2 Kɔratə11

1Hâ! Kədə e lï ndə kə pa e kânga tshelə e teashe tə̂ əpʉ yïrə̈ nə̂ əmə! Bale, ngâ, e sə kə ru tshelə tə̂ əmə!2Mə sə kə mbrə manda e də manda ə̂në ə to mâ ndə Ndjapä kɔ. Mbrə ə̂në mə kô e kʉ kə koshe bale, Kristə nə, ndə kə pa mə ma e kə ətshə, tshə to e mata amvera ə̂në tshə wusə̂ akoshe wu ne kɔ.3Bale, mata ə̂në əkrɔ frɔ̂ Evə də əpʉ əterə kɔ, awa mbrə əmə ndə kə pa lɔsu e te gâ lə əmbrʉ ərə ə gi e ngrʉ̂ gashe tə̂ Kristə nə ə̂në e tɔ̂ popo ətshə ətshinə gâ ye də ə̂rɔ̂ lɔsu kɔ.4Mbrə ə̂në, kədə ə̈bə̈ əzü kə na â mʉ əpʉ ə̈bə̈ ata Jezu kə e kpî tə̂ Jezu nə ə̂në ä mʉ̂ əpʉ ye kə e gâ ye kɔ, e sə kə ru tshelə e tə̂ ye ngâ tə ə̂rɔ̂nə; wala kədə e sɔtə̂ ə̈bə̈ ata yîrə̂ kpî tə̂ ətshə ənə̂ sə̂ ə̂në e sɔ̂tə̂ ye ətshinə gâ ye kɔ, wala e yində ə̈bə̈ ata Ə̂rɔ̂ Əpʉ kpî tə̂ ənə̂ sə̂ ə̂në e yîndə nə gâ ye kɔ, e sə kə ru tshelə e tə̂ nə ngâ tə ə̂rɔ̂nə.
5Mə wu ənə̂ əmə ə pa, azü-awla ə̂në əndje pa alane rô ə̂dû azü-awla nɔ̂ gâ ye kɔ, əndje rô əmə rô lə ə̈bə̈ ərə bale ne.6Kədə əpʉ za ama əmə za tə ə̂rɔ̂nə, lə kə pa əpʉ ne, bale ə də̂ lə kə wusə̂ ərə də̂ ne. Ä yîsə̂ nə gashu kə e lə aâkâ aərə nɔ̂ gâ ye.
7Alɔ ə̂në mə mbrə̂ tə̂ əmə tə əngʉ əzü ndə kə pa e do tə̂ e tə əgbro azü kɔ, ə̂në mə mʉ̂ Ə̂rɔ̂ Əpʉ nə̂ Ndjapä kə e tə ambanə kɔ, əmbrʉ ərə də̂ mə mbrə̂ kɔ a?8Mə yîndə nə ə kô ngendja lə kəna alabə̈ azü lə aata Alaglizə ə̂në əndje yîndə kə piyi əmə kɔ ndə kə pa mə mbrə kosəra mbrə e.9Bale, ə̂në mə sə̂ lə takpa tə̂ e alɔ nə səkɔ, əzü bale ndɨ̂ ərə nə̂ ye ndɨ̂ mbrə əmə ne alɔ ə̂në mə sə̂ də əgo ə̈bə̈ ərə kɔ. Mbrə ə̂në alaye ə̂në əndje tô mâ Masedwanə ə nâ kɔ, əndje nâ də aərə nɔ̂ kə əmə â lî də əmə gâ ye. Lə aərə nɔ̂, mə bâta tə̂ əmə ndə kə pa mə sə̂ sə̂ tə ə̈bə̈ kongbɔ gâ pâ e ne â mə sə kə bata tə̂ əmə kʉ rə alɔnɔ̂.10Tə̂ äwä djatra əpʉ nə̂ Kristə ə̂në ə sə lə əmə kɔ, mə pa orâ ə pa ə̈bə̈ əzü bale sə sə kə shera əmə ndə kə pa mə da əkro əmə da tə̂ əpʉ səkɔ lə ashɔ əgɔ Akayi nɔ̂ ne.11Mə pâ əpʉ sə rə mbrə yea? Mə pâ rə mbrə ə̂në mə yində e yi ne a? Ndjapä wusə̂ nə ə pa mə yində e.
12Ərə ə̂në mə sə kə mbrə nə kɔ, mə sə kə mbrə nə kwatə̂mə, ndə kə pa azü ə̂në əndje sə kə pra ə̈bə̈ ərə kanika ə da əkro əndje tə̂ nə ə pa alane lï ə lï də ä kɔ, əndje sɔ̈tə̂ äwä nə sɔ ne.13Azü səkɔ sə tə azü-awla əterə də aafrɔ alayïkosəra â kô tə̂ əndje tə azü-awla nə̂ Kristə nə kɔ.14Ə sə sə tə əpʉ ə̂në kumu əzü ə kpe pâ əndu ye tə̂ nə ne. Mbrə ə̂në Sataa də ə̂tə̂ ye za tə̂ ye tə trawaya ə̂yîtshe.15Rəkɔ, ə sə sə tə tafa ərə ndə kə pa alayïkosəra nə̂ ye ndje ko tə̂ əndje tə aawombrə ə̂rɔ̂ ərə ne. Bale, kə sə əndje nə sə kə nglɔ nə ə lï də kosəra nə̂ əndje nə.
16Mə pa kwatə̂mə kə e: əzü bale wü wü əmə tə əyïyirə̈ ne; də̂ ne, e yində nə ə pa mə sə tə əyïyirə̈, kanika, əmə ndje, mə da əkro əmə teashe.17Əpʉ ə̂në mə sə kə pa nə kɔ, mə pa pa ə lï də ərə ə̂në Âgbɔ̂ Əyïngerə yində nə kɔ ne, bale mə pa tə əyïyirə̈. Mbrə ə̂në mə wûsə̂ âdâ ərə ə̂në mə da əkro əmə tə̂ nə kɔ gâ ye.18Ə̂në azü ngbatshe sə kə da əkro əndje tə̂ aərə ə̂në ə sə tə̂ äwä əzü kɔ, mə sə ndje kə da əkro əmə.19E-e ə̂në kumu e sə tə̂ nə je kɔ, e sə kə yində əpʉ nə̂ azü ə̂në əndje sə tə alayïyirə̈ kɔ!20E yində nə ngâ ə pa azü mbrə e tə akanga ə zɨ aərə nə̂ e ə ko aərə nə̂ e tə̂ e ə neke e ə da e kpə ətshi e!21Ə sə tə əpʉ gana, əpʉ səye ə̂në mə pa kɔ: mə wu a pa də ä mɔ ə mɔ wââ kôto!
Bale, kədə ə̈bə̈ əzü kə yində kə da əkro ye, əmə ndje, mə sə kə da əkro əmə – mə pa əpʉ tə əyïyirə̈ â pa kɔ!
22Əndje sə tə Aebrʉ a? Əmə ndje nɔ̂! Əndje sə tə azü əgɔ Isərayalə a? Əmə ndje nɔ̂! Əndje sə tə angwa Abraamo a? Əmə ndje nɔ̂!23Əndje sə tə alayïkosəra nə̂ Kristə a? – Mə sə kə pa əpʉ ngâ mata əyïyirə̈ – mə sə ndje tə əyïkosəra nə̂ Kristə ə rô əndje. Tə̂ äwä kosəra, mə rô əndje; tə̂ äwä kə mbrə kânga, mə rô əndje; tə̂ äwä əzɔ, azü dâ əmə ə rô əndje â äwä ngbatshe, mə sə lə ama kuzu.24Äwä mindû, Ajuwufu dâ əmə də djakwa zazü bale də grʉvəta amanə vəna ,25äwä vəta, azü əgɔ Rɔmə dâ əmə də djakwa, äwä bale, azü gbô əmə də badja; äwä vəta, bato lî ə̂ngû də əmə â äwä bale, mə mâ əlo bale, pəle-ora, lə ə̂ngû.26Mə nâ ana ngbatshe, äwä ngbatshe, aəmbrʉ aərə wûtu gâ tə̂ əmə: aəmbrʉ aərə langû, aəmbrʉ azü wûtu gâ tə̂ əmə, alaye əmə də̂ Ajuwufu gâ ndə azü ə̂në əndje sə sə tə Ajuwufu ne kɔ mbrə̂ əmbrʉ ərə tə̂ əmə; mə sɔ̂tə̂ aəmbrʉ aərə lə agala, lə ngbûndû, la ə̂ngû əngbrʉ, ndje lə takpa tə̂ alaye əterə.27Mə mâ akosəra ə wû əyo; äwä ngbatshe, mə lô əlo lô ne, əgo mî əmə də əgo ə̂ngû mî əmə; äwä ngbatshe, mə sɔ̂tə̂ rəgo sɔ̂ ne, əzɨ mî əmə, mə sə̂ sə̂ də ləba ne.28Bale, mə sə sə kə pa əpʉ gâ pâ ə̂dû aərə nə nɔ̂ ne. Lə əlo bale bale, ərə ə̂në ə za lɔsu əmə kɔ, kə də̂ əpʉ Alaglizə nɔ̂.29Kədə ə̈bə̈ əzü kə gbɔ gbɔ ne, əmə ndje, mə gbɔ gbɔ ne. Kədə ə̈bə̈ əzü kə te lə nyaka, əpʉ nə sə kə sho tshelə əmə ə sho.
30Kədə ə sə tə əpʉ kə da əkro, mə sə kə da əkro əmə mbrə tə̂ ə̂në mə mɔ ə mɔ kɔ.31Ndjapä, ə̂në tshə sə tə Abä Âgbɔ̂ Əyïngerə Jezu kɔ â əndje sə kə vrɔ ətshə də ə̂ngû də ə̂ngû kɔ, wusə̂ nə ə pa ə də̂ əterə də̂ mə pa kɔ ne.32Alɔ ə̂në mə sə̂ mâ Damasə, komandâ ə̂në tshə mbrə̂ kosəra də əɨrɨ əyïngerə Aretasə kɔ, kô atrugu gâ lə manda tshelə gala nə ndə kə pa əndje tegbɔ əmə.33Bale, alabə̈ azü zâ əmə gâ lə mbogɔ̂ ə jêrə də əmə lə äkɔ̈ manda, tə̂ dati ə̂në ə sə dji tshelə gala nə kɔ â mə kpê tə̂ ye â rô.

The Seed Company

https://app.library.bible/content/7c1bcb0f6c35eea8