మూలు16
1అబ్రాము డొక్రి సారయిని తాణ కొక్కరి పోదయఁ జర్న ఆఅతెరి. ఇంజాఁ ఐగుప్తు దేసతక్కి పాడ ఆతి రో హల్లెణి మన్నె. ఏదాని దోరు హాగరు.2సారయి అబ్రాముఇఁ “వెన్నము, యెహోవ నంగె కొక్కరి పోదయఁ హిల్లఅరేటు కియ్యతెసి. నీను నా హల్లెణిని ఇట్టము. ఏదాని తాణ హబుల నా కోసొమి కొక్కరి పోదయఁ జర్న ఆనెరి” ఇచ్చె. అబ్రాము సారయి హాడ్డ వెచ్చెసి.3అబ్రాము కనాను దేసత బస్స ఆహఁ దొస్సొ బర్స ఆతెసిఎ. అబ్రాము డొక్రి సారయి ఐగుప్తు దేసతక్కిపాడ ఆతి తని హల్లెణి హాగరుని తని డొక్రకి డొక్రి కియ్యలి హీతె.4ఇంజహఁ ఏవసి హాగరుని కూడలెఎ, ఏ హాగరు పూరమాస ఆతె. ఇంజాఁ తాను పూరమాస ఆతణి పుంజహఁ హాగరు తని కిహఁ కజ్జాని ఊణ కిహిఁ సినికియ్యలి మాట్హె.5ఎచ్చెటిఎ సారయి అబ్రాముఇఁ “నా ఉసొరొమి నింగె ఆడ్డనె. ఈది బర్రె నీ వల్లెఎ ఆతె. నా హల్లెణిని నానుఎ నీ కెయ్యుత హియ్యతెఎఁ. ఏది పూరమాస ఆతె. ఏదఅఁ పుచ్చి తాణటిఎ ఏది క్రియుఁ కన్ను హిల్లఅరేటు నన్నఅఁ ఊణ కిహీఁ సినికియ్యలి మాట్హతె. నింగెఎ నంగెఎ మద్ది యెహోవ మహపురుఎ బిచ్చర కియ్యపెసి” ఇచ్చెసి.6ఏదఅఁతక్కి అబ్రాము “సినికిము, నీ హల్లెణి నీ కెయ్యుతెఎ మన్నెమా. ఏదాని నీ ఇచ్చ మోనొలెహెఁ కిమ్ము” ఇచ్చెసి. ఎచ్చెటిఎ సారయి తని హల్లెణిని డొండొ హియ్యలి మాట్హె ఏదఅఁతక్కి హాగరు సారయిని పిస్సాఁ హత్తుస్తె.7సూరు హన్ని జియ్యుత జాడత మన్ని ఏయు ఊట దరి యెహోవ దూతొ ఏదాని మెస్తెసి.8ఇంజహఁ ఏదాని “సారయి హల్లెణి ఆతి ఓ హాగరు, నీను ఎంబిటి వాతి? ఎంబియఁ హజీజి?” ఇంజిహిఁ వెచ్చెసి. ఏదఅఁతక్కి ఏది “నా కిహఁ కజ్జాని తాణటి హొట్ట వాహమఇఁ” ఇచ్చెసి.9ఎచ్చెటిఎ యెహోవ దూతొ, “నీను ఓడె వెండె నీ కిహిఁ కజ్జాని తాణ హల్లము. ఏదానక్కి పూర్తి నంగ లొఙహఁ హాడ్డ వెంజిహిఁ మన్నము” ఇచ్చెసి.10యెహోవ దూతొ ఓడె ఇల్లె ఇచ్చెసి. “నీ బేలితి పిట్టొవి కిఅరేటు గడ్డు ఏప కిఇఁ. ఏదఅఁ లెక్క కియ్యలి ఆడ్డఅరేటు కిఇఁ” ఇంజిహిఁ ఏదాని వెస్తెసి.11ఓడె మహపురు దూతొ “వెన్నము, యెహోవ మహపురు నీ ప్రాతన వెచ్చెసి. నీఎఁ నీను పూరమాసతొల్లె మంజి. నింగె మీరెఎసి జర్న అయ్యనెసి. ఏవణఇఁ ఇస్మాయేలు ఇన్ని దోరు ఇట్టిది.12ఏవసి జాడ గాడ్దెలేహెఁతి మణిసి. ఏవసి బర్రె జాణతక్కి పగ్గతొల్లె డొయినెసి. బర్రెజాణ ఏవణక్కి పగ్గగట్టరి ఆనెరి. ఏవసి తని తయ్యియఁకివ ఎట్కెఎ బత్కినెసి” ఇంజిహిఁ ఏదాని వెస్తెసి.13ఎచ్చెటిఎ ఏది “నన్నఅఁ మెస్తతసి నంగె సత్తెఎ తోంజ అయ్యతెసి” ఇచ్చె. ఏదఅఁతక్కి తన్నఅఁ జోలితి యెహోవ “నన్నఅఁ సినికిహిఁ మంజాని మహపురుతి నీనుఎ” ఇన్ని దోరు ఇట్టితె.14ఏదఅఁతక్కి ఏ ఏయు ఊటతి “బెయేరు లహాయి రోయి ” ఇన్ని దోరు వాతె. ఏది కాదేసుకి బెరెదుకి మద్ది మన్నె.15ఏ డాయు హాగరు అబ్రాము మీరెఎణకి జర్నకీతె. హాగరుని తాణటి జర్నఆతి తని మీరెఎణఇఁ అబ్రాము ఇస్మాయేలు ఇన్ని దోరు ఇట్టితెసి.16అబ్రాము మీరెఎణ ఇస్మాయేలుకి హాగరు తాణ జర్న ఆతటి అబ్రాము వయసు సారి కొడి సోహొ బర్సయఁ ఆహఁ మచ్చెసి.
The Word for the World International