Mark16

1Xók tangêi Sa-baat ơi lơh, Ma-ri Ma-đơ-leen, Ma-ri amêêq Ja-kơ, lơq Sa-lô-mê, kơl janươu thum buôn xók tơk dham, piđó ve chóóm xut xaak Ađó.2Tââq lóng tarưưp tangêi đu mưi kalóóng tun, piđó vôôiq tơk dham đong ping xók mat tangêi tââp blo.3Piđó tapraaq xóng piđó: “Ngaai e talâh bhangôh dhơl tââq palóng đong ping đóng nôôq he?”4Xók riing lêi, piđó lêi kơi bhangôh dhơl ơi bâân talâh patââi, dhơ ađó lóng gamak.5Hayơq xók ơi mót kalóóng đong ping, piđó lêi mưi n'dhóm xơp aau bhóók xók tơơt dhiq hót atươm, lơq piđó bâân kakhin lêi.6Bơơi manưih achêk praaq palơq piđó: “Óóq kakhin. Nôôq pe xók chêk-lêi Jê-su manưih Na-xa-reet, Yaang ơi bâân tateeng dhiq n'lóóng m'baang chatông. Ađó ơi bâân têêng mamông lóóiq aq! Ađó kah tơơt dhiq đôk. Phaai lêi dham đu palââng ơi tabêch xaak Ađó.7Dhơ kơi achêk, Phaai vôôiq, praaq đóng nôôq môôn-đô Ađó lơq Phi-e-rơ kơi ađô: ‘Ađó e vôôiq loom adhi anó tơk Ga-li-lê. Dhiq ađek, adhi anó e lêi Ađó’, dhalam kơi Ađó ơi praaq palơq adhi anó.”
8Bhêêl ơi gluh leq nguôi, piđó mut tââq đong ping, ơi rau hayer papreh lơq hêq lêi klum dhuum piđó. Lơq piđó kah rau praaq palơq ngaai ơi taai piđó kakhin kapơn bhlơng.9(Yayóng tarưưp tangêi đu mưi kalóng tun, xók ơi mamông lóóiq, Ađó pakah tabhral laloom tââm đóng Ma-ri Ma-đơ-leen, nek manưih hơq Ađó ơi viêng tapól panong abhưi gluh xooq.10Manưih pađiil achêk vôôiq truuih lóóiq đóng nôôq manưih glêh tơơt palơq Ađó xók bhêêl piđó xók ayô châq lơq nhiim kalau.11Hayơq piđó, xók xâng kơi Ađó dyơq mamông lơq ơi bâân chênh pađiil ve lêi, nek kah huuiq.
12Xók achêk, tatun nôôq tarnêêng achêk, Ađó pakah tabhral kalóóng dyaang achak lââng đóng bơơr chanak kalóóng sôôq piđó xók bhêêl vôôiq dyung yuur chô leq xưưq xaang.13Lơq bơơr nhiđó achêk, xong xók val chô, truuih đóng nôôq môôn-đô đu dyơq, bơơi piđó kah huuiq bơơr nhiđó.
14Bơơi hayơq, tatun xariêq, Ađó pakah tabhral đóng majêt sưưq-đô xók bhêêl piđó tơơt tóór baang chacha, Ađó trêh teng rau kah huuiq lơq nhâng lóóm ưng piđó taai piđó kah huuiq nôôq manưih ơi lêi Ađó xong xók Ađó ơi bâân mamông lóóiq tââq akan chêt.15Ađó praaq kayua piđó: “Phaai vôôiq tơk plok hóng katiêk, phaai truuih pachóóm Taruuih Liêm đóng dyóp ngaai.16Ngaai huuiq lơq đơơp bap-teem e bâân paq, hayơq ngaai kah huuiq e bâân xêi matu.17Nôôq kanal chrih ađôk e ting vôôiq palơq nôôq manưih ve lóóm huuiq: Vơn dhanóók thêi, piđó e viêng pagluh nôôq abhưi. Piđó e praaq nôôq rau dhariêng tame.18Piđó e kóóp kaxênh, lơq dhơ đóng piđó ơm hau rau bhanuôh, dhakơi ađó yươq têêng mahaai rau tơk piđó. Piđó e lơơi têi dhiq nôôq manưih dhuôr ka-ai nek nôôq manưih achêk e bâân yươh.”
19Xong xók Chuôq Jê-su ơi praaq palơq piđó, Ađó bâân padyók leq pleng lơq tơơt hót tươm Yaang Pleng.20Hayơq nôôq manưih ađek, xong xók yuur vôôiq, piđó truuih pachóóm plok dyóp leq, bhêêl xók Chuôq têêng tarnêêng palơq piđó lơq đu lêi đóng taruuih palơq nôôq kanal chrih ting vaaih. A-meen.)

FAR EAST BROADCASTING COMPANY

https://app.library.bible/content/15a813fef7fefb05