128Ï karë na dong wöö othum, Paulo ocwodo ëlübkör Yecu bothe, kinge cükö cwinygï ëka mothogï, cë öcïdhö yo Macedonia.2Ën obedo ka woth ï lobo nön nakun cükö cwiny jïï kï köp na pol, ëka kinge obino othuno ï lobo Grecia3kanya ën obedo ïë pï dwethe adek. Ën onwongo tye ka yübërë më kwang kï mel më cïdhö yo Ciria. Ï karë na ën ongeo nï Eyuda öyübö gïnï köp ï kome, cë Paulo ölökö thama mërë më dök cen nakun wok kï ï Macedonia.4Ën owotho kanya acël kï Copater wod ka Piro më Berea, Aricitako ëka Cekondo më Tecalonika, Gayo më Derube ëka Timoteo, kanya acël kï Tukiko ëka Tropimo më lobo Acia.5Jö ni öcïdhö anyim ëka öküröwa gïnï ï Teroa.6Ëntö wan ëkwang kï ï Pilipi kinge Kwer më Ogati na Thöbï ope ïë ëka kinge nïnö abic ethuno bothgï ï Teroa, kanya wan ebedo ïë pï nïnö abïrö.
Ecero Yutiko kï ï thöö
7Ï nïnö më acël më cabït,wan ëcökërë kanya acël më poko ï ogati. Paulo obedo twak kï jïï, pïën onwongo dong mïtö cïdhö ökö kodiko mërë, cë ën obedo twak naka dingwor.8Tara na pol onwongo tye ka lyël ï öt na malö na wan ëcökërë ïë.9Na Paulo onwongo mëdërë amëda kï twak, athïn awobi na nyïngë Yutiko onwongo obedo ï derica cë nïnö ömakö wangë rwök ëka opodho pïny kï ï derica më öt më adek na malö, cë etingo ën na dong öthöö.10Ëntö Paulo oidho pïny cë oryebere ï kom awobi nön, ëka öthünö cë öcakö kobo nï, “Kür ïpar unu, ën pod kwö.”11Cë Paulo öïdhö ödök ï öt na malö, opoko ï ogati ëka öcamö gïnï kanya acël. Paulo ömëdërë kï twak naka pïny oru cë öcakö cïdhö.12Jïï otero awobi nön na kwö yo pacö ëka na cwinygï yom rwök.
Paulo örwatërë k'edong më Epeco
13Wan ëcïdhö anyim kï mel cë ëkwang naka ï Acco, kanya onwongo wan ebino më kwanyö Paulo kï ïë. Ën onwongo öyübërë më woth kï tyënë yo kunön.14Ï karë na ën oromo ködwa ï Acco, ëkwanyö ën kï mel cë wan ëcïdhö ködë kanya acël naka yo Mitilene.15Wan ëcakö kwang kï kunön ëka kodiko mërë ethuno kany mörö n'opimere kï Kioc. Kinge nïnö nön wan ëngölö naka yo cula nam më Camoc ëka kinge nïnö acël wan ethuno ï Mileto.16Paulo onwongo omoko thama mërë më kwang kalö Epeco akala, ëk kür ëbal caa ï lobo Acia, pïën onwongo mïtö cïdhö pïöpïö ëk ka twërë ebed ï Jerucalem ï nïnö më Pentekot.17Ëntö ï karë na wan ethuno ï Mileto, Paulo ooro köp yo Epeco më cwodo edong ka jö n'oye Kiricito ëk obin gïnï bothe.18Ï karë na gïn othuno, ën okobo nïgï nï, “Un ingeo unu kite na an akwö ködë ï kinwu, cakërë ï nïnö më acël na an abino ködë ï lobo Acia.19An atio both Rwoth kï mwolo na dit rwök ëka kï pii wanga, kadï bed onwongo atye ï atëmatëma na rac n'Eyuda öyübö gïnï ï koma.20Un ingeo nï an ba abedo kï lworo më tïtö niwu köp mörö na twërö könyöwu, ëntö an apwonyowu ï kin lwak ëka ï öt kï öt.21An abedo kobo köp n'atïr both Eyuda ëka both jö Girik nï myero ongut gïnï kï kom bal cë ölökërë gïnï both Obanga ëka obed gïnï kï yee ï kom Rwothwa Yecu.22“Kobedini dong an atye ka cïdhö yo Jerucalem nakun abedo amabuc ka Tipo Naleng, na ba angeo ngö na bino tïmërë ï koma kï kunön.23Gin na an angeo këkën ënë nï Tipo Naleng öcïka nï ï pacö kïbëc, buc ëka pëkö tye ka kemo koma.24Ëntö kwöna anënö calö gin mörö na köny mërë ope kï botha, thwara ka atio ködë më tyeko tic na Rwoth Yecu ömïa—tic më mïö caden më Emuth na Bër më kïca k'Obanga.25“Kobedini dong an angeo nï ngat mörö ope kï kin jö na an abedo tïtö köp më Ker k'Obanga bothgï na dök bino nënöna.26Pï manön, an akobo bothwu tin nï, ka kwö ka ngat mörö kï ï kinwu bino rwenyo, remo mërë ope ï wia.27Pïën ba abedo kï lworo më tïtö niwu gin na kïbëc n'Obanga mïtö nï inge unu.28Gwökërë unu kenwu ëka kï jö kïbëc na Tipo Naleng okethowu më gwökögï. Bed unu ëkwath ka jö k'Obanga n'oye Kiricito na ën öwïlö kï remo ka Kiricito kikome.29Angeo nï, ka dong ayaa ökö, orudi na ger bino bino ï kinwu ëka ba bino wëkö rom.30Naka thon jö mökö kï kinwu bino gïnï yaa më lökö köp n'atïr ökö ëk öywa ëlübkör Yecu ï körgï.31Pï manön gwökërë unu! Po unu nï onwongo abedo coko ngat acëlacël kï ï kinwu na ba alïng pï mwaka adek kiwor ëka kiceng, nakun akok kï pii wanga.32“Kobedini dong an amïöwu ï cïng Obanga ëka kï köp më kïca mërë na twërö mïö ïdöngö unu, ëka bino mïöwu inwongo gin na ën öyübö më mïö both jö kïbëc na ën ölönyögï.33An ba abedo kï miti ï kom ryal, gol onyo böngü ka ngat mörö.34Un kï komwu ingeo unu nï an anwongo gin na kïbëc na mïtërë botha ëka both jö na an atio ködgï kï tic më cïnga.35Ï kom tic kïbëc na an dong atio, anyutho niwu nï, kï tic na tëk myero ëköny jö na görü, nakun epo ï kom köp na Rwoth Yecu kï kome okobo nï: ‘Gum na thwönë tye ï mïö na löö gamö.’”36Ï karë na dong otyeko kobo köp nön, ën orumo cöngë pïny ködgï kïbëc ëka ölëgö.37Gïn kïbëc okok kï pii wang-gï, nakun thünö gïnï ngut Paulo ëka emotho ën kï moth më mar.38Gin n'ocwero cwinygï rwök ënë köp na ën okobo nï gïn ba dök bino nënö wangë. Cë ökwangö gïnï ën ï mel.