Luke9
1Xong xók dhaloong majêt bơơr sưưq-đô panhoom lóóiq, Ađó đóng leq piđó praan karơ lơq mataai raman lơh tabhơt nôôq abhưi lơq đóng payươh ka-ai,2hayơq Ađó kayua piđó gluh vôôiq đóng truuih móón leq katiêk Yaang Pleng lơq đóng payươh manưih ka-ai.3Chuôq pató palơq piđó: “Óóq pei đââng marau marâ xók vôôiq kalơng — kah tarlââng, kah chadhung, kah beng, kah jêên — kung óóq pei đââng bơơr beq aau.4Adhi anó mót leq n'đó đong, phaai tơơt lóóiq dhiq ađek lơq nek tââq ađek yuur vôôiq.5N'đó dhiq palââng kah pơh yaauq adhi anó, nek xók gluh tââq kanóón ađek, phaai tapiêh puui dhiq dyung adhi anó kơi paraaq pakah móón jơl lóóiq piđó.”6Kơi ađek nek xók yuur vôôiq kalơng, nôôq môôn-đô vôôiq leq nôôq bhươl kanóón, truuih pachóóm taruuih liêm lơq payươh ka-ai dyóp leq.7Xók Hê-rôôt bhua katưưiq xâng leq dyóp rau tarnêêng xók vaaih, ađó lóng nhok karnóq, taai paraaq nôôq manưih móón kơi ađô Jang ơi tââq akan chêt mamông lóóiq,8bơơi ve ngaai nek móón Ê-li ơi tabhral, bơơi sôôq lââng móón nek mưi nak kalóóng nôôq manưih đââng taruuih xók hanua ơi mamông lóóiq.9Bơơi Hê-rôôt móón: “Aku ơi têch akoq Jang, bơơi manưih ađô nek ngaai hơq aku xâng nôôq chiên kơi achêk leq ađó?” Hayơq ađó ađek tabâân lum Chuôq.10Xók nôôq sưưq-đô ơi val chô, piđó truuih lóóiq leq Ađó n'nal n'đơq tarnêêng piđó ơi têêng. Lơq xong xók đââng piđó ting vôôiq, Ađó tư róch chô leq mưi kanóón bâân đóók nek Bêêt-saai-đa.11Bơơi xók tanóói manưih bơk đâh n'nal kơi achêk, nek piđó vôôiq ting Ađó. Chuôq pơh yaauq piđó, kluôh pakah đóng piđó leq katiêk Yaang Pleng, lơq Ađó paq payươh nôôq manưih kơng bâân yươh.12Tangêi tââp habu blót, xók achêk, xók majêt bơơr sưưq-đô vôôiq tơk, piđó móón palơq Ađó: “Nhan Thêi kayua tanóói dhanuôr đóng piđó mót leq nôôq bhươl lơq xưưq xaang tóór ađôk, piđó ve chóóm tabâân dhiq tơơt dhêi lơq tarmông, taai dhiq ađôk, nôôq he xók tơơt dhiq m'pơng mưi dham kruung vơng.”13Dhơ kơi ađek, Ađó praaq palơq piđó: “Adhi anó phaai đóng piđó cha.” Bơơi piđó ââi: “Kah rau ve dhiq nôôq yi đu bơk lơh xââng beq beng lơq bơơr panong kadhóóng — môôiq nek nôôq yi vôôiq kơl tarmông đóng mơ ađek manưih dhanuôr ađô.”14(Ơi ve mơ xââng ngaan manưih padruuih.) Ađó praaq palơq nôôq môôn-đô ađêi: “Nek kayua piđó tơơt đóng cha ting kơi bhruq mơ xââng jêt chanak.”15Piđó ting têêng kơi ađek, kayua luch manưih dhanuôr tơơt đóng cha.16Xong xók pei xââng beq beng lơq bơơr panong kadhóóng, chaling mat leq pleng, Ađó ma-ơ leq tarmông ađek, hayơq veh beng, pađơơp leq nôôq môôn-đô đóng chik nh'xóóng leq ganơr manưih dhanuôr.17Bhơt dyóp ngaai maar cha kabhôôq kajrê, lơq rau dhơơm dyơq xưa bâân chââih krong đóng piđó nek majêt bơơr jong beng lêêk.18Tarnêêng vaaih xók Chuôq Jê-su dyơq nhan gavơh panlei, nôôq môôn-đô biêh vôôiq mandrươh palơq Ađó, nek Ađó tamóh piđó kơi ađô: “Manưih dhanuôr móón aku nek ngaai?”19Xók ââi bóóp, piđó móón: “Nek Jang Bap-tiit, dyơq đu lââng móón thêi nek Ê-li, bơơi đu lââng dyơq móón nek mưi kalóóng nôôq manưih đââng taruuih hanua mamông lóóiq.”20Hayơq Ađó tamóh piđó kơơq: “Dyơq adhi anó móón aku nek ngaai?” Xók ađek, xók Phi-e-rơ ââi, ađó móón: “Thêi nek Yaang Paq Manưih ưng Yaang Pleng.”21Bơơi đóng praaq pagat piđó, Ađó praaq pató kah chóóm chik truuih rau ađô leq ngaai,22xók praaq kơi ađô: “Akóón Manưih phaai đơơp bơk rau jarnah, bâân nôôq takóh bhươl, nôôq takóh kadhâng bhanuôih, lơq nôôq takóh pachóóm gani kah đươi, hayơq e bâân taleng, lơq tơk tangêi đu pe e mamông lóóiq.”23Hayơq Ađó praaq palơq tabhơt piđó: “La ngaai kiêng vôôiq ting aku nek phaai lơơi ađêi kala, dyóp tangêi đuôl m'baang chatông ađêi lơq ting aku.24Ơi la ngaai kiêng paq parmông ađêi nek manưih achêk e bil parmông, hayơq la ngaai taai aku đơơp bil parmông ưng ađêi, nek manưih achêk e bâân paq ađó.25Ơi mưi nak hau nek malơơi, xók ve luch hóng katiêk, bơơi lóóiq tư pahư môôiq tabil chênh ađêi kala?26Ơi la ngaai kachiit mat leq aku lơq paraaq ưng aku, nek Akóón Manưih e kachiit mat leq ađó ađek xók Ađó bhral kalóóng cha-iil tabah ưng ađêi, palơq ưng Ama lơq ưng nôôq dhơn pleng liêm tabah.27Bơơi alua, aku móón palơq adhi anó, ve bơơr pe nak kalóóng nôôq manưih xók dyương dhiq ađô, nek nôôq manưih lalua e yươq rau xâng akan chêt đóng tơk xók piđó lêi katiêk Yaang Pleng.”28Tarnêêng ơi vaaih mơ takóól tangêi xong tââq nôôq paraaq achêk, xók đââng Phi-e-rơ palơq Jang lơq Ja-kơ, Ađó vôôiq đơk leq bôôl đóng nhan gavơh.29Rau vaaih xók Ađó dyơq nhan gavơh, ađek nek moh mat ưng mat Ađó tadhơ n'tua kơi, lơq kun aau ưng Ađó nek vaaih brương bhóók chalóng.30Lơq tôôh, bơơr nak xók praaq chiên palơq Ađó, ađek nek Môôi-se lơq Ê-li,31hơq piđó bâân pakah kalóóng cha-iil tabah, xók praaq leq rau đơơp chêt ưng Ađó, nek rau Ađó ravang têêng đóng tajaap paraaq dhiq Jê-ru-sa-leem.32Phi-e-rơ lơq nôôq manưih mađó palơq ađó biêh xók kuôq kiêng bêch, bơơi xók bhrang taach mat lóóiq, piđó lêi cha-iil tabah ưng Ađó lơq bơơr nak xók dyương palơq Ađó.33Tarnêêng ơi vaaih xók bơơr chanak achêk yuur xooq tââq Ađó, Phi-e-rơ móón palơq Chuôq Jê-su: “Thêi ơơi, alua nek liêm đóng nôôq he tơơt dhiq ađô, nôôq yi ve chóóm têêng pe beq pơơq: mưi beq đóng amei, mưi đóng Môôi-se, lơq mưi đóng Ê-li.” (Ađó kah n'nal rarau xók praaq.)34Bơơi xók ađó praaq kơi achêk, mưi garboq dhaluk bhral lơq dhuum piđó; piđó kakhin lêi xók piđó mót hót kalóóng garboq dhaluk.35Hayơq tââq kalóóng garboq dhaluk tar-auq dhariêng praaq, kơi ađô: “Ađô nek Akóón Aku, nek Manưih ơi bâân chââih. Phaai xâng Ađó.”36Xók dhariêng ađek pat nek chapiên dyơq lóóiq mưi Chuôq Jê-su giêl. Piđó maar parngau bha-ip, lơq kah ngaai truuih leq dhơ dharau đu ađêi ơi lêi kalóóng nôôq tangêi ađek.37Tarnêêng ơi vaaih leq tangêi tatun, xók piđó tââq bôôl dhaluônh, mưi tanóói dhanuôr bơk tơk lum Ađó.38Hayơq tôôh, ve mưi nak manưih tââq kalóóng ganơr manưih praaq karơ kơi ađô: “Thêi ơơi, nhan Amei ka-er đóng tơk akóón padruuih aku, ơi ađó nek akóón padruuih mưi ưng aku.39Lêi ni, mưi yaang kadhâng akóón paniên lơq akóón paniên buôn đóók treeh lalơu, hayơq ađó pakalơm akóón paniên tatrươih lơq tapô havi tââq bóóp. Ađó pamơ kah xooq tââq akóón paniên, bhiêk janah akóón paniên bhlơm bhlua.40Aku ơi nhan nôôq môôn-đô ưng amei kơi têêng piđó viêng paxooq ađó, bơơi piđó kah ve chóóm tating têêng.”41Xók ââi, Chuôq Jê-su praaq: “Ayô, dhong nooi đu kah đơơp huuiq lơq chêt bil, aku e tơơt palơq nôôq pe lơq đơơp jruôn nôôq pe patơk mơ dyơq? Nek đââng akóón padruuih amei leq ađô.”42N'drươh xók akóón paniên tơk, abhưi dhađơm karơ ađó leq katiêk lơq têêng ađó vaaih tatrươih. Bơơi Chuôq Jê-su trêh yaang môôp lơq payươh akóón paniên, hayơq Ađó pajaau akóón paniên lóóiq leq akonh ađó.43Tabhơt maar bâân hêq lêi toom mataai raman gamak ưng Yaang Pleng. Bơơi xók dyóp ngaai dyơq hêq lêi leq dyóp rau tarnêêng Ađó têêng, nek Ađó praaq palơq nôôq môôn-đô ađêi:44“Adhi anó phaai lơơi nôôq paraaq ađô leq katór ađêi: Ơi Akóón Manưih ravang bâân tapajaau leq têi palââng.”45Dhơ kơi ađek, piđó kah n'nal rau paraaq achêk lơq tarnêêng ađôk biêh pâng tapađơp palơq piđó, hayơq piđó kah chóóm n'nal ađó, piđó vil kah khin đóng tamóh Ađó leq paraaq achêk.46Tatun ađek, m'pơng piđó yuur vaaih tarkaai đóng lêi ngaai đu kalóóng nôôq piđó nek gamak tââm.47Bơơi ơi Chuôq Jê-su n'nal rau karnóq kalóóng lóóm piđó, nek xong xók đââng mưi nak paniên, Ađó patơơt akóón paniên achêk hót tóór ađêi,48lơq móón palơq piđó: “La ngaai vơn achak aku pơh yaauq akóón paniên ađô, nek ađó ađek yaauq aku, lơq la ngaai yaauq aku, nek ađó ađek yaauq Yaang ơi kayua aku. Ơi ngaai đu nek katưưiq tââm kalóóng tabhơt adhi anó, hayơq ađó ađek nek gamak tââm.”49Xók Jang yuur pei ââi, ađó móón: “Thêi ơơi, nôôq yi lêi ve ngaai vơn achak amei đuôi abhưi lơq nôôq yi ơi kajơq ađó ađek lóóiq, taai ađó ađek kah ting vôôiq palơq nôôq he.”50Bơơi Chuôq Jê-su praaq palơq ađó: “Óóq chik kajơq, ơi ngaai đu yươq rau nek tajơl palơq adhi anó nek dyương hót adhi anó.”51Tarnêêng ơi vaaih nek xók tangêi rau bâân padyók leq pleng ưng Ađó kiêng tơk đan, nek Ađó tabhlơng dhakơi đóng vôôiq tơk leq kanóón Jê-ru-sa-leem.52Ađó kayua nôôq manưih đââng paraaq vôôiq loom toom mat Ađó, lơq xók vôôiq, piđó mót leq kalóóng mưi bhươl ưng manưih Sa-ma-ri đóng ravang leq Ađó.53Palââng kah pơh yaauq Ađó taai karnóq ưng Ađó nek xók vôôiq leq Jê-ru-sa-leem.54Nôôq môôn-đô nek Ja-kơ lơq Jang, xók lêi kơi achêk, piđó móón: “Kakoh Chuôq, Amei ve kiêng nôôq yi kayua đóng óih tââq pleng dhuônh óch róh piđó kah?”55Bơơi xong xók palâh lóóiq, Ađó trêh teng piđó,56hayơq piđó vôôiq leq kanóón lââng.57Xók piđó dyơq vôôiq dhiq kalơng, mưi nak tôôh móón palơq Ađó: “Aku e ting amei dhơ dhaleq amei vôôiq.”58Chuôq Jê-su praaq palơq ađó ađek: “Axing ve bóng lơq achim pleng ve xaruh, bơơi Akóón Manưih kah ve dhiq bha-óóih akoq.”59Ađó praaq palơq mưi chanak đu lââng: “Hêq ting aku.” Bơơi ađó achêk ââi: “Kakoh Chuôq, nhan đóng pheep aku chô tơp ama aku loom.”60Bơơi Chuôq praaq palơq ađó ađek: “Nek lơơi nôôq manưih chêt tơp nôôq manưih chêt ưng piđó. Dyơq xók amei yuur vôôiq, nek truuih đuui katiêk ưng Yaang Pleng.”61Hayơq, mưi chanak đu lââng dyơq móón: “Kakoh Chuôq, aku e ting Amei, bơơi laloom tââm nek đóng pheep aku chô móón nôôq manưih kalóóng đong aku.”62Bơơi kơi ađek, Chuôq Jê-su ââi: “Kah ngaai, xók ơi kadhâng têi ađêi leq kanei hơq dyơq lêi leq hót hóng, nek kah ađaang đóng katiêk ưng Yaang Pleng.”
FAR EAST BROADCASTING COMPANY