Matthew5
1Xók achêk, xong xók lêi tanóói dhanuôr, Ađó vôôiq đơk dhiq bôôl, lơq xók Ađó ơi tơơt, nôôq môôn-đô Ađó tơk palơq Ađó.2Ađó pơơh bóóp pató pachóóm piđó, kơi ađô:3“Phươk đóng nek nôôq manưih ngeeo hadhơơp kalóóng lóóm yaang,ơi katiêk pleng nek ưng piđó.4Phươk đóng nek nôôq manưih nhiim griit,ơi piđó e bâân tabhơơl.5Phươk đóng nek nôôq manưih moor dha-iiq,ơi piđó e bâân đươi katiêk.6Phươk đóng nek nôôq manưih ha-ul lơq rahaal rau bhơt liêm,ơi piđó e bâân kabhôôq dyóp.7Phươk đóng nek nôôq manưih buôn kayô ka-er,ơi piđó e bâân kayô ka-er.8Phươk đóng nek nôôq manưih sek tabah kalóóng lóóm,ơi piđó e ve lêi Yaang Pleng.9Phươk đóng nek nôôq manưih paliêm lóóiq,ơi piđó e bâân đóók nek nôôq akóón ưng Yaang Pleng.10Phươk đóng nek nôôq manưih pâng kóóp róp ơi taai rau bhơt liêm,ơi katiêk pleng nek ưng piđó.11Adhi anó ve phươk xók palââng kađiq tamôôp adhi anó, palơq têêng pahư lơq praaq dyóp rau môôp baauq uôn huông palơq adhi anó ơi taai thêi.12Phaai bhuui marhaal lơq sương si, ơi kaliim haanh ưng adhi anó lóng gamak dhiq katiêk pleng, taai palââng ơi kóóp róp nôôq manưih đââng taruuih laloom adhi anó i kơi achêk.13Adhi anó nek abhóh ưng katiêk. Bơơi la abhóh bâân bil kariêq, nek ađó e bâân têêng đóng kariêq palơq hau rau? Chapiên bâân m'peq leq nguôi buôn bâân palââng đâq kadhaat, taai nek ađó kah malơơi malaai đóng hau rau dyơq.14Adhi anó nek kalaaq brương ưng hóng katiêk. Mưi kanóón manưih bơk tơơt dhiq kachruôch bôôl nek kah ve chóóm bâân tapađơp.15Kung kah ngaai bat dhơu lơq patơơt ađó dhiq kalóóng hôk, bơơi nek dhiq dyung dhơu, lơq ađó dyóól brương đóng dyóp ngaai kalóóng đong.16Tarvaai ađek, kalaaq brương ưng adhi anó phaai yuur klaaq toom mat palââng, ng'kơi đóng palââng ve chóóm lêi nôôq tarnêêng liêm ưng adhi anó lơq bhi haanh Ama ưng adhi anó dhiq pleng.17Óóq ngóq kơi thêi ơi tơk buôn pahư tabil gani môôiq nôôq paraaq manưih đââng taruuih. Thêi ơi tơk eh rau buôn pahư tabil, bơơi nek buôn têêng đóng paxong.18Ơi nek lalua, Aku praaq palơq adhi anó, patơk xók pleng lơq katiêk lơh bil, nek kah mưi rau môôiq mưi râ kalóóng gani dhakơi kah chóóm bil patơk n'đó bhêêl dyóp rau bâân chóóm ve.19Taai kơi achêk, la ngaai pahư lơơi mưi kalóóng nôôq rau katưưiq tââm ưng nôôq rau gani ađô lơq pachóóm palââng kơi achêk nek e bâân đóók nek katưưiq tââm kalóóng katiêk pleng. Bơơi ngaai đu yuur têêng lơq truuih pachóóm piđó, manưih ađek e bâân đóók nek gamak kalóóng katiêk pleng.20Ơi thêi praaq palơq adhi anó kơi la rau bhơt liêm ưng adhi anó kah đuôh lơh rau bhơt liêm ưng nôôq manưih pachóóm gani lơq manưih Pha-ri-si, nek adhi anó dhakơi e kah bâân mót kalóóng katiêk pleng.21Adhi anó ơi xâng nô kơi, rau ơi bâân truuih đóng manưih hanua: ‘Kah chóóm leng manưih,’ hơq ‘ngaai đu leng manưih nek e phaai đơơp rau praaq xêi.’22Bơơi thêi praaq palơq adhi anó kơi dyóp đu vaaih pagrâ palơq adhi anó ađêi e đơơp rau praaq xêi. Hơq ngaai đu móón adhi anó ađêi: ‘Đu ngôôk!’ nek e đơơp nôôq kabhuh xêi xanêi. Dyơq ngaai đu teng: ‘Đu ngôôk abhưưl!’ nek e đơơp rau janah dhiq bóng óih.23Taai ađek, la adhi anó xók đââng tapôông bhanuôih ađêi dhiq para bhanuôih hayơq dhiq ađek, adhi anó hei lóóiq kơi mưi nak adhi anó ưng ađêi ve rauriq ađek huông palơq ađêi,24nek phaai lơơi lóóiq bhanuôih ađêi dhiq toom para bhanuôih lơq yuur chô; laloom kơ phaai chô paliêm palơq manưih adhi anó ưng ađêi ađek, lơq hayơq, xong xók chô, nek tapôông bhanuôih ađêi.25Phaai praaq paliêm kalóóng lóóm bóóp palơq manưih đu kaauq ađêi kơi chóóm đâh hơq xók bhêêl adhi anó dyơq vôôiq dhiq kalơng nek palơq manưih achêk, óóq manưih đu kaauq ve chóóm pajaau adhi anó đóng kuôn xêi xanêi, lơq kuôn xêi xanêi đââng đóng kabhuh linh, hayơq adhi anó e bâân m'peq mót đong kanam.26Alua, thêi praaq palơq adhi anó, adhi anó dhakơi e kah bâân gluh tââq ađek patơk nh'xók adhi anó ve chóóm chróót đông-jêên tatun xariêq.27Adhi anó ơi xâng nô kơi, paraaq ơi bâân truuih: ‘Kah chóóm têêng matu tapiing.’28Bơơi thêi praaq palơq adhi anó kơi bhơt dhơ dhangaai lêi mưi pađiil palơq karnóq kaniêng kiêng marlóóch pađiil achêk, nek manưih ađek ơi têêng tapiing matu lơt palơq pađiil achêk kalóóng lóóm ađêi ơi.29Kơi lââng, la kaliêng mat hót atươm ưng adhi anó têêng ađêi lơt matu, phaai bhalok ađó gluh lơq m'peq changaai tââq adhi anó. Ơi kơi achêk nek liêm lơh đóng adhi anó xók mưi phơn kalóóng nôôq achak araang ưng adhi anó bâân hư bil, hơq tabhơt achak araang ađêi yươq bâân m'peq leq bóng óih.30Lơq la têi atươm ưng adhi anó têêng ađêi lơt matu, phaai rakóh ađó lơq m'peq changaai tââq adhi anó. Ơi kơi achêk nek liêm lơh đóng adhi anó xók mưi phơn kalóóng achak araang ưng adhi anó bâân hư bil, hơq tabhơt achak araang ađêi yươq vôôiq mót bóng óih.31Dyơq paraaq ơi bâân truuih: ‘Ngaai đu lơơi kađiêl ađêi, nek manưih achêk phaai đóng leq ađó mưi bha-aar xaraq tarlơơi.’32Bơơi thêi praaq palơq adhi anó kơi dhơ dhangaai tarlơơi kađiêl ađêi, hơq kah ve kaauq patu leq matu têêng tapiing, nek têêng đóng ađó đơơp matu têêng tapiing. Lơq la ngaai nhan manưih glêh bâân tarlơơi nek matu lơt têêng tapiing.33Adhi anó vil ơi xâng nô kơi, paraaq ơi bâân truuih đóng manưih hanua: ‘Kah chóóm ng'kóh chachââr, bơơi phaai yuur têêng paraaq ng'kóh ưng ađêi palơq Chuôq.’34Bơơi, thêi móón adhi anó óóq ng'kóh marau marâ; kung óóq chaleq pleng hơq ng'kóh, ơi ađek nek tanơơt ưng Yaang Pleng;35kung óóq chaleq katiêk hơq ng'kóh, ơi ađek nek parđâq dyung ưng Ađó; kung óóq chaleq kanóón Jê-ru-sa-leem hơq ng'kóh, ơi ađek nek kanóón ưng Bhua gamak.36Adhi anó kung óóq chaleq akoq ađêi hơq ng'kóh, ơi adhi anó kah ve chóóm đuôh buôn têêng mưi n'dreh xok val xar bhóók môôiq tam.37Bơơi paraaq ưng adhi anó phaai nek ‘Ve, nek ve,’ môôiq ‘Kah, nek kah.’ Dyơq hau rau kuôq lơh tarnêêng ađô nek tââq abhưi.38Adhi anó ơi xâng nô kơi, paraaq ơi bâân truuih: ‘Mat chróót mat, lơq kaniêng chróót kaniêng.’39Bơơi, thêi móón adhi anó óóq tarjơl đu aak. Klóóih dhiq ađek, dhơ dhangaai m'pah adhi anó leq tabók hót atươm, kung nek đóng tabók đu dyơq đóng manưih ađek.40Palơq đu kiêng kaauq adhi anó leq đu xêi xanêi lơq pei paxooq aau kalóóng ưng adhi anó, phaai lơơi manưih achêk pei luôn aau nguôi ađêi.41Lơq ngaai ađek e pa-eep adhi anó vôôiq mưi n'lóóch kalơng, nek phaai vôôiq palơq ađó achêk bơơr n'lóóch kalơng.42Phaai đóng manưih tamóh nhan adhi anó, lơq óóq vih mat lơh tââq ađó kiêng nhan vaq tââq dhiq adhi anó.43Adhi anó ơi xâng nô kơi, paraaq ơi bâân truuih: ‘Nh'nhơr manưih đan tóór ađêi, lơq geet manưih brau ađêi.’44Bơơi thêi móón adhi anó, phaai nh'nhơr manưih brau ađêi lơq gavơh nhan klóóih đóng manưih đu janah ađêi,45ng'kơi đóng adhi anó ve chóóm bâân val xar akóón ưng Ama ađêi dhiq pleng. Achêk nek ơi Ađó têêng mat tangêi ưng Ađó klaaq dhiq manưih jar-ââih palơq manưih liêm, lơq Ađó đóng bó dhiq manưih đu liêm palơq manưih đu môôp.46Ơi la adhi anó nh'nhơr nôôq manưih nh'nhơr ađêi, nek adhi anó ve kaliim haanh harau? Kah alua nôôq manưih pagoop jêên kung têêng i kơi chêk alua?47Lơq la adhi anó mơ pơh kóóp têi nôôq manưih adhi anó ađêi, nek adhi anó têêng hau rau đu lơh? Kah alua nôôq dhanuôr manưih nguôi kung têêng i kơi achêk alua?48Kơi achêk, adhi anó nek e bhơt liêm, thê kơi Ama dhiq pleng ưng adhi anó nek bhơt liêm.
FAR EAST BROADCASTING COMPANY