Matthew3
1Kalóóng nôôq tangêi ađek, Jang Bap-tiit tơk truuih taruuih kalóóng kruung vơng parah Ju-đê,2kơi ađô: “Phaai klôôq lóóm, taai katiêk pleng ơi đan.”3Ơi ađôk nek manưih ơi bâân praaq tơk tââq Ê-saai manưih đââng taruuih, kơi ađô: “Ve dhariêng dhaloong karơ kalóóng kruung vơng: ‘Phaai dhoon lơơi kalơng ưng Chuôq, phaai têêng đóng tapat nôôq charlah Ađó.’”4Jang ađô xơp aau tââq xok kamel, xeet janiich palơq ng'kar praang tarveng, dyơq tarmông ưng ađó nek amiit lơq đơơk gayơơiq booiq.5Hayơq dhanuôr kanóón Jê-ru-sa-leem, tabhơt parah Ju-đê lơq tabhơt parah pruq praang xirvir karuung Jô-đen tơk palơq ađó,6lơq xók bhêêl truuih matu ađêi, piđó bâân ađó têêng bap-teem dhiq karuung Jô-đen.7Xong xók ve lêi bơk manưih Pha-ri-si lơq Sa-đu-sê tơk ơi pheep bap-teem ưng ađêi, ađó móón palơq piđó: “Kabhuh akóón chachau ưng kaxênh ve chapââr tôôh! Ngaai ơi kamêch nôôq pe klôôn mut tââq galuh pagrâ janah ravang tơk?8Kơi achêk hayơq, phaai mayưưm đóng đaang palơq klôôq lóóm.9Lơq nôôq pe kung óóq ngóq hơq tapraaq xóng ađêi: ‘Nôôq he ve abhươp avuôq Ap-ra-haam.’ Ơi aku móón palơq nôôq pe nek Yaang Pleng ve chóóm yuur paxar akóón chachau đóng Ap-ra-haam tââq nôôq khuk dhơl ađô.10Bơơi pla chuung ơi bâân ng'gơq dhiq gađơr n'lóóng. Đóng hayơq, tabhơt nôôq n'lóóng la kah bóóng pale liêm nek bâân takươl kalơm lơq m'peq leq óih.11Aku têêng bap-teem leq rau klôôq lóóm đóng adhi anó palơq đơơk. Bơơi Yaang tơk tatun aku ve mataai raman lơh aku, leq Yaang achêk nek aku hơq đu kah chóóm đaang buôn tayel jêi ưng Ađó. Ađó e têêng bap-teem đóng adhi anó palơq Chuôq Yaang Liêm lơq palơq óih;12beq chraauq ưng Ađó dhiq kalóóng têi Ađó, hayơq Ađó e kaau sek se taang m'bhrah aviq ađêi lơq karong aviq ưng Ađó leq jơơng. Bơơi Ađó e óch róh n'drang palơq óih kah mơ chóóm đuôh tapat.”13Bhêêl achêk, Chuôq Jê-su vôôiq tââq xưưq Ga-li-lê tơk karuung Jô-đen, dhiq ưng Jang, buôn bâân ađó têêng bap-teem.14Bơơi Jang bhiêk mưi kơi kadhuông kajơq Ađó kơi ađô: “Aku hayơq ve chóóm kiêng bâân Amei têêng bap-teem đóng, kơi achêk hơq Amei vil tơk palơq aku hơ?”15Bơơi xók ââi lóóiq, Chuôq Jê-su praaq palơq ađó: “Xók ađôk, phaai têêng kơi achêk nek, ơi kơi achêk nek pâng dhalam palơq nôôq he buôn têêng paxong dyóp rau bhơt liêm.” Hayơq Ađó lơơi Jang têêng.16Xók achêk, xong xók đơơp bap-teem hayơq, Chuôq Jê-su n'drươh yuur tââq đơơk, lơq lêi tôôh, nôôq talaang pleng bâân tayaah đóng Ađó, hayơq Ađó ve lêi Yaang Liêm ưng Yaang Pleng dhaluônh jaq thê kơi achim paraap, bóq dhiq Ađó,17lơq lêi tôôh, mưi dhariêng praaq tââq nôôq talaang pleng kơi ađô: “Ađôk nek Akóón nh'nhơr bhlơng ưng Aku. Aku iêm lóóm dhiq Akóón achêk.”
FAR EAST BROADCASTING COMPANY