Filipai3kyg_tbl

1Konagaꞌnimogitapae, huꞌna, geꞌnimo huꞌna hano hugefeꞌmo huvanagi henaga geꞌnimo afiyo. Ala kava nefeꞌmo lapamogaga aiyo. Lapa paiꞌnova gemo halate lapa paisuvafeꞌmo alaga oꞌnahaeꞌniyanageꞌna lapa maesugetapa alagepa hutapa maisayafeꞌmo lapa nepauve.2Mago vayaꞌmogimo afela kalagana huꞌa maiꞌneꞌa hosu aliꞌyaꞌmo neꞌaliꞌa hosu kavaꞌmo huꞌa apakufamo lagauꞌa neꞌapataya vayaꞌaifeꞌmo ehetapiye.3Lagaemo alagepa kavatiletiꞌmo laha maegaiye, huta osuta Aunemeꞌaletiꞌmo Gotifekeꞌmo mono huta Kalaisi Yesufekeꞌmo lamogaga aita amuse nehune.4Alagepa kavatiletiꞌmo afaꞌa laha maeꞌniyesinana alagepa kavaꞌniletiꞌmo henagaꞌamo alagepa huꞌna mauvesine. Mago vayaꞌmogi alagepa kavatiletiꞌmo laha maegaiye, huꞌa apakesamo afiꞌnisayana aeꞌna apakaseꞌnovaꞌmofeꞌmo alagepa kavaꞌniletiꞌmo naha maegaiye, huꞌna nagesamo afuvesine.5Naha maegaiye, huꞌna nagesamo afuvesina agufa kavaꞌmo haneꞌniyana itaꞌnimoꞌmo alino nateꞌnigeno magoke salemo utegeꞌapaeꞌmo nagufamo lagauꞌa nateꞌnae. Nagaemo Isaleli vekamo maiꞌneꞌna Menisameni nofi vayapati vekamo maiꞌnove. Muki naginago vayaꞌmo Himulu vayaꞌageꞌmo maiꞌnae. Hogoteꞌna Falasi mono vekamo maiꞌneꞌna Yu vayaꞌai keꞌaepa gemo akame huꞌnove.6Nagaemo, Goti aliꞌyaꞌamo aligesuve, huꞌna huteꞌna lusi kava huꞌna nayamukiki huꞌna siosi vayaꞌaitegamo kame huꞌna apateꞌnove. Keꞌaepa gemo alagepa huꞌna akame huꞌnogeꞌa nageteꞌapaeꞌmo vaiꞌmo oꞌnamiꞌnae.7Hogoteꞌna ani agufa kavaꞌmo huꞌna maiꞌneꞌnaeꞌmo, naha maegaiye, huꞌna nagesamo afiteꞌna amuse huꞌnovaꞌmonanafa Kalaisiꞌa atafausuvafeꞌmo, naha oꞌmaeno natafauno nategaiye, huꞌna nagesamo afiꞌneꞌna ataleꞌnove.8Ataleꞌnovanageꞌna hemenimo huꞌnaeꞌmo, hogote yaꞌmo aeno agaseꞌniya yaꞌmo Ala kava neꞌnimo Kalaisi Yesuꞌa alagi ageꞌna aeto hisuvafekeꞌmo kanamo aliꞌneꞌnaeꞌmo muki yaꞌmo ago ataleꞌnove. Hosuꞌniya neꞌyaꞌmo alini uꞌa neꞌatalaya neꞌyakana huno haneꞌniye, huꞌna huteꞌna Kalaisiꞌa alisuvafeꞌmo aliꞌna yaga auꞌna ataleꞌnove.9Nagaemo keꞌaepa gemo akame huteꞌna nagaiꞌni fatago kavaꞌnimo aliꞌnovanageno Gotiꞌa nagesiyafeꞌmo oꞌnahauꞌniye. Kalaisifekeꞌmo nagesa afiꞌna fatago huꞌnogeno Gotiꞌa fatago kavaꞌamo fiku alino namiꞌnigeꞌna aliꞌnovanageno Gotiꞌa Kalaisipiꞌmo nagetenoꞌaeꞌmo, naulagaleꞌmo fatago vekamo maiꞌnane, huno hisiyafekeꞌmo nahauꞌniye.10Kalaisiꞌa ageꞌna aeto hisuvafekeꞌmo neꞌnahaiye. Faliꞌniyatetiꞌmo he tiꞌniya himamuꞌamoꞌa naipafiꞌmo aliꞌyaꞌmo alisigeꞌna agegesuve. Kanamo aliꞌniya kavatefeꞌmo magoke agufa kava huꞌna kanamo alisuvafeꞌmo neꞌnahaiye. Faliꞌniyanageꞌna atafa naipamo hano hisiyafeꞌmo faliteꞌna agaekana huꞌna maigesuve.11Atupaleꞌmo uꞌna avaꞌyi huteꞌna muki faliꞌnaya vayapatiꞌmo alagepa huꞌna he tisuvafeꞌmo amalageka huꞌna nayamukiki nehuve.

Poloꞌa atupaleꞌmo uno avaꞌyi hisiyafeꞌmo nagu nagu huno uꞌniya gemae.

12Atupaleꞌmo uꞌna avaꞌyi osuꞌnove. Haiꞌna ohapaiꞌnovanageꞌna atafausuvafeꞌmo vegala aeꞌna nagu nagu huꞌna uꞌna atafausuvafeꞌmo Kalaisi Yesuꞌa hogoteno natafauꞌniye.13Konagaꞌnimogitapae, huꞌna, atafauꞌnove, huꞌna nagesamo oꞌafiꞌna magoke kavafeꞌmo huꞌnaeꞌmo nakamelaga eno neꞌviya kavaꞌmo nage kaniꞌna ataleteꞌna naulagatiꞌmo neꞌaya kavaꞌmo alisuvafeꞌmo faiꞌna alipailiꞌna nagu nagu huꞌna neꞌuve.14Gotiꞌa anaga kotegamo haiꞌna maisuvafeꞌmo Kalaisi Yesutetiꞌmo nagaefeꞌmo keya aeꞌnigeꞌna atupaleꞌmo uꞌna avaꞌyi huteꞌna hetamaꞌnimo alisuvafeꞌmo nayamukiki huꞌna nagu nagu huꞌna neꞌuve.15Neꞌuvaꞌmofeꞌmo alopa vayaꞌmo haita hapaiꞌnona vayaꞌmogitamo ani kava huta maigetao. Mago vayaꞌamogitapa alu lapakesamo neꞌafisayaꞌmoꞌmo Gotiꞌa mani kavaꞌmo afaꞌa alino lapave ligiye.16Alino apave ligiyaꞌmonanafa alino lave liꞌniya kavaꞌmo akame huteta magoke laipa lagesamo aliteta magoke gemo akame higetao.17Konagaꞌnimogitapae, nehuva kavaꞌmo nagetetapa ani kavaꞌmo hutapa nakame hiyo. Ani kavaꞌmo huta neꞌmauna vayaꞌmo alagepa hutapa lagetetapa lakame hiyo.18Mani hemenimo hisuva gemo muki afinaꞌmo lapa paiꞌnovanageꞌna hemenimo halate magoꞌe huꞌna lapa paiꞌnaeꞌmo, Asole vayaꞌmo Kalaisi kame vayaꞌamo maiꞌneꞌa malipu yosaleꞌmo faliꞌniya kavafeꞌmo ava gemo aeꞌa ati nekae, huꞌna huteꞌna naunumo nelamigeꞌna lapa nepauve.19Gotiꞌa alino apagoꞌya lagauno apatalesigeꞌa alagi lageso hugae. Apakaemo neꞌyafekeꞌmo lusi kava huꞌa apakesamo neꞌafiya yaꞌmo gotiꞌapimoꞌae. Apavagage hisiya yafekeꞌmo amuse huꞌa neꞌatae. Ma mopafi yatefekeꞌmo apaipa apakesamo aliꞌa atalageno neꞌviyaꞌmonanafa20lagaemo kokuꞌnapi vayaꞌmo maiꞌneta kokuꞌnapatiꞌmo eminesiya vekamoꞌa lagufamo alino katino nelateya vekamo Ala kava neꞌmo Yesu Kalaisifekeꞌmo lavayagunagu huta agava neꞌmaune.21Agaemo ayamufaꞌaletiꞌmo muki yaꞌe vayaꞌeꞌmo alino aiyafiꞌmo apateteno yagaino apatesiya ayamufaꞌaletiꞌmo hosu lagufamo lokiya oꞌvaino nekasaliya lagufamo agaiꞌa agufagana agufa lagufamo ha le konali lagufamo alino hamaleno lategaiye.
expand_more
Search