John8
1Xók achêk, Chuôq Jê-su bhađơk leq kakóóng Ô-liiu.2Bơơi mót bhêêl yayóng jarương, Ađó vôôiq lóóiq tơk đong bhanuôih, lơq dyóp ngaai pajươk tơk paleq Ađó.3Xók achêk, nôôq thêi pachóóm gani lơq nôôq manưih Pha-ri-si đââng tơk mưi pađiil parkan bâân lum kóóp xók tarlum têêng tapiing, hayơq palââng lơơi ađó tơơt pa-ô dhiq m'pơng.4Taai klêêu Ađó, nôôq takóh kadhâng bhanuôih móón palơq Ađó đóng piđó ve paraaq kaauq patu jaklâk lóóiq Ađó: “Thêi ơơi, manưih pađiil parkan ađô bâân takóóp talum nek palơq tarnêêng têêng matu tapiing.5Kơi lââng, kalóóng gani, Môôi-se ơi truuih phaai glơm dhơl nôôq manưih kơi ađek, dyơq xók đôk, Thêi praaq ng'kơi?”6Bơơi xong xók kóp chok leq, Chuôq Jê-su xaraq dhiq katiêk palơq chabô têi ađêi.7Kalóóng bhêêl ađek, piđó bhiêk gluh pakah tamóh ng'ngơng, Ađó ngơơq chaling lơq móón piđó: “Ngaai kalóóng nôôq pe yươq ve matu lơt, nek glơm dhơl leq ađó ađô laloom tââm.”8Hayơq kóp chok leq, Ađó lóóiq xaraq dhiq katiêk palơq chabô têi ađêi.9Bơơi hayơq, ting chanak mưi kalóóng nôôq manưih Jo Thaaiq achêk yuur xooq, tââp tanââp palơq nôôq manưih taha tuôi tââm, tơk mơ tabhơt piđó maar yuur róch, lơq chapiên nek mưi Ađó dyơq lóóiq, nek palơq manưih pađiil parkan dyơq tơơt pa-ô m'pơng.10Kơi achêk hơq, xong xók ngơơq chaling Chuôq Jê-su praaq palơq manưih pađiil parkan achêk: “Kabhuh piđó tơơt n'dhiq? Kah ngaai patu amei hơ?”11Lơq ađó ââi: “Kah ve ngaai, Chuôq ơơi.” Hayơq Chuôq Jê-su praaq: “Aku kung kah patu amei. Amei phaai vôôiq, tââq đôk óóq têêng matu dyơq.”)12Xong ađek, Chuôq Jê-su vil praaq palơq piđó kơi ađô: “Aku nek taklaaq brương ưng hóng katiêk, ngaai đu ting Aku alua dhakơi e kah jađaang vôôiq kalóóng bóng kanam, bơơi ve taklaaq brương ưng parmông.”13Xong ađek, nôôq manưih Pha-ri-si móón palơq Ađó: “Thêi truuih đuui leq chênh Ađêi nek paraaq truuih ưng Thêi nek kah chóóm huuiq.”14Chuôq Jê-su ââi lóóiq lơq Ađó praaq palơq piđó: “Dhơ nek aku truuih đuui leq chênh ađêi, paraaq truuih đuui ưng aku nek chóóm huuiq. Taai aku n'nal aku n'đó tââq bhral lơq aku ravang vôôiq n'leq, dyơq nôôq pe kah n'nal aku bhral n'tââq môôiq aku ravang n'đó leq vôôiq.15Nôôq pe xêi lơt ting karnóq manưih; Aku kah xêi lơt dhơ dhangaai.16Bơơi patơk la kơi aku xêi lơt, nek rau xêi lơt ưng aku nek dhalam tapat taai aku kah tơơt mưi ađêi, bơơi aku nek palơq Ama, nek Yaang đu kayua aku.17Kơi lââng, kalóóng gani ưng nôôq pe ve xaraq kơi paraaq truuih đuui ưng bơơr chanak nek chóóm huuiq.18Aku nek manưih truuih đuui leq chênh ađêi, lơq Ama, nek Yaang đu kayua aku, truuih đuui leq aku.”19Kơi achêk hơq, piđó móón palơq Ađó: “Ama ưng thêi tơơt n'dhiq?” Chuôq Jê-su ââi bóóp: “Nôôq pe kah n'nal aku, kung kah n'nal Ama aku; la nôôq pe ơi n'nal aku, hơq alua nek nôôq pe kung n'nal Ama aku.”20Ađó praaq nôôq paraaq ađô dhiq kađôôq lơơi jêên pagoop, xók bhêêl truuih pachóóm kalóóng đong bhanuôih, bơơi kah ngaai kóóp jư Ađó taai jơ ưng Ađó kah tơk.21Xong ađek, Ađó vil praaq palơq piđó: “Aku yuur vôôiq, lơq nôôq pe e chêk aku, hayơq nôôq pe e chêt kalóóng matu lơt ađêi. Leq aku vôôiq, nôôq pe kah kơi tơk chóóm.”22Kơi Achêk nek manưih Jo Thaaiq móón: “Ve kơq manưih ađô e leng ađêi kala, taai ađó ađek móón: ‘Leq aku vôôiq nôôq pe kah kơi tơk chóóm’?”23Lơq Ađó praaq palơq piđó: “Nôôq pe gluh tââq hót raal, aku gluh tââq piing yaal. Nôôq pe mađó leq hóng katiêk ađô, Aku kah mađó leq hóng katiêk ađô.24Taai ađek, Aku praaq palơq nôôq pe kơi nôôq pe e chêt kalóóng matu lơt ađêi. Taai la nôôq pe kah huuiq kơi aku alua kơi ađek, nek nôôq pe e chêt kalóóng matu lơt ađêi.”25Taai kơi ađek, piđó móón palơq Ađó: “Thêi nek ngaai?” Chuôq Jê-su móón piđó: “Hau rau đu Aku patơk mơ ơi praaq palơq nôôq pe tư tââq tarnââp.26Aku ve bơk rau đóng praaq lơq đóng xêi xanêi leq nôôq pe. Dhơ kơi ađek, Yaang đu kayua aku nek dhalam lalua; kơi ađek nôôq rau aku xâng tââq Ađó nek aku praaq nôôq rau achêk đóng manưih hóng katiêk.”27Piđó kah n'nal kơi Ađó dyơq praaq leq Ama đóng piđó.28Kơi achêk hayơq, Chuôq Jê-su praaq palơq piđó: “Xók nôôq pe yuur yông Akóón Manưih, nek bhêêl achêk, nôôq pe e n'nal kơi aku alua kơi ađek, lơq aku kah tư ađêi têêng hau rau. Palâh lóóiq, aku praaq nôôq rau ađô ting kơi Ama ơi pachóóm aku.29Yaang đu kayua aku tơơt palơq aku; Ađó yươq lơơi aku laleh dharit, taai aku taluôn têêng rau liêm lóóm Ađó.”30Xók bhêêl Ađó dyơq pachóóm nôôq paraaq achêk, bơk manưih tabóq lóóm huuiq dhiq Ađó.31Hayơq Chuôq Jê-su praaq palơq nôôq manưih Jo Thaaiq ơi huuiq Ađó: “La nôôq pe bhiêk tơơt kalóóng paraaq ưng aku, nôôq pe alua nek môôn-đô ưng Aku;32nôôq pe e n'nal paraaq dhalam, lơq paraaq dhalam e paloh nôôq pe.”33Piđó chróót ââi palơq Ađó: “Nôôq yi nek akóón chachau Ap-ra-haam lơq yươq glêh têêng xól đóng dhơ dhangaai; ng'kơi thêi móón kơi ađô: ‘Nôôq pe e bâân rathaai’?”34Chuôq Jê-su ââi bóóp piđó: “Alua, alua, aku praaq palơq nôôq pe, kơi ngaai đu têêng matu hayơq nek têêng dhơn xól ưng matu.35Kơi lââng, têêng dhơn xól kah bhiêk tơơt taluôn kalóóng đong, Akóón nek bhiêk tơơt taluôn luôn.36Taai kơi chêk, la Akóón paloh nôôq pe, nek nôôq pe e lalua bâân rathaai.37Aku n'nal kơi nôôq pe nek akóón chachau Ap-ra-haam, bơơi nôôq pe tabâân kơi leng aku taai paraaq aku kah ve dhiq kalóóng nôôq pe.38Aku praaq nôôq rau aku ơi lêi tââq Ama; Dyơq nôôq pe nek têêng nôôq tarnêêng nôôq pe xâng tââq ama ađêi.”39Piđó chróót ââi lơq praaq palơq Ađó: “Ama ưng nôôq yi nek Ap-ra-haam.” Chuôq Jê-su praaq palơq piđó: “Hơq la nôôq pe nek akóón chachau ưng Ap-ra-haam nek nôôq pe ơi têêng nôôq tarnêêng ưng Ap-ra-haam.40Bơơi xók ađôk, nôôq pe tabâân kơi leng aku, mưi chanak hơq ơi praaq đóng nôôq pe paraaq dhalam, nek rau aku xâng tââq Yaang Pleng. Ap-ra-haam ơi kah têêng rau kơi ađek.41Nôôq pe têêng nôôq tarnêêng ưng ama ađêi.” Kơi ađek hơq, piđó móón palơq Ađó: “Nôôq yi bâân yuur n'niên eh rau tââq rau têêng tapiing; nôôq yi ve mưi Ama, nek Yaang Pleng.”42Chuôq Jê-su móón piđó: “Praaq babi Yaang Pleng nek Ama ưng nôôq pe, hơq alua nek nôôq pe ơi nh'nhơr aku, taai aku bhral tââq Yaang Pleng, lơq ve mat dhiq ađô; taai aku kah tư karnóq bhral, bơơi chênh Ađó ơi kayua aku.43Taai ng'kơi hơq nôôq pe kah n'nal galuh praaq chiên ađô ưng aku? Ađek nek taai nôôq pe kah ve đuôh chóóm xâng nôôq paraaq ưng aku.44Nôôq pe mađó leq ama ađêi, chênh nek abhưi, lơq nôôq pe ve lóóm têêng ting nôôq malóóch kiêng ưng ama ađêi. Tââq tarnââp ađó nek đu leng manưih lơq kah glêh dyương mưng kalóóng paraaq dhalam, taai kah ve paraaq dhalam kalóóng ađó. Xók ađó praaq paraaq galơơk chachââr, nek ađó praaq tââq lóóm kanóq ưng ađó taai ađó nek đu praaq chachââr lơq nek ama ưng rau praaq chachââr.45Bơơi taai aku praaq lalua, hơq nôôq pe kah huuiq aku.46Ngaai kalóóng nôôq pe chaleq pakah gluh aku ve matu? La aku praaq rau lalua, taai ng'kơi nôôq pe kah huuiq aku?47Ngaai đu mađó leq Yaang Pleng nek xâng paraaq ưng Yaang Pleng; taai rau ađek nôôq pe kah xâng ơi taai nôôq pe kah mađó leq Yaang Pleng.”48Manưih Jo Thaaiq ââi chróót lơq praaq palơq Ađó: “Nôôq yi kah praaq pâng, kơi amei nek makơi manưih Sa-ma-ri lơq bâân abhưi bóq?”49Chuôq Jê-su ââi bóóp: “Aku yươq bâân abhưi bóq, palâh lóóiq, Aku bhi chap Ama aku; dyơq nôôq pe nek paxê tamôôp aku.50Kơi lââng, Aku kah chik chêk cha-iil tabah ưng ađêi; ve mưi Yaang chik chêk lơq xêi xanêi.51Alua, alua, Aku praaq palơq nôôq pe, la ngaai đu xâng jư paraaq Aku, nek manưih achêk alua dhakơi e yươq lêi kan chêt tơk taluôn luôn.”52Manưih Jo Thaaiq móón palơq Ađó: “Xók đôk nôôq yi ơi n'nal kơi Amei bâân abhưi bóq. Ap-ra-haam lơq nôôq manưih đââng taruuih ơi chêt, hơq Amei nek praaq: ‘La ngaai đu xâng jư paraaq Aku, manưih achêk alua dhakơi e yươq bâân xâng akan chêt tơk taluôn luôn.’53Ve kơq Amei nek gamak lơh abhươp avuôq Ap-ra-haam ưng nôôq yi, nek mưi chanak ơi chêt alua? Nôôq manưih đââng taruuih kung ơi chêt. Amei tư đóng ađêi nek ngaai?”54Chuôq Jê-su ââi bóóp: “La aku tư bhi haanh ađêi, cha-iil tabah ưng Aku kah rauriq; Ama aku nek Yaang bhi haanh aku, hơq nôôq pe đóók Yaang chêk kơi Ađó nek Yaang Pleng ưng ađêi.55Nôôq pe biêh kah n'nal Ađó, bơơi aku n'nal Ađó. Lơq la aku praaq kơi ađô: ‘Aku kah n'nal Ađó,’ aku nek manưih praaq chachââr thê kơi nôôq pe. Dhơ kơi ađek, aku n'nal Ađó lơq xâng jư paraaq Ađó.56Ap-ra-haam, abhươp avuôq nôôq pe marhaal marlaat buôn ve chóóm rââm lêi tangêi ưng Aku, ađó ơi lêi lơq bhuui sương.”57Kơi ađek nek manưih Jo Thaaiq móón palơq Ađó: “Amei kah đuôh xââng jêt tuôi, hơq Amei ơi lêi Ap-ra-haam?”58Chuôq Jê-su praaq palơq piđó: “Alua, alua, aku praaq palơq nôôq pe, xók kah ve ơi mat Ap-ra-haam, aku TALUÔN VE.”59Taai ađek, piđó chââih dhơl đóng glơm leq Ađó, bơơi Chuôq Jê-su palââp mat lơq vôôiq gluh tââq đong bhanuôih.
FAR EAST BROADCASTING COMPANY