe' twitzju' kse'n tqantaq' q'aq' ex ikyqe' tqan kse'n q'ank'uxb'il ẍtilsa'n, intma'n kjalu:¹⁹Wojtzqi'ne' tkyaqilju' ntb'incha'na; kanli nwitze' ati tk'u'jlalila, ati tokslab'la, nnajb'ena ex ljo'n tu'na, nxi'x aq'unana ja'lo kyetwitz tnejel.²⁰Naq o'kx tiljuya weye': nxitq'o'na anb'il te' qya Jesab'el, nok tq'o'ntib' te t-sanjelal Dyos, extzun nche t-sb'u'n nmajine' tu'n t-xnaq'tzb'il, nche oktchq'o'n tu'n kyb'inchan ajpaji'n ex tu'n t-xikywan wab'j kub'ni q'o'n kywitz witzleb'.²¹Matxi' txinq'o'ne' anb'il te tu'n tanjtzti'j tanmi; mixtzunti'x nanjtzti'j tanmi ex min nkyajtq'o'n ajpaji'n.²²Qu'mtzun ktzajel nq'o'ne' yab'il ti'ju' qya lu, ex che kb'el nb'yo'ne' nche k'monte t-xnaq'tzb'il ex nelkypa'n kyib' ti'j Dyos. Qatzun ma tz'antzti'j kyamni ex ma kyanjsa kyib' tuk'i'l Dyos, lay kub' ntz'e'ysa'ne' kywitz. Ikytzu'n k'elela' kynik' kykyaqil okslal qa wojtzqi'ne' kynab'l ex toj kyanmi, ex kxe'l nq'o'ne' tu'me'l t-xel kye kse'nxju kyb'inchb'aj.²⁴Aye'tzunkye' najlqe'ye' toj tnam Tyatira, aye'ye' min ljo'n xnaq'tzb'il lu kyu'ne' ex min nche xnaq'tzane' ti'ju' t-xnaq'tzb'il tajaw il, ju' nkyma'n junjun qa nim nab'l tajb'il, lay kub' nq'on juntl iqtze' kyib'aje'.²⁵Naq o'kx kytzyume' atitl kyeye' tzmax ajwule'.²⁶Alkyete makub'ti'j tu'n ex ntb'incha'n wajb'ile' tzmax ajtjapun mankb'il q'ij, kxe'l nq'o'ne' toklen kyib'aj nimaqtnam,²⁷kse'nte Nmane' matzaj tq'o'n woklene'; kkawil kyib'aj nimaqtnam tuk'i'l k'uxb'il b'aston, ex che b'elttxiju'n kse'n tx'otx' k'wil.²⁸Ex kxe'l nq'o'ne' sqixun che'w te.²⁹¡Alkyete ati t-ẍkyin, b'imju' ntma'n Xewb'aj Xjan kye okslal! chiku'ya, chij. Tpakb'al kye okslal aj Sardes

¹Tz'ib'anxa te anjl ati kyxol okslal aj Sardes, kjalu: Luju' ate' wuq t-xew Dyos tuk'i'l ex wuq che'w toj tq'ob' kjalu: kanli nwitze' tkyaqilju' ntb'incha'na, ex b'i'n wu'ne' nq'umli qa itz'a, extzun kyimniya.²Na'ntztib'a ex b'incham qexi'xtla ti'xti' nche tb'incha'na b'a'n naqch'inxtl kykyaj naj tu'na, matxi' wile' mya toj ttzinunalqe' nche tb'incha'na twitz Nmane' Dyos.³Na'ntza xnaq'tzb'il oje tk'ama; b'inchama ex kutanjtz ti'ja tuk'i'l Dyos. Qatzun min, naqx myanim ajwule' ti'ja kse'n jun eleq'.⁴Ate'tzun junjun kyxole' toj Sardes b'ajx kytz'ilsaya' kyxb'alun; che tenb'el wuk'i'le' oksa'n kyxb'alun saq, qu'n b'a'n kychwinqlal.⁵Alqetzunte ma kanb'an, saq t-xb'alun k'okyel, ex lay jatz nxitu'ne' tb'i toju' u'j te chwinqlal, kxe'l nma'ne' tb'i twitz Nmane' ex kywitzju' tanjl.⁶¡Alqe ati t-ẍkyin, b'inxju' ntma'n Xewb'aj Xjan kye okslal! chiku'ya, chij. Tpakb'al kye okslal aj Piladelpya

⁷Tz'ib'anxa te anjl ati kyxol okslal aj Piladelpya kjalu: Luju' xjan ex axxi'x, aju' ati tal tja nimaqkawil Dab'i toj tq'ob', ajtjqonte ttzija, mix-a'lo'tlte kb'antel tjpunte, ex ajtjpunte, mix-a'lo'tlte kb'antel tjqonte, intma'n kjalu:⁸Wojtzqi'ne' tkyaqilju' ntb'incha'na; matxi' njaqe' ttzija teya, mix-a'lo' kb'antel tjpunte, tu'npetzu'n naqch'i'n tipumala, njapun nyole' tu'na ex min nkub' tewa'na qa okslala wi'je'.⁹Knb'incha'ye' tu'n kykub' mejeju' nche ajb'en te tajaw il twitza, in okkyq'o'n kyib' te aj Juda extzun chalyol qe', tu'n telkynik' qa k'u'jla'na wu'ne'.¹⁰Tu'nju' nche tb'incha'na nchaq'b'ile' ex matxi' tzik'xtu'na, knkla'ya toju' tq'ijlalil tzul ajkyok kykyaqil xjal toj joyb'ilkyi'j wu'ne', tu'n telkynik'tzil kykyaqilju' najlqe' twitz tx'otx'.¹¹Chin ule' lwiy, tzyumju'ya atitl teya, tu'ntzun mix-a'lo' k'elel q'inteju' oyaj teya.¹²Aye' makub'ti'j kyu'n, che okyel nq'o'ne' te tqan ja toj tja nmane' Dyos, ex layx che etztl atzu'; k'okyel ntz'ib'a'ne' tb'i Dyos ex tb'i ninttanam Dyos kyi'j, aju' t-ak'a'j Jerusalen Dyos ktzajel toj kya'j; ex k'okyel ntz'ib'a'ne' nb'iye' ak'a'j kyi'j.¹³¡Alkye ati t-ẍkyin, b'inxju' ntma'n Xewb'aj Xjan kye okslal! chiku'ya, chij. Tpakb'al kye okslal aj Laodisya

¹⁴Tz'ib'anxa teju' anjl kyxol okslal aj Laodisya kjalu: Aju' tziyalku'xi'x ex ax yolin, ex ti'j tzajna' qe tkyaqilju' tb'incha Dyos t-xetnejel, intma'n kjalu:¹⁵B'i'n wu'ne' tkyaqilju' nkyb'incha'ne'. Kanli nwitze' mya che'w qe'ye' ex mya moq'moj qe'ye'. ¡Maswitlo b'a'n che'w qe'ye' mujqa moq'moj!¹⁶Sq'ulin qena'kye', mya che'w ex mya moq'moj qe'ye', qu'mtzun che jawil nxa'ne'.¹⁷Inkyma'ne' qa q'inun qe'ye', b'a'n ta'qe'ye' ex mixti'tl nojqelan kyeye'; kuchitzun qa min nelkynik'e' qa b'isb'ajilx ta'qe'ye', qab'anx kywitze', prowqe'ye', moẍqe'ye' ex ẍb'iqlqe'ye'.¹⁸Qu'mtzun kxe'l nq'o'n kynab'le' tu'n kylq'onteye' q'anpwaq ẍtilsa'n toj q'aq' weye', tu'ntzun kyq'inumaxe' axxi'x; ex tu'n kylq'onteye' saq xb'alun weye' te kutxb'ilkyeye' ex kylq'ome' q'a'nb'il kywitze' tu'n kyka'yine'.¹⁹Inche nwuli'ne' kykyaqilju' k'u'jla'nqe' wu'ne' ex nche ntzak'u'ne'. Qu'mtzun kyq'onk tilile' ex kutanjtz kyi'je' tuk'i'l Dyos.²⁰Luqine' nchin txokon ttzija; alkye matz'etz b'inweye' ex matjaqu' tja, chin okyixe' toj tja ex chin wale' junx tuk'i'l.²¹Kxe'l nq'o'ne' kyoklenju' makub'ti'j tkyaqil kyu'n, tu'n kykub' qe nk'etze' toj nkawb'ile', kse'nwe' matxi' kub'ti'j wu'ne' ex q'uqli qine' tk'etz Nmane' toju' tkawb'il.²²¡Alkye ati t-ẍkyin, b'inxju' ntma'n Xewb'aj Xjan kye okslal! chiku'ya, chij. Nche k'ulunju' ate' toj kya'j te Dyos

¹Tb'ajlenxi'tzun q'ma'n ja'lu, xinka'yi'ne' ex wile' jun ttzija jqo'n toj kya'j; ex tzaj yolinju' ojetoq yolin weye' nejtl, aju' ikytoq tq'ojq'ojel twi' kse'n tq'ojq'ojel chun, tma kjalu: Kutjatza tzalu, che kxe'l nyek'u'ne' ti'xti' teya ati tu'n kyik' yajxi'tl, chij.

²Textzu'n kmoj lu ulju' tipumal Xewb'aj Xjan wib'aje', ex wile' jun q'uqb'il tkub' toj kya'j, ati jun wnaq q'uqli tib'aj.³Ikytoq tka'yinkju' kse'n jaspe ex kse'n kyeq ab'j, ex atitoq jun qe'nkan intoq qoptz'aj kse'n txa'x ab'j ti'jileju' q'uqb'il;⁴ex e'wile' junaqkyaje'tl q'a'jtz ti'jileju' q'uqb'il, q'uqlqe'toq junaq kyaje' tijwnaq kyib'aj: toktoq kyxb'alun saq ex tokx kykoron q'anpwaq toj kywi'.⁵Intoq che etz xloq'lokya'j, e'tq'ojq'ojel towi'yj ex q'ankyaq ti'ju' q'uqb'il; ex intoq che k'ant wuq tqantaq' q'aq' twitzju' q'uqb'il, aye' wuq t-xew Dyos.⁶Ex atitoq jun naku'j ninnjab' twitzju' q'uqb'il, ẍtilun naku'j lispej.
Ate'toq kyaje' itz'qe' jata' q'uqb'il ex ti'jile toj nky'ajchaq, ate'toq txqan kywitz kywitzxi' ex kytze'lkyi'j.⁷Ikytoq ka'yin tnejelju kse'n b'alun, atzu'n tkab' ikytoq kse'n jun tman wakx, atzu'n toxi'n ikytoqju' kse'n xjal, atzu'n tkyaji'n ikytoq kse'n jun t'iw.⁸Teyile junjunju' kyaje' lu ate'toq qaq t-xik' ate'toq kywitz kyi'jile ex kyojxi'. Majxtoq ljo'n kymante q'ijtl ex qonik'an kjalu:
¡Xjan, xjan, xjante' Qajaw, Dyos nimtipumal, aju' ati ojtxi', ati ja'lo ex tzul! chechij.

⁹Atl junjun maj ajkyq'on ninb'ilju' itz'qe' lu ex ajkyq'on chjonte teju' q'uqli tib'aju' q'uqb'il, teju' itz' toj tkyaqil tab'q'iyil,¹⁰intoq che kub'mejeju' junaq kyaje' tijwnaq twitz ex inche k'ulun te, intoq b'ajkub' kyq'o'n kykoron twitzju' q'uqb'il ex inkyma'n:

¹¹Qman Dyos nim toklena, tu'n tajwalita, tu'n tnimeta ex tu'n tk'monteya ipumalj, qu'n aya b'inchante tkyaqilju' ati; tu'n tb'istk'u'ja e'tb'inchaya ex ate', chechij. Aju' tu'jil exju' qpoj tman rit

¹Wile' jun u'j tzyu'n tu'n tb'anq'ob'ju' q'uqli toju' q'uqb'il, tz'ib'a'ntoq tojxi' ex ti'jxi', ex jpu'ntoq kyu'n wuq sey.²Ex wile' jun anjl nimtipumal intoq xjelun njaw tq'ojq'ojel twi' kjalu: ¿Alkye ati toklen tu'n kyel tlaqu'n sey ex tu'n tjqonteju' u'j? chij.³Mixtzun alo'te jun toj kya'j, twitz tx'otx' ex tjaq' tx'otx' tu'nwt tb'ent tjqonteju' u'j, expe' tu'nwt tkub' tka'yi'n.⁴Inxixtoqtzun chin oq'e', qu'n mix-a'lo'x te jun nknet atiwt toklen tu'n tjqonteju' u'j, ex tu'nwt tkub' tka'yi'n.⁵Tzajtzun tma'n junju' tijwnaq we'ye': Lalun tz'oq'tla, qu'n matxi' kub'ti'j tu'n b'alun kyxol tnej tyajajil Juda, t-xul Dab'i, kb'antel kyel tlaqu'n sey ex tu'n tjqonteju' u'j, chij.

⁶Wiltzu'ne' Qpoj Tman Rit nqaku' tk'etzju' q'uqb'il kyxolju' kyaje' itz'qe', ex kyxolju' tijwnaq. Wa'ltoq, ex q'ancha'l qa ojetoq kub' te chojb'il. Ate'toq wuq tuk'a ex wuq twitz, aye' wuq t-xew Dyos chq'o'nqe' toj tkyaqil twitz tx'otx'.⁷Tzaju' Qpoj Tman Rit lu eltiq'in u'j toj tq'ob'ju' q'uqlitoq tib'aju' q'uqb'il;⁸ex tej txi' ttzyu'n u'j, eb'ajkub' mejeju' kyaje' itz'qe' exqe' junaq kyaje' tijwnaq twitzju' Qpoj Tman Rit. Kykyaqil atitoq kychinab' arpa, ex q'i'nqe'toq tkb'el k'wab'j q'anpwaq kyu'n nojniqe'toq tu'n sturak, aye' kyna'j Dyos okslal ttanam Dyos.⁹Ex intoq che b'itzan b'itz ak'a'j kjalu:
Ateju'ya ati toklena tu'n ttzyunteya u'j ex tu'n kyel tlaqu'na jupb'ilte, qu'n kub' q'o'na te chojb'il; ex tu'nju' tchk'ela elqojli e'tkola xjal te tkyaqil kyajil, chukchaq kyol ex te kykyaqil nimaqtnam, tu'n kyok teku'xi'x Dyos.¹⁰Mache oktq'o'na toj jun kawb'il, mache oktq'o'na te pale tu'n kyajb'en te Dyos, ex che kawil twitz tx'otx', chechij.

¹¹Wiltltzuntze', ex nb'iye' jawkyma'n txqan anjl kuw ate'toq ti'jileju' q'uqb'il, exqe' itz'qe' exqe' tijwnaq. Nimxi'xtoq txqan kyajlal,¹²intoq jawkyma'n kuw kjalu:
¡Aju' Qpoj Tman Rit kub' q'o'n te chojb'il ati toklen tu'n tk'monte ipumalj ex q'inumal, nab'l ex kuwal, oklenj, ninb'il ex ajwalb'il! chechij.

¹³Ex nb'iye' intoq kyma'n kykyaqilju' tch'isb'en Dyos toj kya'j, twitz tx'otx', tjaq' tx'otx' ex toj ninnjab', kjalu:
¡Tewtju' q'uqli toju' q'uqb'il ex tewtju' Qpoj Tman Rit, che'xa' q'o'na' b'itz, ninb'il, ajwalb'il ex ipumalj toj tkyaqil tab'q'iyil! chechij.

¹⁴Intoq xikytzaq'we'n kyaje' itz'qe' kjalu: ¡Ikyxwitju'! chechij. Aye'tzu'n junaq kyaje' tijwnaq e'kub'meje ex e'niman te Dyos. Aye' tnejel kyaje' sey

¹Wiltzuntze' tej tel tlaqu'n Qpoj Tman Rit tnejel sey jupb'ilte u'j, ex nb'iye' tjaw tma'n jun kyxolju' kyaje' itz'qe' kuw naku'j q'ankyaq kjalu: ¡Kutzaja! chij.²Nxinka'yine', ex wile' jun chej saq ti'j, atzunju' tokx tib'aj q'i'ntoq jun smaj tu'n. Xiq'o'n jun koron toj twi', xi'tzuntz, matxitoq kanb'an kyi'ju' tajq'oj ex ljo'nxtoq tkub'kyi'j txqantl tu'n.

³Tetzunj tel tlaqu'n Qpoj Tman Rit tkab' sey jupb'ilte u'j, nb'iye' jawtma'n juntl tkab' kyxolju' itz'qe' kjalu: ¡Kutzaja! chij.⁴Ex wile' juntl chej. Kyeqti'j, atzu'n tokx tib'aj xiq'o'n anb'il te tu'n tel tiq'i'n nak'b'il twitz tx'otx' ex tu'n tb'inchante tu'n tb'ajkub' kyb'yo'n kyib'ju' xjal kyxolx; ex xiq'o'n jun nin tk'uẍtx'e'nb'il.

⁵Tetzunj tel tlaqu'n Qpoj Tman Rit toxi'n sey jupb'ilte u'j, nb'iye' jawtma'n juntl toxi'n kyxolju' itz'qe' kjalu: ¡Kutzaja! chij. Nxi' ka'yine' ex wile' jun chej q'eqti'j, atzunju' tokx tib'aj q'i'ntoq jun tqan peẍ tu'n.⁶Ex nb'iye' jawtma'n jun kyxolju' kyaje' itz'qe' kjalu: Naq kab'e' lib'r triy tk'i' nik'jan klq'etel tu'n te tq'ij jun xjal, ex wuq lib'r tk'i' nik'jan seb'ad tu'n te tq'ij jun xjal; lantzun kub' tyaju'na aseyt ex b'in, chij.

⁷Tetzunj tel tlaqu'n Qpoj Tman Rit tkyaji'n sey, nb'iye' jawtma'n tkyaji'n kyxolju' kyaje' itz'qe' kjalu: ¡Kutzaja! chij.⁸Nxi' ka'yine' ex wile' jun chej sq'an ka'yin, atzunju' tokx tib'aj Kamik tb'i. Lepchix toqju' kynajb'il kyimni ti'j, ex xiq'o'n kyoklen tib'aj jun tkyaji'n aq'pun teju' twitz tx'otx', tu'n kykub' kyb'yo'n xjal najlqe' twitz tu'n q'oj, tu'n we'yaj, tu'n yab'il ex kyu'n tojk'ul txkup. Tjwe'yi'n ex tqaqi'n sey

⁹Tetzunj tel tlaqu'n Qpoj Tman Rit tjwe'yi'n sey jupb'ilte u'j, xinka'yi'ne' tjaq'ju' q'olb'eb'l ate'toqju' ojetoq che kub' b'yo'n tu'n tpaj xikypakb'a'n tyol Dyos ex kub'kyanq'i'n.¹⁰Intoq jawkyma'n kuw kjalu: Aya nimxi'x toklena, xjan ex njapun tyola, ¿Jtojtzun che oktq'o'na xjal twitz tx'otx' toj xjel, ex tu'nkub' ttz'e'ysa'na kywitzju' ẍeb'ajkub' b'yonqeye'? chechij.¹¹Xi'tzun q'o'n kyxb'alun saq, ex xiq'ma'n kye tu'n kyojlan jte' q'ijtl, tzmax ajttzqet kyajlalju' kytzik e'kyitz'in, ju' ati tu'n kykyim toju' ajb'eb'l te Dyos kse'nxkye.

¹²Tetzunj tel tlaqu'n Qpoj Tman Rit tqaqi'n sey, xinka'yi'ne', tzaj jun nin kyajnajnab'. Kub' qloljixju' q'ij, kse'n xb'alun te b'is; ex kub' kyeqaxju' xjaw kse'n chik',¹³exqe' che'w twitz kya'j e'tzaj tz'aq twitz tx'otx', kse'n nche tzaj tz'aq iw cha'xqe'x ti'j tqan ajkykub' xyiju'n tu'n kyq'iq'.¹⁴Kub' naju' kya'j kse'n ajtjaw toli'n jun u'j, ex eb'ajx ch'exb'en kykyaqil witz ex swejtx'otx' toj kykub'el.¹⁵Aye'tzu'n nimaqkawil twitz tx'otx' junx kyuk'i'l xjal nimaq kyoklen, eb'aj ewan kyoj jyom ex kyxol pik kywi' witz, junx kyuk'i'lju' e'kynejel xjal te q'oj, e'q'inun, e'ati kyipumal ex kykyaqil lq'o'n majin ex tzaqpi'nqe';¹⁶intoq xikyma'n kyeju' witz ex kyeju' pik kjalu: ¡Kukytzaj tz'aqe' qib'aje' ex qokyewame' twitzju' q'uqli tib'aju' q'uqb'il, ex twitzju' ttx'u'jil Qpoj Tman Rit!¹⁷Qu'n matxi' tzulkanun tq'ijlalilju' tz'e'ysb'il witzb'aj, alxi'xkye kweb'el twitz, chechij. Aye' tok kyechel kyxol kyajajil Israel

¹Yajxi'tzuntl e'wile' kyaje' anjl wa'lqe' kyoju' kyaje' ttx'u'k tx'otx', tzyu'nqe' kyaje' kyq'iq' kyu'n tu'n lalun tzaj kyxupxi'n twitz tx'otx' ex tib'aj ninnjab', ex kyib'aju' tze.²Ex wile' juntl anjl xi'toq ttzaj tu'me'l tjawetzq'ij, q'i'ntoq t-sey Dyos itz' tu'n. Jaw ẍch'inju' anjl lu kuw kyeju' kyaje'tl matxitoq kyk'am kyipumal tu'n kyk'ixb'san twitz tx'otx' ex toju' ninnjab', kjalu:³¡Lalun kyk'ixb'saye' twitz tx'otx', toj ninnjab' exqe' tze, qa na'mxtoq tok qq'o'ne' kyechelju' tmajin Qman Dyos kyplaj! chij.

⁴Ex nb'iye' kyajlalju' b'jo'kni kyechel: wajxaqlajoj mutx' (144,000) kyb'aj kyxol kykyaqilju' tnej tyajajil Israel.⁵Jumutx' lajk'al (12,000) ok kyechel kyxol tnej tyajajil Juda, jumutx' lajk'al (12,000) kyxol tnej tyajajil Rub'en, jumutx' lajk'al (12,000) kyxol tnej tyajajil Kad,⁶jumutx' lajk'al (12,000) kyxol tnej tyajajil Aser, jumutx' lajk'al (12,000) kyxol tnej tyajajil Neptali, jumutx' lajk'al (12,000) kyxol tnej tyajajil Manases,⁷jumutx' lajk'al (12,000) kyxol tnej tyajajil Simeon, jumutx' lajk'al (12,000) kyxol tnej tyajajil Leb'i, jumutx' lajk'al (12,000) kyxol tnej tyajajil Isakar,⁸jumutx' lajk'al (12,000) kyxol tnej tyajajil Sab'ulon, jumutx' lajk'al (12,000) kyxol tnej tyajajil Jse, ex jumutx' lajk'al (12,000) kyxol tnej tyajajil B'enjamin.

⁹Yajxi'tzuntl, xinka'yi'ne' ex wile' nim txqan xjal te kykyaqil nimaqtnam, chukchaq kyyajil, chukchaq kyyol ex te chukchaq tnamqe'. Wa'lqe'toq twitzju' q'uqb'il twitzju' Qpoj Tman Rit, nim txqan kyb'aj, mix-a'lo'x kb'antel tajlante. Toktoq kyxb'alun saq ex q'i'ntoq tq'ob' tut kyu'n.¹⁰Kykyaqil intoq jaw kyẍch'in kuw kjalu:
¡Tu'nte Qman Dyos xqo kleta' aju' q'uqli tib'aju' q'uqb'il, ex tu'n Qpoj Tman Rit! chechij.

¹¹Kykyaqilju' anjl wa'lqe' ti'jileju' q'uqb'il ex kyi'jile kyaje' itz'qe'; ex e'kub' meje twitzju' q'uqb'il majx ku'pun kyplaj twitz tx'otx', ex ek'ulun te Qman Dyos¹²intoq kyma'n kjalu:
¡Ikxwitju'! Awttzu' che q'onjtza' b'itz, ajwalb'il, nab'l, aq'b'il chjonte, oklenj, ipumalj ex kuwal te Qman Dyos toj tkyaqil tab'q'iyil. ¡Ikyxwitju'! chechij.

¹³Tzajtzun tqani'n jun kyxolju' tijwnaq weye' kjalu: ¿Alkyeqe'tzu'n tok kyxb'alun saq lu, ex jaẍe tzaja'? chij.¹⁴Aya ojtzqilte taye, nchije' xintzaq'we'ne'. Tzaj tma'ntzuntz weye': Aye'kye matxi' che ik'ju'lu toju' ninyajb'il, aye' matxi' kyẍtilsa kyxb'alun tu'n tchk'el Qpoj Tman Rit.

¹⁵Qu'mtzun ate' twitzju' tq'uqb'il Dyos, nche ajb'en te toju' tja q'ijtl ex qonik'an. Aju' q'uqli tib'aj tq'uqb'il kxq'uqilkye tjaq' t-xmuj.¹⁶Lay tzajtl we'yaj ex k'waj kyi'j, ex lay che tze'ytl tu'n q'ij, ex lay che yajtitl tu'n kyaq,¹⁷qu'n aju' Qpoj Tman Rit ati toju' q'uqb'il, kk'ik'lel kyi'j ex che kxe'ltiq'i'n ja ta'qe' t-xiklil a' te chwinqlal, ex k'elel t-sun Dyos tkyaqil ta'l kywitz, chij weye'. Twuqi'n sey

¹Tej tel tlaqu'n Qpoj Tman Rit twuqi'n sey jupb'ilte u'j, majx e'kyaj nume nik'jan or ju' te toj kya'j.²Ex e'wile' wuq anjl wa'lqe'toq twitz Dyos, b'ajx q'o'n wuq chun kye.³Yajxi'tzuntl ul juntl anjl q'i'n jun q'anpwaq xq'aq'b'il tu'n, ex kub' we' twitz q'olb'eb'l; xiq'o'n txqan sturak te tu'n tkub' tq'o'n tib'aju' q'anpwaq q'olb'eb'l, atitoq twitzju' q'uqb'il, tuk'i'lxi' kyna'j Dyos tnam xjan.⁴Jawju' t-sb'el sturak toj tq'ob'ju' anjl twitz Dyos, kymoju' kyna'j Dyos tnam xjan.⁵Jawtzun ttzyu'n anjl xq'aq'b'il, kux tnojsa'n tu'n ttxalq'aq' tib'aj q'olb'eb'l, ex xit-xon tib'aju' tx'otx'; ex e'q'ajt q'ankyaq, tq'ojq'ojel towi'yj, xloq'lokya'j ex tzaj kyajnajnab'. E'q'ajtzanjtz chun

⁶Kyb'incha kyib'ju' wuq anjl b'ajx q'o'n chun kye tu'n kyq'ajtzante.

⁷Xitq'ajtza'n tnejel anjl tchun, ex b'aj tzaj xon saqb'aqun ex q'aq' smo'n tk'i chik' twitz tx'otx'. B'aj tz'e'y jun toxi'n aq'pun twitz tx'otx', kyuk'i'lxi' jun toxi'n aq'pun tze ex tkyaqilju' cha'x k'ul.

⁸Xitq'ajtza'n tkab' anjl tchun, ex pon xon jun toj ninnjab' naku'j nin witz nk'ant q'aq' ti'j; ex jawb'ent jun toxi'n aq'punju' ninnjab' te chik'.⁹Eb'aj kyim jun toxi'n aq'pun te tkyaqilju' ate' toj ninnjab', ex eb'aj xitj jun toxi'n tneju' b'ark.

¹⁰Xitq'ajtza'n toxi'n anjl tchun, ex tzaj tz'aq jun ninche'w twitz kya'j, nk'ant naku'j tqantaq' q'aq', ex kub' tz'aq tib'aj jun toxi'n aq'pun kye nin a' ex kyib'aj t-xiklil a'.¹¹Tk'ayil tb'iju' che'w; ex jaw k'ayix jun toxi'n aq'punju' a', nim xjal eb'aj kyim tu'nju' k'a a'.

¹²Xitq'ajtza'n tkyaji'n anjl tchun, ex b'o'lj jun toxi'n aq'punju' q'ij, jun toxi'n aq'punju' xjaw ex jun toxi'n aq'pun kyeju' che'w. Majx kyej qloljix jun toxi'n aq'pun kye, ex min e'k'ant jun toxi'n aq'pun te jun q'ij ex te qonik'an.

¹³Xinka'yi'ntle' ex wile' jun t'iw intoq lipan twitz kya'j ex intoq jawtma'n kuw kjalu: ¡Qab'anx kywitzju' xjal najlqe' twitz tx'otx', ajkyq'ajtiju' chun che xe'lkyq'ajtza'n oxe'tl anjl!, chij.

¹Xitq'ajtza'n tjwe'yi'n anjl tchun, ex wile' jun che'w ku'tz tz'aq twitz kya'j tzmax twitz tx'otx', ex xiq'o'n talja te tu'n tjqetju' jul jaloja t-xelo.²Jawtjqo'n jul jaloja t-xelo, ex jawtz sib' toj naku'j t-sb'el nin chuj; ex jpet twitzju' q'ij ex kyq'iq' tu'n.³Tojtzu'n sib' b'je'tza' txqan ẍt'ikt'u'l ex eb'ajx puqli twitz tx'otx'; xiq'o'n kyipumal kse'n kyipumal lakran.⁴Xiq'ma'n kye tu'n lalun che yajun ti'j jun cha'x k'ul, mo awal mo jun tze twitz tx'otx', o'kx tu'n kyyajuna' kyi'ju' xjal min tok t-sey Dyos kyplaj.⁵Ex min xiq'o'n kye tu'n kykub' kyb'yo'n xjal, naq o'kx tu'n kyok jwe' xjaw toj k'ixk'oj; ex aju' k'ixk'oj tu'n kyoka' kse'n tchib'en lakran.

⁶Tojtzu'n tq'ijlalil lu kkyqani' xjal kykamik, laytzun che kyim; kyajb'il tu'n kykyim, k'elel oqju' kamik kyi'j.

⁷Ikyqe'toq ẍt'ikt'u'l kse'n b'anchej b'incha'n kyten te q'oj; tojx jun naku'j q'anpwaq koron toj kywi', naku'j xjal che ka'yin.⁸Ati t-xya'mal kywi' kse'n twi' qya, atzu'n kywitzte naku'j twitzte b'alun.⁹Ktxu'n kyi'j tu'n jun k'uxb'il q'ojb'il, ikytq'ojq'ojel kyxik'ju' kse'n kyq'ojq'ojel txqan karwaj jwo'n kyu'n chej ajq'ojil.¹⁰Q'i'n kyq'ojb'il te b'iyb'il ti'j kyje, naku'j tje lakran, tu'ntzunju' ati kyipumal tu'n kyk'ixb'san kye xjal toj jwe' xjaw.¹¹Atzu'n kynejelju' ẍt'ikt'u'l, aju' tajaw jul jaloja t-xelo, Ab'adon tb'i toj eb'rey, atzu'n toj kryek Apolyon.

¹²Ik'ju' tnejel k'ixk'oj; atixtzun kab'e'tl tu'n tik'.

¹³Xitq'ajtza'n tqaqi'n anjl tchun, ex nb'iye' etz yolin jun kyxolju' kyaje' tuk'a q'anpwaq q'olb'eb'l atitoq twitz Dyos.¹⁴Atzunju' etz yolin tma teju' tqaqi'n anjl kjalu: Tzaqpinqe'mila kyaje' anjl xwaku'nqe' ttzi nin a' Ewprates, chij.¹⁵Eb'je'ltzun tzaqpi'n kyaje' anjl, b'incha'ntl kyib' tu'n kykub' kyb'yo'n jun toxi'n aq'punju' xjal, toju' kmoj, q'ij, xjaw ex ab'q'i.¹⁶Ex nb'iye' kyajlalju' xjal te q'oj ate'kx kyi'j chej, (200,000,000) kyajlal.

¹⁷Ikytzu'n wila'ye' txqan b'anchej toju' tzaj yek'u'n, ex ktxu'ntoq ttzikyk'u'ju' ate'kx kyi'j tu'n jun q'ojb'il kyaq kse'n q'aq', ẍkul kse'n jasint ex q'an kse'n ta'lq'ol. Ex iky kywi' chej kse'n twi' b'alun, ex intoq etz q'aq' toj kytzi kse'n ta'lq'ol.¹⁸E'kyimu' jun toxi'n aq'pun xjal kyu'n oxe' k'ixb'sab'l intoq che etz toj kytziju' b'anchej: aju' q'aq', sib', ex ta'l q'ol.¹⁹Qu'n xi' ta'ya' kyipumalju' b'anchej toj kytzi ex ti'j kyje; iky kyjeju' kse'n kan, ex nche k'ixb'san tu'n kywi'.²⁰Aye'tzu'n txqantl xjal min e'kyim tu'n k'ixb'sab'l lu, kukx kyb'inchante taq'wixju' kse'n tnejel, ex kukx kyk'ulunju' kye tajaw il ex kye witzleb' q'anpwaq, saqpwaq, q'ank'uxb'il, ab'j ex tze, min nche ka'yin, min nche b'in ex min nb'ent kyb'et.²¹Ljo'nx kyb'yon xjal, ljo'nx kyk'a'n, kukx kyb'inchan ajpajilju' ex kukx kyalq'anju'. Jun tal u'j q'i'n tu'n anjl

¹Wile' juntl anjl nimtipumal, xi'toq tku'tz toj kya'j toj jun toli'n muj; atitoq jun qe'nkan tib'aj twi', intoq qoptz'aju' twitz kse'n q'ij exqe' tqan naku'j kab'e' tnej tqantaq' q'aq'.²Tzyu'n jun tal tolin u'j tu'n, jqo'n, ex kub' twab'a'n tqan te tb'anq'ob' tib'aj ninnjab', atzu'n te tnayaj tib'aj tx'otx'.³Jaw ẍch'intzuntz kuw, naku'j b'alun ntzanun; ex tej tjaw ẍch'in, naku'j wuq q'ankyaq e'jaw tinun.⁴Kyb'ajlenxi'tzun yolinju' wuq q'ankyaq, ikytoq tku'x ntz'ib'a'ne' kyma; nb'iye' jun tzaj yolin toj kya'j, tma weye': K'u'nku'ya xkymaju' wuq q'ankyaq toj tanmiya, lalun ku'x ttz'ib'a'na, chij.

⁵Atzu'n anjl wa'ltoq tib'aju' ninnjab' ex tib'aju' tx'otx', jaw tq'o'n tb'anqob' twitz kya'j⁶ex tma toj tb'iju' itz' tejumajx, aju' b'inchante kya'j, tx'otx', ninnjab' ex tkyaqilju' ti'jxti' ati kyoj. Tma: Mixti'tlte anb'il,⁷naqa xponkmoj tu'n txi' tq'ajtza'n twuqi'n anjl tchun, kjapumelju' echa'ntl toj ewaj tu'n Dyos, kse'nx tma kyeku' tmajin ex t-sanjelal, chij.

⁸Atzunj xinb'i'ne' ttzaj yolin toj kya'j, tzaj yolin jumajtl weye', tma kjalu: Kutxi'ya q'elteju' tolin u'j jq'o'n toj tq'ob'ju' anjl wa'l tib'aj ninnjab' ex tib'aj tx'otx', chij.⁹Nxi'tzune' tke'tzju' anjl ex xinqani'ne' tal tolin u'j te, tzaj ttzaq'we'ntzuntz kjalu: Q'inxa ex wanxa. Chi' k'okyela' toj ttziya naku'j ta'lkab', ajtzun tku'pun toj tk'u'ja kjawil tx'amix, chij.

¹⁰Elwiq'i'ne' tal tolin u'j teju' anjl, ex xinwane'; chi'toqte' toj ntziye' naku'j ta'lkab', tetzunj tb'aj wu'ne', jaw tx'amix toj nk'u'je'.¹¹Tzaj tma'ntzuntz weye' kjalu: Ati tu'n txitma'na ak'a'j tpakb'alil tyol Dyos kyi'j txqan tnam, kyi'j nimaqtnam, kyi'j xjal chukchaq kyol ex kyi'j nimaqkawil, chij.

¹Tzaj q'o'n jun b'ar te echb'il weye', naku'j jun ajlaj, ex tzaj q'ma'n kjalu: Kutxi'ya echalteju' ja te k'u'lb'il exju' q'olb'eb'l, ex ajlanxa kyb'aju' nche k'ulun na'tz.²Naq o'kx lalun kub' techa'na tpenju' ja te k'u'lb'il ti'jxi', qu'n oje txiq'o'n kye min nche niman te Dyos, kb'ajel kytxa'ju'n xjan nintnam toj kab'naq kab'e' (42) xjaw.³Ex che xe'lnchq'o'ne' kab'e' tziyal wi'je' tok kyxb'alun te b'is, tu'n t-xikyma'n tpakb'alil tyol Dyos toj oxk'al oxnaq (1,260) q'ij, chij.

⁴Aye'tzu'n kab'e' tziyal lu aye' kab'e' tqan olib'o exju' kab'e' kykb'el kantil ate' twitzju' Dyos tajaw tx'otx'.⁵Qa ati jun tajb'il tu'n tk'ixb'san kye, k'eletz q'aq' toj kytzi, majx che b'ajel kytz'e'ysa'n kyajq'oj; ikytzu'n kkyimela' alkye tajb'il tu'n tk'ixb'san kye.⁶Ati kyipumalju' tziyal lu tu'n kyjpunte kya'j, tu'n lalun tzaj jb'al toju' tq'ijlalil nche pakb'an tyol Dyos, ex ati kyipumal tu'n tjaw b'entju' a' kyu'n te chik' ex tu'n tyajti twitz tx'otx' tu'n tkyaqil yajb'il, jte'xku' maj tu'n kyk'ixb'san.

⁷Tb'ajlenxi'tzun kypakb'a'n ax, k'okyel tzaqpaju' txkup njatz toju' jul jaloja t-xelo kyi'j, kb'elkyi'j tu'n ex che b'eltb'yo'n.⁸Che kjel woqonje kyxmilal kyoj b'e toju' nintnam jajawa' q'o'n Qajaw twitz krus, aju' nintnam tok tb'i Sodom ex Ejipt tejun techlal.⁹Che okyel ka'yi'n woqo'jqe' toj oxe' q'ij tk'i' nik'jan kyu'n xjal te chukchaq tnam, chukchaq kyol, chukchaq kyajil, ex te chukchaq nimaqtnam, ex lay tz'ajonjtz tu'n kyku'x mqu'n.¹⁰Che tzalajelju' xjal najlqe' twitz tx'otx' ajkylonte kyimniqe'tl. Okxi'x che tzalajel ex che q'ol kyoyaj kyxolilex tu'n kytzalajb'il, qu'n yajul qexi'xtoqju' kab'e' sanjelal lu toj kywitz.

¹¹Tb'ajlenxi'tzun oxe' q'ij tk'i' nik'jan, e'jaw anq'intl tu'n Dyos ex ejawe' jumajtl, majx tzaj kychi kyi'ju' e'ok ka'yinkye.¹²Kyb'itzu'n kab'e' tziyal lu jun yol kuw tzaj q'ma'n kye toj kya'j kjalu: ¡Kukyjatze' tzalu! chij. E'jawxtzuntz toj kya'j toj jun muj, kywitzku' kyajq'oj.¹³Textzu'n kmoj lu tzaj jun nin kyajnajnab', ex majxkub' xitj jun tlajoji'n aq'punju' nintnam, e'kyim wuqlajk'al lajnaq (7,000) xjal tu'n kyajnajnab'. Aye'tzu'n e'kyaj anq'in, ojexi'x che xob' ex jawkyajwali'n Dyos te toj kya'j.

¹⁴Atzun tkab' k'ixk'oju' ik', tzultzuntlju' toxi'n k'ixk'oj. Xiq'ajtza'n twuqi'n chun

¹⁵Xitq'ajtza'n twuqi'n anjl tchun, ex e'jaw tq'ojq'ojel towi'yj kuw toj kya'j, intoq kyma'n:
Atlte Qman Dyos exju' Krist chq'o'n tu'n nche kawin twitz tx'otx' ex che kawil toj tkyaqil tab'q'iyil, chechij.

¹⁶Aye'tzu'n junaq kyaje' (24) tijwnaq q'uqlqe' toj kyq'uqb'il twitz Dyos eb'ajkub' meje majx ku'pun kyplaj twitz tx'otx' ex ek'ulun te Dyos,¹⁷Kyma kjalu:
Chjonte teya Taye, nimtipumala, aya atiya ojtxi' ex atiya kukxju', qu'n matyek'uya tipumala nimxi'x ex matzyet tkawina.¹⁸Matzaj kytx'u'jil xjal kyoj nimaqtnam ti'ja; ex matxi' japun tq'ijlalil tu'n ttz'e'ysanteya kywitz, aju' kmoj tu'n kyok kyimni toj xjel tu'na, ex tu'n txitq'o'na tu'me'l t-xel kye tmajina ju' sanjelal, kye ttanama xjan ex kyeju' nche nimante tb'iya, nimaq kyoklen mujqa naqch'i'n kyoklen; ex che b'elt-xitu'na nche xitun twitz tx'otx', chechij.

¹⁹Jqettzu'n tja Dyos ati toj kya'j, ex q'ancha'ltoqu' tkaxil tyol Dyos kyejni b'entti'j toju' tja Dyos. B'ajtzajtzun xloq'lokya'j, e'tq'ojq'ojel towi'yj, e'q'ankyaq, jun kyajnajnab' ex jun nin saqb'aqun. Jun qya exju' txkup

¹Tzaj yek'u'n jun nin techlal toj kya'j: jun qya ktxu'nti'j tu'n q'ij naku'j t-xb'alun, atitoqu' xjaw tjaq' tqan ex tokx jun tkoron toj twi' ate'k kab'lajoj che'w ti'j.²Ch'onwi' toqju' qya, ex intoq ẍch'in tu'n tk'ixk'ojal wnaq ti'j, intoq yajti tu'n xi'titz'ji tal.

³Ex yek'unjtz juntl techlal toj kya'j: jun nin txkup kyeqti'j, wakxkan tb'i, ate'toq wuq twi', lajoj tuk'a ex tokx jun tkoron tojunjun twi'.⁴Majx e'tzaj tjto'n tje txkup jun toxi'n aq'punju' che'w twitz kya'j, ex eb'ajkb'u'l t-xon twitz tx'otx'. Kub' we' txkup lu twitzju' qya xi'toq titz'ji tal, tu'ntoq txi' tch'yo'n talu' qya naqa sitz'ji.⁵Itz'jitzun talju' qya, q'a, ju' ati tu'n tkawin kyib'aj kykyaqil nimaqtnam tuk'i'l tb'aston k'uxb'il. Eltzun q'i'n tal te ex xiq'i'n twitz Dyos ex twitzju' tq'uqb'il;⁶xi'tzun oqu' qya toj chq'ajlaj, jatoq tu'n ttena' tu'n Dyos ex tu'n twan atzu' toj oxk'al oxnaq (1,260) q'ij.⁷Yajxi'tzuntl tzaj jun q'oj toj kya'j: q'ojin Myel kynejel anjl kyuk'i'lju' tanjl, ti'ju' txkup wakxkan. Q'ojin wakxkan exqe' tanjl,⁸mixtzunti'x e'kanb'an, ex min xiq'o'ntl anb'il kye tu'n kyten toj kya'j.⁹Qu'mtzun majx etzxonju' nin txkup wakxkan, aju' ojtxi' kan tok tb'i Tajaw il ex Ajq'oj ti'j Dyos, ex nsb'un kyi'j kykyaqil xjal. Eb'ajku'tz xon kyuk'i'lxi' tanjl tzmax twitz tx'otx'.

¹⁰Xi'tzun nb'i'ne' jun tq'ojq'ojel towi'yj kuw toj kya'j, intoq kyma'n:
Matxi' tzulju' kolb'il, ex tipumal ex tkawb'il Qman Dyos, ex tkawb'il Krist chq'o'n tu'n, qu'n matxi' tz'etz xonju' b'ajsal intoq poqonkye okslal q'ijtl ex qonik'an twitz Qman Dyos.¹¹Makub'ti'j kyu'n qtzik e'qitz'in tu'n tchk'el Qpoj Tman rit elqojli ex tu'n tpakb'al b'a'n xikypakb'a'n; min e'xob' tu'n tel kychwinqlal, kyaq'kyib' tu'n kykyim.¹²¡Che tzalajxtzune' kya'j, ex aye'ye' najlqe'ye' toj kya'j! ¡Qab'anxtzunkye' kywitz najlqe'ye' twitz tx'otx' ex toj ninnjab', qu'n matxi' ku'punju' tajaw il q'ojil kyi'je', intx'u'jin qu'n kanli twitz qa naqch'i'nxtl toj tq'ij!, chij.

¹³Tetzunj matxitoq ku'tz xon wakxkan twitz tx'otx', okten ljolte tojtq'ijju' qya matxitoq tz'itz'ji tal.¹⁴Atzunte' qya e'okq'o'n kab'e' t-xik' nimaq kse'n t-xik' t'iw, tu'n tb'ent t-xilik'k'in jatu'n ttena' toj chq'ajlaj, najchaq ti'ju' wakxkan, jatu'n t-xiq'o'na' twa toju' oxe' ab'q'i tk'i' nik'jan.¹⁵Jawtzun t-xa'n txkup wakxkan a', tu'n tjaw jun nin a' tu'nt-xi tiqa'nju' qya;¹⁶onintzu'n tx'otx' ti'ju' qya, qu'n xik'ab'chaj ex xinaju' a' jaw t-xa'n wakxkan toj.¹⁷Tu'ntzunju' ojexi'x q'ojin wakxkan ti'ju' qya, xi'tzuntz q'ojil kyi'ju' txqantl tyajajilu' qya, kyi'ju' nche nimante tchaq'b'il Dyos ex lepchiqe' ti'ju' t-xnaq'tzb'il Jesus.¹⁸Ex kub'tq'o'ntib' wakxkan ttzi ninnjab'. Aye' kab'e' txkup

¹Wile' jun nin txkup jatz toj ninnjab', wuq twi' ex lajoj tuk'a. Tokxtoq jun koron toj twi' junjun tuk'a, ex ate'ktoq tb'i xmayb'i'lte Dyos kyi'ju' twi'.²Ikytoq nintxkupju' wile' kse'n leopa'rt; ikyqe'toq tqan kse'n tqan oso, atzu'n ttzi kse'n ttzi b'alun. Xitq'o'n wakxkan tipumal ex tq'uqb'ilju' txkup lu tu'n tkawin, ex nim toklen.³Wile' jun twi'ju' txkup lu, naku'j k'ixb'ni te kyimle'n; atzu'n k'ixb'ni lu q'anet, kykyaqiltzu'n xjal eb'jaw lab'ti ex eb'jo'k lpe ti'ju' txkup lu.⁴E'k'ulun te wakxkan qu'n xitq'o'n toklen txkup, ex ek'ulun teju' txkup, intoq kyma'n kjalu: ¿Alxi'xkye juntl kse'n txkup lu, ex alkye kb'antel tq'ojin tuk'i'l? chechij.

⁵Ex xiq'o'n anb'il teju' txkup lu tu'n tmante tyol te ninb'iltib' ex te xmayb'il ti'j Dyos, ex xiq'o'n toklen tu'n tkawin kab'naq kab'e' xjaw.⁶Yolintzuntz ti'j Dyos, tma txqan xmayb'il ti'j Dyos, ti'ju' tja xjan ex kyi'ju' ate' toj kya'j.⁷Xiq'o'n anb'il te tu'n tq'ojin ti'ju' xjan tnam, tzmax ajtkub'kyi'j tu'n; ex xiq'o'n toklen tu'n tkawin kyib'aj kykyaqil xjal chukchaq kyyajil, chukchaq kytanam, chukchaq kyyol, ex chukchaq nimaqtnamqe'.⁸Che k'ulul kykyaqil xjal najlqe' twitz tx'otx' teju' txkup lu, aye' min tku'x kyb'i ttzajlen qex twitz tx'otx' toju' tuj Qpoj Tman rit te chwinqlal.

⁹Alkye ati t-ẍkyin, b'inxju' yol lu:¹⁰Aye' ati tu'n kyxi' toj kars, che xe'lq'i'n toj kars; aye'tzu'n ati tu'n kyb'aj tu'n k'uẍtx'e'nb'il che kb'el b'yo'n tu'n k'uẍtx'e'nb'il.
Atzuntzu' kq'ancha'lixela' kyipumal ex kyokslab'lju' xjan ttanam Dyos.

¹¹Yajxi'tzuntl wile' juntl txkup, intoq jatz toju' tx'otx'. Ate'toq kab'e' tuk'a kse'n tuk'a qpoj tman rit, extzun intoq yolin kse'n jun wakxkan.¹²Xini q'o'n toklen tu'n tnejel txkup, ex eb'jo'k tchq'o'n tx'otx' exqe' najlqe' twitz tu'n kyk'ulun teju' tnejel txkup, ju' ojetoq q'anet tk'ixb'len te kyimle'n.¹³Ex e'tb'incha nimaq techlal eb'a'nq'ob'aj. Inpe' tzajt-xon q'aq' twitz kya'j nkb'u'l twitz tx'otx', kywitzku' xjal.¹⁴Kyu'ntzu'n techlal nxiq'o'n anb'il te tu'n tb'inchante twitzju' tnejel txkup, e'kub' t-sb'u'n xjal najlqe' twitz tx'otx' ex xitma'n kye tu'n kyb'inchante jun tilb'ilalju' txkup itz'x maskye ojetoq k'ixb'sanjtz tu'n k'uẍtx'e'nb'il.¹⁵Ex xiq'o'n tipumalju' tkab' txkup tu'n tq'onte tchwinqlalju' tilb'ilal tnejel txkup, tu'n tyolinju' tilb'ilal lu ex tu'n tmante tu'n kykub' b'yo'n kykyaqilju' min nche k'ulun te.¹⁶Expe' tb'incha tu'ntzun kykyaqil xjal, nim kyoklen ex ch'i'n kyoklen, q'inun ex prow, tzaqpi'nqe' ex lq'o'n majin, tu'n tok kyechel toj kyb'anq'ob' mujqa kyplaj.¹⁷Ex mix-a'lo'te kb'entel tloq'on ex tu'n tk'ayin, qa mixti' tok techel mujqa tb'iju' txkup ti'j, mujqa tajlalju' tb'i.

¹⁸In nojqelan nab'l teju' lu; alkye makane toj twitz, ximanx tnab'lju' tajlal txkup lu, qu'n tajlalx tb'i xjalte'. Aju' tajlal lu junk'al oxlajnaq qaq (666). Kyb'itzju' qaqlajmutx' lajk'al (144,000)

¹Wile' Qpoj Tman rit wa'ltoq twi' witz Syon. Ate'toq qaqlajmutx' lajk'al (144,000) xjal tk'etz, tz'ib'a'ntoq tb'i Qpoj Tman rit ex tb'i Qman Dyos kyplaj.²Ex nb'iye' jun tq'ojq'ojil tzaj toj kya'j; iky tq'ojq'ojil kse'n a' njukyin ajtku'tz twitz xaq, ex kse'n tq'ojq'ojel q'ankyaq; iky tb'inxju' kse'n tq'ojq'ojil txqan chnab' arpa.³Intoq kyb'itza'n jun ak'a'j b'itz twitzju' q'uqb'il ex kywitzju' kyaje' itz'qe' ex kywitzju' tijwnaq. Mix-a'lo'x toqjun nb'ant t-xnaq'tzante tib' ti'ju' b'itz lu, oqe'kxkye' qaqlajmutx' lajk'al (144,000) e'klet kyxolju' ate' twitz tx'otx' nb'ant kyb'itzante.⁴Qpoj qekye' lu, min kytz'ilsa kyib' kyuk'i'l qya; aye' lepchqe'k ti'ju' Qpoj Tman rit jaxjaku' matxa'. E'klet kyxolju' xjal tu'n kyok te tnejel oyaj te Dyos ex te Qpoj Tman rit.⁵Min etz jun chajyolil toj kytzi, mixti'x jun il kyb'incha. Kypakb'ab'l oxe' anjl

⁶Wile' juntl anjl, intoq lik'ik'in twitz kya'j ex q'i'ntoq jun tpakb'al tu'n, tu'n txitma'n kyeju' najlqe' twitz tx'otx', kye kykyaqil xjal kyoj kykyaqil nimaqtnam, chukchaq kyajil, chukchaq kyol ex te chukchaq kytanam.⁷Intoq jawtma'n kuw kjalu: Che xob'e' te Qman Dyos ex che b'itzan qe'ye' te, qu'n matxi' pon kmoj tu'n kyok xjal toj xjel tu'n. Che k'ulun qe'ye' teju' b'inchante kya'j ex tx'otx', ninnjab' exqe' t-xiklil a', chij.

⁸Lepchix juntl anjl ti'j, intoq tma'n: ¡Matxi' kub' tz'aq, matxi' kub' tz'aqu' B'ab'ilon nimtipumal, aju' kub' tx'ojsankye kykyaqil nimaqtnam tu'n b'in te tajpaji'n!, chij.

⁹Xi' lpe juntl toxi'n anjl kyi'j, intoq jawtma'n kuw kjalu: Qa ati jun mak'ulun teju' txkup ex teju' tilb'ilal, ex matk'amu' techel txkup tplaj mo ti'j tq'ob',¹⁰kk'wal ti'ju' ttx'u'jil Dyos, b'incha'ntl; kyajtel tu'n k'ixk'oj tuk'i'l q'aq' ex ta'l q'ol kywitzju' xjan anjl ex twitzju' Qpoj Tman rit.¹¹Njaw t-sb'elu' yajb'il lu toj tkyaqil tab'q'iyil, ex mixti'x ojb'il q'ijtl ex qonik'an kyeju' nche k'ulun teju' txkup ex te tilb'ilal ex makyk'amu' tb'i te kyechel, chij.

¹²¡Atzuntzu' tu'n kyyek'unteya' xjan tnam tu'n tik'xkyu'n ex tu'n tten kypasens, aye' nche kyanq'i'n tchaq'b'il Dyos ex q'uqlok kyk'u'j ti'j Jesus! chij.

¹³Nb'itzune' jun tzaj yolin weye' toj kya'j, tma kjalu: Tz'ib'anku'ya lu: B'a'nxi'xte' kyeju' mache kyim ate'qe' tuk'i'l Qajaw, chij.
Iku'—chi Xewb'aj—, che ojlal te kyaq'un, qu'n lepchixju' kyaq'unb'en kyi'j, chij. Jaw chmo'n twitz awal

¹⁴Nxi' ka'yine' ex wile' jun saq muj, q'uqlitoq jun tib'aju' muj naku'j Tk'wal Dyos. Tokxtoq jun tkoron q'anpwaq toj twi' ex q'i'n jun semu'l tu'n jqu'n twitzte.¹⁵Ex etz juntl anjl toju' tja Dyos, intoq ẍch'inx kuw teju' q'uqli tib'aj muj kjalu: ¡Jonktza tu'n t-semu'la ex b'uyinktza twitz awal; qu'n matxi' pon kmoj tu'n tb'uyet, ex matxi' b'entu' twitz awal! chij.¹⁶Tzajtzun tnuqpi'n anjl q'uqli tib'aju' muj tq'ob' tuk'i'l t-semu'l, ex jaw tb'uyi'n twitz awal twitz tx'otx'.

¹⁷Etz juntl anjl toju' tja Dyos ati toj kya'j, ex q'i'n jun t-semu'l jqu'n twitzte.¹⁸Ex etz juntl anjl tk'etzu' q'olb'eb'l, atitoq toklen tib'aju' q'aq' ex xiẍch'in kuw teju' q'i'n t-semu'l jqu'n twitzte, tma kjalu: ¡Jonqe'mila txijtwitz ub'a ati twitz tx'otx' tu'n t-semu'la jqu'n twitzte, qu'n matxi' che q'anax! chij.¹⁹B'jeltzun tjon anjl twitz ub'a twitz tx'otx' tu'n t-semu'l, b'ajku'x tq'o'ntzuntz toju' nin tkb'el ja nela' ytz'o'n ta'l, in techla'n ttx'u'jil Dyos.²⁰B'je'l ytz'o'n ta'lu' ub'a ti'jxi' nintnam, ex b'je'tz txqan chik' toju' tkb'el, qapelo jun metr tk'i' nik'jan jawa' lq'e tib'aj tx'otx', te oxnaq o'lajoj ajlab' ik'a'. Wuq yajb'il tzulkyq'o'n anjl

¹Wile' juntl nin techlal toj kya'j ex xob'ajilx: wuq anjl kyuk'i'l b'ajsb'il wuq k'ixk'oj, kyuk'i'ltzun njapuna' b'aj ttx'u'jil Dyos.

²Ex wile' naku'j ninnjab' ẍtilun smo'n tk'i q'aq'; wa'lqe'toqu' ojetoq kub'ti'ju' txkup ex tilb'ilal kyu'n, tk'i'xi' tajlal tb'i, ttzi ninnjab' lu, tuk'i'l kychinab' arpa xinitq'o'n Dyos kye.³Ex intoq xikyb'itza'n tb'itz Moyses, tmajin Dyos, ex tb'itz Qpoj Tman rit. Intoq kyma'n kjalu:
Nim toklen ex te lab'te'nxi'xju' matxi' tb'inchaya, aya Nman Dyos, nimtipumala; tzinunqe'xi'x ex ax qexi'xju' tb'eya, aya Nimaqkawil kyib'aj nimaqtnam.⁴¿Alkye lay xob' teya Nman Dyos? ¿Alkye lay jaw ajwalinteya? O'kxna'ta xjan; kykyaqil nimaqtnam che b'ju'l ex che k'ulul teya, qu'n matxi' tz'el kynik' qa tnik'alxi'x ti'ja, chechij.

⁵Tb'ajlenxi'tzun ja'lu, xinka'yine' ex wile' jqetu' ja xjan toj kya'j, ex tjaju' yol kyejni b'entti'j.⁶Eb'je'tzju' wuq anjl q'elte wuq yajb'il. Toktoq kyxb'alun tb'anil sed chub'i'ntwitz nqoptz'aj, ex toktoq jitz'b'il kyk'u'j q'anpwaq japumni ttzikyk'u'j.⁷Juntzun kyxolju' kyaje' itz'qe' xitq'o'n jun k'wab'l q'anpwaq nojni tu'n ttx'u'jil Dyos itz' toj tkyaqil tab'q'iyil, teyile junjunju' wuq anjl.⁸Ex noju' ja xjan tu'n sib' ntzaj ti'ju' tajwalil Dyos ex tipumal, ex mix-a'lo'x jun tu'n tb'ant tokx toj tzmax ajkyb'ajik'ju' wuq yajb'il q'i'ntoq kyu'n wuq anjl. Aye' wuq k'wab'l te ttx'u'jil Dyos

¹Nb'iye' etz yolin jun kuwxi'x toju' ja xjan, tma kyeju' wuq anjl kjalu: Kukyxi'ye ex kyqonxe' ttx'u'jil Dyos tku'x kyoju' wuq k'wab'l lu tib'aju' tx'otx', chij.

²Xi'tzun tnejel anjl ex xitqo'nju' tku'xtoq toj tk'wab'l tib'aju' tx'otx'; b'je'tztzun tx'a'ktz taq'wixi'x ex k'ixk'ojxi'x kyi'j kykyaqilju' xjal toktoq techelu' txkup kyi'j ex intoq che k'ulun twitzju' tilb'ilal.

³Xitqo'n tkab' anjl toju' tk'wab'l tib'aj ninnjab', ex jawb'entju' ninnjab' te chik' kse'n tchk'el jun xjal makub' b'yo'n, ex eb'aj kyim kykyaqilju' intoq che anq'in toj ninnjab'.

⁴Xitqo'n toxi'n anjl k'wab'l tzyu'n tu'n kyib'aj nin a' ex kyib'aj t-xiklil a', ex eb'jaw b'ent te chik'.⁵Nb'itzuntze' tmaju' anjl ati toklen tib'aju' a' kjalu:
Nman Dyos, aya xjan, majx atiya tejumajx tu'me'lte' saj tq'o'na tz'e'ysb'il witzb'aj lu,⁶qu'n b'je'l kychk'el ttanama xjan kyu'n, ex kychk'elju' t-sanjelala, atzu'n ja'lo tojx kyil xxa'tq'o'na chik' te kyk'wa', chij.

⁷Ex nb'iye' juntl etz yolin ti'j q'olb'eb'l kjalu: Ikyju' Nman Dyos, nimtipumala, makub' ttz'e'ysa'na kywitz tojxi'x tu'me'l ex ax, chij.

⁸Xitqo'n tkyaji'n anjl tku'x toju' tk'wab'l tib'aju' q'ij, ex xiq'o'n tipumal q'ij tu'n kyb'aj ttz'e'ysa'n xjal.⁹Kykyaqiltzun majx eb'aj tz'e'y; extzun mixti'x anjtzkyi'j tuk'i'l Dyos tu'n ja'lu, ex min jawkyajwali'n, xipe' e'oka'ten q'mal kyol taq'wixi'x ti'ju' Dyos nimtipumal tib'aj tkyaqilju' yajb'il lu.

¹⁰Xitqo'n tjwe'yi'n anjl tku'x toju' tk'wab'l tib'aj tq'uqb'ilu' txkup, ex majx kyej qloljixju' tkawb'il. Inxi'xtoq kytx'a'n xjal kyaq' tu'n k'ixk'oj;¹¹mixtzunti'x kyej kytzaqpi'n tu'n kyb'inchan taq'wix tu'n tpaju' tx'a'k ex k'ixk'oj, xi'pe' e'oka'tentl q'mal txqan ti'xti' myab'a'n ti'j Dyos te toj kya'j.

¹²Xitqo'n tqaqi'n anjl tku'x toju' tk'wab'l tib'aju' nin a' Ewprates, ex xitzqiju' nin a' tu'n kyik'xju' nimaqkawil tzajniqe' toj tjawetzq'ij.

¹³Wile' eb'je'tz oxe' tz'il xewb'aj naku'j xtx'oqe' toj ttzi wakxkan, toj ttzi txkup ex toj ttzi mya ax sanjelal.¹⁴Kyxew tajaw ilqe', intoq che kyb'incha'n techlal tuk'i'l b'a'nq'ob'aj ex intoq che kyb'uyi'n kykyaqil nimaqkawil twitz tx'otx' tu'n kyq'ojin toju' q'ij ajkyok kykyaqil xjal toj xjel tu'n Dyos nimtipumal.

¹⁵Tma Dyos kjalu: Naqx myanim ajwule' kse'n jun eleq'. Tzalajb'ilxi'x teju' itz' ex nxitka'yi'n t-xb'alun, tu'n lalun b'et ẍb'iqli ex tu'n lalun tz'el tch'ixaw, chij.

¹⁶Eb'ajtzun kyb'uyi'n nimaqkawil toju' tenb'il Armajedon tb'i toj eb'rey.

¹⁷Xi'tzun tqo'n twuqi'n anjl tku'x toj tk'wab'l toju' kyq'iq', ex etz yolin jun toju' ja xjan tzmax jata' q'uqb'il, tma: ¡Matxi' b'ent! chij.¹⁸B'ajtzajtzun xleq'lekya'jtz, e'tq'ojq'ojel towi'yj ex q'ankyaq, ex yokchi tx'otx' tu'n jun kyajnajnab' kuwxi'x kyetwitz tkyaqil kyajnajnab' ttzajlenx kyanq'in xjal twitz tx'otx'.¹⁹Kub' aq'puju' nimaq nintnam toj oxe', ex eb'ajkub' xitju' nimaqtnam twitz tx'otx'; ex tzaj tna'n Dyos nimaq nintnam B'ab'ilon, tu'n tk'monteju' ttx'u'jil Dyos kuwxi'x.²⁰Kykyaqilju' swejtx'otx' exqe' witz eb'ajkub'naj,²¹b'aj tzaj txqan nimaq saqb'aqun twitz kya'j b'ajkub' kyib'aju' xjal, jun kyintalchaqlo kyalal, ex b'jaw kyma'n xjal kyol taq'wixi'x ti'j Dyos tu'n tpaju' yajb'il tu'n saqb'aqun, qu'n jun ninyajb'ilxi'x. Tz'e'ysb'il twitzju' qya nimaq ajpajil

¹Tzajtzun jun kyxolju' wuq anjl q'i'nqe' wuk k'wab'l kyu'n, tzaj tma'n weye' kjalu: Kutzaja, kxel nyek'u'ne' tz'e'ysb'il twitzu' qya nimaq ajpajil teya ati kyib'aju' a'.²Mache ajpajinju' nimaqkawil twitz tx'otx' tuk'i'l, ex mache tx'ojtu xjal najlqe' twitz tx'otx' tu'n b'in te tajpaji'n, chij.

³Inxi'tzun tiq'i'ne' anjl toj chq'ajlaj toju' tzaj tyek'u'n Xewb'aj weye'.
Wile' jun qya atzu' tokx tib'aj jun txkup kyeqti'j, tokyile b'iyj xmayb'ilte Dyos ti'jile, ate'toq wuq twi' ex lajoj tuk'a.⁴Toktoq t-xb'alunju' qya lu kyaq ex tb'anil ka'yin, ex wiqo'nti'j kyu'n q'anpwaq, tb'anil ab'j ex cha'x ab'j. Tzyu'ntoq jun k'wab'l q'anpwaq tu'n nojni kyu'n ti'xti' ik'b'ajilx ex tu'n ttz'ilil tajpaji'n;⁵tz'ib'a'ntoq jun tb'i tplaj te lab'te'n kjalu: Aju' nin B'ab'ilon, txub'aj kye ajpajil ex kye kykyaqilju' ik'b'ajilqe'x twitz tx'otx'.⁶Eltzun nnik'tze' ti'ju' qya tx'ojteniltoq tu'n kychk'elju' xjan tnam ex tu'n kychk'elju' eb'ajkub'yo'n tu'n tpaj tziyalqe' ti'j Jesus.
Majx njaw sak'puje' tej nka'yinteye'.⁷Tzajtzun tma'n anjl weye' kjalu: ¿Tiqu'n xsak'puja'ya? Kxe'l nma'ne' teya titi' tz'elpuna' qya lu exju' txkup iqalte, aju' ate' wuq twi' ex lajoj tuk'a.⁸Ate' txkup xtila junte' itz'toq nejtl, ex mixti'tl ja'lo; oktzun jawitz toju' jul jaloja t-xelo na'mxtoq txi' toju' tz'e'ysb'il witzb'aj tejumajx. Aye'tzu'n xjal najlqe' twitz tx'otx' min tku'x kyb'i toju' u'j te chwinqlal tzajx tkub'len b'incha'n twitz tx'otx', che jawil sak'puj ajkyka'yinte txkup lu itz'toq nejtl ex mixti'tl, extzun tzul jumajtl.

⁹Nim nab'l tajb'il tu'n tkane ja'lu: Aye' wuq twi' in techla'n wuq witz q'uqliju' qya lu kyib'aj; ex nkyechla'n wuq nimaqkawil.¹⁰Jwe'tzun kyxolju' nimaqkawil lu oje che kyim, atzun jun in kawin ja'lo, atzun juntl na'mx tkawin. Ajtzun tul, naq jte' q'ij kkawil.¹¹Aju' txkup itz'toq nejtl ex mixti'tl ja'lo, aju' twajxaqi'n nimaqkawil; jun kyxolju' wuq, tzul jumajtl kawil, ex kxe'l toj tz'e'ysb'il witzb'aj tejumajx.

¹²Aye' lajoj tuk'a ẍetila, lajoj nimaqkawilqe' na'mx ttzyet kykawin; tojtzun junkmuj che tenb'el te nimaqkawil junx tuk'i'lju' txkup.¹³Che okyelju' lajoj nimaqkawil lu toj junx kyxim, ex kxel kyq'o'n toklen ex tipumalju' txkup.¹⁴Che q'ojil ti'ju' Qpoj Tman rit; oktzun b'elkyi'j tu'n Qpoj Tman rit, aye' che tenb'elju' tuk'i'l aye' txko'nqe' ex sk'o'nqe' tu'n Dyos ex q'uqli kyk'u'j ti'j, qu'n ate' Qpoj Tman rit ati Toklen kyib'aj nimaq kyoklen ex kyib'aj nimaqkawil, chiju' anjl.

¹⁵Ex tzaj tma'n anjl weye' kjalu: Aye' a' ẍe'x tka'yi'na ja q'uqla' qya ajpajil, tnam qekye', xjalqe' chukchaq kyol ex txqan nimaqtnam.¹⁶Aye'tzu'n lajoj tuk'a ẍe'x tka'yi'na exju' txkup, k'elel kyik'o'n qya ajpajil, ex kjel kykolb'e'n ex kjel kyẍb'iqb'a'n; kb'ajel kych'yo'n t-xmilal ex kb'ajel kytz'e'ysa'n tu'n q'aq'.¹⁷Kub' tq'o'n Dyos toj kyanmi tu'n kyb'inchanteju' tajb'il Dyos: kb'antelti'j kyu'n tu'n txikyq'o'n kyoklen te nimaqkawil teju' txkup, tzmax ajtjapunju' oje tma Dyos.¹⁸Aju' qya xitka'yi'na ate nimaq nintnamju' nkawin kyib'aj nimaqkawil twitz tx'otx', chiju' anjl. Tej tkub' xitj B'ab'ilon

¹Tb'ajlenxi'tzun ja'lu, wile' juntl anjl ljo'ntoq tku'tz twitz kya'j; nimtoq tipumal, majxkub' ẍtile' twitz tx'otx' tu'n tqoptz'ajel.²Intoq ẍch'in kuw, intma'n:
¡Matxi' kub' xitj, matxi' kub' xitj nimaq B'ab'ilon! ¡Matxi' tz'ok te kyja tajaw il, te kyja kykyaqil tz'il xewb'aj te kyja kykyaqil tz'il pich' ex te kyja tz'il txkup ik'b'ajilqe'x!³Mache tx'ojti xjal kyoj kykyaqil nimaqtnam tu'n b'in te tajpaji'n; mache ajpajin nimaqkawil twitz tx'otx' tuk'i'l, mache q'inumaxju' xk'aẍlel twitz tx'otx' tu'nju' tachb'il nimxi'x, chij.

⁴Nb'iye' tzaj yolin juntl toj kya'j, intoq tma'n: Kukyetze' ntanam toju' nintnam lu, tu'n lalun che b'inchan ile' junx kyuk'i'l ex tu'n lalun pon kanun yajb'ilkye kyi'je';⁵qu'n nim txqan kyil majx njapun toj kya'j, ex in tka'yi'n Dyos tkyaqilu' kyb'inchb'aj myab'a'n.⁶Kyb'inchame' te kse'nx matxi' tb'incha kye txqantl; kyq'onk kamaje' tu'me'l t-xel te; kysmonku' kamaj twitzju'ye' tk'wa' k'axi'x kyetwitz smob'ente kyk'wa' txqantl tu'n;⁷kyq'onke' toj k'ixk'oj ex yajb'il kse'nx tjaw tnima'ntib' ex tej sachun. Qu'n ina' tma'n toj tanmi kjalu: Luqine' q'uqli qine' kse'n qya nimaqkawil. Mya kyimniwe' nchmil ex lay chin yajtiye', chij.⁸Qu'mtzun naq tojun q'ijx tzula' yajb'il ti'j: e'kamik, b'is ex we'yaj, ex kb'el tz'e'ysa'n tu'n q'aq' qu'n nimte Qman Dyos tipumal, ju' xiq'onte toj tz'e'ysb'il twitz, chij.

⁹Che oq'elu' nimaqkawil twitz tx'otx' e'ajpajin ex e'achin tuk'i'l, ex k'elex ch'yon toj kyk'u'j ajkyka'yinte sib' ajtb'aj tu'n q'aq'.¹⁰Che kjelten najchaq tu'n kyxob'el teju' tz'e'ysb'il witzb'aj, ex kkyma' kjalu:
¡Qab'anx twitza, nimaq nintnam, B'ab'ilon, aya nimaqtnam nimtipumala! Qu'n naq tejun kmojx xkub' tz'e'ysa'n twitza, chij.

¹¹Ex che oq'elju' xk'aẍlel twitz tx'otx' ex k'elex ch'yon nintnam lu toj kyk'u'j, qu'n mix-a'lo'tl alkye klq'olte kyk'a'ẍ:¹²txqan kyk'a'ẍ q'anpwaq, saqpwaq, tb'anil ab'j, cha'x ab'j, xb'alun tz'umin sed ex sed, tb'anil ka'yin ex kyaq; tkyaqil tze ati kyk'ok'jal; e'ti'xti' tb'anil b'aq, e'tb'anil tze, e'q'ank'uxb'il, e'k'uxb'il ex e'ẍtilun ab'j;¹³Txqan kanel ex ti'xti' k'ok'jqe'; sturak, e'k'ok'sb'il ex e'k'ok'sa'n aseyt; eb'in, aseyt, tb'anil arin ex triy; e'alu'mj te iqal, e'rit, eb'anchej, e'karwaj expe' e'lq'o'n majin wnaqqe'.¹⁴Kyma te nintnam kjalu:
¡Mixti'tltej tb'anil twitz lob'j achb'ajil qexi'xtoq teya; tkyaqilju' tachb'ila ex tq'inumala matxi' che kub'naj tejumajx!

¹⁵Eb'aj q'inumaxju' xk'aẍlel kyi'ju' ti'xti' lu tu'n nintnam, che kjelten najchaq tu'n kyxob'el te tz'e'ysb'il kywitz, che oq'el ex k'elex ch'yon toj kyk'u'j,¹⁶ex okkyma':
¡Qab'anx twitza nimaq nintnam! Tz'umin sed t-xb'aluna tok, ate'k t-xb'aluna tb'anil ex kyaq che ka'yin, wiqo'n kyu'n q'anpwaq, chi-ab'j ex tb'anil ab'j.¹⁷¡Ex naq tojun kmujx xkunaja' txqan q'inumal! chechilo.
Kykyaqilju' nejenel kyi'j b'ark exqe' nche b'et toj b'ark mlaj, e'aq'unal kyi'j b'ark ex kykyaqilju' nche aq'unan toj ninnjab', mache kyejten najchaq¹⁸Ex tej xkyka'yinte t-sb'el tq'aq'alju' nintnam, mache jawẍch'in: ¿Alxi'xkye juntl nintnam ikywit kse'n nimaq nintnam lu?, chechij.¹⁹Ex mab'jax kyq'o'n quq toj kywi', nche oq' ex nul toj kyk'u'j, ex njaw kyẍch'in:
¡Qab'anx twitz nimaq nintnam! Ma'xi'x che b'jawb'ent kykyaqil ati kyb'ark tu'n tq'inumal. ¡Naqtzun tojun kmujx xkyaja' xitj! chechij.

²⁰Che tzalajxe' ate'ye' toj kya'j ti'ju' nintnam lu; che tzalajxe' aye'ye' xjan tnamqe'ye', exqe'ye' apostl exqe'ye' sanjelal, qu'n matb'incha Dyos tnik'alilti'j kyeye', tej xtmante tu'n ttz'e'yset twitzu' nintnam, chechij.

²¹Tzajtzun jun anjl nimtipumal, jawtiq'i'n jun ab'j, kse'n jun nin ab'j te cheb'l, ex xit-xon toj ninnjab', tma kjalu:
Ikytzun kb'elexa' xoyeta'ju'ya, B'ab'ilon, nimaq nintnam, ex layx tz'ok ka'yi'ntla.²²Layx che b'injtztl chnab' arpa, xux ex chun, kyoju' b'e toja, lay che tentl aq'unal ti'j jun aq'untl toja, ex lay b'injtztl tq'ojq'ojel ab'j te cheb'l toja.²³Layx k'antl tq'aq'al jun kantil toja, ex lay b'injtztl tzalajb'il toj mjeb'le'n toja. qu'n nimaq q'inun qe'toq t-xk'aẍlela twitz tx'otx' ex macheb'aj t-sb'u'na kykyaqil nimaqtnam tu'n tajk'ayi'na, chij.

²⁴Qu'n matz'elyal kychk'elju' sanjelal ex kychk'elu' okslal ti'j Dyos toju' nintnam lu, ex kychk'el kykyaqilju' oje che b'aj kub' b'yo'n twitz tx'otx'.

¹Tb'ajlenxi'tzun ja'lu, nb'iye' txqan tq'ojq'ojel towi'yj ntoq kyma'n toj kya'j kjalu:
Ajwalinjtzwit Qman Dyos tete' Dyosu' kolb'il, ajwalil ex ipumalj,²qu'n tojxi'x tu'me'l ex tuk'i'l ax nche oka' xjal toj xjel tu'n; matxi' kub' ttz'e'ysa'n twitzu' qya nimaq ajpajil ju' tok tz'ilsalkye xjal tu'n tajpaji'n; matxi' tz'oktq'o'n t-xel te tu'n tpaj kykamikju' tmajin, chechij.

³Ex kymatl kjalu: ¡Ajwalinjtzwit Qman Dyos! Kjawil t-sb'elju' nintnam lu kukxju', chechij.

⁴Aye'tzu'n junaq kyaje' tijwnaq exqe' kyaje' itz'qe' e'kub' meje majx ku'pun kyplaj twitz tx'otx' ex ek'ulun te Dyos, q'uqlitoq tib'aju' q'uqb'il. Intoq kyma'n: ¡Ikyxwitju'! ¡Ajwalinjtzwit Dyos! chechij.⁵Tzajtzun yolin jun tk'etzu' q'uqb'il, intoq tma'n kjalu:
¡Kyajwalinktze' Qman Dyos kykyaqile', ch'i'n kyoklene' ex nim kyoklene', kykyaqile' inche ajb'ene' ex inche nimane' te Dyos! chechij. B'itz ti'j tmjeb'le'n Qpoj Tman rit

⁶Ex xinb'i'ne' naku'j tq'ojq'ojel kywi' txqan xjal, naku'j tq'ojq'ojel txqan a' nku'tz twitz xaq ex kuw q'ankyaq. Intoq kyma'n:
¡Ajwalinjtzwit Dyos! Qu'n matxi' tzyet tkawin Qajaw, aju' Qman Dyos nimtipumal.⁷Qoqe' tzalaj, qoqe' tzalajxi'x ex qajwalinktz, qu'n matxi' ponju' kmoj te tmjeb'le'n Qpoj Tman rit. Matxi' tb'incha tib'ju' t-xu'jil:⁸matxiq'o'n anb'il te tu'n toktq'o'n t-xb'alun tz'umin sed, ẍnu'l ex nqoptz'aj, qu'n ate' sed xb'alun lu aju' b'a'n kychwinqlal okslal, chechij.

⁹Tzaj tma'n anjl weye' kjalu: Tz'ib'anku'ya: Tzalajb'il kyeju' txko'nqe' toju' ninwan ti'j tmjeb'le'n Qpoj Tman rit, chij. Ex tmatl: Aye' tyol Dyos ja'lu axxi'x, chij.

¹⁰Nkub'tzun mejeye' t-xe tqanu' anjl, tu'n nk'ulune' te, atzunte tzaj tma'n weye': Lan tb'inchaya lu, tmajin Dyos qinwe', kse'nx aya ex kse'nqe' titz'ina ex ttzika ljo'n kychik'b'ante tziyb'il ti'j Jesus. Xi'k'ulunata te Dyos, chij.
Aju' tpakb'ab'l Jesus nxewsankye t-sanjelal Dyos. Tkamb'ab'lju' toktz ti'ju' chej saq ti'j

¹¹Wile' jqo'ntoqu' kya'j; ex atitoq jun chej saq ti'j, atzu'n q'uqlojx tib'aj, a tb'iju': Njapunxi'x tu'n ex Axxi'x tyol, qu'n tojxi'x tu'me'l nkawina' ex nq'ojina'.¹²Intoq che qoptz'aju' twitz kse'n tqantaq' q'aq', tojxtoq txqan tkoron toj twi' ex tz'ib'a'n jun tb'i o'kxte ojtzqilte.¹³Toktoq t-xb'alun uk'sa'n toj chik', atoq tb'iju': Aju' Tyol Dyos.¹⁴Lepchqe'xtoq txqanju' ate' toj kya'j ti'j, tok kyxb'alun tz'umin sed, saq ex ẍnu'l, ex ate'ktz kyi'j chej saq kyi'j.¹⁵Intoq etz jun k'uẍtx'e'nb'il jqu'n twitzte toj ttzi, tu'n kyok tk'ixb'sa'n nimaqtnam. Kkawil kyib'aj tuk'i'l tb'ar k'uxb'il. Ex aku' kb'ajel pch'unkye ub'a tu'n tqan tu'n tel b'in yek'b'ilte kuw ttx'u'jil Dyos nimtipumal.¹⁶Tz'ib'a'ntoq tb'i toklen ti'j t-xb'alun ex ti'j tkux kjalu: Nimaqkawil kye nimaqkawil ex Kyajaw nimaq kyoklen.

¹⁷Ex wile' jun anjl wa'ltoq tib'aj q'ij, nxi' t-ẍch'i'n kuw kye kykyaqilju' pich' ch'yol txkupqe' inche lipan twitz kya'j, intma'n kjalu: ¡Kukytzaje' toju' ninwan tu'n Dyos,¹⁸tu'ntzun kych'yo'ne' ti'j kychib'jil nimaqkawil, e'kynejenel xjal te q'oj ex kychib'jil ichan kuwqe' te q'oj, e'kychib'jil chej exqe' te'kx kyi'j chej, kychib'jil kykyaqil: e'tzaqpi'nqe' ex lq'o'n majin, ch'i'n kyoklen ex nimaq kyoklen!, chij.

¹⁹Wile' txkup exqe' nimaqkawil twitz tx'otx' kyuk'i'l kyxjal te q'oj, matxitoq b'aj kyb'u'yi'n kyib' tu'n kyq'ojin ti'ju' tokxtoq ti'j chej ex kyi'ju' txqan t-xjal lepchqe'k ti'j.²⁰Tzyetu' txkup tuk'i'lxi' chalyol pakb'al matxitoq che b'ajtb'incha'n techlal ex b'a'nq'ob'aj twitz. Kyu'ntzu'n techlal lu matxitoq che b'aj t-sb'u'n chalyol pakb'alju' xjal b'jo'k techelju' txkup kyi'j ex ek'ulun teju' tilb'ilal. E'xi'tzun xonju' txkup tuk'i'lxi' chalyol pakb'al itz'qe'x toju' q'aq' njab' jank'anta' q'ol.²¹Aye'tzu'n txqantl eb'aj kyim tu'n k'uẍtx'e'nb'il intoq etz toj ttziju' tojxtoq ti'j chej, ex b'ajx ch'yo'n kychib'jil kyu'n pich' ch'yol txkup. Aju' kab'k'al lajnaq (1,000) ab'q'i

¹Wile' jun anjl xi'toq tku'tz twitz kya'j q'i'ntoq talja te tjpelu' jul jaloja t-xelo ex q'i'n jun nin xpatx'k'uxb'il tu'n.²Aju' anjl lu kub' t-xmo'n wakxkan, ju' ojtxi' kan aju' Tajaw il ex Tajq'oj Dyos, kyej tk'lo'n kab'k'al lajnaq (1,000) ab'q'i toj xpatx'k'uxb'il.³Ku'x t-xon toju' jul jaloja t-xelo, jakyaja' tjpu'n ex oktq'o'n jun techel ti'ju' tjpel tu'n lalun sb'untl kyi'ju' nimaqtnam tzmax ajtjapun kab'k'al lajnaq (1,000) ab'q'i, tu'n tel tzaqpi'n jte' q'ij ajtjapun tq'ijlalil lu.

⁴E'wile' q'uqb'il, jaq'uqlqe'toqu' matxitoq kyk'am kyoklen tu'n kyok xjal toj xjel kyu'n. Ex e'wile' kyanmiju' ojetoq b'je'l tx'emu'n kywi' tu'n tpaj q'uqlok kyk'u'j ti'ju' t-xnaq'tzb'il Jesus ex tyol Dyos. Min ek'ulun teju' txkup ex te tilb'ilal, ex min kyaj tu'n toku' techel txkup ti'j kyplaj mo ti'j kyq'ob'. Ex wile' e'jaw anq'intl ex e'kawin kab'k'al lajnaq (1,000) ab'q'i tuk'i'l Krist.⁵Ayekye' tnejelju' tu'n kyjaw anq'in, min eb'jaw anq'in txqantl kyimni toju' kmoj lu, tzmaxi'j tb'aju' kab'k'al lajnaq (1,000) ab'q'i.⁶¡Tzalajb'il kyeju' ate' kyxolju' che jawil anq'in toju' maj tnejel, qu'n xjan tnamqe'! Mixti' toklenju' tkab' kamik kyi'j, che okyel te ajb'el te Dyos ex te Krist, ex che kawil tuk'i'l toju' kab'k'al lajnaq (1,000) ab'q'i.

⁷Tb'ajlenxi'tzun kab'k'al lajnaq (1,000) ab'q'i, k'eletz tzaqpi'n Tajq'oj Dyos toju' ja jpu'na',⁸k'elextzuntz sb'ulkye nimaqtnam kyoju' kyaje' ttx'u'k tx'otx', toj Kok ex toj Makok, nim kyajlal txqan kyxjal te q'oj kse'n tz'awan ttzi ninnjab', che b'ajel tb'uyi'n tu'n kyq'ojin.

⁹Eb'ajtzaj toj tkyaqil twitz tx'otx', b'aj kyb'eti'n ti'jile xjan tnam, exju' nintnam ntk'u'jla'n. Tzajtzun q'aq' toj kya'j ex majx eb'aj tz'e'y tu'n.¹⁰Atzu'n tajaw il matxitoq sub'un kyi'j, xi'xon toju' njab' q'aq' ex q'ol, ja ojetoq txa' xonju' txkup tuk'i'lxi' chalyol pakb'al. Atzuntzu' che tx'iwunjtzela' q'ijtl ex qonik'an toj tkyaqil tab'q'iyil. Ajkyok xjal toj xjel

¹¹Wile' jun nin saq q'uqb'il, ex e'kub'naju' kya'j ex tx'otx' twitzju' q'uqli tib'aj, mixti'x e'ok ka'yi'ntl.¹²Ex e'wile' kyimniqe'tl, nimaq kyoklen ex ch'i'n kyoklen, wa'lqe' twitzju' q'uqb'il; ex e'jqetu' u'j, exu' juntl u'j, aju' u'j te chwinqlal. E'okju' kyimni toj xjel kse'nxu' kyb'inchb'aj exju' tz'ib'a'n kyoju' u'j lu.¹³Kyek'u kyib'ju' eb'aj kyim toj ninnjab' twitz Dyos, exqe' ate'toq toj kynajb'il kyimni; kykyaqil eb'jo'k toj xjel, teyile junjun kse'nx tb'inchb'aj.¹⁴Xi'tzun xonju' kamik tk'i'xi' tkawb'il toju' njab' q'aq'. Atzun tkab' kamikju' njab' q'aq' lu,¹⁵atzuntzu' exa' xona' min tz'ib'a'n kyb'i toju' u'j te chwinqlal. Jun ak'a'j kya'j ex ak'a'j tx'otx'

¹Yajxi'tzuntl wile' jun ak'a'j kya'j ex jun ak'a'j tx'otx'; qu'n mixtoq ti'qe'tlkye' tnejel kya'j exju' tnejel tx'otx', exju' ninnjab'.

²Wile' xjan nintnam, ju' ak'a'j Jerusalen, xi'toq tku'tz toj kya'j twitz Qman Dyos. B'incha'ntoq tib' kse'n jun txin tok t-xb'alun twitzju' q'a xi' tmje tuk'i'l.³Ex nb'iye' jun tzaj yolin kuw tk'etzju' q'uqb'il, ntoq tma'n: Luju' janajla' Dyos kyuk'i'lju' xjal. K'anq'il kyuk'i'l, ex che okyel te ttanam, ex aku' Dyos ktenb'el kyuk'i'l tu'n kyk'ulun te.⁴K'elel t-sun ta'l kywitz, ex lay tzajtl kamik kyi'j, lay che oq'tl, lay tzultl toj kyk'u'j, lay che oktl toj k'ixk'oj; qu'n tkyaqilju' atitoq nejtl, mixti'qe'tl, chij.

⁵Tmaju' q'uqli tib'aju' q'uqb'il kjalu: Tkyaqilju' ti'xti' che nb'incha'ye' ak'a'j, chij. Ex tma: Tz'ib'anku'ya, qu'n ax qekye' yol lu ex ati tu'n tqe tk'u'jlalil, chij.

⁶Yajxi'tzuntl tzaj tma'n weye': B'antnitlte'. Ayine' tnejil ex b'ajsb'il techtz'ib', te ttzajlen qe ex te jakpomela' b'aj. Alkye nk'wajti, kxe'l nq'o'ne' tk'wa' ti'ju' t-xiklil a' te chwinqlal, mya loq'oj.⁷Alkye ma kanb'an, tk'ma' tkyaqil ja'lu te tetzb'il; kk'ulul weye' ex k'okyel ten k'wale' ayine' Dyos.⁸Aye'tzu'n mya'l che xob', exqe' mya okslal, e'myab'a'n kyb'inchb'aj, eb'yol xjal, e'ajpajil, e'ajk'a, e'k'lul witzleb', ex kykyaqilju' chalyol, che kxe'l toju' njab' q'ol ntz'e'y, aju' tkab' kamik, chij.

⁹Ultzun jun kyxolju' wuq anjl nk'etze', ju' q'i'nqetoqu' wuq k'wab'l kyu'n nojnqe' tu'n wuq yajb'il kuwqexi'x te b'ajsb'il ex tma weye' kjalu: Kutzaja, kxel nyek'u'ne' txin ch'inx tmje teya, aju' t-xu'jil Qpoj Tman rit, chij.¹⁰Naku'jtzun toj witzik' tzaj tyek'u'n Xewb'aj Xjan weye', nxitiq'i'ne' anjl twi' jun nin witz ex nimin twe', ex tzaj tyek'u'n xjan nintnam Jerusalen weye', ljo'ntoq tku'tz toj kya'j twitz Dyos.¹¹Intoq qoptz'aju' nintnam tu'n t-spik'umal Dyos; ikytqoptz'ajel se'n jun tb'anil ab'j, kse'n jun tal ab'j jaspe, ẍtilun kse'n kristal.¹²Atitoq jun nintapi nimin twe' ti'jileju' nintnam, ate'toq kab'lajoj tjpel, ex atitoq jun anjl tojunjun tjpel; tz'ib'a'ntoq kyb'iju' kab'lajoj tnej tyajajil Israel kyi'ju' tjpel.¹³Oxe' tjpel ate'toq tu'me'l tjawetzq'ij, oxe' tu'me'l tb'a'nq'ob'kya'j, oxe' tu'me'l tnayajkya'j, oxe' tu'me'l tkub'exq'ij.¹⁴Ate'toq kab'lajoj ab'j te tq'uqlilju' nintapi ti'ju' nintnam, tz'ib'a'ntoq kyb'i kab'lajoj t-apostl Qpoj Tman rit kyi'j.

¹⁵Q'i'ntoq jun ajlaj q'anpwaq echb'ilte nintnam, e'tjpel exju' nintapi, tu'n anjl ntoq yolin wuk'i'le'.¹⁶Juniletoqu' nintnam kyoju' kyaje' ttx'u'k; kyinxtoq tnuqub'u' se'n twitz. Kub' techa'n anjlju' nintnam tu'n ajlaj: junk'al wuqnaq lajoj (2,200 km.) ajlab'; kyinx tnuqub'ju', kyinx twe'ju' ex kyinx twitzju'.¹⁷Xitecha'ntlu' nintapi: tetoq oxnaq jwe' (65) metr, ax echb'ente tu'n anjl kse'nx che echan xjal.

¹⁸Ab'j jaspeyileju' nintapi b'incha'n, atzu'n nintnam q'anpwaqilexi'x, kse'n b'idr ẍtilsa'n.¹⁹Wiqo'n kyi'ju' ab'j te tq'uqlil kyu'n tkyaqil ch'ix tb'anil ab'j: aju' tnejel kyu'n tal ab'j jaspe; atzu'n tkab' kyu'n ab'j sapiro; atzu'n toxi'n kyu'n ab'j akata; atzu'n tkyaji'n kyu'n cha'x ab'j;²⁰atzu'n tjwe'yi'n kyu'n ab'j onise; atzu'n tqaqi'n kyu'n kyeq ab'j; atzu'n twuqi'n kyu'n ab'j krisolit; atzu'n twajxaqi'n kyu'n ab'j b'erilo; atzu'n tb'eljoji'n kyu'n ab'j topasyo; atzu'n tlajoji'n kyu'n ab'j krisopras; atzu'n tjunlajoji'n kyu'n ab'j jasint; atzu'n tkab'lajoji'n kyu'n ab'j amatist.²¹Aye'tzu'n kab'lajoj tjpel kab'lajoj tb'anil xlikqe'; teyile junjun tjpel b'incha'n junx cha'x ab'j. Atzu'n b'e toju' nintam q'anpwaqile, kse'n b'idr ẍtilun.

²²Minti' wile' jun ja te k'u'lb'il toju' nintnam, qu'n a ja xjanju' toj, aku' Qman Dyos nimtipumal exju' Qpoj Tman rit.²³Min nojqelan q'ij ex xjaw tu'n kyk'ant toju' nintnam, qu'n aku' t-spik'umal Dyos nspik'b'ante toj, ex a tkantilju' Qpoj Tman rit.²⁴Che b'etelu' xjal kye nimaqtnam toj t-spik'umalju' nintnam, aye'tzu'n nimaqkawil twitz tx'otx' kxelkyq'o'n kyq'inumal toj.²⁵Lay che jpetu' tjpel te q'ijtl, ex lay ten qonik'an toj.²⁶Kb'ajxel q'o'n kyq'inumal ex kyxa'wanku'yil nimaqtnam te;²⁷ex lay tz'okx jun tz'il toj, ex lay tz'okx jun xjal nb'inchan taq'wix mo sb'ub'l toj. Oqe'kxju' tz'ib'a'n kyb'i toju' tuj Qpoj Tman rit te chwinqlal che okyex toj.

¹Tzaj tyek'u'n anjl jun nin a' ẍnu'l, te chwinqlal tejumajx, weye'. Ẍtiluntoq kse'n kristal, ntoq etz tk'etzju' tq'uqb'il Dyos ex tq'uqb'il Qpoj Tman rit.²Intoq ch'iyu' tze te chwinqlal toju' ninb'e toju' nintnam ex tojunjun plaj ttzi nin a', intoq witzan atl junjun xjaw, kab'lajoj maj nwitzan tojun ab'q'i; atzu'n t-xaqu' tze najb'en q'anb'ilkye nimaqtnam.³Mixti'tlte kjel tjaq' qanb'en taq'wix atzu'. Ktenb'elu' tq'uqb'il Dyos ex tq'uqb'ilu' Qpoj Tman rit toju' nintnam, ex che k'ululju' tmajin te.⁴K'okyelku' kyka'yi'n Dyos, ex ktenb'elu' tb'i tz'ib'a'n kyplaj.⁵Lay ten qonik'an toju' nintnam lu, ex lay tz'ajb'en tqan kantil mo t-spik'umal q'ij toj, qu'n a Qman Dyos q'olte spik'un toj, ex che kawil toj tkyaqil tab'q'iyil. Ch'inx tul jumajtl Jesukrist

⁶Tzaj tma'n anjl weye' kjalu: Ax qekye' yol lu ex q'uqb'an ku'jalqe'. Aju' Qajaw, axju' Dyos nxewsante yol kye t-sanjela, matzaj tchq'o'n tanjl tu'n tyek'u'nteju' tzulkanun lwiy kye tmajin, chij.

⁷¡Chin ule lwiy! ¡Tzalajb'il teju' nxitb'i'n tpakb'al b'a'n q'ma'ntl tz'ib'a'nku'x toju' u'j lu!, chij.

⁸Ayine' Xwan, wile' ex nb'iye' ja'lu. Tetzunj tb'aj nka'yi'ne' ex tb'anb'i'ne', nkub' mejeye' t-xetqanju' anjl tzaj yek'unte tkyaqil ja'lu, tu'n nk'ulune' twitz.⁹Atzunte tzaj tma'n weye': Lalun tb'inchaya lu, tmajin Dyos qinwe', kse'nx aya ex kse'nqe' t-sanjelal Dyos, ttzika mo titz'ina, ex kse'nqe'ju' nxikyb'incha'n tz'ib'a'n toju' u'j lu. K'uluna te Dyos, chij.

¹⁰Ex tzaj tma'n weye': Lalun kub' tjpu'na tpakb'al q'ma'ntl toju' u'j lu, qu'n ch'inxtl kyjapun.¹¹Xk'eku' b'inchal taq'wixju' qa ljo'nx tb'inchan taq'wix, exu' xjal tz'il, tz'ilsamtib' kukxju'; atzu'n b'a'n tchwinqlal, q'onk tilil tu'n tb'inchante b'a'n, exju' okslal q'onk tilil tu'n t-xjansantetib', chij.

¹²Luqine' chin nul, ex tzul wiq'i'ne' oyaj kxe'l nq'o'ne' teyile junjun kse'nxju' tb'inchb'aj.¹³Ayine' tnejel ex mankb'il techtz'ib', t-xetnejel ex te b'ajsb'ill.

¹⁴Tzalajb'il kyeju' nkytxjo'n kyxb'alun tu'n tten kyoklen ti'ju' tze te chwinqlal ex tu'n tb'ent kyokx kyoju' ttzi nintnam.¹⁵Aye'tzu'n b'inchal myab'a'n che kjelten ti'jxi', aye' nche k'a'n, e'ajpajil, eb'yol xjal, e'k'lul witzleb' ex kykyaqilju' majx kgan tu'n kysb'un.

¹⁶Ayine' Jesus, matzaj nchq'o'ne' wanjle' tu'n tb'ajx tma'n tkyaqil ja'lu kye okslal. Ayine' t-xul tyajajil Dab'i. Ayine' che'w nxi'x qoptz'aj te prim, chij.

¹⁷Nkyma'n Xewb'aj Xjan tuk'i'l t-xu'jil Qpoj Tman rit kjalu: ¡Kutzaja! Ex ikx alkye ma b'inte, q'manx: ¡Kutzaja! Chiku'. Ex alkye nk'wajti ex tajb'il tk'wa', kuttzaj tu'n tk'wan naqkukx ti'ju' a' te chwinqlal.

¹⁸Kykyaqilju' mache b'inte tpakb'al q'ma'n toju' u'j lu, kxe'l nma'ne' kye: Qa ati jun majaw tch'isa'ntl tib'aj, ktzajel tq'o'n Dyos yajb'il tib'aj nimxi'x kyetwitzu' q'ma'n toju' u'j lu.¹⁹Qatzun ati jun matz'el tiq'i'n ti'ju' tpakb'al q'ma'n toju' u'j lu, k'elel tiq'i'n Dyos toklen ti'ju' tze te chwinqlal ex toju' xjan nintnam tz'ib'a'n toju' u'j lu.

²⁰Intma'nju' nchik'b'ante ja'lu, kjalu: Axxi'x, luqine' chin nul, chij.
Ikyxwitju'. ¡Kutzaja Wajaw Jesus!

²¹Tenxwit t-xtalb'il Qajaw Jesus kyib'aje' kykyaqile'.

Bible Society in Guatemala

https://app.library.bible/content/aea9d9099feb3a24