Read Lukka 1

Lukka1lug_bib

¹Abantu bangi bagezezzaako okuwandiika ebyafaayo ebyatuukirizibwa mu ffe,²ng’abo abaasooka edda bwe baabitubuulira, nga be baali abajulirwa era abaweereza b’Ekigambo okuviira ddala ku lubereberye.³Bwe ntyo bwe mmaze okukakasiza ddala buli kintu n’obwegendereza okuva ku by’olubereberye okutuukira ddala ku byasembayo, ne ndaba nga kirungi okukuwandiikira ggwe Teefiro ow’ekitiibwa ennyo, ndyoke mbikuwandiikire nga bwe byaliraanagana.⁴Olyoke omanye amazima g’ebyo bye wayigirizibwa.

Okulanga Okuzaalibwa kwa Yokaana Omubatiza

⁵Awo mu biro Kabaka Kerode we yafugira Obuyudaaya, waaliwo kabona erinnya lye Zaakaliya, nga wa mu kitongole kya Abiya, nga mukyala we naye yali wa mu kika kya Alooni, erinnya lye Erisabesi.⁶Abantu abo bombi baali batuukirivu mu maaso ga Katonda, era nga batambulira mu mateeka ga Katonda gonna, ne mu biragiro bya Mukama, nga tebaliiko kya kunenyezebwa.⁷Bombi baali bakaddiye nnyo, era tebaalina mwana, kubanga Erisabesi yali mugumba.⁸Awo lwali lumu, Zaakaliya bwe yali ng’ali ku mulimu gwe ogw’obwakabona mu maaso ga Katonda, kubanga kye kyali ekiseera eky’oluwalo lwe,⁹n’alondebwa okwoteza obubaane mu yeekaalu ya Mukama, ng’emirimu gy’obwakabona bwe gyabanga.¹⁰Mu ssaawa eyo ey’okwoteza obubaane ekibiina kyonna eky’abantu baali bakuŋŋaanidde mu luggya lwa Yeekaalu.¹¹Awo malayika wa Mukama n’alabikira Zaakaliya, n’ayimirira ku luuyi olwa ddyo olw’ekyoto okwoterezebwa obubaane!¹²Zaakaliya n’atya nnyo bwe yalaba malayika, entiisa n’emukwata.¹³Naye malayika n’amugamba nti, “Totya Zaakaliya! Kubanga okusaba kwo kuwuliddwa, era mukazi wo Erisabesi ajja kukuzaalira omwana wabulenzi. Olimutuuma erinnya Yokaana.¹⁴Mwembi mulisanyuka nnyo ne mujaguza. Era bangi abalibasanyukirako olw’okuzaalibwa kwe.¹⁵Kubanga aliba mukulu mu maaso ga Katonda. Talinywa mwenge wadde ekitamiiza kyonna. Era alijjuzibwa Mwoyo Mutukuvu ng’akyali mu lubuto lwa nnyina.¹⁶Era alireetera abaana ba Isirayiri bangi okudda eri Mukama Katonda waabwe.¹⁷Aliweerereza mu mwoyo ne mu maanyi aga nnabbi Eriya, n’akyusa emitima gy’aba kitaabwe okudda eri abaana baabwe, n’okukyusa emitima gy’abajeemu okudda eri amagezi g’abatuukirivu alyoke ateeketeeke abantu okulindirira Mukama.”¹⁸Zaakaliya n’agamba malayika nti, “Ekyo nnaakimanya ntya? Kubanga nze ndi mukadde, ne mukazi wange naye akaddiya nnyo.”¹⁹Malayika n’amugamba nti, “Nze Gabulyeri ayimirira mu maaso ga Katonda, era y’antumye okwogera naawe n’okukuleetera amawulire gano.²⁰Naye olw’okuba nga tokkirizza bigambo byange, ojja kuziba omumwa, era togenda kuddamu kwogera okutuusa ng’ebintu ebyo bimaze okubaawo. Kubanga ebigambo byange byonna birimala kutuukirira mu kiseera kyabyo.”²¹Abantu abaali balindirira ebweru wa Yeekaalu okulaba Zaakaliya ne beewuunya nnyo ekyamulwisaayo ennyo bw’atyo.²²Oluvannyuma ennyo bwe yavaayo, yali tasobola kwogera nabo, ne bategeera nga mu Yeekaalu afuniddeyo okwolesebwa. N’asigala ng’azibye omumwa naye ng’abategeeza mu bubonero.²³N’abeera mu Yeekaalu okutuusa ennaku ze ez’oluwalo lwe zaggwaako n’alyoka addayo eka.²⁴Ennaku ezo bwe zaayitawo, mukazi we Erisabesi n’aba olubuto, ne yeekwekera ebbanga lya myezi etaano.²⁵N’agamba nti, “Mukama nga wa kisa kingi, kubanga anziggyeeko ensonyi olw’obutaba na mwana.”

Okuzaalibwa kwa Yesu Kulangibwa

²⁶Awo mu mwezi ogw’omukaaga, Katonda n’atuma malayika Gabulyeri mu kibuga Nazaaleesi eky’omu Ggaliraaya²⁷eri omuwala erinnya lye Maliyamu, nga tamanyi musajja, eyali ayogerezebwa omusajja erinnya lye Yusufu, ow’omu lulyo lwa Dawudi.²⁸Awo Gabulyeri n’alabikira Maliyamu n’amulamusa nti, “Mirembe! Ggwe aweereddwa omukisa! Mukama ali naawe!”²⁹Maliyamu n’atya, n’abulwa n’ekyokwogera, ng’okulamusa okwo kumutabudde, nga n’amakulu gaakwo tagategeera.³⁰Awo malayika n’amugamba nti, “Totya, Maliyamu, kubanga olabye ekisa mu maaso ga Katonda.³¹Kubanga, laba, olibeera olubuto, olizaala omwana wabulenzi era olimutuuma erinnya, Yesu.³²Agenda kuba mukulu, wa kitiibwa, era aliyitibwa Omwana w’Oyo Ali Waggulu Ennyo, era Mukama Katonda alimuwa entebe ey’obwakabaka eya jjajjaawe Dawudi.³³Alifuga ennyumba ya Yakobo emirembe gyonna, era n’obwakabaka bwe tebulikoma.”³⁴Awo Maliyamu n’abuuza malayika nti, “Ekyo kiriba kitya? Kubanga simanyi musajja.”³⁵Malayika n’amuddamu nti, “Mwoyo Mutukuvu alikukkako, n’amaanyi g’Oyo Ali Waggulu Ennyo galikubuutikira, n’omwana alizaalibwa aliba mutukuvu, Omwana wa Katonda.³⁶Laba, muganda wo Erisabesi eyayitibwanga omugumba, kati ali lubuto lwa myezi mukaaga mu bukadde bwe.³⁷Kubanga buli kigambo kiyinzika eri Katonda.”³⁸Maliyamu n’addamu nti, “Nze ndi muweereza wa Mukama, kibe ku nze nga bw’ogambye.” Malayika n’ava w’ali, n’agenda.

Maliyamu Akyalira Erisabesi

³⁹Awo mu biro ebyo, Maliyamu n’ayanguwa okugenda mu nsi ya Buyudaaya ey’ensozi, mu kibuga kyayo.⁴⁰N’ayingira mu nnyumba ya Zaakaliya n’alamusa Erisabesi.⁴¹Naye Maliyamu bwe yalamusa Erisabesi, omwana eyali mu lubuto lwa Erisabesi n’abuukabuuka era n’ajjuzibwa Mwoyo Mutukuvu.⁴²Erisabesi n’alyoka ayogerera mu ddoboozi ery’omwanguka nti, “Oweereddwa omukisa, ggwe mu bakazi, era n’omwana ali mu lubuto lwo aweereddwa omukisa.⁴³Nga nfunye ekitiibwa kinene ggwe nnyina wa Mukama wange okujja okunkyalira!⁴⁴Kubanga bw’oyingidde n’onnamusa, omwana ali mu lubuto lwange oluwulidde ku ddoboozi lyo ne yeekyusakyusa olw’essanyu!⁴⁵Oweereddwa omukisa bw’okkirizza nti ebintu ebyo Mukama bya kwogeddeko birituukirizibwa.”

Oluyimba lwa Maliyamu

⁴⁶Maliyamu n’agamba nti,⁴⁷“Emmeeme yange etendereza Mukama.N’omwoyo gwange gusanyukidde Katonda omulokozi wange,⁴⁸Kubanga alabyeobuwombeefu bw’omuweereza we.Kubanga laba, okuva kaakano, ab’emirembe gyonna banaampitanga eyaweebwa omukisa.⁴⁹Kubanga Owaamaanyi ankoledde ebikulu;N’erinnya lye ttukuvu.⁵⁰N’okusaasira kwe kwa mirembe na mirembeeri abo abamutya.⁵¹Akoze eby’amaanyi n’omukono gwe.Asaasaanyizza ab’emitima egy’amalala.⁵²Awanudde abafuzi ku ntebe zaabwe ez’obwakabakan’agulumiza abawombeefu.⁵³Abali mu kwetaaga abakkusizza ebirungi.Naye abagagga n’abagoba nga tabawaddeeyo kantu.⁵⁴Adduukiridde omuweereza we Isirayiri,n’ajjukira okusaasira,⁵⁵nga bwe yayogera ne bajjajjaffe,eri Ibulayimu n’ezzadde lye emirembe gyonna.”⁵⁶Maliyamu n’amala ewa Erisabesi muganda we, ng’emyezi esatu, n’alyoka addayo ewuwe.

Okuzaalibwa kwa Yokaana

⁵⁷Awo ekiseera kya Erisabesi eky’okuzaala ne kituuka, n’azaala omwana wabulenzi.⁵⁸Baliraanwa ba Erisabesi n’ab’ekika kye ne bawulira nga Mukama bw’amulaze ekisa, ne basanyukira wamu naye.⁵⁹Awo omwana bwe yaweza ennaku omunaana, ne bajja okumukomola, bonna nga balowooza nti ajja kutuumibwa erinnya lya kitaawe Zaakaliya.⁶⁰Naye Erisabesi n’abagamba nti, “Nedda, ajja kutuumibwa Yokaana.”⁶¹Ne bamuwakanya nga bagamba nti, “Mu kika kyo kyonna tetuwulirangayo yatuumibwa linnya eryo.”⁶²Ne babuuza kitaawe w’omwana erinnya ly’ayagala atuumibwe.⁶³N’abasaba eky’okuwandiikako, n’awandiikako nti, “Erinnya lye ye Yokaana!” Bonna ne beewuunya nnyo!⁶⁴Amangwago akamwa ka Zaakaliya ne kagguka, n’olulimi lwe ne lusumulukuka, n’atandika okwogera n’okutendereza Katonda.⁶⁵Abantu bonna ab’omu kitundu ekyo ne batya nnyo, era ebigambo ebyo ne bibuna mu nsi yonna ey’e Buyudaaya ey’ensozi.⁶⁶Buli eyawulira ebigambo ebyo n’abirowoozaako nnyo mu mutima gwe, ne yeebuuza nti, “Naye omwana ono bw’alikula aliba atya?” Kubanga awatali kubuusabuusa, omukono gwa Mukama gwali wamu naye.

Oluyimba lwa Zaakaliya

⁶⁷Awo Zaakaliya kitaawe, n’ajjula Mwoyo Mutukuvu n’awa obunnabbi nti,⁶⁸“Atenderezebwe Mukama Katonda wa Isirayiri,kubanga akyalidde abantu be, era abanunudde.⁶⁹Yatuyimusiriza obuyinza obw’obulokozi,mu nnyumba y’omuddu we Dawudi.⁷⁰Nga bwe yasuubiriza mu bigambo bya bannabbi be abatukuvu ab’edda ennyo,⁷¹Okulokolebwa mu balabe baffe,n’okuva mu mukono gw’abo bonna abatukyawa,⁷²okulaga bajjajjaffe ekisa,n’ajjukira n’endagaano ye entukuvu,⁷³ekirayiro kye yalayirira jjajjaffe Ibulayimu,⁷⁴okukituukiriza, n’okulokolebwa okuva mu mukono gw’abalabe baffe awatali kutya,tulyoke tuweereze mu maaso ge,⁷⁵mu butukuvu ne mu butuukirivu ennaku zonna ez’obulamu bwaffe.

⁷⁶“Naawe, mwana wange, oliyitibwa nnabbi w’Oyo Ali Waggulu Ennyo;kubanga gw’olikulembera Mukama okumuteekerateekera amakubo ge.⁷⁷Okumanyisa abantu be obulokozi,obw’okusonyiyibwa ebibi byabwe.⁷⁸Byonna birituukirira olw’ekisa kya Katonda waffe ekingi.Emmambya esala eritukyalira okuva mu ggulu,⁷⁹okwakira abo abatudde mu kizikizane mu kisiikirize eky’okufa,okuluŋŋamya ebigere byaffe mu kkubo ery’emirembe.”⁸⁰Omwana n’akula n’ayongerwako amaanyi mu mwoyo, n’abeera mu malungu okutuusa ku lunaku lwe yayolesebwa eri Isirayiri.