John2
1Mót tangêi đu pe, mưi bhiêk nhan manưih yuur têêng dhiq Ka-na xưưq Ga-li-lê, amêêq ưng Chuôq Jê-su tơơt dhiq ađek.2Chuôq Jê-su lơq nôôq môôn-đô Ađó kung bâân kayua pơh bhiêk nhan manưih.3Xók buôh hariêq bhơt, amêêq ưng Chuôq Jê-su móón palơq Ađó: “Palââng kah ve buôh dyơq.”4Lơq Chuôq Jê-su praaq palơq ađó: “Amêêq ơơi, rau ađek hau pâng kre tơk aku lơq amei? Jơ ưng aku kah ơi tơk.”5Amêêq ưng Ađó móón palơq nôôq dhơn ratơơq: “Phaai ting têêng dhơ dharau đu Ađó ađek kayua nôôq pe.”6Dhiq ađek ve chapat beq bhaang palơq dhơl bâân lơơi pantua đóng tarnêêng kajut pasek ưng manưih Jo Thaaiq, mưi beq kađôôq đuôh mơ bơơr tơk pe jêt ng'kó đơơk.7Chuôq Jê-su yua piđó: “Nek toh tabing đơơk leq nôôq bhaang ađek.” Hayơq piđó toh bing đơơk tơk teer bóóp.8Ađó praaq palơq piđó: “Xók đôk nek chik lơq đââng leq manưih kala bhiêk.” Kơi chêk nek, piđó vôôiq đââng.9Bơơi xók manưih kala bhiêk, bip xâng đơơk ơi bâân xar vaaih buôh (hơq ađó kah n'nal n'tââq ađó ve, bơơi nôôq dhơn ratơơq — nek nôôq manưih ơi chik đơơk achêk — hayơq n'nal), manưih kala bhiêk dhaloong chaxaau10lơq móón palơq ađó: “Dyóp ngaai biêh yaauq buôh iêm laloom, lơq xók tamóói ơi ơm ból, nek yaauq buôh m'bưưiq jêên lơh. Hayơq amei nek koom buôh iêm tơk leq bhêêl đôk.”11Ađôk nek kanal chrih tarnââp Chuôq Jê-su ơi têêng dhiq Ka-na, xưưq Ga-li-lê, Ađó pakah cha-iil tabah ưng ađêi, lơq nôôq môôn-đô Ađó ơi huuiq dhiq Ađó.12Xong tarnêêng ađek, Chuôq Jê-su, amêêq Ađó, lơq nôôq adhi padruuih, palơq nôôq môôn-đô Ađó dhuônh leq kanóón Ka-bê-na-um, bơơi piđó tơơt dhiq ađek kah ve bơk tangêi.13Bhiêk Jalơh ưng manưih Jo Thaaiq ơi đan tơk, nek Chuôq Jê-su đơk tơk Jê-ru-sa-leem.14Ađó lêi kalóóng đong bhanuôih nôôq đu baan karók, trưưu lơq paraap; palơq kabhuh raxal jêên tơơt dhiq ađek.15Xók xong klaanh mưi m'beq tarnaach palơq tarlêi, Ađó chuih bhơt kabhuh piđó gluh tââq đong bhanuôih, nek palơq trưưu lơq karók, Ađó kung vươk chêh xu ưng kabhuh raxal jêên lơq talâh baang ưng piđó.16Ađó praaq palơq nôôq đu baan paraap: “Phaai paxooq nôôq rau ađek gluh tââq đôk. Óóq têêng đong Ama ưng Aku xar dham kơl baan.”17Nôôq môôn-đô Ađó hei lóóiq paraaq ơi xaraq, kơi ađô: “Bhơt lóóm leq đong Chuôq e óch róh akóón.”18Taai rau ađek, manưih Jo Thaaiq ơi ââi lóóiq lơq praaq palơq Ađó: “Amei pakah đóng nôôq yi lêi hau karnal chrih xók amei têêng nôôq tarnêêng ađô?”19Chuôq Jê-su ââi bóóp, Ađó praaq palơq piđó: “Nek rơh pahư đong bhanuôih ađôk, hayơq kalóóng pe tangêi Aku e kadhơng ađó lóóiq.”20Kơi ađek nek, manưih Jo Thaaiq móón: “Đong bhanuôih ađô bâân têêng kalóóng puôn jêt chapat kamó, hơq Amei e kadhơng ađó lóóiq kalóóng pe tangêi?”21Dhơ kơi ađek, đong đu Ađó biêh praaq tơk chaleq leq đong bhanuôih ưng achak araang Ađó.22Kơi chêk hayơq, xók Ađó ơi tââq kan chêt mamông lóóiq, nôôq môôn-đô ưng Ađó hei lóóiq kơi Ađó ơi praaq kơi ađek, nek piđó huuiq Bha-aar Yaang Pleng lơq paraaq đu Chuôq Jê-su ơi praaq.23Kơi lââng, xók bhêêl Ađó tơơt dhiq Jê-ru-sa-leem mót tangêi Bhiêk Jalơh, dhiq kabhuh manưih ganơr, bơk manưih huuiq dhiq dhanóók Ađó xók lêi nôôq karnal chrih đu Ađó ơi têêng.24Dhơ kơi ađek, chênh Chuôq Jê-su kah đóng lóóm huuiq Ađêi leq piđó, taai Ađó n'nal bhơt dyóp manưih,25ađek nek Ađó kah ve kơng tơk mơ ngaai ađek phaai truuih đuui leq palââng, taai Ađó tư n'nal hau rau tơơt kalóóng dyóp ngaai.
FAR EAST BROADCASTING COMPANY