Luke17
1Hayơq Ađó móón palơq nôôq môôn-đô ađêi: “Rau kah chóóm kah vaaih nek nôôq rau têêng đóng n'đóih lơt, bơơi ayô xangaat đóng ngaai đu hơq tââq ađó, nôôq rau têêng lơt vaaih!2Alua liêm đóng ađó achêk la kơi mưi tapal dhơl bâân tachauq praang tuôr ađó, lơq ađó bâân m'peq leq taxiiq liêm lơh nek đóng ađó têêng đóng n'đóih lơt leq mưi kalóóng nôôq akóón paniên ađô.3Phaai chamet jư ađêi kala! La mưi nak adhi anó ađêi matu lơt, phaai trêh teng ađó achêk; lơq la ađó achêk klôôq lóóm, nek lơơi lơt đóng ađó.4Dhơ ađó achêk matu lơt palơq adhi anó tơk tapól chu mưi tangêi, lơq tapól chu val lóóiq móón palơq adhi anó: ‘Aku klôôq lóóm,’ nek adhi anó dyơq e lơơi lơt đóng ađó!”5Nôôq sưưq-đô móón palơq Chuôq: “Nhan đóng kơơq lóóm huuiq leq nôôq yi.”6Hayơq, Chuôq ââi: “La adhi anó ve lóóm huuiq makơi mưi kaliêng habhêi, nek kơi xók adhi anó praaq palơq tââm marlóóng ađôk kơi ađô: ‘Amei phaai bâân tarôôq lơq bâân tachoh dhiq taxiiq,’ hayơq ađó lalua nek phaai xâng bóóp adhi anó.7Bơơi ngaai kalóóng adhi anó ve dhơn ratơơq vôôiq kei ruông môôiq jư trưưu tââq klung chô hơq vil yua ađó: ‘Vôôiq tơơt leq baang chacha n'drươh’?8Klóóih dhiq ađek, eh dhơq manưih kala e móón palơq ađó: ‘Phaai dhoon vaar chana đóng aku cha, lơq xeet tarveng amei têêng yaauq aku xók bhêêl aku ơm cha, hayơq xong nôôq tarnêêng ađek, amei ve bâân ơm cha’ kah lua?9Manưih kala achêk kah pakah lóóm n'nal ơơn marau marâ palơq dhơn ratơơq taai ađó ơi têêng nôôq tarnêêng bâân pató kayua, pâng kah?10Adhi anó kung kơi ađek, xók adhi anó xong dyóp rau tarnêêng ơi bâân kayua đóng ađêi, nek móón kơi ađô: ‘Nôôq yi nek nôôq dhơn ratơơq kah ađaang. Nôôq yi ơi têêng xong rau ađêi phaai têêng.’”11Tarnêêng vaaih xók bhêêl dhiq kalơng vôôiq tơk leq Jê-ru-sa-leem, nek Ađó vôôiq pagan leq xưưq tarjaap bhlưa Sa-ma-ri lơq Ga-li-lê.12Xók Ađó mót leq mưi kanóón achêk, majêt chanak ka-ai tơơt bhơơi đương kêch Ađó, hơq piđó dyương tââq changaai13lơq piđó yuur dhaloong móón: “Thêi Jê-su ơơi, nhan kayô ka-er nôôq yi.”14Xók lêi piđó, Ađó móón piđó: “Nek vôôiq pakah ađêi leq nôôq takóh kadhâng bhanuôih.” Lơq tarnêêng vaaih xók bhêêl piđó vôôiq, nek piđó bâân sek.15Hayơq mưi nak kalóóng piđó, xók lêi kơi ađô ađêi ơi bâân yươh, ađó palâh val lóóiq, pakarơ dhariêng bhi haanh Yaang Pleng.16Ađó chip mat leq katiêk dhiq dyung Chuôq, ma-ơơn Chuôq. Ađó achêk nek mưi manưih Sa-ma-ri.17Kơi ađek nek, xók ââi lóóiq, Chuôq Jê-su tamóh: “Eh dhơq luch majêt chanak maar bâân sek alua? Dyơq takiêh chanak đu lââng n'leq vaq?18Hau kah rau lêi ngaai val lóóiq đóng cha-iil tabah leq Yaang Pleng chapiên mưi manưih dhanuôr katiêk lââng ađô?”19Hayơq Chuôq praaq palơq ađó ađek: “Nek yuur dyương, lơq vôôiq, Lóóm huuiq ưng amei ơi payươh amei.”20Xók bâân nôôq manưih Pha-ri-si tamóh n'đó bhêêl Katiêk ưng Yaang Pleng e bhral, Ađó ââi piđó, lơq praaq: “Katiêk Yaang Pleng kah ve chóóm bhral palơq rau chamet lêi.21Palââng kung e kah móón: ‘Lêi nô, dhiq ađô!’ môôiq ‘Tôôh chêq!’ Ơi, Phaai lêi nek, katiêk ưng Yaang Pleng tơơt dhiq kalóóng nôôq pe.”22Hayơq Ađó praaq palơq nôôq môôn-đô: “E ve nôôq tangêi xók đu adhi anó rââm bâân lêi mưi kalóóng nôôq tangêi ưng Akóón Manưih, hơq adhi anó e kah bâân lêi.23Lơq palââng e móón palơq adhi anó: ‘Tôôh, dhiq tôôh!’ môôiq: ‘Nô, dhiq ađô!’ Óóq gluh vôôiq, kung óóq ting mut tapun piđó,24ơi kơi kamlaaq chaach tââq raal talaang pleng hót ađô blaach tơk raal talaang pleng hót tôôh, nek Akóón Manưih e kung kơi ađek.25Bơơi rau đu laloom tââm đóng Ađó nek đơơp bơk rau jarnah lơq kah huuiq tââq klaang đơơi ađô.26Kơi tarnêêng ơi vaaih ng'kơi kalóóng đơơi Nô-ê, nek ađó kung e kơi ađek kalóóng đơơi Akóón Manưih.27Palââng bhiêk cha, ơm, nhan, đóng, — patơk tangêi Nô-ê mót leq kalóóng bhuông, hayơq đơơk tuh lim tơk lơq leng luch dyóp rau.28Makơi ađek, kơi tarnêêng ơi vaaih kalóóng đơơi ưng Loot — palââng bhiêk cha, ơm, kơl, baan, choh chóói, têêng đong xaang,29bơơi xók tangêi Loot gluh tââq Sô-đôôm, nek bó óih lơq róh roong katiêk tââq pleng dhuônh óch, hayơq róh dyóp rau.30Tarnêêng e vaaih tơk ting kơi achêk kalóóng tangêi Akóón Manưih tabhral.31Kalóóng tangêi ađek, ngaai tơơt dhiq pabhung đong hơq karvaan ađêi dhiq kalóóng đong, nek óóq dhaluônh pei paxooq nôôq ađek; lơq makơi ađek, ngaai tơơt dhiq klung nek óóq val chô palơq rau dhơơm đu dyơq.32Phaai hei lóóiq kađiêl ưng Loot.33La ngaai tabâân jư parmông ađêi nek e bil ađó, bơơi la ngaai lơơi parmông nek e bâân paq ađó.34Aku móón palơq adhi anó, xók hayum achêk, e ve bơơr chanak bêch madhiq dharââng. Mưi chanak e bâân tađââng vôôiq, dyơq chanak tôôh e bâân lơơi lóóiq.35E ve bơơr nak tatap kalóóng madhiq dham. Mưi chanak bâân tađââng vôôiq, dyơq chanak tôôh bâân tachêq lóóiq.”36[Bơơr chanak dhiq klung, mưi chanak e bâân tađââng vôôiq, lơq chanak tôôh e bâân tachêq lóóiq]37Lơq xók ââi bóóp, piđó móón palơq Ađó: “Chuôq ơơi, n'đó dhiq achêk?” Hơq Ađó móón piđó: “Xaak chêt n'đó dhiq, kêên kêên e kung prơu lóóiq dhiq ađek.”
FAR EAST BROADCASTING COMPANY