Read Luke 1

Luke1

¹Nsekieem Teophil: Bât babwiik katetsh baan aphuun mikaan mi mwooy makun mambaak makeph’t aphingiit.²Mbok mintshiin atalwoos’dj baan abol bitieen bât ba bukoos to matetetsh, bamwiphil ben a ngun mu dweey di Ntshièm.³Ntshiin akun, namabok lakeny a ntem, aman miim awuul mwooy makun to matetetsh, kabok miim lakeny ikaam iphuuns i maan a bulodj, ween kum Teophil,⁴ikaam i mbè uyeeph ane, mwooy malwoos’dj baan ma makwook.

Lashaang la mibotsh’dj mi Yoon-Mubatiis

⁵Itaang imbaak Helood kum a Yudey, ambabaak ntwootsh a Ntshièm a diin di Sakaliy, ambaak akat nsel mu Abiy. Diin diku disalak shin mikim a Palesitine. Mwam’shaan, Elisabeet ambaak ntshwakaan abol Aloon.⁶Mpween mubaan bambaak bât basek a miish ma Ntshièm, bambaak bamwoom’k i itshiiny mikiètsh mikim baan’i mwooy ma ikin ma Kum.⁷Ek kabambaak i mwân mbi, ikaam Elisabet ambaak ikut, kamotsh mpween mubaan bambaak baman anun.

⁸Lasu liek’dj, Sakaliy ambaakaan esakel ngun mwaan mu butwootsh a miish ma Ntshièm, ikaam i mbè ambaak phweet a baan akel ngun a nsel mwaan.⁹Mbok mintshiin ambaak ikelel i batwootsh banen, aan bambaak bansol a mpwim ikaam iying’l a Ntuum mu Kum ikaam ituum ibel,¹⁰itaang ituum ibel anyem’liin, twoong mikim a bât imbaak isalwoom Ntshièm a mbis buseph bu mbûl a Ntshièm.¹¹Imbet intshiin, ntshol a Ntshièm kasolaan a bol Sakaliy ayeem a lo la ikat la ituum’l i ibel.¹²Sakaliy amonaan ntshol, butet bumangaat.¹³Ek ntshol kanwoosaan ane: “Sakaliy, kutshin’k mbi, ikaam Ntshièm awok ilwoomiaa, mwam’sha Elisabet ayekayeek mwân. Umwekamweek diin di Yoon.¹⁴Ween ukaal i nshaas mubwiik mwalek’s idik diaan, kamotsh bât babwiik bekaal i nshaas a mibotsh’dj miaan.¹⁵Ikaam, aan el’kaal mwoot anen a miish ma Kum. Kelanyo maan aal’k biket bikim bisayaat. El’kaal ayool to i Mween musek a bos bu mbè inanaan kataadj ambot,¹⁶aan el’kalaat mitem mi bân ba Isaleel babwiik abol Kum, Ntshièm a baan.¹⁷Aan el’kieen a bos bu Kum i mween baan’i bunoon’l bi Eliy, ikaam itshik a motsh bataat akol bân, kamotsh akakakal’l mitem mi ben a bwoom’dj ikaam i mbè baal i bwaany bu bât basek; ikaam ilos Kum bât bel akolakol ikaam inyey.”

¹⁸Sakaliy kawulaan ntshol ane: “Dweey diku nadiyeeph mbony? Miim nde inun, mwam’sheem anaang bwiik.”

¹⁹Ntshol kankal’laan ane. “Nde Gabiliyel, namwaak a bos bu Ntshièm, amakantom ikaam itwootiaa kamotsh ashaang’s lashaang laku lasek.²⁰Wok, ween ulashaal kil, kulamon mbokatwoot mbi shaang lasu lelayeem’l mwooy maku, ikaam i mbè ween kuyim’sdj mwooy mieem mbi.”²¹Bât bambaak besakwoong Sakaliy a buseph; kakam’l baan ikaam i mbè aan, amaman suw ibwik a ngat a Ntuum mu Ntshièm.²²Antowaan, kamon mbokatwoot’i baan mbi. Kayeeph baan ane, amamon dweey di makam’l a mbûl a Ntshièm. Ikaam ambaak esatwoot i mio miaan, kashalaan kil.

²³Ambaakaan aman matu maan ma ngun a Ntuum, kakalaan a mbûlaan.²⁴Mataang makieek ambis akun, mwam’shaan Elisabet kiyaan dieem, aan kadisweyaan a ndieeng a ngwôn itaan, katwootaan ane:²⁵“Lieenanyeeny busek bumankes Kum.” “Amuk antey bukut bumbaakankel busony a ndieeng a bât!”

Ntshol esashaang’l mibotsh’dj mi Yish

²⁶A ngwôn ishaam’l i dieem di Elisabet, Ntshièm katomaan ntshol Gabliel a bol bumotsh bu Ngaleel akat Nazaleet.²⁷Abol ilieeng’i ngaat i mbè kayitshik ayeeph nuung imbaak yeek’l ibol Yosef, ntshwakaan abol Davidj. Diin di ilieeng a ngaat i mbè kayitshik ayeeph nuung akun ambaak Maliy.²⁸Ntshol kiying’laan a bol Maliy, kanwoosaan ane: “Maliy wanum, nkit’l mwaliaa! Mweeng mu Ntshièm mwaaliaa; Kum ediaa!”

²⁹Ek lakeny kadiim luun Maliy ikaam i nkieetsh muku, kadiwuusaan ane yum’l iku isalak key.³⁰Ek ntshol kanwoosaan ane: “Maliy kutshiin’k mbi, ikaam mweeng mu Ntshièm mudiaa.”³¹Ween ukaal i dieem, ukabot mwân a nuung, Umwekamweek diin di Yish.³²El’kaal mwoot anen. Bambokambok mbel ane: “Mwân abol Kum a dik, Kum Ntshièm amwekamweek bunyim bu ishanaan Davidj,³³el’kaal kum a yoyoo a ben’a Isaleel, bukum bwaan kabulaal i mom mbi.”

³⁴Maliy kawuulaan ntshol ane: “Dweey diku dilayeem’l mbony, ikaam i mbè miim yaaph nde ilieeng’i ngaat i mbè kayitshik ayeeph nuung?”

³⁵Ntshol amankal’l ane: “Mween musek mukakum a dik diaa, bunoon’l bu Ntshièm bukaal’iaa mun ilwimalwim. Ngwoon, mwân elween abot, bambokambok mbel mwân a Ntshièm.³⁶Lieen, Elisabet mwanyo, iyaan edi dieem di mwân a nuung a bunun bwaan; aan ambaak baan abok mbel ane ikut, ek ngwôn aku wey, iyaan anshaam’l a dieem.³⁷Ikaam’i mbè, kwa dweey mbè dimotsh dinek Ntshièm bunoon’l mbi.”³⁸Iphontshi Maliy kankal’laan ane: “Nde nso abol Kum”, “Bikim bikeph’t mbok antwootween.” A mbis akun Ntshol kanswoolaan, kieenaan.

Maliy anyetaan Elisabet

³⁹A mbis matu makieek, Maliy kakataan kieenaan bwaas a bol bu mikwootsh bu Yudey.⁴⁰Kayiing’laan a mbûl abol Sakaliy, kawuum’laan Elisabet.⁴¹Awok’dj Elisabet yum’l ibol Maliy, i mwân kanying’laan a ngat ikuuniaan. I Elisabet kayolaan tô i Mween Musek⁴²kabolaan nwool, esatwoot ane: “Ween u ngaat ashaak’s aphiing a baat bakim, i mwân el ikuuniaa wey ashaak’s iyaan!⁴³Ek nde nyeeny ikaam i mbè inaan abol Kumieem indieen?⁴⁴Ikaam’i mbè itaang imwook miim yum’liaa a mato mieem, mwân amatoph i nshaas mubwiik a ikuunieem.⁴⁵Nshaas mwaal i mwoot akun amwim’s, ikaam i mbè mwooy makim malwoos’dj baan abol Kum mayekayeem’l!”

Lieem lasem’l la Maliy

⁴⁶Maliy katwootaan ane:“Ntem mweem musasem’l Kum;⁴⁷ntem mweem mudi nshaas a Ntshièm, mwoot amaphaans,⁴⁸ikaam i mbè amuk alieen i mun a ngunaan i nkit’l.Ntshiin mbè, atetsh to lwool mabotsh makim mambokambok mbel ane udi iteem isek,⁴⁹ikaam i mbè Ntshièm a bunoon’l bukim ankes mwooy manen.Diin diaan di di ikin;⁵⁰mweeng mwaan mul’kaal a mabotsh ma bâtbakim besatshiin bukum bwaan.⁵¹Amaakel mwooy manen i lo laan la bunoon’l;amatshaak’dj bât bambaak adiwoot i keny ibey imbaak a mitem mibaan.⁵²Amakum’s bakun bambaak a buum,ek amabaans bât bambaak i nkit’l.⁵³Bât bambaak’i ntshal, amabadiees biket bisek;ek ben budiy amabakas mio bwaang.⁵⁴Amayaas mwootaan Isaleel,kamotsh amayiph’l mweeng mwaan bos a bât besankes ngun,⁵⁵mbok ambaakaan akel ilak i imuk abol mamiit, Abalaphami bân baan yoyoo!”

⁵⁶Maliy amaatwoos i Elisabet phot’a ngwôn iset, ambis akun kakalaan a mbûlaan.

Mibot’dj mi Yoon Mubatiis

⁵⁷Ngwôn ibol Elisabet kayeem’liin ikaam ibot mwân, kabotaan mwân a nuung.⁵⁸Bambaak akolaan i ben ilwootshaan anyeeph baan ane, Kum alak mweeng idik diaan, kawook baaniaan nshaas.

⁵⁹Lasu la inaan, kiy baan ikaam ikel mwân nkaan, bambaak i nyiing amweek diin di Sakaliy, muna ndwey ishanaan.⁶⁰Ek inanaan kakal’laan ane: “Mbi, diin diaan Yoon.”

⁶¹Bamanwoos ane: “Kwa mwoot a ilwootshiin edi diin diku mbi!”⁶²Kawuul baan ishanaan a bisam ane, usamuk bamweek diin key.

⁶³Sakaliy kalwoomaan dibey ikaam iphuun diin, kaphuunaan ane: “Diin diaan Yoon.” I nkimubaan bamakam’l!⁶⁴Itaang ikun intshiin, inem ibol Sakaliy katungiin, katetshaan atwoot kamotsh kasem’laan Ntshièm a ngon.⁶⁵Butet kayaat buun bât bakim bambaak akol a baan; mwooy maku makim bambaak bes’matwoot a mal makim ma mikwootsh mi Yudey.⁶⁶Bât bakim bawok’dj mwooy makun, katetsh baan adiwuus ane: “Mwân aku elaphil nyeeny?” Ikaam’i mbè bunoon’l bu Kum bumbabaakiaan.

Lieem lasem’l la Sakaliy

⁶⁷Sakaliy ishaan abol a Yoon, kayolaan i Mween Musek, katetshaan atwoot mwooy ma bungaang bu Ntshièm ane:⁶⁸“Basem’l Kum, Ntshièm a Isaleel.Ikaam anyiyaas bât baan, abaphaans kamotsh.⁶⁹Aan amanyitalaas kum anoon’l ikaam itaphaans biitbân ba kum Davidj, nsowaan.⁷⁰Mbok atwootsh’diaan a muny mu bangaang ba ikin ba to kaany⁷¹ambaak atayeek ilak ane:el’katashaang’l a mio mi baphis biit akol bât bes’tabim’l.⁷²Amaalak bamaam biit mweeng mwaan,kayiph’laan malak maan ma ikin.⁷³Mbok mintshiin ambaakaan akel kot i mamiit Abalapham,ane, el’kataphaans a mio mi baphis biitikaam inkes ngun i ntem ngon,⁷⁵ikaamieen a bos bwaan a bulodj baan’i ikinmatu miit makim ma mwoony.

⁷⁶“I ween mwânieem, babokabok mbel ane, ngaang a Ntshièm abol Ntshièm anen a dik.Ikaam ween ukatieel a bos bu Kumikaam ilodj mbokiaan,⁷⁷ikaam ishaang’s bât baan lashaang ane Ntshièm ntshaan esaphaans bât,ankas bawok’s mweeng to mbi a bweph bu baan,⁷⁸Ikaam’i mbè Ntshièmiit edi mweeng mubwiik.Esaal angaam’s a dik diit mwany mu to dik mwaphwaans i itaang i ntshees butu⁷⁹ikaam ingaam’s bât bel a mwim’l akol ba bel a shin ilwimalwim i iwa,ikaam ilaat ma teemiit a mbok edi nkit’l.”

⁸⁰Mwân ambaak esienaang, i mween mwaan kanaang muun. Ambaak esatwoos a mandiy maaph bât shaang lasu lambaakaan asol a yol’l abol bât ba Isaleel.

The Word for the World International

https://app.library.bible/content/dfceee8f9bf63cb8