Hiburu5lga_sco

1Ira doru kuta iama lavata sa na taviledi tugu pana tadira tinoni tugu beto qai tauduku sira ko mai roiti vania na Tamasa ko mai tokaniria sira na tinoni. Ko na roiti qai tavilenia beto qai taudukunia ira sa mai vavakukuvu beto mai vaivananiria sira na vaivana vulasadi na sela tadira na tinoni.2Na kuta iama lavata mekana ba sa gosororia gu sira na munyala ko sa vei sa sa boka gigila vataleria isa sira na tinoni qai rura ko qai tatoni vapiru.3Na tinoni munyala sisa, ko sa vei sa na ona roiti sa taiania sa mina vavakukuvu lao tana Tamasa ko mina vulasaria isa sira nake sela tadira na goto tinoni gu mekadi goto na ona sela tugu mekana vei.4Kepore sa kai tinoni bi vilea mekana ko bi tavalavata vei na iama. Goto pana uduku tu tana Tamasa sa sa tavatoqo iama sa na tinoni, kai muqisi podeke vei i Eroni ba na Tamasa tugu sa udukia poni sa sa iama.5Ko na Karisito ba sake valavata mulenia mekana ko bi kai kuta iama lavata sisa, goto na Tamasa tu pira saunia,<<Na Tuqu ara sao,pa ngeni qa ule votunia sa ara sa na Tamamu ao,>> sau.6Beto koleona mule sa kai eqa pana Kukuti Tabuna ketakoi sa paranga vei pira,<<Ao sa kai iama kole jolamupana soana vei sa iama i Melekizedeki,>> sau.7Tonai sa suvere pa peso si Jisu sa kiu alili viviva beto sa vavara tetepa lao sisa pana tana Tamasa, ko na Tamasa bi boka vasarea pana mate sau. Ko sa oea na Tamasa sisa ura sa vaiketai lao tana Tamasa.8Na Tuna tugu na Tamasa sisa, ba pana vitigi tu sa gosororia isa sa gigilai isa sa na soana vatabena na Tamasa.9Ko tonai sa vaokotia i Jisu sa nona roiti, poni tonai sa isa sa na kutana na inaalo kole jolana tadira doru qai vatabea sisa,10ko na Tamasa sa ule votunia na kuta iama lavata pana soana vei sa iama i Melekizedeki sisa.

Muke noso totoravusia na Karisito

11Koledia mutugu sa soku sakasava qa nyogua pojanigou ara sa na veveina isa qa koni pojanigou, ba sa tapata na vakabere vanigou sapi, ura qu rura ko quke boka vakoititiria na sakasava qu nongororia agou.12Ura na kakasana sa na totoso sa tei jola tu ko sa pada bu tei boka tinoni vaivagigalai tu sagou. Ba qu oqoro pada ko ira tu na tinoni sa mai vagigalai beinigou mule sira na sakasava sa pada pa popodalaina tu bu tei gigilai tu agou isa na veveina sa pojai na Tamasa. Sa tei pada tu bu tekuria agou sira na gagani maurudi ba qu korapa laomiu gu na susu meleke sagou.13Na tinoni sa korapa susu meleke sa na koburu melalu gu sisa, ko sa oqoro vagigilai isa sa na veveina na tuvisi.14Goto ira na tinoni matuadi sa na gagani maurudi tu sa qai tekua, ko ira sa qaike koroto varoitiria ko qai boka bati pikatia na tuvisina na ikerena.
expand_more
Search