Jenesis50lid_wbt

1Eme badeh Josep morohani iy i andri i la-u taman ma iy tawi buli taman ma iy eden.2Ano badeh Josep tiye i tiri lau ta komba ta atondrok taman.3Ili badeh winiya len ta komba asahan hanoh. Ya iri lau badu Ijip aden ili winiya len ndro tonoh.4Ano len ta ndrelen ano badeh, Josep tiye i tiri lau ta lahou ta kabin badu bolo asiu anya, “Ado katiyani sahou tek doh ki ta kabin:5Na len suniya tama anya kimek badeh iy tiye, Jo badeh ndratandrakan ta a-eh iy kili munu bek mene iy ndralosowaniy udu munyak Kenan. Eme ya i buku none ou aseken eh, jo anya kili ka-eh tama ano badeh jo barame hamon ja.”6Eme kabin anya, “Mwasin, iy kili kihiy taman i buku none iy mene ndratandrakan ta amwekes.”7Eme badeh Josep iu ili a-eh taman. Eme iri lau ta lahou badu bolo asiu ta kabin, iri lau tinan ta anuhun sahou, ma hawe iri lau ta lahou ta mwena badu Ijip badeh a hawe Josep.8Ma udu Josep ma nadun uru, hawe nadu tinen oro mari ala. Ma hawe lowa taman, iri Isra-el, ala hawen ale. Arile nadu oro bwisik, hawe iri sipsip, iri me ma hawe iri bulumakau badeh ado loboho Gosen ado.9Eme iri lau hawe sau aliu na katin haka mari ma lau ado bwele-e iri katin haka aloh hos, iri lau solo-an handru en a hawe Josep.10Ano len iri ame asos Atat kon ndrahu iri aburoh wit loboho rai ta Jordan badeh iri mari aden boho iri loken luluwen handru. Ma Josep tiye i tiri ado doh aden winiya len ma ndro taloh.11Eme iri lau badu kati kon Kenan badeh anyolom iri lau nane aden ado Atat badeh iri tiye, “Iri lau badu Ijip badeh amwekes kabek ma aden tare doh!” Eme badeh iri tondrohani nyara kon doh ili Abel Misra-em, moson, “Iri Ijip aden.”12Eme badeh nadu Isra-el oro badeh mwesekei i le buku tama oro mene tiye i toro.13Ano badeh iri bwese-ei iy ili atehei iy ili munu bek Makpelah loboho rai ta Mamre udu bolo bilin udu Kenan. Bilin mene Abraham sihinei ta Epron ndramak badu Hita i ta ndrahu a-eh ndramak imek.14Josep ihiy taman ano badeh iy iu i hamon ja ili Ijip hawe nadu tinen oro hawe iri lau badu Ijip nane ala ta a-eh taman.

Josep Asehek Sahou Aleu I Ta Nadu Tinen Oro

15Udu hamon ta tama oro imek badeh, nadu tine Josep oro tiye, “Ki buku sah kameh i buku none Josep badeh kabudon ndra-in keme tato ma i buku none iy kamwekes budon ta amwekes ki saluwen ta kandriyen ndra-in mene to amwekes i badan?”16Eme badeh oro suni sahou ili ta Josep i buku doh: “Suniya tama to anya kimek badeh,17iy tiye tam badeh ta ou badeh balem sabudon ta kadriyen ndra-in mene aso amwekes ewek tam, ma i dah kameh aso kameh are baha Kindrei ta tamam.” Eme Josep anuhun badeh ma iy eden.18Ano badeh nadu tinen oro amwenen ala badeh kandru oro aluh i tan; Eme oro anya, “Aso are madam dah aso badeh bonyo-ou.”19Arile Josep tiye i toro, “Ado sanoh; jo badeh winiyan bakohok kon ta Kindrei bwe.20Ado badeh amwekes kandriyen ndra-in eme tek, arile Kindrei badeh mwesekei asahan mwasin labai ta aseben lau mari are kede-eh, ma iri mari bamak bwe.21Ado badeh sanoh ta ari lakou. Jo kameh atondrok ado ma nadu ado oro.” Ano badeh Josep tiye budon mwasin i toro ma mwesekei ndrine oro ta tikisiy iu.

Josep Imek

22Ano badeh Josep badeh manyah udu Ijip le hawe lowa taman oro; eme badeh Josep badeh i alon, jaha tan ili asahan rinek ronoh (110) badeh ma iy imek.23Iy badeh udu anyolom nadu tubun oro badu ndrine nadun Ipra-im. Iy anyolom nadu Makir oro; Makir badeh nadu Manase. Oro doh badeh i buku none nadun oro.24Ano Josep tiye i ta nadu tinen oro, “Jo badeh mirihik kimek ai, arile Kindrei kameh tondrokei ado kameh udu mwasin ma iy le kameh winiyan kuhiy ado ame len ma iy kameh tiyani ado ala munyak mene iy tandrakan i ta Abraham, i ta Aisik hawe Jekop.”25Ano badeh Josep tiye iri lau tan amwekes tandrakan. Eme Josep anya, “Ado katandrakan keme tek i buku none Kindrei kasariye ado ka hamon kala munyak Kenan badeh ado kakuhiy badak kewek.”26Eme Josep badeh udu winiya jaha tan asahan rinek ronoh (110) badeh iy imek. Iy imek badeh udu Ijip. Eme iri lau ta komba atondrok badan ma atehei iy i bolo kes.
expand_more
Search