Yîsə̂ Aərə5
1Bale, mə wû ə̈bə̈ fraka ə̂në əndje wûru gâ tə̂ nə, ə̂në əndje tâ aəpʉ gâ lə nə ndje djoko mandânə, ə̂në əndje kô atapɔ mindû amanə bishi gâ pâ nə ndə kə i də nə kɔ lə ndəkɔ ətshə nə ə̂në tshə sə̂ gâ tʉ gâ pâ mbata ngerə nə kɔ.2Mə wû ndje ə̈bə̈ trawaya nə̂ Ndjapä, ə̂në tshə sə̂ tə əyïworɔgbɔ kɔ, ə̂në tshə sə̂ kə mʉ əpʉ tə âgbɔ̂ ə pa: «Əde kə lï ndə kə pa tshə djɔ atapɔ nə ə ndjɔ tshela fraka nə?»3Bale, ə̈bə̈ əzü bale wala mâ lafɔ wala pâ ashɔ wala tshekudu ashɔ lï lï ndə kə pa tshə ndjɔ tshela fraka nə wala ə wu ne.4Mə kɨ̂ ngbatshe, mbrə ə̂në ə̈bə̈ əzü bale lï lï ndə kə pa tshə ndjɔ tshela fraka nə wala ə wu ne kɔ.5Bale, ə̈bə̈ âgbɔ̂ əzü nə bale pâ kə əmə ə pa: «Kɨ̈ kɨ̈ ne! Bamara marä Juda, tə angwa Davidə, sɔ̂ lagbanga gâ ye, tshə lï ndə kə pa tshə djɔ atapɔ mindû amanə bishi nə ə ndjɔ tshela fraka nə.»6Bale, mə wû ə̈bə̈ Aya Ndalimi ə̂në tshə kâ gâ lafɔ, ə̂në a pa də əndje wô ətshə gâ ye kɔ, trö də mbata ngerə nə lə ə̂grû tə̂ asorô nə vəna nə, ndje lə ə̂grû tə̂ aâgbɔ̂ azü nə. Tshə sə̂ də aədɨ mindû amanə bishi də aala mindû amanə bishi ə̂në ə sə tə ayirə̂ nə̂ Ndjapä mindû amanə bishi ə̂në Ndjapä nə wlâ əndje na na ye pâ ashɔ nɔ̂ kɔ.7Tshə nâ ə zâ fraka nə lə ndəkɔ ətshə nə ə̂në tshə sə̂ gâ tʉ gâ pâ mbata ngerə nə kɔ.8Alɔ ə̂në tshə zâ fraka nə gâ ye kɔ, asorô nə vəna nə gâ ndə aâgbɔ̂ azü nə zazü bale amanə vəna nə tê gâ tʉ gâ ətshi Aya Ndalimi nə. Əzü bale bale zâ kundi də akopo lɔrə ə̂në ə sû trɔ̂ də yombo kɔ, ə̂në yombo nə sə tə aəpʉ kə yu Ndjapä nə̂ azü nə̂ Ndjapä nə kɔ.9Əndje sə̂ kə wli ə̈bə̈ tafa ətshi ə pâ:«Bə lï ndə kə pa bə za fraka nəə djɔ atapɔ nə,mbrə ə̂në azü wô əbə ə tô əbə də əkrɔ gâ yeâ, tə̂ äwä ə̈ndjï zə, bə yɔ̂ azü lə amarä nɔ̂,azü aama aəgɔ nɔ̂, azü aəgɔ nɔ̂də azü ashɔ aəgɔ nɔ̂ mbrə Ndjapä gâ ye.10Bə mbrə̂ əndje tə azü Əgɔngerə nə̂ Ndjapä də aawotokrɔ mbrə Ndjapä nə̂ əzə̂ gâ yeâ əndje mbrə ngerə pâ ashɔ je.»11Mə lîshi ə djî tshema atrawaya nə̂ Ndjapä ə̂në əndje ngbâ ə ngbâ tə bandanə kɔ dji ndʉ mbata ngerə nə də tshema asorô nə də aâgbɔ̂ azü nə. Atrawaya nə̂ Ndjapä nə sə̂ sake sake sake kûtu kûtu kûtu.12Əndje sə̂ kə pa nə tə âgbɔ̂ ə pa:«Aya Ndalimi nə ə̂në əndje wô ətshə ə tô əkrɔ də ətshə kɔlï ndə kə pa tshə sɔtə̂ ngerə də rishidə kə wusə̂ âdâ ərə də awlra də kə lʉ ətshedə kə mbe ətshe də kə tɔlɔ ətshe!»13Â mə djî aərə nɔ̂ ə̂në Ndjapä mbrə̂ mâ lafɔ kɔ, pâ ashɔ kɔ, tshekudu ashɔ kɔ, lə ə̂ngû əngbrʉ, də aərə nɔ̂ ə̂në ə sə lə nə kɔ, əndje pâ:«Kə tɔlɔ ətshe də kə lʉ ətshedə kə mbe ətshe də ngerəsə̈ mbrə ətshə nə ə̂në tshə sə gâ tʉ gâ pâ mbata ngerə nə kɔdə Aya Ndalimi nə də ə̂ngû də ə̂ngû piii!»14Â asorô nə vəna nə pâ əpʉ ə pa: «Asərəmə!» Â aâgbɔ̂ azü nə tê gâ tʉ ə zâ kumu əndje su ashɔ ə sə̂ kə vrɔ Ndjapä gâ ndə Aya Ndalimi nə.
The Seed Company