Nehemiah8
1सतमा महीना के पहिला दिन, इस्राएल के सभे लोग जल फाटक भीर बनल चौराहा में लोगवन के भारी भीड़ जमा हो गेल। ओखनी शास्त्री एज्रा से ऊ व्यवस्था के किताब के कुंडल पत्र निकाल के ले आवेला कहलन जेकरा मूसा लिखलन हल, आउर जेकरा यहोवा इस्राएलियन के इनकर विधियन आउर नियम के मानेला देलन हल। 2शास्त्री एज्रा, जे भवन में बलिदान चढ़ा के परमेश्वर के सेवा करऽ हलन, व्यवस्था के बाहरे निकाल लईलन आउर एकरा सभे आदमी के सामने पेश कईलन, मरद आउर औरत दूनो के, आउर जे लईकन एकरा पढ़ल जाय पर एकरा समझ सकल हल। ओखनी एकरा ओही साल के सतमा महीना के पहिला दिन कईलन। 3ओही जईसन ऊ मूसा के व्यवस्था के किताब, जे चमड़ा में लपेटल हल, के भोर के पूरा समय जल फाटक भीर वाला चौराहा पर जोड़-जोड़ से पढ़ते रहलन। ऊ एकरा सभे आदमी के सामने पढ़लन, दूनो मरद आउर औरत आउर लड़कन के सामने, जे एकरा पढल जाय के उमर में एकरा समझ सकऽ हल। आउर सभे लोग ऊ विधियन के ध्यान से सुनलन जे कुंडल पत्र पर लिखल हल।4शास्त्री एज्रा लकड़ी के एगो ऊँचा चबूतरा के ऊपर खड़ा होलन जेकरा आदमी लोग येही मकसद ला बनईलन हल। ओकर दाहिना पट्टी मत्तित्याह, शेमा, अनायाह, ऊरिय्याह, हिल्किय्याह आउर मासेयाह खड़ा हलन। आउर उनकर बामा पट्टी पदायाह, मीशाएल, मल्किय्याह, हाशूम, हशबद्दाना, जकर्याह आउर मशुल्लाम खड़ी हलन।5तब एज्रा सभे आदमी से ऊपरे चबूतरा पर खड़ा होलन जेकरा से हर कोई उनका देख सकतन। ऊ मूसा के कानून के कुण्डलपत्र के खोललन, आउर अईसन करे घड़ी सभे लोग खड़ी होलन।6तब एज्रा यहोवा महान परमेश्वर के धन्य कहलन, आउर सभे लोग हाथ उठईलन ई दिखावे ला कि ऊ उनका जौरे प्रार्थना कर रहलन हे। उनकर प्रार्थना के अन्त में ओखनी कहलन “आमीन!” तऽ ऊ सभे जमीन पर मुँह के भरे गिर के प्रणाम कईलन, आउर यहोवा के आराधना कईलन। 7तऽ येशुअ, बानी, शेरेब्याह, यामीन, अक्कूब, शब्बतै, होदिय्याह, मासेयाह, कलीता, अजर्याह, योजाबाद, हानान, पलायाह, इन सब लेवीयन, मूसा के व्यवस्था के मतलब ऊहाँ खड़ा लोगवन के समझईलन।8ऊ परमेश्वर के व्यवस्था के कुण्डलपत्र से साफ-साफ पढ़लन आउर ओकर मतलब समझईलन, करऽ से आदमी समझ सकतन कि एज्रा आउर दुसरका पढ़ रहलन हे।9तऽ आदमी व्यवस्था के बात सुन के उदास होके रोबे लगलन। तऽ नहेम्याह, जे राजपाल हलन याजक आउर शास्त्री एज्रा आउर लेवी जे लोगवन के मतलब के समझा रहलन हल, ओखनी सभे आदमी से कहलन, आज एगो परव के दिन हे जेकरा में तोहनी अपन परमेश्वर यहोवा ला पवित्र हे आराधना करे के चाही। येहिसे शोक नऽ करऽ आउर नऽ ही रोवऽ!10तब नहेम्याह उनका से कहलन अब घरे जा, कुछ बढ़ियाँ खाना खा, आउर कुछ मीठा पियऽ। आउर एकरा में से थोड़ा ऊ लोग के बाँट दऽ जे बढ़ियाँ खाना आउर मीठा रस के खरचा नऽ उठा सकऽ हथन, काहेकि आज हमनी के प्रभु के आराधना करे लागी एगो अलग करल गेल पवित्र दिन हे। येहिगुने शोक मत करऽ, काहेकि कि यहोवा के आनन्द तोहरा मजबूत गढ़ हे।11लेवियन ऊ आदमी से भी जे रो रहलन हल चुप होवे लागी कहलन, आज के दिन पवित्र हे! येहिला चुप रहऽ। कपसऽ नऽ।12ई बजह सभे लोग खाई आउर पिये आउर जे कुछ उनकर पास हल ओकरा जरूरतमंद लोगवन के बाँटे लागी घरे गेलन आउर ऊ बहुत जादे खुश हलन, काहेकि ऊ शब्द के मतलब समझ गेलन हल जेकरा एज्रा पढ़लन हल आउर दूसरा उनका समझईलन हल।13ऊ सतमा महीना के दूसरा दिन, सभे आदमी के कुल वंश के अगुवन आउर याजकवन आउर लेवियन, शास्त्री एज्रा से भेंट कईलन। ऊ व्यवस्था के गौर से पढ़ेला चाहऽ हलन जेकरा यहोवा मूसा के देलन हल। ई ओकरा अच्छा से समझे ला चाहऽ हलन।14ऊ सिखलन कि व्यवस्था में कहल गेल हल कि यहोवा मूसा से कहलन हल कि सतमा महीना के एगो परव के घड़ी इस्राएलियन के झोपड़ियन में रहे के आज्ञा देतन। ई येहिसे होल कि उनका याद रहे कि उनकर खानदान मिस्र छोड़ला के बाद जंगल में से जईते घड़ी झोपड़ी में रहलन हल।15ओखनी ई भी सिखलन कि उनका अपन सभे नगरवन आउर यरूशलेम में सभे से जादे ई परचार करे के चाही कि लोग के पहाड़ी पर जाय के चाही, आउर डँहुड़ियन के काटे के चाही। ई जैतून, तैलवृक्ष, मेंहदी, खजूर आउर छायादार वृक्षवन में से रहे। ऊ ई डँहुड़ियन के लाबे ला होत आउर परव के घड़ी रहे लागी झोपड़ियन बनावे ला होत। चामपत्र में येही आज्ञा देवल गेल हल।16ई वजह से ओखनी नगरवन से डँहुड़ियन के काट के लाबे ला निकल गेलन आउर ओकरा अपना ला झोपड़ी बनावे लागी ले अईलन। ओखनी अपन घरे के चौकोर छत पर, अपन अँगना में, परमेश्वर के भवन के अँगना में जल फाटक भीर चौराहा पर, आउर एप्रैम फाटक भीर चौराहा में झोपड़ियन के बनईलन।17बाबेल के कैद से लौटे वाला सभे इस्राएलियन झोपड़ी बनईलन आउर एक सप्ताह तक ओकरा में रहलन। जखनी नून के बेटा यहोशू उनका ई जगह में आवेला अगुवाई कईलन हल जहिया से अखनी तक इस्राएली लोगवन कहियो भी अईसन परव नऽ मनईलन हल। अईसन ऊ पहिला बार कर रहलन हल। आउर लोग बड़ी जादे खुश हलन।18पर्व के पहिला दिन से आखिर दिन तक रोज ऊँचा बोली में एज्रा परमेश्वर के व्यवस्था के कुण्डलपत्र से लोगवन के पढ़ के सुनईलन। ओखनी सात दिन तक परव मनयईलन। अठमाँ दिन, ओखनी सभे लोगवन के एक जौरे आवेला कहलन जेकरा से ऊ परव के खतम होवे पर एगो समारोह के आयोजन कर सकतन। कुण्डलपत्र में येही आज्ञा देवल गेल हल।
Bridge Connectivity Solutions Pvt. Ltd.