1फिर परमेश्वर न मूसा सी कह्यो,2इस्राएलियों सी कहो कि परमेश्वर को त्यौहार तुम पवित्र सभा ख एकजूट करन लायी ठहरायो समय पर प्रचार करनो पड़ेंन, हि मोरो त्यौहार यो आय।3छय दिन काम-काज करयो जायेंन, पर सातवों दिन परमविश्राम को अऊर पवित्र सभा को दिन आय; ओको म कोयी तरह को काम-काज नहीं करयो जायेंन; ऊ तुम्हरो घरों म परमेश्वर को आराम दिन ठहरेंन।
फसह अऊर अखमीरी रोटी को त्यौहार
4“फिर परमेश्वर को त्यौहार जेको म सी एक एक को ठहरायो हुयो समय म तुम्ख पवित्र सभा करन लायी प्रचार करनो पड़ेंन हि यो आय।5पहिलो महिना को चौदावों दिन शाम को समय परमेश्वर को फसह को त्यौहार मनायो जाय।6अऊर उच महिना को पन्द्रावों दिन ख परमेश्वर को लायी अखमीरी रोटी को त्यौहार मनायो जाय; ओको म तुम सात दिन तक अखमीरी रोटी खायो करो।7ओको म पहिलो दिन तुम्हरी पवित्र सभा होयेंन; अऊर ऊ दिन मेहनत को कोयी काम मत करो।8पर सात दिन तक तुम परमेश्वर ख अग्निबलि चढ़ायो करो; अऊर सातवों दिन पवित्र सभा होयेंन; ऊ दिन कोयी मेहनत को काम मत करो।”9फिर परमेश्वर न मूसा सी कह्यो,10“इस्राएलियों सी कहो कि जब तुम ऊ देश म सिरो जेक परमेश्वर तुम्ख देवय हय अऊर ओको म की फसल काटो, तब अपनो अपनो पक्यो खेत की पहली फसल की एक पेंढी याजक को जवर लायो करो;11अऊर याजक ऊ पेंढी ख परमेश्वर को सामने हिलायेंन, कि ऊ तुम्हरो लायी स्विकारयो जायेंन; ऊ ओख आराम दिन को दूसरों दिन हिलायेंन।12अऊर जो दिन तुम पेंढी हिलावो उच दिन एक साल को निर्दोष मेंढी को बच्चा परमेश्वर लायी होमबलि चढ़ावो।13अऊर ओको संग अनाज भेंट एपा को दसवों अंश जैतून को तेल सी सान्यो हुयो मैदा होय, सुखदायक सुगन्ध लायी परमेश्वर को हवन को रूप म चढ़ायो जाय; अऊर ओको संग पेयबलि लायी दोय लिटर अंगूरीरस भी चढ़ायो जाय।14जब तक तुम नयी फसल को चढ़ावा अपनो परमेश्वर को जवर नहीं लावो, तब तक नयी फसल की रोटी यां भूज्यो दाना यां कच्चो दाना मत खावो; यो तुम्हरी पीढ़ी सी पीढ़ी म तुम्हरो घराना म हमेशा की विधि ठहरेंन।
कटनी को त्यौहार
15“फिर ऊ आराम दिन को दूसरो दिन सी, मतलब जो दिन सी तुम हिलायी जान वाली भेंट की पेंढी ख लावो, ऊ दिन सी पूरो सात आराम दिन गिन लेवो;16सातवों आराम दिन को दूसरो दिन को बाद सी पचास दिन गिनो, अऊर पचासवों दिन परमेश्वर लायी नयो अन्नबलि चढ़ावो।17तुम अपनो घरों सी हिलावन की भेंट बलि को रूप म चढ़ावन लायी दोय किलो मैदा की दोय रोटियां लावो; जो परमेश्वर ख पहली फसल को रूप म चढ़ावन लायी खमीर को संग पकायी जाय।18अऊर वा रोटी को संग एक एक साल को सात पूर्ण स्वस्थ मेंढी को बच्चा, अऊर एक बछड़ा अऊर दोय मेढ़े चढ़ावो; हि अपनो अपनो अनाज भेंट अऊर पेयबलि समेत परमेश्वर लायी अग्निबलि को जसो चढ़ायो जाये, मतलब हि परमेश्वर लायी सुखदायक सुगन्ध देन वालो हवन ठहरे।19फिर पापबलि लायी एक बकरा, अऊर मेल-मिलाप बलि लायी एक एक साल को दोय मेंढी को बच्चा चढ़ावो।20तब याजक उन्ख पहली फसल की रोटी समेत परमेश्वर को सामने हिलावन की भेंट लायी हिलाये, अऊर इन रोटियों को संग हि दोयी मेंढी को बच्चा भी हिलायो जाये; हि परमेश्वर लायी पवित्र, अऊर याजक को भाग ठहरेंन।21अऊर उच दिन यो प्रचार करो कि अज हमरी एक पवित्र सभा होयेंन; अऊर मेहनत को कोयी काम मत करो; यो तुम्हरो पूरो घराना म तुम्हरी पीढ़ी पीढ़ी म हमेशा की विधि ठहरेंन।22“जब तुम अपनी जमीन की फसल काटो तब खेतों ख पूरो को पूरो मत काटो, अऊर नहीं फसल की कटायी को बाद गिरी हुयी लोम्बा जमा करो; ओख गरीब अऊर परदेशियों लायी छोड़ देवो; मय तुम्हरो परमेश्वर यहोवा आय।”
नयो साल को त्यौहार
23फिर परमेश्वर न मूसा सी कह्यो,24“इस्राएलियों सी कहो कि सातवों महिना को पहिलो दिन ख तुम्हरो लायी खास आराम को होना; ओको म याद दिलावन लायी नरसिंगा फूक्यो जाय, अऊर एक पवित्र सभा जमा हो।25ऊ दिन तुम मेहनत को कोयी काम मत करो, अऊर परमेश्वर लायी एक अग्निबलि चढ़ावो।”
प्रायश्चित को दिन
26फिर परमेश्वर न मूसा सी कह्यो,27उच सातवों महिना को दसवों दिन पश्चाताप को दिन मान्यो जाये; ऊ तुम्हरो पवित्र सभा को दिन होयेंन, अऊर ओको म तुम उपवास करो अऊर परमेश्वर लायी अग्निबलि चढ़ावो।28ऊ दिन तुम कोयी तरह को काम-काज मत करो; कहालीकि ऊ पश्चाताप को दिन चुन्यो गयो हय जेको म तुम्हरो परमेश्वर यहोवा को सामने तुम्हरो लायी पश्चाताप करयो जायेंन।29येकोलायी जो आदमी ऊ दिन खुद दु:ख नहीं सहेंन ऊ अपनो लोगों म सी नाश करयो जायेंन।30अऊर जो आदमी ऊ दिन कोयी तरह को काम-काज करेंन ऊ आदमी ख मय ओको लोगों को बीच म सी नाश कर डालूं।31तुम कोयी तरह को काम-काज मत करो; यो तुम्हरी पीढ़ी पीढ़ी म तुम्हरो घराना म हमेशा की विधि होयेंन।32ऊ दिन तुम्हरो लायी परमविश्राम को होयेंन, ओको म तुम खुद दु:ख देवो; अऊर ऊ महिना को नववों दिन की शाम सी ले क दूसरो दिन की शाम तक अपनो खास आराम दिन मान्यो करो।
खोपड़ियों को त्यौहार
33फिर परमेश्वर न मूसा सी कह्यो,34“इस्राएलियों सी कहो कि उच सातवों महिना को पन्द्रावों दिन सी सात दिन तक परमेश्वर लायी खोपड़ियों को त्यौहार मनायो जाये।35पहिलो दिन पवित्र सभा होयेंन; ओको म मेहनत को कोयी काम मत करो।36“सातवों दिन परमेश्वर लायी अग्निबलि चढ़ायो करो, फिर आठवों दिन तुम्हरी पवित्र सभा होयेंन, अऊर परमेश्वर लायी हवन चढ़ावो; ऊ महासभा को दिन आय, अऊर ओको म मेहनत को कोयी काम मत करो।37परमेश्वर को ठहरायो त्यौहार योच आय, इन म तुम परमेश्वर ख बलिदान चढ़ावो, मतलब अग्निबलि, अन्नबलि, मेल-मिलाप बलि अऊर अंगूरीरस, हर एक अपनो अपनो नियुक्त समय पर चढ़ायो जाय अऊर पवित्र सभा को प्रचार करो।38इन सब सी जादा परमेश्वर को आराम दिनों ख मानो, अऊर अपनी भेंटों, अऊर मन्नतों, अऊर खुद की इच्छा सी बलियों ख परमेश्वर ख चढ़ायो करो।39“फिर सातवों महिना को पन्द्रावों दिन ख, जब तुम जमीन की फसल ख जमा कर लेवो, तब सात दिन तक परमेश्वर को त्यौहार मनावो; पहिलो अऊर आठवों दिन खास आराम को दिन होयेंन।40अऊर पहिलो दिन तुम अच्छो अच्छो झाड़ को फर, अऊर खजूर को डगालियां, अऊर घनो झाड़ो की डगालियां, अऊर नदी को किनार को मजनूं झाड़ की डगाली ले क अपनो परमेश्वर यहोवा को सामने सात दिन तक खुशी मनावो।41हर साल सात दिन तक परमेश्वर लायी यो त्यौहार मनावो; यो तुम्हरी पीढ़ी सी पीढ़ी म हमेशा की विधि ठहरेंन कि सातवों महिना म यो त्यौहार मनायो जाय।42सात दिन तक तुम खोपड़ियों म रह्यो करो, मतलब जितनो जनम सी इस्राएली हय हि सब को सब खोपड़ियों म रहेंन,43येकोलायी कि तुम्हरी पीढ़ी सी पीढ़ी को लोगों ख एहसास होय जाये, कि परमेश्वर न हम इस्राएलियों ख मिस्र देश सी निकाल लायो होतो; तब हम्ख खोपड़ियों म निवास करायो होतो; मय तुम्हरो परमेश्वर यहोवा आय।”44अऊर मूसा न इस्राएलियों ख परमेश्वर को त्यौहार को ठहरायो समय बतायो।