Luke22

1Bhiêk Beng Kah Piêng, bâân đóók nek bhiêk Jalơh, ravang tơk đan.2Nôôq takóh kala kadhâng bhanuôih lơq takóh pachóóm gani chik tabâân ng'kơi hơq piđó ve chóóm leng Ađó, ơi piđó biêh kakhin manưih dhanuôr.
3Hayơq Sa-taan jaq leq Ju-đa, ađó bâân đóók nek Ich-ka-ri-ôôt, dhiq kalóóng sôôq majêt bơơr sưưq-đô.4Lơq, xók ơi tơk lum, ađó tapraaq palơq nôôq takóh kala kadhâng bhanuôih lơq takóh kadhâng akoq linh đong bhanuôih leq kơi têêng ađó ve chóóm pajaau Chuôq leq piđó.5Piđó yayar bhlơng lơq đơơp hươq đóng ađó baak.6Ađó đâh đơơp lơq tabâân ve bhêêl pajaau Chuôq leq piđó xók kah ve mat manưih dhanuôr.
7Hayơq tangêi bhiêk Beng Kah Piêng tơk, nek tangêi đu palââng phaai bhuôih trưưu akóón Bhiêk Jalơh.8Ađó kayua Phi-e-rơ lơq Jang vôôiq, pató: “Nek vôôiq ravang bhiêk Jalơh leq nôôq he, đóng nôôq he cha.”9Piđó tamóh Ađó: “Thêi kiêng nôôq yi dhoon ravang n'đó dhiq?”10Hayơq Ađó ââi piđó: “Ni, xók adhi anó ơi mót kalóóng kanóón, mưi chanak padruuih đơơq jraai đơơk e lum adhi anó. Phaai vôôiq tapun ađó achêk mót kalóóng dhanong đong đu ađó ađek vôôiq mót.11Lơq adhi anó e móón palơq kala đong: ‘Thêi tamóh amei: “Buông tamóói dhiq thêi ve chóóm cha bhiêk Jalơh palơq nôôq môôn-đô ưng thêi n'đó dhiq?”’12Ađó achêk e chaleq đóng adhi anó mưi buông gamak dhiq gaak ve sam ađô đaak. Nek dhoon vaar cha dhiq ađek.”13Kơi ađek, xók ơi yuur vôôiq, nhiđó lêi rau tarnêêng pâng kre kơi Ađó ơi móón palơq nhiđó. Lơq nhiđó dhoon ravang đóng bhiêk Jalơh.
14Xók jơ chacha tơk, Ađó tơơt leq baang, lơq nôôq sưưq-đô tơơt madhiq palơq Ađó.15Ađó móón palơq piđó: “Palơq lóóm rââm, thêi ơi kiêng cha bhiêk Jalơh ađô palơq adhi anó laloom xók thêi đơơp janah.16Ơi thêi móón palơq adhi anó, kơi thêi lalua e kah cha bhiêk ađô đóng tơk xók bhiêk achêk bâân paxong kalóóng katiêk ưng Yaang Pleng.”17Lơq xong xók pei choom lơq ma-ơơn, Ađó móón: “Nek pei đơơp choom ađô lơq nh'xóóng xóng ađêi.18Ơi thêi móón palơq adhi anó, tââq ađô tơk tabhêêl, thêi lalua e kah ơm pale nho ađô, đóng tơk xók katiêk ưng Yaang Pleng bhral.”19Lơq xong xók pei beng lơq ma-ơơn, Ađó veh lơq pađơơp leq piđó, móón: “Ađôk nek chak araang thêi, taai adhi anó hơq pajaau đóng. Nek têêng rau ađô đóng hei leq thêi.”20Kung makơi kơi ađek palơq choom, xong xók ơi cha, Ađó móón: “Choom ađô nek raket tame kalóóng ahaam thêi, nek ahaam bâân n'toh taai adhi anó.21Dhơ kơi ađek, lêi tôôh, tapaang têi ưng manưih baan thêi ng'gââng leq baang madhiq palơq thêi.22Ơi dhơ Akóón Manưih vôôiq lơh ting kơi rau ơi bâân patơơt, bơơi ayô đóng ađó achêk, nek manưih hơq tââq ađó, Chuôq bâân pajaau tabaan!”23Piđó vaaih tââp tarkaai xóng ađêi manưih kơi ađek nh'jau nek ngaai kalóóng kabhuh piđó, nek manưih xók kiêng têêng tarnêêng achêk.
24Hayơq, mưi praaq tarkaai kung vaaih dhiq m'pơng piđó leq ngaai đu kalóóng sôôq piđó bâân lêi nek gamak lơh.25Hayơq, Ađó móón palơq piđó: “Nôôq bhua ưng nôôq katiêk pei praan karơ têêng kala palââng, lơq nôôq manưih kadhâng koq dhiq dhanuôr bâân đóók nek ‘manưih đóng ơơn.’26Bơơi palơq adhi anó nek kah chóóm kơi achêk. Klóóih dhiq ađek, manưih gamak tââm kalóóng adhi anó phaai val xar kơi manưih katưưiq tââm, lơq manưih kadhâng koq kơi manưih têêng yaauq.27Ơi ngaai taha lơh, manưih tơơt chacha môôiq manưih đu têêng yaauq? Eh dhơq nek manưih tơơt chacha alua? Ađek hơq thêi tơơt dhiq m'pơng adhi anó kơi mưi manưih têêng yaauq.28Bơơi adhi anó nek nôôq manưih ơi đan griêq palơq thêi kalóóng nôôq hadhaap ưng thêi.29Thêi kung đóng leq adhi anó, kơi Ama thêi ơi đóng katiêk leq thêi,30đóng adhi anó ve chóóm ting ơm cha madhiq baang ưng thêi kalóóng katiêk pleng thêi, lơq tơơt dhiq tanơơt hơq xêi xanêi majêt bơơr kabhuh dhong nooi ưng I-sơ-ra-êên.
31Si-môôn ơơi, Si-môôn, lêi tôôh, Sa-taan ơi nhan óm halóóch amei kơi aviq.32Bơơi thêi ơi nhan gavơh đóng amei đóng lóóm huuiq amei yươq bil. Lơq amei, xók ơi palâh val lóóiq, nek têêng đóng nôôq adhi anó amei karơ.”33Bơơi ađó móón palơq Chuôq: “Kakoh Chuôq, aku taluôn ravang ting vôôiq palơq Amei patơk mơ leq đong kanam lơq tơk dham chêt.”34Bơơi Ađó móón: “Phi-e-rơ ơơi, thêi móón palơq amei, hayum ađôk atưưch gôông e kah takar laloom xók amei dyiin kah n'nal thêi pe chu.”
35Ađó móón palơq piđó: “Xók thêi kayua adhi anó vôôiq óóq ting đââng chadhung jêên, chadhung, jêi dheep, adhi anó kah ve rau thiêuq, pâng kah?” Piđó ââi: “Yươq rau ve.”36Hayơq Ađó móón palơq piđó: “Bơơi xók ađôk, ngaai ve chadhung jêên, nek pei vaq, lơq chadhung kung kơi ađek. Ngaai kah ơi ve bhươt, nek baan aau chaguôk ađêi hơq kơl.37Ơi thêi móón palơq adhi anó kơi paraaq ơi bâân xaraq ađô phaai tajaap dhiq thêi: ‘Lơq ađó ơi bâân gróóp madhiq palơq nôôq manưih kah vaaih gani.’ Ơi lalua rau chaleq leq thêi phaai paxong.”38Hayơq, piđó ââi: “Kakoh Chuôq, lêi ađô, dhiq ađôk ve bơơr pala bhươt.” Ađó móón palơq piđó: “Kơi ađek nek dyóp aq.”
39Xong xók ơi gluh, Ađó vôôiq tơk leq bôôl Ô-liiu kơi kaxu, dyơq nôôq môôn-đô kung ting tapun Ađó.40Xók ơi vôôiq tơk leq dham, Ađó móón palơq piđó: “Nek nhan gavơh đóng yươq mơk leq dharơơl galơơk.”41Ađó xooq changaai tââq dham piđó mưi gral mơ glơm mưi kaliêng dhơl, lơq chakoh takól, Ađó nhan gavơh,42kơi ađô: “Kakoh Ama, la Ama kiêng, nhan patââi choom ađô tââq Akóón. Dhơ kơi ađek, eh rau karnóq Akóón, bơơi nek, nhan karnóq Ama bâân vaaih.”43[Mưi dhơn pleng tââq pleng bhral leq Ađó, poor praan đóng Ađó.]44[Tơơt m'pơng đu hadhaap jarnah, Ađó nhan gavơh bhơt lóóm, lơq karhơuq Ađó xar kơi nôôq katraq ahaam haruôi leq katiêk.]45Xók yuur dyương tââq dham nhan gavơh, Ađó vôôiq tơk leq dham nôôq môôn-đô, Ađó lêi piđó xók bêch taai ranguôq.46Ađó móón palơq piđó: “Hau adhi anó bêch? Yuur meh nhan gavơh aq, đóng adhi yươq mơk leq dharơơl galơơk.”
47Xók Ađó dyơq praaq, lêi tôôh, ve mưi kabhuh manưih bơk lơq ađó bâân đóók nek Ju-đa, mưi kalóóng majêt bơơr sưưq-đô, đââng koq piđó. Ađó tơk pađan leq Chuôq Jê-su đóng chum Chuôq.48Bơơi Chuôq Jê-su móón palơq ađó: “Ju-đa, amei baan pajaau Akóón Manưih palơq mưi chanum alua?”49Xók nôôq manưih xir vir Ađó bâân lêi tarnêêng ravang vaaih, piđó tamóh: “Kakoh Chuôq, nôôq yi ve chóóm đenh chróót palơq bhươt kah?”50Mưi manưih achêk kalóóng sôôq piđó ơi m'preh dhơn ratơơq ưng takóh kadhâng bhanuôih bhơt liêm, lơq m'preh tatươt katór tươm ưng ađó ađek.51Bơơi ââi lóóiq, Chuôq Jê-su móón: “Nek lơơi mak kơi đóng chiên ađô.” Lơq xók kapat dhiq katór ađek, Ađó payươh đóng ađó ađek.52Tatun ađek, Chuôq Jê-su móón palơq nôôq manưih tơk kóóp Ađó, chênh nek nôôq takóh kala kadhâng bhanuôih, nôôq takóh kadhâng koq linh đong bhanuôih, lơq nôôq takóh bhươl, kơi ađô: “Nôôq pe bhral palơq bhươt lơq bhaniiq kơi kóóp đu tatông?53Dyóp tangêi, xók aku tơơt madhiq palơq nôôq pe kalóóng đong bhanuôih, nôôq pe kah pei têi kóóp aku. Bơơi ađôk nek jơ ưng nôôq pe lơq kataai karơ kanam kanheet.”
54Hayơq, xong xók kóóp jư Ađó, piđó đââng vôôiq lơq đââng tơk đong ưng takóh kala kadhâng bhanuôih bhơt liêm. Dyơq Phi-e-rơ ting Ađó tââq changaai.55Xók ơi jrưưng mưi garboq óih dhiq m'pơng taang lơq tơơt karong lóóiq xóng piđó, Phi-e-rơ tơơt madhiq palơq piđó.56Xók achêk, dhơn ratơơq pađiil achêk, xók đóók lêi ađó tơơt tóór óih aang nek lêi li mrang leq ađó, pađiil móón: “Ađó ađô kung tơơt palơq manưih tôôh.”57Bơơi ađó dyiin, kơi ađô: “Amei ađek, aku ve n'nal ađó ađek dhơq.”58Maxưưiq tââq ađek, mưi nak đu lââng, xók lêi ađó, nek móón: “Amei kung mađó leq kabhuh piđó.” Bơơi Phi-e-rơ dyiin: “Amei ađek, eh rau aku.”59Kơ mưi jơ ơi lơh, mưi nak đu lââng dyơq praaq tabhlơng kơi ađô: “Pâng nek ađó ađô kung tơơt palơq ađó tôôh, taai ađó ađek kung nek dhanuôr Ga-li-lê.”60Bơơi Phi-e-rơ ââi: “Amei ađek, aku kah n'nal amei praaq hau rau.” N'drươh, xong xók ađó dyơq praaq, mưi tưưch gôông pei takar.61Chuôq palâh koq lêi Phi-e-rơ, lơq Phi-e-rơ hei lóóiq paraaq ưng Chuôq, ng'kơi Ađó ơi móón palơq ađêi kơi ađô: “Mađôk laloom xók atưưch gôông takar, amei e dyiin thêi pe chu.”62Lơq xók ơi gluh leq nguôi, ađó nhiim griit kơi ka-ai karuôq.
63Nôôq manưih đương jư Ađó ơi praaq paxê, m'bhiiq vei Ađó.64Pươr mat Ađó lóóiq xong, kabhuh piđó padhơơch Ađó kơi ađô: “Paraaq taruuih loom n'nal! Ngaai nek manưih đu m'bhiiq amei?”65Piđó praaq palơq Ađó bơk rau praaq chôlô lââng dyơq.
66Xók pleng tââp brương, nôôq takóh bhươl kalóóng dhanuôr, dhơơm nôôq takóh kala kadhâng bhanuôih lơq takóh pachóóm gani, ơi hoop lóóiq lơq piđó đââng Ađó tơk Kabhuh Takóh Xêi Xanêi ưng ađêi,67móón: “La amei nek Chuôq Paq Manưih, nek móón palơq nôôq yi.” Bơơi Ađó móón palơq piđó: “La aku móón nôôq pe, lalua nôôq pe kah huuiq;68dyơq la aku tamóh, lalua nôôq pe e kah ââi.69Bơơi tââq ađôk leq tabhêêl, Akóón Manưih e tơơt hót tươm ưng Yaang Pleng mataai raman.”70Xók achêk, piđó maar tamóh: “Kơi ađek, amei nek Akóón ưng Yaang Pleng kah alua?” Hayơq Ađó ââi palơq piđó: “Chênh nôôq pe xók móón kơi aku nek Yaang achêk.”71Hayơq nek piđó móón: “Nôôq he dyơq kơng đươi praaq truuih harau dyơq? Taai chênh nôôq he ơi xâng tââq bóóp ađó.”

FAR EAST BROADCASTING COMPANY

https://app.library.bible/content/15a813fef7fefb05