Titus3
1Phaai pahei piđó huuiq bóóp lơq đơơp xâng nôôq têêng bhua chuôq palơq nôôq manưih kadhâng koq, phaai ravang đóng dyóp tarnêêng liêm,2kah praaq kađiq ngaai, kah kiêng tarjơl tarvei, hơq phaai moor dha-iiq, yuur pakah bhơt praan pakatưưiq lóóm palơq dyóp ngaai.3Taai nôôq he n'loom hei kung nek nôôq đu ngôôk ngaak lơq kah xâng bóóp, bâân dharơơl paxuq lơq têêng xól đóng dyóp rau malóóch kiêng palơq bhuui sương, mamông kalóóng rau lơt aak lơq chriik lêi, đaang geet, lơq gaam chróót xóng ađêi.4Bơơi xók rau liêm kre lơq lóóm nh'nhơr ưng Yaang Pleng, Chuôq Paq nôôq he, bâân tapakah,5nek Ađó paq nôôq he, eh rau tââq nôôq tarnêêng têêng gluh tââq rau bhơt liêm đu nôôq he ơi yuur têêng, bơơi tââq lóóm kayô ka-er ưng Ađó, dhiq tarnêêng raau pasek ưng ơơn n'niên lóóiq lơq rau raxal tame tââq Chuôq Yaang Liêm,6nek Yaang đu Yaang Pleng ơi n'toh kơi xưa raai dhiq nôôq he tââq Chuôq Paq nôôq he nek Jê-su Chuôq Paq Manưih,7buôn xong xók bâân đóók bhơt liêm ve ơơn phươk liêm Ađó, nôôq he bâân xar kơi nôôq manưih pâng đơơp ting kơi lóóm parââm dhakơi mưng leq rau parmông nh'chró.8Taruuih liêm ađô nek đaang huuiq ganơơm, lơq aku kiêng akóón praaq tabhlơng leq nôôq rau chêk, ng'kơi đóng nôôq ngaai ơi huuiq Yaang Pleng e chagơn giit chamet lêi buôn tapôông achak leq tarnêêng liêm kre. Nôôq tarnêêng ađek nek liêm kre lơq malơơi leq bơk manưih.9Bơơi phaai róch nôôq ganơt praaq tarkaai ngôôk ngaak, nôôq bha-aar dhong nooi, rau tarkaai tarlak lơq tarvei tarjơl leq gani taai piđó nek nôôq rau kah malơơi malaai lơq kah chóóm liêm.10Phaai m'peq lơơi ngaai manưih ting taruuih lââng lơh mưi môôiq bơơr chu trêh teng,11taai n'nal kơi manưih kơi achêk ơi bâân lơt xraang lơq bhiêk têêng matu lơt, nek đu tư tabóq matu ađêi.12Xók aku kayua A-tê-ma môôiq Ti-chi-kơ tơk leq akóón, nek akóón phaai pađâh tơk lum aku dhiq Ni-kô-bô-li, taai aku ơi dhakơi kanóq tơơt lơh nil ha-ót dhiq ađek.13Phaai đââng takóh xêi xanêi Xê-na lơq A-bô-lô vôôiq kalơng alua dyóp tarmông tanuur, ng'kơi đóng piđó yươq rau tabhuch tapiêl.14Nôôq adhi anó đu huuiq ưng nôôq he kung phaai đuui pajaau achak leq nôôq tarnêêng liêm kre đơơp ââi xâng nôôq rau kiêng kơng bhlơng, buôn yươq xar kơi kah bóóng pale.15Tabhơt nôôq manưih tơơt palơq aku tamóh tham akóón. Phaai pagơơi paraaq tamóh tham nôôq manưih nh'nhơr nôôq he kalóóng lóóm huuiq. Nhan ơơn phươk liêm tơơt palơq tabhơt adhi anó.
FAR EAST BROADCASTING COMPANY