Efazə1
1Əmə, Palɔ, əzü-awla nə̂ Jezu Kristə tə̂ äwä ərə ə̂në tshelə Ndjapä yində nə gâ ye kɔ, mə sə kə ta ngrowô səye kə azü nə̂ Ndjapä, ə̂në əndje sə mâ Efazə kɔ, ə̂në əndje zâ lɔsu əndje nɔ̂ kə Jezu Kristə gâ ye kɔ .2Abä əzə̂ də Ndjapä gâ ndə Âgbɔ̂ Əyïngerə Jezu Kristə mbrə̈ ə̂rɔ̂tə̂ əndje kə e ə zä blatshe kə e!3A tɔ̈lɔ Ndjapä, Abä Âgbɔ̂ Əyïngerə nə̂ əzə̂ də Jezu Kristə! Tshə kô aə̂rɔ̂ aərə Yîrə̂ nə̂ ye kə əzə̂, ə̂në ə tô mâ lafɔ kɔ lə Kristə nə gâ ye kɔ.4Lə Kristə nə, tshə kê əzə̂ ətshinə gâ ye ndə kə pa tshə mbrə̂ tshepashɔ, kanika əzə̂ sə kpî mbrə ətshə ə sə sə də ə̈bə̈ əmbrʉ ərə tə̂ əzə̂ ətshi ye ne. Lə kə yində əzə̂ ə̂në tshə yində əzə̂ kɔ,5tshə gâmba əzə̂ ətshinə gâ ye, tə̂ äwä Jezu Kristə nə, ndə kə pa əzə̂ do tə̂ əzə̂ tə aləvu nə, ə lï də ə̂rɔ̂ ərə ə̂në tshelə ye yîndə nə gâ ye kɔ.6Tshə mbrə̂ rə ndə kə pa a mbe ətshə lə ə̂yî mbrə ə̂rɔ̂tə̂ ye nə ə̂në tshə mbrə̂ kə əzə̂ lə Ɨrɨ nə ə̂në tshə yində ye tə bandanə kɔ.7Lə Kristə nə, a djɔ̂ lə əmbrʉ ərə gâ ye tə̂ äwä ə̈ndjï ye kɔ â tshelə anyaka nə̂ əzə̂ gbâ gâ ye Lïndə̂ ə̂rɔ̂tə̂ ye ə̂në ə rô pâ nə gâ ye kɔ!8Ayî, tshə mbrə̂ ə̂rɔ̂tə̂ ye nə kə əzə̂ rô pâ nə â krɔ̂ äwä kə wusə̂ ərə də âdâ nə kə əzə̂ gâ ye kɔ.9Tshə yisə̂ ərə ə̂në tshə za wû ə̂në tshelə ye yində nə kɔ gashu kə əzə̂ gâ ye, tə ə̂rɔ̂ ərə ə̂në tshə gâmba mâ tə̂ lɔsu ye gâ ye kɔ,10ndə kə pa tshə mbrə nə tə̂ ə̂dû alɔ: tshə ngbo aərə tshelafɔ nɔ̂ də aərə nɔ̂ pâ ashɔ gâ tshekudu Kristə nə bale, tə əyïngerə.11Lə Kristə nə, a sɔ̂ ndje tə̂ ə̂sə̂ aərə nə̂ əzə̂ nə lə kəna Abä əzə̂ nə, əzə̂ nə ə̂në tshə kê əzə̂ ətshinə gâ ye, ə lï də ərə nə ə̂në tshə gâmba gâ ye kɔ, ətshə ə̂në tshə mbrə ərə lə aərə nɔ̂ Lïndə̂ aəpʉ ama ye də ərə ə̂në tshelə ye yində nə kɔ.12Tshə mbrə̂ rə ndə kə pa a mbe ə̂yî ye, əzə̂ nə ə̂në a zâ lɔsu əzə̂ nə gâ pâ Kristə nə ətshinə gâ ye kɔ.13Lə Kristə nə, e-e ndje, e djî əpʉ gâ pâ djatra əpʉ gâ ye, gâ pâ Ə̂rɔ̂ Əpʉ ə̂në ə lï ndə kə she e lə kuzu kɔ; e zâ lɔsu e kə Kristə nə gâ ye â Ndjapä zâ tapɔ gâ pâ e gâ ye â Âgbɔ̂ Yîrə̂ nə kə də̂ tapɔ nə, ə̂në tshə zâ ama də əpʉ ye gâ ye kɔ.14Â Âgbɔ̂ Yîrə̂ nə sə tə angbʉlî ərə ə̂në ə yisə̂ nə pa a sɔtə̂ ə̂dû aərə nə nɔ̂ ə̂në Ndjapä kô gâ-e mbrə azü nə̂ ye kɔ je, alɔ ə̂në tshə sə kə djɔ əzə̂ gbrä lə əmbrʉ ərə, ndə kə pa a mbe ətshə lə ə̂yî ye.15Âdârə ə̂në, alɔ ə̂në mə djî ndə əpʉ lɔsu e lə Âgbɔ̂ Əyïngerə Jezu də əpʉ kə yində azü nə̂ Kristə nɔ̂ ə̂në e yində əndje kɔ,16mə ka katə̂ kə za mərshe kə Ndjapä mbrə e ne kɔ kə sə̂. Lə aəpʉ kə yu Ndjapä nə̂ əmə, mə sə kə li tshelə əmə ndə e17â sə kə yu Ndjapä nə̂ Âgbɔ̂ Əyïngerə nə̂ əzə̂ də Jezu Kristə nə, tə Abä lə ə̂yî kɔ, ndə kə pa tshə za Yîrə̂ kə wusə̂ ərə nə kə e, ə̂në tshə sə kə yisə̂ ye kə e gashu ndə kə pa e yerɔ ətshə kpro kɔ.18Mə yu Ndjapä nə ndə kə pa tshə vru ala e tə̂ äwä ə̂yîəwo nə̂ ye kanika e wusə̂ ərə ə̂në e za lɔsu e gâ pâ nə, ə̂në tshə ê e ndə nə gâ ye kɔ, ka e wusə̂ aâtshɔ̂ aərə ə̂në ə rô pâ nə gâ ye ə̂në tshə kô gâ-e mbrə azü nə̂ ye kɔ.19Mə yu Ndjapä nə ndə kə pa e wusə̂ âgbɔ̂ awlra nə̂ ye ə̂në əzü lï lï ndə kə pa tshə wusə̂ âdâ nə ne kɔ, ə̂në tshə yîsə̂ nə gashu gâ ye mbrə əzə̂ ə̂në a zâ lɔsu əzə̂ kə Kristə nə gâ ye kɔ. Awlra nə̂ ye nə ə̂në ə rô pâ aərə nɔ̂ gâ ye kɔ,20Ndjapä nə yîsə̂ nə gashu gâ ye lə Kristə nə, alɔ ə̂në tshə shê ətshə lə takpa tə̂ akuzu gâ ye â zâ ətshə â tshə sə gâ tʉ gâ ndə ndəkɔ ye mâ lafɔ kɔ.21Â Kristə nə sə gâ pâ aərə nɔ̂ ə̂në ə sə də awlra, ə̂në ə sə kə za ama kɔ, ə̂në ə sə kə mbrə ngerə kɔ, gâ pâ əɨrɨ tshe kpəsəye nɔ̂ ndje də əɨrɨ tshe dambʉ nɔ̂.22Ndjapä nə kô aərə nɔ̂ gâ tshekudu ə̈nü Kristə nə gâ ye ə zâ ətshə gâ pâ aərə nɔ̂ gâ ye, â zâ ətshə tə kumu Laglizə gâ ye.23Laglizə nə sə tə tshekotə̂ Kristə nə â lə Laglizə nə, Kristə nə sə je tshegege, ətshə ə̂në Ndjapä nə sə lə ye tshegege kɔ.
The Seed Company