Matthew16
1Xong xók tơk đan, nôôq manưih Pha-ri-si lơq Sa-đu-sê — taai klêêu Chuôq — ơi nhan Chuôq pakah đóng piđó mưi kanal chrih tââq pleng.2Bơơi bhêêl ââi lóóiq, Chuôq praaq palơq piđó: [“Xók tơk habu blót, nôôq pe móón: ‘Pleng liêm, taai pleng bhrôông.’3Yayóng yayương ađô nek móón: ‘Pleng grơm adhiiq, taai pleng bhrôông, nguut tun.’ Dhơ nôôq pe n'nal kơi lêi karnal dhiq pleng, bơơi kah ve đuôh n'nal leq nôôq karnal ưng ganah.”]4“Mưi klaang đơơi lơt aak lơq têêng tapiing chêk-tabâân karnal chrih, bơơi karnal chrih e kah bâân đóng leq ađó, chapiên karnal chrih ưng Jô-na.” Lơq bhêêl ơi lơơi piđó lóóiq, nek Ađó vôôiq lơh.5Hayơq nôôq môôn-đô nek ơi havil đââng beng, xong xók vôôiq tơk tóór hót tôôh.6Xók achêk, Chuôq Jê-su praaq palơq piđó: “Phaai chagơn lơq hêch lêi leq piêng ưng manưih Pha-ri-si lơq Sa-đu-sê.”7Bơơi kơi achêk, piđó bhiêk tarkaai palơq xóng piđó kơi ađô: “Ađek nek taai nôôq he ơi kah đââng beng.”8Bơơi xók n'nal rau ađô, Chuôq Jê-su praaq: “Nôôq đu m'bưưiq lóóm huuiq tôôh, hau adhi anó tarkaai palơq xóng ađêi kơi achêk nek taai ađêi kah ve beng?9Adhi anó dyơq kah thuông n'nal lơq kung kah hei xââng beq beng đóng xââng ngaan manưih hayơq adhi anó karong bâân ađó mơ jong alua?10Môôiq tapól beq beng đóng puôn ngaan manưih, hayơq adhi anó ơi chêk-karong bâân ađó mơ jong alua?11N'đó kơi dhơq hơq adhi anó kah chóóm n'nal kơi Aku ơi kah praaq palơq adhi anó leq beng? Bơơi phaai hêch lêi leq piêng ưng manưih Pha-ri-si lơq Sa-đu-sê.”12Bhêêl ađek piđó n'nal kơi na Ađó eh móón piđó hêch lêi leq piêng ưng beng, bơơi nek leq paraaq pachóóm ưng manưih Pha-ri-si lơq Sa-đu-sê.13Xók achêk, xong xók vôôiq tơk xưưq xaang kanóón Sê-sa-rê Phi-liip, Chuôq Jê-su ơi tamóh nôôq môôn-đô ađêi, kơi ađô: “Palââng móón Akóón Manưih nek ngaai?”14Hayơq piđó ââi: “Mưi phơn manưih móón nek Jang Bap-tiit; hayơq mưi phơn móón nek Ê-li; hơq phơn lââng móón nek Jê-rê-mi môôiq mưi kalóóng nôôq manưih đââng taruuih.”15Ađó praaq palơq piđó: “Hayơq adhi anó móón Aku nek ngaai?”16Kơi achêk nek, xók ââi bóóp, Si-môôn Phi-e-rơ móón: “Amei nek Chuôq Paq Manưih, Akóón Yaang Pleng taluôn mamông.”17Bhêêl achêk, xók ââi lóóiq, Chuôq Jê-su praaq palơq ađó: “Si-môôn, akóón Jô-na, amei ve phươk bhlơng, taai eh rau m'bech lơq ahaam ơi pakah đóng amei, bơơi nek Ama ưng Aku dhiq pleng.18Hayơq thêi kung praaq palơq amei kơi amei nek Phi-e-rơ, lơq dhiq dharaaq dhơl ađô, thêi e têêng kadhơng Kabhuh Akóón Dhơn Chuôq ưng thêi, lơq nôôq palóng ưng bóng maraaih e kah đuôh chóóm jơl lóóiq kabhuh ađek.19Thêi e pajaau đóng amei nôôq kaliêng parlóng ưng katiêk pleng, hơq hau rau amei kliêng dhiq katiêk nek e bâân takliêng dhiq pleng, lơq hơq hau rau amei lóng dhiq katiêk nek e bâân tarlóng dhiq pleng.”20Tââq ađek, Ađó praaq pagat nôôq môôn-đô buôn piđó óóq móón palơq ngaai kơi Ađó nek Chuôq Paq Manưih.21Tââq xók ganah ađek, Chuôq Jê-su Paq Manưih tââp tarnââp đóng nôôq môôn-đô ưng ađêi n'nal kơi Ađó kơng phaai vôôiq tơk Jê-ru-sa-leem, lơq đơơp bơk karuôq jarnah tư tââq nôôq takóh bhươl, nôôq takóh kadhâng bhanuôih bhơt liêm palơq nôôq manưih pachóóm gani. Hayơq bâân taleng chêt lơq bâân têêng mamông lóóiq leq tangêi thưưq pe.22Lơq xong xók ruiq Ađó leq mưi hót, Phi-e-rơ tââp tarnââp trêh Ađó, kơi ađô: “Chuôq ơơi, Yaang Pleng pakah lóóm moor m'pheep palơq thêi. Chiên ađek e kah mơ chóóm vaaih tơk đóng thêi.”23Bơơi hadhiêr achak lóóiq, Ađó praaq palơq Phi-e-rơ: “Sa-taan tôôh, phaai vôôiq lââp hót hóng Aku! Amei nek khuk dhơl têêng n'đóih dyung đóng thêi, taai amei kah ve kanóq tơk nôôq tarnêêng ưng Yaang Pleng, bơơi nek nôôq tarnêêng ưng akóón manưih.”24Tââq ađek, Chuôq Jê-su praaq palơq nôôq môôn-đô ưng Ađó: “La ngaai kiêng vôôiq ting hóng thêi, nek manưih ađek phaai havơơi lơơi ađêi kala, palơq đuôl n'lóóng m'baang chatông ưng ađêi lơq ting thêi.25Ơi hơq ngaai kiêng paq parmông ađêi nek e bil ađó, hayơq ngaai đu bil parmông ađêi ơi taai thêi nek e bâân lum ađó.26Ơi mưi nak e bâân malơơi harau la bâân jeng tabhơt talaang katiêk, bơơi bâân bil parmông ađêi? Môôiq mưi chanak e yuur đóng hau rau kalóóng tarnêêng rakơl lóóiq parmông ađêi?27Ơi Akóón Manưih ravang tơk kalóóng cha-iil tabah ưng Ama Ađó nek palơq nôôq dhơn pleng Ađó. Lơq xók bhêêl ađek, Ađó e chróót đóng dyóp chanak ting kơi hau dhơơm ưng piđó.28Alua, Aku praaq palơq adhi anó kơi ve nôôq manưih xók dyương dhiq ađôk, nek nôôq manưih dhơ dhakơi e yươq n'nal kơi akan chêt đóng tơk xók bhêêl piđó lêi Akóón Manưih bhral kalóóng katiêk Ađó.”
FAR EAST BROADCASTING COMPANY