మూలు30
1రాహేలు యాకోబు తొల్లె కొక్కరిపోయఁ ప్ణాఅతె ఇంజహఁ తని నానని లెక్కొ కుట్ర అతె. ఏది యాకోబుతొల్లె “నంగె కొక్కరిపోదని హియ్య. హియ్యతిహిఁ నాను హఇఁ” ఇచ్చె.2యాకోబు కోపతొల్లె రాహేలు లెక్కొ కోపఆతె. ఏవసి “నింగె కొక్కరిపోదయఁ హియ్యహ మహపురు టాయుత నాను మఇఁకి?” ఇచ్చెసి.3ఇంజహఁ ఏది “నా హల్లెణి ఆతి బిల్హా మన్నె సమ్మ, ఏదానితొల్లె లాఅఁయ హుంజలి హల్లము. ఏది నా కోసొమి కొక్కరి పోదని ప్ణానె. ఇంజహఁ ఏదనితొల్లెవ నాను కొక్కరి పోదాఁణి ప్ణాఇఁ” ఇంజిహిఁ వెస్తె.4తని కమ్మగట్టయి ఆతి బిల్హాని డొక్రిలెహెఁ హిత్తె. యాకోబు ఏదానితొల్లె హుంజితెసి.5ఎచ్చెటిఎ బిల్హా పూరమాసఆహఁ యాకోబుకి రో మీరెఎణఇఁ పాటె.6ఎచ్చెటిఎ రాహేలు “మహపురు నంగె బిచ్చర కియ్యతెసి. ఏవసి నా ప్రాతన వెంజహఁ నంగె మీరెఎణఇఁ హియ్యతెసి” ఏవణఇఁ “దాను” ఇంజిహిఁ దోరు ఇట్టితె.7రాహేలు కమ్మగట్టయి బిల్హా ఓడె పూరమాసఆహఁ యాకోబుకి దుయితి మీరెఎణఇఁ పాటె.8ఎచ్చెటిఎ రాహేలు “మహపురు క్రుప హాడ్డత నా నానని తొల్లె గెల్పిఅయ్యలి ఆడితెఎఁ” ఏవణఇ నప్తాలి ఇంజిహిఁ దోరు ఇట్టితె.9లేయా తాను కొక్కరి పోదాఁణి పాటలి ముట్హెఎఁ ఇంజహఁ తని కమ్మగట్టయి ఆతి జిల్పాని యాకోబుకి డొక్రిలెహెఁ హిత్తె.10జిల్పా యాకోబుకి మీరెఎణఇఁ పాటె.11ఎచ్చెటిఎ లేయా “ఈది కొర్మొఎసాఁ” ఇంజహఁ ఏవణఇఁ గాదు ఇంజిహిఁ దోరు ఇట్టితె.12లేయా కమ్మగట్టయిఆతి జిల్పా యాకోబుకి మీరెఎణఇఁ పాటె.13లేయా “నాను కొర్మొగట్టతెఎఁ. ఇయస్క నన్నఅఁ కొర్మొగట్టతి ఇంజియనెరి సమ్మ” ఇంజిహిఁ ఏవణఇఁ ఆసేరు ఇంజిహిఁ దోరు ఇట్టితె.14గోదుమయఁ డాని బేలత రూబేను హజ్జహఁ బ్డిఁయుత జాడతి ఒస్సొహీరు మెస్సహఁ తని తల్లి లేయానకి తచ్చ హిత్తెసి. ఎచ్చెటిఎ రాహేలు, “నీ మీరెఎసి తత్తి జాడతి ఒస్సొ హీర్క కొచ్చెక నంగె హియ్యము,” ఇంజిహిఁ లేయాతొల్లె ఇచ్చె.15ఇంజహఁ ఏది “నా డొక్రఇ కొడ్డితి సమ్మ, ఏది హాలతెకి? నీఎఁ నా మీరెఎసి తత్తి జాడతి ఒస్సొ హీర్కవ కొడ్డిదికి” ఇచ్చె. ఇంజహఁ రాహేలు “ఎల్లెకిఁ ఇచ్చిహిఁ నీ మీరెఎసి తత్తి జాడతి హీర్క పాయిఁ నీ డొక్ర ఈ లాఅఁయ నీతొల్లె హుంజినెసి” ఇంజిహిఁ వెస్తెయి.16ఏ మిలొఒడ యాకోబు బ్డిఁయుటి వాహిఁనటి లేయా ఏవణి నోకిత హజ్జహఁ “నీను నా తాణ వాము. నా మీరెఎసి తత్తి జాడతి ఒస్సొ హీర్కతొల్లె నిన్నఅఁ కొడ్డతెఎఁ” ఇంజిహిఁ ఇచ్చె. ఇంజహఁ ఏవసి ఏ లాఅఁయఁ ఏదని తొల్లె మచ్చెసి.17మహపురు లేయా ప్రాతన వెచ్చెసి, ఏది పూరమాసఆహఁ యాకోబుకి పాసవ మీరెఎణఇఁ ప్ణానె.18లేయా “నా డొక్రకి నా కమ్మగట్టని హియ్యలెఎ మహపురు నన్నఅఁ ఆసిర్వాదొమికిత్తెసి” ఇంజకొడ్డహఁ ఏవణఇ “ఇస్మాకారు” ఇంజిహిఁ దోరు ఇట్టితె.19లేయా ఓడె పూరమాసఆహఁ యాకోబుకి చోహొతి మీరెఎణి పాటె.20ఎచ్చెటిఎ లేయా “మహపురు నంగె నెహిఁకి ఆసిర్వాదొమికియ్యతెసి. నా డొక్రకి చోహొజాణ మీర్కాణి పాటెఎ. ఇంజహఁ ఏవసి నాతొల్లె మన్నెసి” ఇంజకొడ్డహఁ ఏవణఇఁ “జెబూలూను” దోరు ఇట్టితె.21ఏ డాయు ఏది రో మాంగని పాటె ఏదనకి దీనా ఇంజిహిఁ దోరు ఇట్టితె.22ఎచ్చెటిఎ రాహేలుని మహపురు ఒణ్పకొడ్డహఁ, ఏదని ప్రాతన వెంజహఁ కొక్కరిపోదయఁణి ప్ణాపికిత్తెసి.23ఎచ్చెటిఎ ఏది పూరమాసఆహఁ మీరెఎణి పాటహఁ “మహపురు నా నింద మ్నెక్నెసి” ఇంజకొడితె.24ఓడె ఏది “తంజి ఆతి యెహోవ నంగె ఓరొ మీరెఎణి హియ్యనెసి సమ్మ” ఇంజకొడ్డహఁ ఏవణఇ “యోసేపు” ఇంజిహిఁ దోరు ఇట్టతె.25రాహేలు యోసేపుఇఁ పాటి డాయు యాకోబు లాబానుతొల్లె “నన్నఅఁ పండము. నా టాయుతక్కి, నా దేసత వెండె హల్లిఇఁ.26నా డొక్రిస్కని, నా కొక్కరిపోదని నా నంగె హియ్యము. నాను హజ్జిమఇఁ, ఏవరి కోసొమి నింగె సేబకిత్తెఎఁ. నాను సేబకిత్తయి నీను పుంజిమా” ఇంజిహిఁ వెస్తెసి.27ఏదఅఁతక్కి లాబాను ఏవణితొల్లె “నీ దయ నా లెక్కొ మచ్చిహిఁ నా హాడ్డతి వెన్నము. నీను మంజి ఇంజహఁ తంజిఆతి యెహోవ నన్నఅఁ ఆసిర్వాదొమి కియతెసి ఇంజిహిఁ నాను పాంజి తొల్లె పుచ్చెఎ.28నీ జీతొమి ఇచ్చెక ఇంజిహిఁ నాతొల్లె సత్తెఎ వెస్తము, ఏది నింగె హియ్యఇ” ఇచ్చెసి.29యాకోబు ఏవణఇ మెస్సహఁ “నాను నింగె సేబ కిత్తెఎఁ, నీ మందయఁ నా దరి ఏనికి మచ్చునొ ఏదఅఁతి నీను పుంజి.30నాను వాఅ నోకి నీ తాణ మచ్చయి కొచ్చెక, ఏది నెహిఁకి ఆసిర్వాదొమిఆహఁ గడ్డుఆతె. నాను హన్ని టాంగణ తంజి ఆతి యెహోవ నిన్నఅఁ ఆసిర్వాదొమికియ్యనెసి. ఇచ్చిహిఁ నాను నా సొంతె ఇజ్జొతరి కోసొమి ఎచ్చెలవ కూడికిహకొడ్డానెఁ?” ఇచ్చెసి.31ఎచ్చెటిఎ లాబాను “నాను ఏనఅఁ హియ్యఇఁ?” ఇంజిహిఁ వెచ్చెసి. ఇంజహఁ యాకోబు “నీను నంగె ఏనయి జికెల హియ్యఅని సమ్మ, నీను నా కోసొమి నాను వెస్తిలెహెఁ కిత్తిహిఁ, నాను వెండె నీ మందతి కాపుకాఇఁ ఏవఅఁతి సినికిఇఁ.32నీంజు నాను నీ మందబర్రెతి మెస్సహఁ లంబఆతి మచ్చఆతి ప్రెతి మేండతి మేండడాల్కని కాడియఆతని, గొర్రితాణ మచ్చఆతనివ, లంబఆతఅ వేరుకిఇఁ. ఏవి బర్రె నంగె కూలి ఆను.33ఓడె తొల్లి నంగె సరిఆతి కూలితక్కి నీను సినికియ్యలి వాతటి నా నీతిఎ నంగె సాక్కిఆనె. గొర్రియఁతాణ లంబ మచ్చయఁ హిల్లఅగట్టఅఁ, గొర్రి డాల్కణ కాడియఁ హిల్లఅగట్టఅఁ నా దరి మచ్చిహిఁ నాను డొఙకిత్తెఎఁ ఇంజిహిఁ వెహ్ము” ఇచ్చెసి.34ఇంజహఁ లాబాను “నెహయిఁ, నీ హాడ్డ సొమన ఆపె” ఇచ్చెసి.35ఏ నేచు లాబాను చారలూ, మచ్చయఁ మన్ని గొర్రియఁని, లంబఆతి మచ్చగట్టి హాడ్డ గొర్రియఁని కొచ్చెక కుమ్డి మన్ని ప్రెతి గొర్రిడాల్కని కాడియఁ గొర్రీణి వేరుకిహఁ తని మీర్కాకి హిత్తెసి.36తంగెకి యాకోబుకి మద్ది తీని నేచుయ హన్ని ఎచ్చెక హెక్కొ ఇట్టితెసి. లాబానువ హారితి మందతి యాకోబు మెచ్చీనెసి.37యాకోబు గంగ రావి, బాదొమి, సాల మార్క తొక్కయఁ కొడ్డము ఏ తొక్కోణ వెలగట్టి మచ్చయ తోంజఆనిలెహెఁ ఎంబఅఁ ఎంబఅఁ ఏవఅఁతి తొక్కయఁ డొత్హెసి.38మందయఁ ఏయు గొస్సలి వాతటి ఏవి సూలు దొస్సలితక్కి ఏవసి తాను పొడ్హిఁ సాలీఁణి మందయ గొస్సలి వాని కాలువత, ఏయు కాలుత, ఏవఅఁతి నోకిత ఇట్టితెసి.39ఎచ్చెటిఎ ఏ మందయఁ ఏ కొమ్మయ నోకిత సూలు ఆతి చారలు, పొడలు, మచ్చయఆతి గొర్రిని పాటు.40యాకోబు ఏ గొర్రిడాల్కని వేరుకిహఁ , మచ్చయఆతి బకి, లాబాను మందత కాడియ బకి మందయఁ మూంబుతి తిప్పహఁ తని మందాని లాబాను మందయతొల్లె ఇట్టఅఁ రేటుఎ ఏవఅఁతి వేరెఎ కిత్తెసి.41మందత గట్టి సూలుఆతటి ఏవి ఏ మంద నోకిత సూలు ఆతెహెఁ ఇల్లెకి యాకోబు మందతకి నోకితి కాల్వత ఏ ఒస్సొగట్టి బడ్గయఁ ఇట్టితెసి.42మంద వాయితటి ఇట్టఅతెసి. ఎల్లెకిఁ వాయితఅఁ లాబానుకి బల్హఁ మన్నఇ యాకోబుకి వాతు.43ఏనికి ఏ మణసి హారెఎ ఏపఆహఁ మందయ, కమ్మగట్టరి, లొట్టిపిట్టయఁ, గాడ్దెయఁ ఆతెసి.
The Word for the World International