Luke5
1एक दिन जखनी यीशु के अगल बगल में ढेरमनी लोग के भीड़ जुटल हल आउर उनका परमेश्वर के शुभ समाचार के शिक्षा देते सुन रहलन हल, ऊ घड़ी ऊ गन्नेसरत के तलाव के किनारे पर खड़ा होल हलन। 2ऊ ऊहाँ तलाव के किनारे पर मछली पकड़े वाला दूगो नाव के देखलन। मल्लाहवन ऊ नाव के छोड़ के अपन मछली पकड़े वाला जाल के धो रहलन हल।3ऊ दूनो नाव में से यीशु एगो पर चढ़ गेलन, जौन कि शमौन के हल। यीशु ऊ नाव के तट से थोड़ा दूर हटा लेवे ला विनती करलन। फिन यीशु नाव पर बईठ गेलन आउर ओज्जा से ऊ भीड़ के शिक्षा देवे लगलन।4जखनी ऊ शिक्षा देवे लागी खतम कर लेलन, तऽ ओकर बाद ऊ शमौन से कहलन “अपन नाव के गबड़ा पानी में ले चलऽ आउर मछली पकड़े लागी अपन जाल पानी में डालिहऽ।”5शमौन जबाब देलन, “हे, गुरु जी! हम पूरा रात भर कड़ा मेहनत करली आउर तईयो हम एक्कोगो मछली नऽ पकड़ली। बाकि हम फिनो से अपन जाल के डालम काहेकि तूँ हमरा से अईसन करे ला कहलऽ हे।”6येहिगुने शमौन आउर ओकर साथियन अपन जाल के डाललन आउर ओखनी एतना जादे मछली पकड़लन कि ओकर जाल फटे लगल।7ओखनी दोसर नाव में चढ़लन अपन मछली पकड़े वाला साथियन के इशारा करलन कि आके ओकर मदत करतन। येहिगुने ओखनी आके दूनो नाव के मछलियन से एतना भर लेलन कि नाव डूबे लगल।8ई देख के, शमौन पतरस यीशु के सामने ठेहुनियाँ मार के कहलन, “हे प्रभु कृपा कर के हमरा विजुन से चल जा काहेकि हम एगो पापी आदमी ही।”9ऊ अईसन येहिगुने कहलन काहेकि बड़ी मछलियन जे ओखनी पकड़लन हल ऊ ओकरा पर अचरज करलन।10एक दिन, जब्दी के दूनो बेटा, याकूब आउर यूहन्ना, जौन शमौन के साथी हलन बड़ी हैरान होलन। बाकि यीशु शमौन से कहलन, “मत डेरा! अखनी तक तूँ मछलियन के जमा करलऽ हे, बाकि अब से हमर चेला होवे लागी तूँ लोगवन के जमा करवऽ।”11येहिगुने जखनी ऊ आदमी नाव के किनारा जमीन पर ले अईलन तऽ ओकर बाद ओखनी अपन मछली पकड़े के रोजगार के आउर बाकि सभे कुछ के छोड़ देलन आउर यीशु के अनुशरण करलन।12यीशु नजदीक के शहरवन में से एगो में गेलन ऊहाँ एगो आदमी हल जौन एगो कोढ़ रोग से पीड़ित हल। जखनी ऊ यीशु के देखलन तऽ ऊ उनका भीर जमीन पर ठेहुनियाँ मार के उनका प्रणाम करलक। ऊ उनका से विनती करलन कि, “हे प्रभु, दया कर के हमरा शुद्ध करऽ! हम जानऽ ही कि जदि चाहवऽ तऽ तूँ हमरा चंगा कर सकलऽ हे!”13फिन यीशु अपन हाथ बढ़ा के ऊ आदमी के छू लेलन। ऊ कहलन, “हम तोरा शुद्ध करे ला चाहऽ ही! हम अखनी तोरा चंगा करऽ ही!” आउर तुरन्त ऊ आदमी चंगा हो गेलन अखनी ओकरा कोढ़ नऽ रहल!14तऽ यीशु ओकरा से कहलन, “केकरो से नऽ कहिहऽ कि हम तोरा चंगा करली हे। सभे से पहिले जा के अपने आप के कोई याजक के देखावऽ जेकरा से ऊ तोर जाँच करतन आउर देखतन कि अखनी तोरा कोढ़ नऽ हे। संस्कार के रूप में फिन से शुद्ध होवे ला ऊ बलिदान लेके आवऽ जेकरा चढ़ावे ला मूसा आज्ञा देलन हे, ओकरा बलिदान करऽ कि, ओकरा पर गवाही होवे।” 15बाकि एकर अलावे यीशु ऊ आदमी के कईसे चंगा करलन हल एकर बारे में आउर जादे लोगवन सुन लेलन। एकर नतीजा बड़ी भीड़ येहिगुने हो गेल कि यीशु के शिक्षा देते सुनतन आउर ऊ ओकरा ओकर बेमरियन से चंगा करतन।16बाकि ऊ जादेतर ओखनी से दूर जा के सुनसान जगह में प्रार्थना करते रहऽ हलन।17एक दिन जखनी यीशु शिक्षा दे रहलन हल, तऽ फरीसी पंथ में कुछ आदमी आउर यहूदी व्यवस्था के कुछ विद्वान शिक्षक बगल में बईठल हलन। ओखनी गलील आउर यहूदिया प्रान्त के बड़ी गाँव आउर यरूशलेम से आउर यहूदिया राज के दोसर नगर से अईलन हल। ओही घड़ी, प्रभु लोगवन के चंगा करे के सामर्थ यीशु के दे रहलन हल।18जौन घड़ी यीशु ऊहाँ पर हलन, कुछ लोग एगो आदमी के लेके अईलन जेकरा लकवा मारले हल। एगो खटिया पर ओखनी ऊ आदमी के उठईले हलन आउर ओकरा ओखनी घर में ले जा के यीशु के आगे सुतावेला कोशिश कर रहलन हल।19बाकि काहेकि ऊहाँ पर घर में आदमियन के एतना जादे भीड़ हल, कि ऊ ओकरा भीतरे ले जा नऽ पा रहल हल। येहिगुने ऊ बाहरी वाला सीढ़ियन से ऊपरे बराबर छत पर चढ़ गेलन। ओखनी एगो छेद बनावे लागी छत के कुछ खपड़वन के हटा देलन। फिन ओखनी ऊ आदमी के ओकर खटिया पर सुतलही ऊ छेद के सहारे भीड़ के बीच में उतार देलन। ऊ ठीक सामने यीशु भीर नीचे उतर गेलन।20जखनी यीशु ई जान लेलन कि ओखनी ई विश्वास करलन हे कि ऊ, ऊ आदमी के चंगा कर सकलन हे, तऽ ऊ ओकरा से कहलन, “हे दोस्त, हम तोर पापवन के मांफ करऽ ही!”21व्यवस्था के गुरु आउर फरीसी अपने में सोच विचार करे लगलन, “अईसन कह के ई आदमी परमेश्वर के अपमान करऽ हथन! परमेश्वर के अलावे कोई भी पाप के मांफ नऽ कर सकलन हे!”22यीशु अपन मन जानऽ हलन ऊ का सोच रहलन हल। येहिगुने ऊ ओखनी से कहलन, “हम जौन कहली हे ओकरा पर तोहनी के सवाल नऽ करे के चाही!23ईहाँ पर कुछ अईसन होल हे जेकरा बारे में हम चाहऽ ही तूँ गौर कर के सोच विचार करऽ। का कहेला सहज हे, हम तोर पाप के मांफ करऽ ही कि उठऽ जा आउर चले बुले लगऽ? तूँ सोचवऽ कि ई कहेला हम तोर पापवन के मांफ करऽ ही आसान हे काहेकि एकरा में कोई देखावल सबूत के जरुरत नऽ हे।24बाकि हम चाहऽ ही कि तूँ जान लऽ कि परमेश्वर हमरा, आदमी के बेटा के, धरती पर लोगवन के उनकर पाप के मांफ करे के अधिकार देलन हे” एकरा देखावे लागी, हम ई आदमी के उठहूँ ला भी कहम फिन ऊ, ऊ आदमी से जेकरा लकवा मारले हल बोललन, “हम तोरा से कहऽ ही, उठ जा, अपन खटिया उठावऽ आउर अपन घरे चल जा!”25तुरन्त ऊ आदमी चंगा हो गेलन ऊ, ऊ सभे के सामने ही उठ के खड़ा हो गेलन। ऊ, ऊ खटिया के उठईलन जेकरा पर ऊ सुतल हलन, आउर परमेश्वर के बड़ाई करते ऊ घरे चल गेलन।26ऊहाँ मौजूद सभे कोई दंग रह गेलन! ओखनी परमेश्वर के बड़ाई करलन आउर जौन ओखनी यीशु के करते देखलन हल ओकरा पर ऊ पूरा तरह से डरल हलन। ऊ कहते रहलन, “हम आज अचरज बात देखली हे!”27एकर बाद फिन यीशु ऊ जगह के छोड़ देलन आउर ऊ लेवी नाम के एगो आदमी के देखलन जौन रोमी सरकार लागी लगान वसूलऽ हलन। ऊ चुंगी के चौकी पर बईठल हलन जहाँ सरकार के जरुरी लगान देवे ला लोग अईते रहऽ हलन यीशु ओकरा से कहलन, “हमरा साथे आवऽ आउर हमर चेला बन जा!”28बाकि लेवी अपन काम के छोड़ के यीशु के साथे हो गेलन।29बाद में लेवी अपन घरे यीशु आउर ओकर चेलवन लागी एगो बड़का भोज तईयार करलन। ऊहाँ पर लगान वसूले वाला आउर दोसर लोगवन के एगो बड़का भीड़ हल जौन उनका साथे भोजन कर रहल हल।30तऽ कुछ लोग जौन फरीसी पंथ के हलन, आउर ऊ ओखनी में कुछ यहूदी शास्त्री भी शामिल हलन, यीशु के चेलवन से शिकायत करलन। ओखनी कहलन, तोहनी के लगान वसूले वाला आउर दोसर पापियन के साथे खाय पिये के नऽ चाही।31तऽ यीशु ओखनी से कहलन, “जौन आदमी चंगा हे ओकरा वैद्य हाकिम के जरुरत नऽ हे। जौन आदमी बेमार हे ओकरा वैद्य हाकिम के जरुरत हे।32ओईसहीं, हम स्वर्ग से ऊ लोगवन के नेऊता देवे लागी नऽ अईली हे जौन समझऽ हे कि ऊ हमरा विजुन अावे ला धर्मी हथन। एकर उल्टा, हम ऊ लोगवन के नेऊता देवे ला अईली हे जौन जानऽ हथन कि ऊ पापी हथन आउर ऊ अपन पापी वर्ताव से मन फिरा के हमरा विजुन आवऽ हथन।”33तब फरीसी आउर शास्त्री यीशु के जबाब देलन, “यूहन्ना बपतिस्मा देवे वाला के चेलवन हमेशा उपवास रहऽ हथन आउर प्रार्थना करऽ हथन फरीसियन के चेलवन भी अईसने करऽ हथन बाकि तोर चेलवन खईते आउर पीते रहऽ हथन! ऊ दोसर जईसन उपवास काहे नऽ करऽ हथन?”34यीशु जबाब देलन, “वियाह के घर में कोई भी दूल्हा के दोस्तवन के ऊ घड़ी ला उपवास करे ला नऽ कहऽ हथन जखनी ला वियाह के खुशी अखनी ला चल रहल हे!35बाकि कोई दिन दूल्हा अपन दोस्तवन के साथे नऽ रहतन। तऽ, ऊ घड़ी ओखनी उपवास रहतन।”36फिन यीशु समझावे लागी दोसर दृष्टान्त भी देलन कि ओकर का मतलब हे। ऊ कहलन, लोग कहियो नया कपड़ा में से एगो कपड़ा के कोर फाड़ के ओकरा पुरनका कपड़ा में पेवन्द नऽ जोड़ऽ हथन कि ओकरा ठीक करतन। जदि ओखनी अईसन करतन, तऽ ओखनी नया कपड़ा के फाड़ के ओकरा बर्बाद कर देतन आउर नया कपड़ा से निकसल कपड़ा के कोर पुरनका कपड़ा से मेल नऽ खा हे।37आउर कोई भी नया निचोड़ल गेल दाखरस के ओकर भण्डार में जमा करे ला पुराना चमड़ा के थैला में नऽ भरतन। जदि कोई अईसन करलन, तऽ चमड़ा के थैला खराब हो जायेत काहेकि जखनी नया मदिरा उफनत फैलत तऽ ओकरा में खिचाव नऽ होत तखनी ऊ चमड़ा के थैला बर्बाद हो जायेत आउर मदिरा भी बर्बाद हो जायेत काहेकि ऊ, ऊ दह जायेत।38एकर उल्टा, नया मदिरा के नया चमड़ा के थैला में भरे के चाही।39ओखनी जौन खाली पुरनका मदिरा के पियऽ हथन ऊ नया मदिरा के चिखे लागी नऽ चाहऽ, हथन काहेकि ऊ सोचतन कि, पुरनका मदिरा ही बड़ी बढ़ियाँ हे!
Bridge Connectivity Solutions Pvt. Ltd.