Philippians2
1Kơi achêk hayơq, la kalóóng Chuôq Paq Manưih ve n'đó rau tapoor lóóm, la ve n'đó rau tabhơơl lóóm tââq lóóm tanhơr, la ve n'đó rau tarnêêng kalóóng Yaang Liêm, la ve lóóm tanhơr lơq n'đó rau kayô ka-er,2hayơq nek têêng padyóp lóóm bhuui marhaal ưng aku, ađek nek adhi anó ve markơi lóóm karnóq, xók ve markơi lóóm tanhơr, panjoop mưi kalóóng lóóm kanóq, kanóq tơk mưi leq.3Kah têêng tarnêêng rau taai lóóm châq hiin hamôôiq taai bil liêm, palâh lóóiq, palơq lóóm pa-êêp, lêi manưih lââng bhi chap lơh ađêi,4ting chanak óóq mưi kanóq tơk malơơi ưng ađêi kala, hơq dyơq malơơi ưng nôôq manưih lââng dyơq.5Phaai ve lóóm karnóq kơi achêk kalóóng adhi anó, kung nek lóóm karnóq kalóóng Jê-su Chuôq Paq Manưih,6nek Yaang taluôn ve kalóóng a-ô Yaang Pleng, ơi kah lêi rau kơng phaai pei jư nek rau marđơq palơq Yaang Pleng.7Klóóih dhiq ađek, Ađó ơi tư têêng đóng ađêi vaaih kagóh kagóói xók pei xơp dyaang achak dhơn ratơơq, bâân n'niên kalóóng a-ô thê kơi akóón manưih, lơq bâân lêi kalóóng dyaang achak kơi mưi akóón manưih,8Ađó ơi tư pa-êêp ađêi chok leq xók đơơp huuiq bóóp patơk chêt, Patơk mơ chêt dhiq n'lóóng m'baang chatông.9Taai kơi achêk, Yaang Pleng kung ơi padyók Ađó yaal bhlơng lơq ơi đóng leq Ađó dhanóók m'piing dyóp rau dhanóók,10hơq đóng xâng tơk dhanóók Chuôq Jê-su, Dyóp tarkól dhiq pleng, dhiq katiêk, hót raal katiêk, phaai chakoh chok leq,11lơq dyóp n'taak maar đơơp móón kơi Jê-su Chuôq Paq Manưih nek Chuôq, taval chô cha-iil tabah mađó leq Yaang Pleng, nek Ama.12Kơi achêk hayơq, nôôq manưih nh'nhơr bhlơng ưng aku ơơi, ting kơi adhi anó ơi taluôn huuiq bóóp, xók kah chapiên tơơt kalóóng rau ve mat ưng aku, hơq xók ađôk dhaang bơk lơh kalóóng rau kah ve mat ưng aku, adhi anó nek phaai bhiêk têêng đuui ơơn paq jóói ưng ađêi palơq rau bhi kakhin lơq hayer papreh.13Taai Yaang Pleng nek Yaang dyơq matêêng kalóóng adhi anó buôn lơq kiêng lơq têêng ting karnóq liêm ưng Ađó.14Phaai têêng dyóp rau tarnêêng, hơq óóq m'bhoonh hamôôiq tarkaai tarlak,15buôn adhi anó bâân val kơi nôôq panong akóón yươq dhiq chóóm jươm lơq sek liêm ưng Yaang Pleng, yươq madham madhôôn dhiq m'pơng mưi dhong nooi lơt môôp lơq huông hư, hơq dhiq ađek adhi anó dyóól brương kơi nôôq par-aang dhơu dhiq hóng katiêk,16xók jư tamưng paraaq parmông, taai rau tarhơơnh ưng aku kalóóng tangêi ưng Chuôq Paq Manưih ađek nek ađêi ơi yươq mut kalóóng kah malơơi, kung yươq nhưh nhok kơi bil yưưm.17Bơơi patơk mơ dhơ đóng aku bâân tantoh ahaam buôn havươch dhiq adhah bhanuôih lơq dhanah bhanuôih ưng lóóm huuiq adhi anó, nek aku bhiêk yayar marhaal, lơq ting tabhuui palơq, tabhơt adhi anó.18Adhi anó kung kơi achêk, phaai yayar marhaal lơq ting tabhuui palơq aku.19Kalóóng Chuôq, nek Chuôq Jê-su, aku rââm đâh pagơơi Ti-mô-thê vôôiq tham adhi anó, buôn aku kung bâân lêi yayar mamââk xók n'nal đââr xâng leq adhi anó.20Taai aku kah ve ngaai lââng liêm lóóm kanóq kơi ađó achêk, nek manưih lalua lóóm karaang kanóq nôôq rau malơơi ting kơi palơq adhi anó,21taai nôôq manưih lââng maar chik-chêk nôôq malơơi malaai n'tua, eh rau nôôq rau mađó leq Jê-su Chuôq Paq Manưih.22Bơơi adhi anó n'nal liêm charnap ưng ađó achêk, taai thê kơi akóón palơq akonh, ađó achêk ơi têêng yaauq đóng Taruuih Liêm kung palơq aku.23Đóng hayơq aku rââm kayua ađó achêk dhalam xók aku n'nal rau tarnêêng ưng ađêi e n'đó kơi.24Bơơi aku huuiq mưng dhiq Chuôq kơi chênh aku kung e đâh vôôiq tham adhi anó.25Mat lââng, aku kanóq kiêng phaai pagơơi Ep-ba-phô-đich chô lóóiq leq adhi anó, ađó achêk nek manưih adhi anó lơq parjơơk marau tarnêêng kung nek parjơơk ting tajơl ưng aku, nek manưih đââng paraaq tââq adhi anó lơq nek manưih yaauq têêng đóng rau kiêng ưng aku,26taai bâân n'nal kơi ađó bhơt lóóm đương rââm bâân tơơt palơq tabhơt adhi anó, lơq xâng đơơp ranguôq lóóm taai adhi anó ơi xâng kơi ađó achêk ka-ai pakhau.27Taai pâng nek ađó achêk ơi pâng ka-ai đan chêt, bơơi Yaang Pleng ơi kayô ka-er ađó achêk, hơq eh mưi ađó achêk nek giêl, bơơi dyơq aku dyơq, buôn aku yươq đơơp ranguôq lóóm dhaang dyơq ranguôq lóóm.28Đóng hayơq, aku tahươk tahââm kayua ađó achêk vôôiq, buôn xók lum lóóiq ađó achêk, adhi anó ve chóóm bhuui marhaal, lơq aku kung bâân yươq ranguôq lóóm.29Taai kơi achêk, phaai pơh yaauq ađó achêk kalóóng Chuôq palơq tabhơt lóóm bhuui, palơq phaai ve lóóm bhi chap nôôq ngaai kơi achêk.30Ơi taai tarnêêng ưng Chuôq Paq Manưih hơq ađó achêk patơk mơ menh chêt, xók boh parhââm parmông ađêi buôn ve chóóm têêng paxong phơn kah glêh kalóóng rau yaauq têêng ưng adhi anó niin đóng aku.
FAR EAST BROADCASTING COMPANY