Luke4

1Chuôq Jê-su, bing bhlaai Chuôq Yaang Liêm, val chô tââq karuung Jô-đen, lơq bâân Chuôq Yaang Liêm đââng leq kruung vơng,2đóng đơơp abhưi dharơơl galơơk kalóóng puôn jêt tangêi. Bhluuch nôôq tangêi ađek, Ađó kah rau chacha dhơ dharau hayơq Ađó ha-ul xong xók nôôq tangêi ađô luch.3Hayơq abhưi móón palơq Ađó: “La Amei nek Akóón Yaang Pleng, nek hayơq praaq palơq dhơl ađô đóng ađó xar vaaih beng vaq.”4Chuôq Jê-su ââi palơq ađó: “Ve paraaq xaraq kơi ađô: ‘Palââng mamông eh rau ganơơm mơ beng giêl.’”5Hayơq abhưi ơi đââng Chuôq leq đu yaal, ađó chaleq đóng Chuôq tabhơt nôôq katiêk karuung dhiq hóng katiêk xók maxưưiq giêl.6Abhưi móón palơq Chuôq: “Aku e đóng leq amei dyóp rau mataai ađô lơq cha-iil tabah ưng piđó, taai ađó ơi bâân pajaau leq aku, lơq aku ve chóóm đóng ađó leq dhơ dhangaai la aku kiêng.7Kơi ađek, la amei chakoh kakoh toom mat aku, hayơq tabhơt e nek ưng amei.”8Đóng ââi bóóp, Chuôq Jê-su praaq palơq ađó: “Ve paraaq xaraq: ‘Amei phaai bhuôih haanh Chuôq nek Yaang Pleng ưng amei, lơq mơ têêng yaauq Ađó giêl.’”9Hayơq, abhưi đââng Chuôq tơk leq Jê-ru-sa-leem, patơơt Ađó dhiq pabhung ưng đong bhanuôih, lơq ađó móón palơq Chuôq: “La Amei nek Akóón Yaang Pleng, nek patôq ađêi kala chok leq tââq dham ađô.10Ơi ve paraaq xaraq, kơi ađô: ‘Ađó e kayua đóng nôôq dhơn pleng Ađó pơh leq akóón, đóng jư lêi akóón,’11lơq kơi ađô: ‘Piđó e tapââng akóón dhiq têi, đóng akóón yươq n'đóih dyung ađêi pâng dhơl.’”
12Ââi lóóiq, Chuôq Jê-su praaq palơq ađó, kơi ađô: “Ve paraaq praaq: ‘Amei kah chóóm klêêu Chuôq nek Yaang Pleng ưng amei.’”
13Xong xók têêng luch dyóp kơi dharơơl galơơk, abhưi xooq tââq Ađó, đương bhêêl lââng.
14Chuôq Jê-su val chô leq Ga-li-lê kalóóng mataai raman ưng Yaang Liêm, lơq tanđôôr leq Ađó đââr tơk plok xưưq xaang ađek.15Ađó truuih pachóóm kalóóng nôôq đong gươl ưng dhanuôr, bâân dyóp ngaai bhi haanh.
16Ađó vôôiq tơk leq kanóón Na-xa-reet, dhiq Ađó ơi taha gamak, lơq ting kơi tarnêêng kaxu ưng ađêi, Ađó mót leq đong gươl kalóóng tangêi Sa-baat hayơq yuur dyương đok karơ dhariêng.17Panuôl bha-aar ưng Ê-saai manưih đââng taruuih bâân đóng leq Ađó, lơq xók lương panuôl bha-aar, Ađó chêk lêi dhiq đu ơi ve bâân xaraq kơi ađô:18“Yaang Liêm ưng chuôq jaq dhiq aku, taai Ađó ơi xut dhơu leq Aku đóng truuih pachóóm taruuih liêm leq manưih đu ngeeo. Ađó ơi kayua Aku truuih móón rau rathaai đóng leq manưih takról, lơq payươh tabrương đóng manưih kabaang kapôk, đóng pagluh manưih bâân tajanah tơk leq rau rathaai,19lơq đóng truuih kamó ơơn liêm ưng Chuôq.”
20Xong xók puôl bha-aar lóóiq pachô leq manưih têêng yaauq, Ađó joon tơơt. Mat dyóp ngaai kalóóng đong gươl maar chamet lêi leq Ađó.21Hayơq, Ađó tââp praaq palơq piđó, kơi ađô: “Mađôk, paraaq Bha-aar Yaang Pleng tơk leq katór adhi anó ađek ơi bâân tajaap.”22Dyóp ngaai maar truuih đuui liêm leq Ađó lơq piđó hêq lêi toom nôôq paraaq bing ơơn phươk liêm gluh tââq bóóp Ađó, lơq piđó tamóh xóng piđó: “Ađôk kah lua nek akóón padruuih ưng Jô-seep hơ?”23Ađó móón palơq piđó: “Lalua adhi anó e móón palơq aku paraaq karvech ađô: ‘Manưih payươh ơơi, nek tư payươh ađêi kala. N'nal n'đơq tarnêêng đu nôôq yi ơi xâng vaaih dhiq Ka-bê-na-um, nek amei kung phaai têêng dhiq ađô, dhiq bhươl kanóón ađêi hơ.’”24Hayơq Ađó praaq: “Alua, aku móón palơq adhi anó, kơi kah vaaih manưih đââng taruuih đu bâân bhi chap dhiq bhươl kanóón ưng ađêi.25Aku praaq palơq adhi anó dhiq rau dhalam, kơi bơk pađiil kamaai biêh tơơt dhiq I-sơ-ra-êên kalóóng đơơi ưng Ê-li, xók pleng bâân takađơp kalóóng pe kamó chapat kaxe, xók achêk, ganah ha-ul gamak val vaaih kalóóng plok xưưq,26hơq Ê-li bâân kayua tơk palơq kah ngaai kalóóng nôôq piđó, chapiên mơ tơk leq Sa-reep-ta, dhiq kanóón Si-đôôn, tơk palơq mưi pađiil kamaai kayiik.27Kung ve bơk manưih ka-ai tơơt bhơơi dhiq I-sơ-ra-êên xók klaang đơơi Ê-li-sê manưih đââng taruuih, lơq kah ngaai kalóóng piđó bâân sek, chapiên mơ Na-a-maan, manưih Si-ri.”28Xók xâng nôôq paraaq achêk, dyóp ngaai kalóóng đong gươl bing bhlaai pagrâ.29Xong xók yuur dyương, piđó dhalươq pagluh Ađó leq nguôi kanóón, lơq galôôi Ađó tơk leq parah traan ưng bhung bôôl đu kanóón ưng piđó tơơt dhiq ađek, đóng dhalươq Ađó chooh leq.30Bơơi Ađó róch xooq xong xók bhlah dhiq m'pơng piđó.
31Ađó dhuônh leq Ka-bê-na-um, mưi kanóón mađó leq xưưq Ga-li-lê, lơq Ađó truuih pachóóm đóng leq manưih dhanuôr xók tangêi Sa-baat.32Piđó hêq xâng toom paraaq pachóóm ưng Ađó, taai paraaq ưng Ađó pakah ting palơq mataai.33Kalóóng đong gươl, ve mưi nak bâân yaang ưng abhưi rarik rari mót bóq, lơq ađó achêk lalơu karơ dhariêng:34“Ơ! Jê-su Na-xa-reet, nôôq yi palơq Amei hau ve pâng kre? Amei tơk đóng leng kaxiêt nôôq yi hơ? Aku n'nal Amei nek ngaai — nek Yaang Tabah ưng Yaang Pleng!”35Chuôq Jê-su trêh teng ađó, kơi ađô: “Parngau aq, lơq gluh tââq ađó ađô!” Hayơq nek xong xók padhađơm ađó ađek leq katiêk nham m'pơng manưih dhanuôr, abhưi gluh tââq ađó ađek, yươq rau têêng ađó ađô tabhrê.36Rau kakhin kapơn tơk dhiq dyóp ngaai, lơq piđó tapraaq xóng ađêi, kơi ađô: “Hau Taruuih ađô, patơk mơ palơq mataai raman lơq praan karơ, ađó ađek kayua đóng abhưi môôp, lơq piđó phaai gluh xooq?”37Tanđôôr leq Ađó đââr plok dyóp leq xưưq xaang tóór ađek.
38Tatun ađek, xók ơi yuur dyương xooq tââq đong gươl, Ađó mót kalóóng đong ưng Si-môôn. Dhơ kơi ađek, amêêq kađiêl ưng Si-môôn xók ka-ai lơq kahiir puih bhlơng, lơq piđó nhan Ađó payươh amooq.39Kóp pacheeng chak dhiq amooq, Ađó trêh ka-ai kahiir, lơq kahiir xooq tââq amooq, hayơq amooq n'drươh yuur dyương têêng yaauq piđó.
40Xók mat tangêi xriêp, tabhơt dyóp ngaai dhơ dharau bâân ka-ai dhuôr palơq dyóp rau nôôq ka-ai dreh, palââng đââng piđó tơk leq Ađó, hayơq Ađó payươh piđó xók lơơi têi dhiq ting nak kalóóng nôôq piđó.41Nôôq abhưi kung gluh tââq bơk ngaai, xók lalơu karơ hơq móón kơi ađô: “Amei nek Akóón Yaang Pleng!” Lơq palơq trêh teng, Ađó kah đóng pheep piđó praaq, taai piđó ơi n'nal Ađó nek Chuôq Paq Manưih.
42Bhrâ brương mót tangêi tame, xong xók xooq tââq dham ađek, Ađó vôôiq tơk leq mưi dham ranguôq rabaang, dyơq tanóói dhanuôr bhiêk chik chêk Ađó, lơq piđó ơi vôôiq đóng tơk xók lum Ađó hayơq tabhlơng jư Ađó lóóiq, kah đóng vôôiq lơh tââq piđó.43Bơơi Ađó praaq palơq piđó, kơi ađô: “Aku kung phaai truuih pachóóm taruuih liêm leq katiêk ưng Yaang Pleng đóng bơk kanóón lââng, taai aku bâân kayua ơi rau ađô.”
44Hayơq Ađó bhiêk truuih pachóóm kalóóng nôôq đong gươl xưưq Ju-đê.

FAR EAST BROADCASTING COMPANY

https://app.library.bible/content/15a813fef7fefb05