Revelation10
1Dharing ađek, aku lêi mưi dhơn Pleng grâ karơ lââng tââq têêh pleng dhaluônh, bâân ng'guôk leq mưi garboq dhaluk, palơq gavương mariêng dhiq akoq ađêi, mat dhơn pleng achêk kơi mat tangêi, dyung ưng ađó achêk nek kơi chruônh óih,2lơq dyơq jư mưi panuôl bha-aar ng'kar katưưiq ơi talương kalóóng têi ađêi. Dhơn pleng achêk đâq dyung atươm ađêi dhiq taxiiq dyơq dyung ađaai dhiq kakóóng,3hayơq yuur treeh mưi dhariêng karơ thê kơi sư tư gahuum. Xók dhơn pleng achêk treeh karơ, nek tapól dhariêng grơm yuur tar-auq palơq nôôq dhariêng praaq ưng piđó.4Xók tapól dhariêng grơm yuur xuul, aku kanóq xaraq lóóiq, nek aku xâng mưi dhariêng móón tââq pleng praaq: “Phaai tabóq karnal let kiêr nôôq rau tapól dhariêng grơm ơi praaq, hơq óóq xaraq piđó lóóiq.”5Hayơq dhơn pleng đu aku lêi dyương dhiq taxiiq lơq dhiq kakóóng, jarơ têi atươm ađêi leq pleng6lơq ng'kóh tââq dhanóók Yaang mamông patơk nh'chró, taluôn luôn, nek Yaang ơi tavaaih pleng palơq dyóp rau dhiq pleng, katiêk palơq dyóp rau dhiq katiêk, lơq taxiiq palơq dyóp rau kalóóng taxiiq, kơi ađô: “E kah dyơq pađươnh dyơq.7Bơơi mót nôôq tangêi ve dhariêng ưng dhơn pleng đu tapól, xók ađó achêk ravang plong karyóól, nek kadrêi palââp ưng Yaang Pleng e bâân vaaih chaq, dhiêp kơi Ađó ơi truuih taruuih huuiq marhaal achêk đóng dhơn ratơơq Ađó nek nôôq manưih đââng taruuih.”8Hayơq dhariêng đu aku xâng tââq pleng val praaq palơq aku, kơi ađô: “Phaai vôôiq, pei panuôl bha-aar ng'kar ơi lương lơơi kalóóng têi ưng dhơn pleng dyơq dyương dhiq taxiiq lơq dhiq kakóóng.”9Kơi ađek nek aku tơk paleq dhơn pleng ađek, móón ađó achêk đóng leq aku panuôl bha-aar ng'kar katưưiq. Dhơn pleng achêk kayua aku: “Phaai pei đơơp lơq cha ađó vaq, hayơq ađó e têêng luônh amei bâân atang, bơơi kalóóng bóóp amei, ađó e baq kơi đơơk gayơơiq.”10Aku pei đơơp panuôl bha-aar ng'kar katưưiq tââq têi ưng dhơn pleng lơq cha ađó, ađó tơơt kalóóng bóóp aku baq kơi đơơk gayơơiq, bơơi xók aku ơi cha ađó, luônh aku bâân atang.11Hayơq bơk dhariêng praaq palơq aku: “Amei kơng phaai praaq loom taruuih machu dyơq leq bơk dhanuôr, bơk katiêk, nôôq dhariêng paraaq, lơq bhua chuôq.”
FAR EAST BROADCASTING COMPANY