Luke14
1Tarnêêng vaaih xók Ađó vôôiq mót leq đong mưi manưih bhakôq ưng kabhuh Pha-ri-si kalóóng mưi tangêi Sa-baat đóng cha vaar, lơq piđó xók tameng chamet lêi Ađó.2Lơq tôôh, mưi nak achêk bâân ka-ai eh achak araang tơơt toom mat Ađó.3Xók pơơh bóóp, Chuôq Jê-su praaq palơq nôôq takóh pachóóm gani lơq manưih Pha-ri-si, kơi ađô: “Ve chóóm pheep payươh ka-ai kalóóng tangêi Sa-baat môôiq kah?”4Bơơi piđó parngau parngiêt. Hayơq xók tơq manưih ka-ai, Ađó payươh manưih achêk, lơq đóng yuur chô.5Ađó praaq palơq piđó: “Ngaai kalóóng nôôq pe ve akóón padruuih, môôiq mưi akóón karók, bâân n'tôq leq jiêng kalóóng tangêi Sa-baat hơq kah n'drươh ruiq ađó dyók?”6Piđó kah chóóm kaai lóóiq toom nôôq praaq ađô.7Hayơq Ađó truuih leq nôôq tamóói bâân kayua mưi babi, ơi bâân lêi ng'kơi piđó ơi chââih nôôq dham tơơt bhi chap, hayơq móón palơq piđó kơi ađô:8“Xók nôôq pe bâân ve ngaai kayua tơk bhiêk akóón manưih, óóq tơơt leq baang chacha dhiq dham yaal tââm, e kơi ve nh'jau ve mưi nak bhi chap lơh nôôq pe ơi bâân ađó ađek kayua,9Xók manưih ơi kayua adhi anó lơq tamóói tôôh vôôiq tơk, praaq palơq nôôq pe: ‘Nhan lơơi dham ađôk leq tamóói ađô,’ hayơq nôôq pe lalua nek phaai pei tơơt leq tatun palơq rau kachiit mat.10Palâh lóóiq, xók nôôq pe bâân kayua, nek vôôiq, tơơt leq baang chacha dhiq dham tatun, đóng xók manưih ơi kayua nôôq pe bhral, piđó e móón palơq nôôq pe: ‘Parjơơk ơơi, nhan đơk leq dham yaal lơh.’ Xók achêk, e ve bhi chap ravang đóng leq nôôq pe toom mat dyóp nak tơơt madhiq baang palơq ađêi.11Ơi ngaai yuur payaal ađêi kala e bâân tabhlêh pa-êêp, lơq ngaai pa-êêp ađêi kala e bâân hayuur payaal.”12Xong ađek, Ađó kung móón palơq manưih ơi kayua Ađó: “Xók amei yaauq cha dhơng môôiq cha blót, óóq kayua parjơơk amei, môôiq adhi anó amei, môôiq xóng anó amei, kung óóq kayua nôôq manưih dharing tapóóng kavaan, e kơi, piđó kung ve chóóm kayua lóóiq amei, lơq tarnêêng chróót yaauq vaaih tơk leq amei.13Palâh lóóiq, xók amei têêng bhiêk đaam, nek kayua nôôq manưih ngeeo ha-ul, arươp dyóói, khuch ke, kabaang kapôk,14nek amei e bâân phươk, taai piđó kah đuôh chóóm chróót lóóiq leq amei. Taai phơn tachróót pachô e bâân ravang leq amei kalóóng rau mamông lóóiq ưng manưih bhơt liêm.”15Xók mưi kalóóng nôôq manưih tơơt cha xâng nôôq paraaq ađô, ađó ađek móón palơq Chuôq: “Phươk bhlơng nek manưih e bâân cha beng kalóóng katiêk Yaang Pleng!”16Bơơi Chuôq praaq palơq ađó: “Ve manưih achêk dhoon bhiêk gamak lơq kayua bơk tamóói.17Tơk jơ mót bhiêk, ađó kayua dhơn ratơơq ađêi vôôiq đóng móón tamóói ơi bâân kayua: ‘Nhan vôôiq nek taai bhiêk xók ađôk ơi ravang lơơi.’18Bơơi tabhơt piđó ting chanah móón vơng. Manưih đu laloom móón palơq ađó: ‘Aku ơi kơl mưi dham hare, lơq aku ve kơng vôôiq lêi ađó. Nhan amei đóng aku kah bâân vôôiq.’19Manưih đu lââng móón: ‘Aku ve kơl xââng kap karók, lơq ravang vôôiq pakei lêi piđó. Nhan amei đóng aku kah bâân vôôiq.’20Manưih đu lââng dyơq móón: ‘Aku ơi pei kađiêl, lơq taai kơi ađek aku kah bâân vôôiq.’21Dhơn ratơơq chô, truuih lóóiq nôôq tarnêêng achêk leq kala ađêi. Xók achêk, xong xók yuur pagrâ, manưih kala đong móón palơq dhơn ratơơq ađó: ‘Phaai pađâh vôôiq leq nôôq kalơng bhlơng bơk manưih lơq paleh katưưiq dhiq kalóóng charvaal hơq đââng chô nô leq nôôq manưih đu ngeeo ha-ul, dhuôr arươp, abhơơm kabaang lơq khuch ke.’22Dhơn ratơơq móón: ‘Abhươp ơơi, nôôq yi ơi têêng rau amei pató, bơơi kung dyơq dham kagóh.’23Kala móón palơq dhơn ratơơq: ‘Phaai vôôiq leq nguôi ting nôôq kalơng gamak lơq nôôq kalơng bhươl, hơq kayua palââng mót, kơi đóng bing đong ưng aku.24Ơi aku praaq đóng amei kơi kah ngaai kalóóng nôôq tamóói bâân yua achêk e bâân ting tơơt bhiêk ưng aku.’”25Xók achêk, nôôq ganơr manưih dhanuôr bơk bhlơng vôôiq ting Ađó, lơq xók palâh achak lóóiq, Ađó praaq palơq piđó:26“La ngaai tơk leq aku hơq kah geet akonh akan, kađiêl akóón anaaq, adhi anó, miing móóq ađêi, lơq luch parmông ưng ađêi dyơq, nek ađó ađek kah đuôh têêng môôn-đô ưng aku.27La ngaai kah đuôl m'baang chatông ađêi hơq ting tapun aku, hayơq manưih achêk kah chóóm nek môôn-đô ưng aku.28Ơi ngaai đu kalóóng adhi anó kiêng têêng mưi beq đong yaal, hơq laloom kơ kah tơơt kanóq xâng jêên baak mơ — ađêi ve dyóp đóng têêng paxong môôiq kah?29Đóng e kơi, xong xók ađó achêk ơi têêng pariiq hơq kah đuôh chóóm paxong, tabhơt nôôq manưih đu lêi lalua nek kachang praaq paxê ađó ađek,30praaq kơi ađô: ‘Ađó ađô tââp têêng hơq kah đuôh têêng paxong.’31Môôiq n'đó bhua, xók ravang vôôiq tarleng palơq bhua lââng dhiq dham tarleng, hơq kah ve tơơt, laloom kơ kanóq lêi kơi la ađêi ve majêt ngaan linh, hayơq ve đuôh tajơl lóóiq palơq kabhuh linh xók bhral tarjơl palơq ađêi palơq bơơr jêt ngaan linh kah?32La kah đuôh tajơl, nek xók bhêêl bhua tôôh dyơq dhiq changaai, bhua ađô kayua manưih đââng paraaq vôôiq nhan paliêm.33Hayơq makơi kơi ađek, ngaai kalóóng adhi anó hơq kah m'peq lơơi dyóp rau ađêi ve hayơq kah chóóm nek môôn-đô ưng aku.34Abhóh nek malơơi, bơơi la abhóh kung bil đu kariêq, nek ađó e chóóm tamuôiq đóng kriêq palơq hau rau?35Ađó kah ve rau malơơi leq katiêk kung kah đóng têêng katiêk mathuk. Palââng bhiêk m'peq ađó leq nguôi. Ngaai ve katór đóng xâng, nek xâng.”
FAR EAST BROADCASTING COMPANY