Luke23
Yish a bos bu Pilaat
1Nkim mubaan kakat baan, kieen baaniaan a bos bu Pilaat,2andaan, katetsh baan mbokanswoong’l ane: “Tamaatotaan mwoot aku esashieeng’s babiyiit, es’bakiny ane kabalieek ilaam i kum mbi kamotsh esatwoot ane ntshaan kum Kilist.”3Pilaat kamuulaan ane: “Ween u Kum a ben Yudey?”Yish kankal’laan ane: “Ntshween untwoot weenamieet.”4Pilaat kalwoosaan batwootsh banen i misel mi bât ane: “Kanamwoony mwoot aku i dweey di mbè ta ndiaak mbi.”5Ek baan, kaneeng baan dweey di baan ane: “Mwoot aku esaphek’l bât mato i twootshaan! Aabuutsh ben a Yudey bakim! Atetsh to Ngaalel shaang ayè.”
Yish a bos bu Helood
6Amwok Pilaat mwooy maku, kawuulaan ane: “Mwoot aku muna Ngaleel?”7Anyeephaan ane, muna yaas’i Helood, kantomaan a bol Helood, ikaam i mbè Helood ambaak a Yelushaleem a matu makun.8Helood kawokaan nshaas amwonyaan Yish, ikaam i mbè ambaak i nyiing amweeph, ambaak amwook nswoos mwaan bukal, kamotsh ambaak i nyiing mbè ankes makam’l.9Helood kamuulaan mwooy mabwiik; ek Yish kankal’l dweey mbè dimotsh mbi.10A itaang ikun bakum inen baan’i bayeeph mikieetsh bambaak bayeem andaan, besaswoong’l Yish.11Ngwoon Helood i maseleey maan bambaak besansey, bamansesel ambis akun kandiing baan ndel mu phaam. Helood Kakasaan antom abol Pilaat.12Lasu lantshiin Helood baan’i pilaat kakas’baan bukidj bubaan, a bukoos kabambaak awok’s mbi.Bamphuuns Yish iwa
13Pilaat kabokaan batwootsh banen mbel, bakom’l akol a bât bakim,14es’balwoos ane: “Bwanyiy i mwoot aku, busanswoong’l ane esaphek’l bât mato. Ndamamuul a bos bwiin, kandesamon i bweph mbè bumotsh bus’bwiin answoong’l.15Helood i yaan kamon i bweph bu mbè bandiaak mbi, ntshiin amaan tatom’siaan. Mwoot aku mbok es’bwiin amon, kaaph i bweph bunkelaan ikaam i mbè bandiaak mbi.16Ngwoos ndel’kambol mikaaph ambis akun baneph anieem’l.” 18Ek twoong a bât katetsh baan abok minwool besatwoot ane: “Ndieek anyeeny! Butalieem’s Banaba!”19(Banaba ambaak a mwaat ikaam i mbè ambaak adiaak mwoot a bol bukun.)20Ek Pilaat, ambaak i nyiing ashaang’l Yish, kalwoosaan twoong a bât kamotsh.21Ek bât kabol baan minwool ane: “Mbak anyeeny a ntey mu kek! Mbak anyeeny a ntey mu kek!”22Pilaat kabawuulaan phweet anseet ane: “Ankel dweey key dibey? Kanamwoony i dweey dibey dilaan awees mbi. Nambokambol mikaph, namanieem’l.”23Ek bât kakas baan aneeng dweey a ngon ane badiaak Yish a dik di ntey mu kek. Mwooy ma baan kambok’l maan latok.24Ngwoon Pilaat kabat’laan ilaang, katwootaan ane, dweey dinwoom baan dikeph’t mbok es’bwiin amuk.25Pilaat kalieem’laan mwoot ambaak baan alwoom a ngat a mbûl a mwaat ambaak baan bayaat ikaam i buphaang’t kamotsh ambaak adiaak mwoot a ituum; ek aan kabayekaan Yish ikaam i mbè bakel mbok ambaak baan amuk.Yish a dik di ntey mu kek
26Mbokun ambaak mayol mielaatsh Yish, kayaat baan nuung a diin di Simoon nshi Sileen, ambaak esiyi to bwaany, kamwiik baan ntey mu kek a inyakiaan, kamulaataan a mbis a Yish.27Twoong minen a bât kanaphiin a mbis, ngwoon baat bambaak besalel bilel, besabok lakeny idik di Yish.28Yish kakaph’diaan bos baan, kabalwoosaan ane: “Baat ba Yelushaleem, kabulel’k idik dieem mbi! Ek, lelanyeeny idik diin i bân biin.29Ikaam’i mbè, matu mekiiy mel atwoot bât ane: ‘Nshaas mwaali bikut biaaph mbè kabikwook’dj amon bân mbi, biaaph mbè kabitshik abot mbi, akol bakun baaph mbè kabatshik anyoom’s bân mbi!’30A mbis akun bât batèkatètsh alwoos mikwootsh minen ane: ‘Tanyaam’k anyeeny!’ I takwootsh takieek ane, ‘Taphweedj anyeeny!’31Mbè besakel mwooy maku makim a ntey mu maas ngo, ek el muun awoom bakwook’dj mukel mbony?”32Kalaat baan kamotsh biphaang’t bi baluung maphel biphey, ikaam i mbè babadiaak akol a Yish.33Antwool baan a imbet is’baan abok mbel ane: “Ikodj i koph a ntshwey”, mayol kabak baan Yish bikwook a mio akol mateem a dik di ntey mu kek akol biphaang’t biphey, motsh a lo la ikat, iyiek’dj a lo la ikos.34Yish katwootaan ane: “Taat, bawok’s mweeng, ikaam i mbè kabesayeeph dweey dis’baan akel mbi. Mayol kabok maan mpwiim ikaam iyeeph mbè ane nyeeny elatol mindel miaan.”Kaneph baan adikaph’s banamieet.35Bât bambaak bayeem bes’balieen. Bandwoong nsel ba ben Yuud bambaak besambos kot, besanwool ane: “Aan ambaak esaphaans ibiek’dj, adiphaans mbè ntshaan Kilist aasol abol Ntshièm!”36I mayol kamotsh kambos maan kot, kiy maan akolaan, kamweek maan mân ma kodj,37mayol kanwool maan ane: “Mbè u Kum a ben a Yuud, udiphaans wenamieet!”38Kaphuun baan a dik di ntshwey mwaan ane: “AKU NTSHAAN KUM A BEN A YUUD.”39Motsh a ndieeng biphaang’t ambaak abak a ntey mu kek katwoonaan Yish ane: “Kantshween Kilist? Kenephaal adiphaans uneph taphaans i biit!”40Ek aku motsh kaphang’saan esanwool ane: “Kusatshiin Ntshièm mbi? I ween u mun iwa mbok minstshiin i mwoot aku.41Mpween mwiit tesamon bimweeny bi mwooy mabey mankel biit, ek mwoot aku kaaph i bweph bunkelaan mbi.”42Kakasaan atwoot kamotsh ane: “Yish, elween aying’l a bunyim bwaa, umpwiph’l i miim!”43Yish kankal’laan ane: “Ikakaam ndesalwoos mbè ane, alwool aku ween ukaalieem a mpaladiis.”
Iwa i Yish a ntey mu kek
44Ambaak itaang yatwool a ndieeng a ndieeng mwaany, mwim’l kadiph muun a shin mikim shaang itaang inseet i ikwook’l. Itaang kayem’tiin mbokatieem. Ilieem imbaak yakaan a Ntuum kabaantsh yiin a ndieeng a ndieeng.46Yish kabokaan dweey dinoon’l ane. “Taat, ndatshik mween mweem a mio miaa.” Atwootaan ngwoon, kawawaan.47Amwoony sès mayol ma Loom dweey diku, kasem’laan Ntshièm, katwootaan ane: “Ikakaam, mwoot aku ambaak mwoot ansek!”48Bât bakim bambaak amon mwooy maku, kakal baan a mambûl mabaan i buphol, mio batshik a mitshwey.49Bakidj bakim babol Yish akol baat bambaakiyi yaan to Ngaleel kayeem’t baan kaany ikaam ilieen mwooy mambaakashaam.Baley Yish
50Ambabaak mwoot a diin di Yosef, ambaak kom’l anen a ben Yuud. Ambaak mwoot ansek i lwook labwiik, aan kambaak alwoong mwooy mambaak bambèy baan baakel mbi. Ambaakiyi to Alimataay, a nuung mu ben a Yuud, ambaak esakwoong’l bunyim bu Ntshièm.52Yosef kieenaan a bol Pilaat, kanwoomaan ndju mu Yish.53Kamukum’laan to ntey mu kek, ambis akun kamukophaan mbwoon, kamubeyaan a yaan yatshim a ngat a mbôk, a yaan yaaph mbè kabatshik aley mwoot mbi.54Ambaak lasu la mataan, lasu lalodj Nsabat lumbaak akolakol.55Baat bambaakieyeentsh i Yish to Ngaleel, kieen baan i Yosef, bambaak besalieen yaan, kamon baan mbok alieedj baan ndju mu Yish.56A mbis akun, kakal baan bos a bol, kalaam baan mananaans akol sedj a alomat ikaam ibak latok la Yish.Ek lasu la Nsabat, kabambaak akel ngun mbi, ikaam i mbè ambaak lasu la ikin. Mbok ambaak mikieetsh mi ben a Yuud.
The Word for the World International