Romans14

1Mat lââng, phaai pơh jóói manưih dhur kalóóng lóóm huuiq, kah malóóm tơk tarnêêng xêi praaq nôôq tarkaai tarlak.2Dhơ mưi ngaai ađek ve lóóm huuiq buôn cha dyóp rau, bơơi manưih dhur lóóm nek chapiên cha bhơơi pale.3Manưih cha óóq kađiq lêi manưih kah cha, dyơq manưih kah cha óóq xêi lơt manưih cha. Taai Yaang Pleng ơi pơh đơơp ađó.4Manưih xêi lơt dhơn ratơơq kalóóng đong ưng palââng, amei nek ngaai? Manưih achêk dyương môôiq kalơm nek ting kơi palơq kala ưng chênh ađó kala. Bơơi manưih achêk e bâân têêng đóng dyương mưng, Taai Chuôq ve karơ mataai têêng ađó ađek dyương mưng.5Dhơ manưih ađô blah đóng tangêi tôôh palơq tangêi achêk, Bơơi palââng nek kanóq dyóp tangêi nek kre liêm. Ting chanak phaai huuiq tamưng kalóóng karnóq ađêi.6Manưih jư tangêi nek jư taai Chuôq, manưih cha nek cha taai Chuôq, taai manưih ađek ma-ơơn Yaang Pleng. Manưih kah cha, nek kah cha taai Chuôq, manưih achêk kung ma-ơơn Yaang Pleng.7Taai kah ngaai kalóóng nôôq he mamông taai chênh ađêi, lơq kah ngaai chêt taai chênh ađêi.8Tââq lơq xók nôôq he mamông, nek mamông taai Chuôq, palơq xók nôôq he chêt, nek chêt taai Chuôq. Kơi achêk, lơq xók nôôq he mamông palơq xók nôôq he chêt, nek nôôq he maar mađó leq Chuôq.9Ơi buôn kađââng tơk rau ađô, Chuôq Paq Manưih ơi chêt lơq ơi val mamông, buôn Ađó têêng Chuôq tabhơt Chuôq lơq ưng manưih chêt lơq ưng manưih mamông.10Bơơi anó ađô, hau amei xêi lơt adhi anó ađêi? Hamôôiq anó tôôh, hau amei kađiq lêi adhi anó ađêi? Taai tabhơt nôôq he e dyương pakah ađêi toom tanơơt praaq xêi ưng Yaang Pleng.11Tââq paraaq ơi bâân xaraq:
“Chuôq praaq kơi ađô: ‘Kơi Aku taluôn mamông, dyóp tarkól e chakoh toom Aku,
lơq dyóp n'taak e đơơp truuih toom Yaang Pleng.’”
12Kơi achêk hayơq, ting chanak kalóóng nôôq he e đââng pagluh paraaq truuih pakah leq chênh ađêi palơq Yaang Pleng.
13Taai ađek, nôôq he óóq chêk xêi lơt xóng ađêi dyơq, palâh lóóiq, nek phaai kanóq nô kơi nh'jang, kah patơơt khuk dhơl pagan kađơl kalơng hamôôiq taai ađek n'đóih kalơm đóng adhi anó ađêi.14Aku n'nal lơq bâân praaq pakah kalóóng Chuôq Jê-su, kơi kah ve dhơ dharau tââq achak araang ađó nek anhuq, chapiên ngaai manưih chamet lêi hau rau ađek nek anhuq, ađó nek anhuq ting kơi palơq manưih achêk.15Ơi la ngaai adhi anó ađêi pâng têêng đóng môôp lóóm ơi taai chana dhanah, nek adhi anó kah dyơq jađaang vôôiq ting lóóm tanhơr dyơq. Óóq taai chana dhanah ưng ađêi têêng pahư manưih adhi anó achêk, hơq nek manưih hơq Chuôq Paq Manưih ơi chêt klóóih.16Kơi achêk, óóq lơơi rau kre liêm ưng adhi anó bâân praaq tamôôp.17Taai katiêk ưng Yaang Pleng eh rau tââq chana dhanah lơq đơơk ơm, bơơi nek rau bhơt liêm lơq yươq rauha, palơq rau bhuui marhaal kalóóng Chuôq Yaang Liêm.18Taai ngaai têêng tarnêêng Chuôq Paq Manưih ting kơi ađô nek liêm lóóm Yaang Pleng lơq bâân iêm lóóm tââq akóón manưih.19Kơi achêk hayơq, nôôq he phaai ting taviêng nôôq rau paliêm pakre lơq nôôq rau tơq hayuur koom đóng xóng ađêi.20Óóq têêng pahư nôôq tarnêêng ưng Yaang Pleng taai nôôq rau chana dhanah. Dhơ dyóp rau nek sek liêm, bơơi nek matu lơt ting kơi palơq manưih cha ting kơi tavaaih têêng paxruuk palơt.21Rau liêm kre nek kah đah adhah kung kah ơm buôh hamôôiq tabhơt dhơ dharau hơq dhiq ađek têêng manưih adhi anó ưng ađêi n'đóih kalơm, hamôôiq bâân mơk lơt, môôiq nek val vaaih dhur lóóm.22Chênh achak adhi anó ve lóóm huuiq n'đó kơi, nek pei jư ting dhiq chênh ađêi toom mat Yaang Pleng. Phươk đóng nek manưih yươq tư xêi lơt ađêi kalóóng rau ađêi lêi nek dhalam.23Bơơi mưi chanak ơi bâân patu la manưih achêk ơi cha dyơq xók paangra, taai kah yuur vaaih tââq lóóm huuiq. Mat lââng, dyóp rau tarnêêng hơq kah yuur vaaih tââq lóóm huuiq hơq nek matu.

FAR EAST BROADCASTING COMPANY

https://app.library.bible/content/15a813fef7fefb05