1Pana ligudi aipira sa qa nongoro veinia ara na ovovelena kai vaikamu minete lavata sa pa noka, pira qarigu,<<Vatarasaea na Tamasa!Na inaalo, na vinalavata, beto na neqisa tana na oda Tamasa!2Ura qai tuvisi beto qai sosoto sira nona vaituti!Sa tei pitua tu isa sa na rereko tugele lavataisa sa toni vaselai na gugusu pa pesopana ona uana bosina.Ko sa vakilasia na Tamasa sisa,ura sa vamateria na ona nabulu,>> sau.3Beto qai kai vevela viva vei mule pira,<<Vatarasaea na Tamasa!Na tulana na iku sa vurungia na gusu lavata isasake koroto sae kamua na kamua,>> qarigu.4Poni qai opo kokopo gore sira ka rabete made tinoni mamata, beto ko ira ka made manugu toadi, ko qai vatarasaea sa na Tamasa sa toqo pana ona totoqona bangara, pira qarigu,<<Agua! vatarasaea na Tamasa!>> qarigu.
Na vavolo vaialava tana lami
5Beto kai ovovele sa sa koko lame vei pana totoqona bangara, pira sau,<<Vatarasaea na oda Tamasa,agou doru na ona nabulubeto agou doru tinoni ikete na lavataqu pangagania na Tamasa,>> sau.6Beto qa nongoro veinia ara na ovovelena kai minete tinoni lavata sa ovanga vei na kijarani pie, beto sa vei na pererekatadi na paka oka lavata, pira qarigu,<<Vatarasaea na Tamasa!Ura na Bangara, na oda Tamasa vivana jola, sa sa bangara.7Ta qeqera beto ta mekarai qeqera,beto ta vania na vinalavata sisa.Ura sa tei kamu tu sa na totoso vaialava tana lami,ko sa tei vatana vakolea tu mekana sa na ona rereko.8Sa tei taiania tu na rerekosa na poko koregana sa vasaea,sa kilanga beto na liosona,>> sau.(Na poko koregana sa ira na uana tuvisidi tadira na tinoni tana Tamasa.)9Beto sa paranga lame taqu sa na mateana, pira sau, <<Mu kutia sa pira sau, <Mai tamana sira na tinoni qai tasoru ko mai somanania na vavolo vaialavana na lami,> mugu. Aipira sa na paranga sosotodi tana Tamasa,>> sau sa na mateana.10Poni qa kokopo gore todongo pa nenena ko ma vatarasaea qau, ba pira tu saunisiu, <<Muke roitinia isa! Ura ara sa kai nabulu vevei mutugu ao beto veveidi tugu ira na tasimu qai ule votunia na vavakatona i Jisu Karisito. Na Tamasa tu sa mu vatarasaea! Ura na vavakatona i Jisu sa sa vakanokoria ira na tinoni kokorotai ko qai ule votunia nona nongoro,>> sau.
Na tinoni sa koi pana hose keka
11Beto qa batia sa na oka sa tarevanga, poni qa doro qau sa qa batia sa kai hose keka ko isa sa koi pa narena na hose sa sa tagigala Na Tarangena beto Na Sosoto. Ko pana tuvisi sa tutiniria sira na tinoni beto sa rajaria na ona kana.12Na matana sa qai vei na memeana na iku, beto pa batuna na kubo tarapae bangara sa vasaeria. Kai isongona sa takuti kolena pana tana, ba kepore na tinoni sa gigilai goto mekana gu isa sa gigilai sa na isongo isa.13Sa vasaea na poko gojo doru sa tavatubulunia na orungudi ira na ona kana. Na isongona sa Na Paranga tana Tamasa.14Beto qai tutia ira na minete tinoni vaipera pa noka, qai vasaeria na poko keala poreveveidi, na liosodi, beto qai okoto koi pa naredi na hose.15Sa bola votu vei pana mangana sa kai benete vaipera sa jola na ganina, isa mina vakilasaniria ira na pupuku tinoni qai kanai, beto mina bangaraniria ko minake aru qeqeraniria. Mina vakilasa vamateria isa sira pana ona tagigiri na Tamasa vivana jola, mina vei puputa kai tinoni sa kole tetete vakoloria na qurepi pana tete momonyoni vaini.16Beto sa takuti pana ona poko gojo doru beto pana avana pa kale nene matuana sa na isongo pira qai paranga vei:NA KUTA TADIRA NA KUTA BETO NA BANGARA TADIRA NA BANGARA.17Beto qa batia mule sa kai mateana sa kole turuona pa narena tapo, beto sa kole kukuria sira doru manugu tatava qai kole tatava lao lame pa vavagalo eqa, pira sauniria, <<Mei, lame vaikamu pana vavolo lavata tana Tamasa!18Mu lame ko mu ganiria na masadi ira na bangara, na masadi ira na mamata tadira na tinoni vaipera, na masadi ira na varene, na masadi na hose, beto na masadi ira na tinoni qai kokoi pa naredi na hose, beto ko na masadi ira doru tinoni, na tinoni taruvatadi na pinausu, ikete na lavata!>> sau.19Beto isa sa qa batia sa na manugu piruna beto ira na babangara pa peso, beto na dia pupuku tinoni vaipera lavata sa qai vaikamu, ko mai rajai sa isa sa koi pa narena na hose, beto ko ira na tinoni vaipera tana qarigu.20Ko sa tateku sa na manugu piruna tataviti na tinoni kokorotai sesekena sa roroitiniria na roiti vaivagabaradi pa moena na manugu piruna. Ira tugu na roiti vaivagabaradi aipira sa sa toni vapiruniria ira qai tekua na vinagigila tana manugu piruna beto ko qai vatarasaea na kirena manugu piruna. Ko ira karu pira sa qai tagona lao toa pa leo kolo iku sa vurungia na nai.21Goto ira doru dia tinoni vaipera sa sa vamate beto paleria isa sa toqo pana hose, pana ona benete vaipera isa sa bola votu lame vei pana mangana. Ko qai poteniria doru manugu tatavadi sa na masadi.