1 Tesalɔnikə1
1Əmə, Palɔ də Silasə gâ ndə Timɔte kə sə̂ â wla ngrowô səye kə azü Laglizə gala Tesalɔnikə ə̂në əndje sə tə azü nə̂ Ndjapä tə Abä gâ ndə Âgbɔ̂ Əyïngerə Jezu Kristə kɔ. Ndjapä mä ə̂rɔ̂tə̂ ye kə e ə zä blatshe kə e!2Ä sə kə za mərshe alɔnɔ̂ kə Ndjapä mbrə e nɔ̂ â sə kə pa ndə e lə kə yu Ndjapä nə̂ ä.3Ä sə kə li tshelə ä alɔnɔ̂, lə ala Abä əzə̂ də Ndjapä, gâ pâ kosəra lɔsu ə̂në e mbrə kɔ, gâ pâ äwä kə yi tə̂ nə̂ e, ndje gâ pâ äwä kə za lɔsu e ə̂në e za bale ndə kə ka mbrə Âgbɔ̂ Əyïngerə nə̂ əzə̂ Jezu Kristə nə kɔ.4Ä wusə̂ nə, alaye ə̂në Ndjapä yində e wââ kɔ, ə pa Ndjapä kê e gâ ye.5Mbrə ə̂në Ə̂rɔ̂ Əpʉ ə̂në ä mʉ̂ əpʉ nə ʉrrr ndjɔ mâ ndə e kɔ, ä mʉ̂ mʉ̂ kə e kʉ tə̂ äwä əpʉ ne, bale ä mʉ̂ ndje tə̂ äwä awlra də Âgbɔ̂ Yîrə̂ â ä wusə̂ nə ə pa əpʉ nə sə tə djatra əpʉ. Mbrə ə̂në ä mbrə̂ rə kanika e wusə̂ äwä kə mbrə tə̂ ä lə takpa tə̂ e mbrə ə̂rɔ̂ kə sə e.6Bale, e-e, kə mbrə tə̂ e sə mata ənə̂ ä, ndje mata ənə̂ Âgbɔ̂ Əyïngerə, mbrə ə̂në e yində əpʉ nə lə aərə əyo ngbatshe də ə̂rû nə̂ Âgbɔ̂ Yîrə̂ tə̂ lɔsu e.7Rəkɔ, e sə tə azü ə̂në azü nɔ̂ lə əgɔ Masedwanə də əgɔ Akayi ə̂në əndje zâ lɔsu əndje kə Ndjapä gâ ye kɔ, sə kə mbrə tə̂ əndje mata e.8Mbrə ə̂në ə də̂ kʉtə̂ əpʉ nə̂ Âgbɔ̂ Əyïngerə nə ə̂në ə âfɔ mâ ndə e ə zâ ətshe lə aəgɔ Masedwanə də Akayi kɔ də̂ ə zâ ətshe kɔ ne, bale əpʉ lɔsu e tə̂ äwä Ndjapä zâ ətshe ndje nɔ̂, â ä sə sə kə pa ndə əpʉ nə ə pa kwatə̂-ä ne.9Bale, azü nɔ̂ sə kə pa əpʉ gâ pâ əpʉ nə̂ ä, ə pa ndəma äwä ə̂në e wə̂ra ä də nə, alɔ ə̂në ä yî kumu ä mâ ndə e kɔ, də äwä ə̂në e tshî äwä kə vrɔ aamba andjapä tʉ ə dô tə̂ e gu nə gâ tə̂ Ndjapä ndə kə mbrə kosəra kə ətshə, ətshə ə̂në tshə sə tə sorô, tə djatra Ndjapä kɔ.10E sə kə ka mbrə Ɨrɨ nə ə̂në tshə shê ətshə lə takpa tə̂ akuzu gâ ye kɔ, Jezu, ə̂në tshə tshɔ̂ əzə̂ gâ ye lə əkɔ nə̂ Ndjapä ə̂në ə sə kə na gu nə kɔ.
The Seed Company