Romans9
1Aku praaq lalua kalóóng Chuôq Paq Manưih. Aku kah praaq chachââr — luônh lóóm aku truuih đuui đóng aku kalóóng Chuôq Yaang Liêm —2kơi nek palơq aku, ve rau ranguôq lóóm gamak lơq vaaih ka-ai karuôq kah bil kalóóng lóóm aku.3Taai aku biêh rââm kơi chênh ađêi bâân tóh đua, têêng tablah tââq Chuôq Paq Manưih ơi taai adhi anó aku, nek nôôq manưih griêq đan ưng aku ting ng'kar m'bech;4chênh piđó nek dhanuôr I-sơ-ra-êên, hơq nôôq rau chô leq piđó nek dhanóók têêng akóón partơơt, cha-iil tabah, nôôq raket bóóp, tarnêêng pajaau đóng gani, rau bhuôih haanh, lơq nôôq paraaq hươq;5piđó gluh tââq nôôq abhươp avuôq, lơq Chuôq Paq Manưih gluh tââq piđó (hơq nek ting ng'kar m'bech) — Ađó nek Yaang papiing lơh tabhơt dyóp rau, hơq nek Yaang Pleng đaang bâân bhi haanh patơk nh'chró chró. Alua achêk kơi.6Bơơi kah ve chiên paraaq ưng Yaang Pleng ơi bil praan kataai. Ơi eh rau tabhơt nôôq ngaai gluh tââq I-sơ-ra-êên, hơq ađek nek manưih I-sơ-ra-êên.7Kung eh rau tabhơt akóón chachau nek dhong nooi ưng Ap-ra-haam. Bơơi nek, “tââq I-saak, dhong nooi ưng akóón e bâân đóók achak.”8Kiêng móón nek, akóón anaaq ting ng'kar m'bech, nôôq manưih achêk eh rau nek nôôq akóón ưng Yaang Pleng. Palâh lóóiq, akóón anaaq ưng paraaq hươq nek bâân đóók kơi akóón chachau.9Taai ađô nek paraaq hươq: “Mót xók ganah ađôk, Aku e bhral, lơq e ve mưi akóón padruuih koom đóng leq Sa-ra.”10Bơơi kah chapiên kơi achêk, hơq Rê-bê-ka kung kơi achêk xók ve đađââng tââq mưi chanak, nek I-saak, abhươp avuôq ưng nôôq he,11taai xók bhêêl akóón kah ơi n'niên, kung kah têêng rau liêm môôiq rau aak lââng, buôn đóng kanóq kaniêng ưng Yaang Pleng ting rau chââih palưa ưng Ađó ve chóóm jư tamưng,12eh rau tââq tarnêêng têêng, bơơi nek tââq Yaang dhaloong, rau ơi bâân đóng ađó bâân n'nal, ađek nek: “Chanak taha e têêng dhơn đóng chanak tadhi.”13Dhalam kơi rau ơi bâân xaraq: “Aku nh'nhơr Ja-kôôp, bơơi Aku dyââng lêi Ê-saau.”14Kơi achêk, nôôq he e praaq n'đó kơi? Ve kơq ve rau kah marmơ makơi dhiq Yaang Pleng? Chiên ađek kah mơ chóóm vaaih.15Taai Ađó praaq palơq Môôi-se kơi ađô: “Aku e pakah lóóm moor dha-iiq palơq dhơ dhangaai hơq Aku kiêng pakah lóóm moor dha-iiq, lơq Aku e kayô ka-er dhơ dhangaai hơq Aku kiêng kayô ka-er.”16Kơi achêk hayơq eh rau tââq ngaai lââng rââm kiêng, kung eh rau tââq ngaai lââng mut leq têêh mut leq chooh, bơơi nek ting kơi Yaang Pleng, Yaang pakah lóóm kayô ka-er.17Taai Bha-aar Paraaq Yaang Pleng praaq leq Pha-ra-ôôn kơi ađô: “Ơi chênh kanóq kaniêng ađô Aku ơi hayuur amei yuur, buôn dhiq amei Aku ve chóóm pakah đóng mataai raman ưng Aku, lơq buôn ng'kơi đóng dhanóók Aku ve chóóm bâân truuih đuui dhiq plok katiêk.”18Kơi achêk hayơq, Ađó pakah lóóm moor dha-iiq nek palơq ngaai manưih Ađó kiêng, bơơi Ađó têêng nhâng lóóm ngaai lââng Ađó kiêng.19Kơi ađek nek adhi anó e móón aku: “Kơi achêk, hau Amei dyơq bhiêk trêh? Taai ngaai jaklâk lóóiq karnóq ưng Ađó đuôh?”20Nô manưih tôôh, praaq padrêh hơq amei nek ngaai hơq tar-ââi lơq Yaang Pleng? Ve kơq ađô đaak bâân niêl hayơq e móón palơq manưih ơi niêl xar ađêi: “Hau amei chóóm niêl tavaaih aku kơi ađô” hơ?21Môôiq nek manưih niêl katiêk kah ve kataai dhiq katiêk ngaq, buôn yuur tavaaih mưi ađô parvech tââq mađó mưi garboq katiêk, dhơ beq ađô pakoom đóng tarnêêng kiiq bhlơng, bơơi rau tôôh pakoom đóng tarnêêng kah kiêt?22Dyơq la Yaang Pleng, taai kiêng pakah lalua pagrâ janah ưng Ađó lơq têêng pakah karơ mataai ưng Ađó, ơi đơơp kađung kalóóng rau jruôn parngau lóng gamak nek palơq nôôq ađô parvech pakoom đóng ganhuh pagrâ janah, ơi bâân ravang lơơi đóng rau leng kaxiêt;23lơq buôn Ađó ve chóóm têêng pakah rau karvaan ve ưng cha-iil tabah Ađó dhiq nôôq ađô parvech pakoom đóng rau kayô ka-er hơq Ađó ơi ravang lơơi đóng rau cha-iil tabah,24lơq tabhơt nôôq he, nek nôôq manưih hơq Ađó ơi dhaloong, eh mơ tââq manưih Jo Thaaiq, hơq dyơq tââq nôôq dhanuôr katiêk lââng, nek ng'kơi?25Kơi Ađó kung praaq kalóóng bha-aar Ô-sê kơi ađô: “Aku e đóók ađó eh rau dhanuôr Aku, nek ‘dhanuôr Aku’, lơq ađó kah bâân nh'nhơr nek ‘manưih nh'nhơr bhlơng’.26Lơq tavaaih tarnêêng e ve dhiq dham hơq paraaq ơi bâân truuih leq piđó, kơi ađô: ‘Nôôq pe eh rau dhanuôr Aku,’ nek chênh dhiq ađek piđó e bâân đóók nek ‘nôôq akóón padruuih ưng Yaang Pleng taluôn mamông.’”27Bơơi Ê-saai yuur praaq leq dhanuôr I-sơ-ra-êên, kơi ađô: “Dhơ parbơk akóón anaaq ưng dhanuôr I-sơ-ra-êên ve chóóm nek kơi xuôr taxiiq, bơơi chapiên mưi phơn dyơq tagaleq lóóiq e bâân paq.28Taai Chuôq e yuur têêng paraaq Ađó dhiq katiêk, paxong lơq đâh bhlơng.”29Lơq kơi Ê-saai ơi praaq loom: “La Chuôq ưng nôôq praan karơ ơi kah châng lóóiq đóng nôôq he mưi akóón chachau, nek dhơ dhakơi nôôq he ơi bâân val xar kơi kanóón Sô-đôôm, lơq dhakơi nek ơi bâân têêng đóng thê kơi kanóón Gô-mô-rơ.”30Kơi achêk, nôôq he e praaq n'đó kơi? Achêk nek nôôq dhanuôr katiêk lââng, hơq nek nôôq manưih kah ting taviêng rau bhơt liêm, nek ơi tơk bâân rau bhơt liêm, bơơi rau bhơt liêm ađek tââq lóóm huuiq.31Dyơq dhanuôr I-sơ-ra-êên, xók ting taviêng gani ưng rau bhơt liêm, nek ơi kah bâân tơk leq gani achêk.32Ơi taai hau rau? Achêk nek taai kah tââq lóóm huuiq, bơơi kơi tââq tarnêêng têêng. Piđó ơi n'đóih dyung leq khuk dhơl ưng rau têêng chađơl padhêh,33kơi ơi bâân xaraq: “Phaai lêi nô, aku patơơt dhiq Si-ôôn mưi khuk dhơl ưng rau padhêh chađơl lơq bhangôh dhơl ưng tarnêêng têêng lơt, ngaai nak huuiq dhiq dhơl achêk e yươq bâân kachiit mat.”
FAR EAST BROADCASTING COMPANY