John10
1“Alua, alua, Aku praaq palơq nôôq pe, ngaai kah mót hót palóng xók vôôiq mót karól trưưu, hơq vil dyók mót hót kalơng lââng, ađek nek đu tatông lơq đu papei.2Bơơi manưih tââq palóng vôôiq mót nek manưih jư ưng trưưu.3Manưih đương palóng lóng palóng đóng manưih achêk, lơq Trưưu xâng dhariêng ưng manưih jư, hayơq manưih jư dhaloong dhalam achak trưưu ưng ađêi hơq đââng piđó gluh leq nguôi.4Xók manưih jư ơi đââng bhơt trưưu ađêi gluh, ađó vôôiq loom piđó, hayơq trưưu ting tatun ađó, ơi piđó keen n'nal dhariêng ưng manưih jư.5Bơơi piđó alua dhakơi e kah vôôiq ting manưih chrih, palâh lóóiq, piđó mut klôôn tââq ađó, taai piđó kah keen n'nal dhariêng ưng nôôq manưih chrih.”6Chuôq Jê-su praaq babi ađô đóng piđó, bơơi nôôq manưih ađek kah n'nal nôôq rau Ađó praaq palơq piđó nek hau.7Kơi achêk hơq, Chuôq Jê-su vil praaq palơq piđó: “Alua, alua Aku praaq đóng nôôq pe kơi Aku nek beq palóng ưng trưưu.8Tabhơt nôôq ngaai bhral laloom Aku nek manưih tatông lơq manưih papei, bơơi trưưu kah ting xâng kabhuh piđó.9Aku nek beq palóng. La ngaai manưih vôôiq mót makơi lơq Aku, nek manưih achêk e bâân paq; hayơq manưih achêk e vôôiq mót, vôôiq gluh lơq tabâân lêi klung bhơơi.10Manưih tatông kah bhral la kah alua nek buôn tông pei, leng đet lơq leng kaxiêt. Aku bhral đóng trưưu ve parmông lơq ve bâân kơi xưa raai.11Aku nek manưih jư kre liêm. Manưih jư kre liêm. Đơơp chêt parhââm mamông ađêi taai trưưu.12Manưih têêng makông, taai eh rau nek manưih jư, hơq trưưu eh rau nek ưng ađó, hơq ađó lêi axing bhral nek lơơi mak kơi trưưu lơq mut paloh achak, dyơq axing kóóp pei trưưu lơq têêng đóng tachêh bil,13ơi taai ađó nek manưih têêng makông hơq palơq ađó, rau karaang gamang eh rau nek leq trưưu.14Aku nek manưih jư kre liêm, Aku đơơp n'nal trưưu ưng Aku, lơq trưưu ưng Aku đơơp n'nal Aku,15i kơi Ama n'nal Aku, Aku kung n'nal Ama; lơq Aku đơơp chêt parhââm mamông ađêi taai trưưu.16Aku ve nôôq trưưu lââng hơq kah tơơt kalóóng karól ađô. Piđó kung kơi ađek, kơng Aku đââng chô, lơq piđó e xâng dhariêng Aku, hayơq e chapiên ve mưi kanan, palơq mưi manưih jư.17Taai rau ađô, Ama nh'nhơr Aku, taai Aku đơơp chêt parhââm mamông ađêi đóng machu dyơq, Aku ve chóóm bâân đơơp ađó.18Kah ngaai tabil parhââm mamông Aku tââq Aku, dhơ kơi ađek, Aku tư ađêi đơơp chêt ađó. Aku ve mataai đơơp chêt parhââm mamông ađêi, lơq Aku ve mataai đơơp pei ađó machu dyơq. Aku ơi đơơp paraaq kayua ađô tââq Ama Aku.”19Rau tablah tachia vil yuur vaaih dhiq m'pơng nôôq manưih Jo Thaaiq taai nôôq paraaq chêk.20Xók ahêq, bơk manưih kalóóng kabhuh piđó móón: “Manưih ađô bâân abhưi bóq lơq bil karnóq. Kơi nôôq pe tameng xâng Ađó?”21Maphơn lââng nek móón: “Ađôk kah alua nek nôôq paraaq ưng manưih bâân abhưi bóq. Ve kơq abhưi ve chóóm pơơh mat đu kabaang?”22Xong ađek, Bhiêk Bhuôih Tapôông yuur têêng dhiq Jê-ru-sa-leem. Xók achêk nek nil ha-ót,23lơq Chuôq Jê-su dyơq vôôiq val kalóóng đong bhanuôih dhiq hiêng Sa-lô-môôn.24Xong tơk, nôôq manưih Jo Thaaiq xavaang praang Ađó, lơq piđó móón palơq Ađó: “Thêi bhiêk têêng bhayuih kalóóng lóóm ưng nôôq yi patơk mơ dyơq? La thêi nek Chuôq Paq Manưih, phaai praaq kơi rathaai kluôh pakah đóng nôôq yi.”25Chuôq Jê-su ââi bóóp piđó: “Aku ơi praaq palơq nôôq pe, lơq nôôq pe kah huuiq. Nôôq tarnêêng đu Aku têêng kalóóng dhanóók Ama Aku, piđó truuih đuui leq Aku.26Dhơ kơi ađek, nôôq pe kah huuiq taai nôôq pe eh mađó leq trưưu ưng Aku.27Trưưu Aku xâng dhariêng Aku, dyơq Aku đơơp n'nal piđó, lơq piđó ting Aku.28Aku kung đóng leq piđó parmông nh'chró chró, lơq piđó alua dhakơi kah bâân hư bil tơk taluôn luôn, lơq e kah ngaai bâân n'drooih dhơ dhađó trưưu kalóóng nôôq piđó tââq têi Aku.29Ama Aku, Yaang ơi đóng piđó leq Aku, nek kataai karơ lơh dyóp rau, lơq kah ngaai ve chóóm n'drooih piđó tââq têi Ama.30Aku lơq Ama nek mưi.”31Bơơi manưih Jo Thaaiq vil pei dhơl đóng ve chóóm glơm Ađó.32Chuôq Jê-su tar-ââi palơq piđó: “Aku ơi pakah đóng nôôq pe bơk tarnêêng liêm tââq Ama. Nôôq pe glơm dhơl aku taai n'đó tarnêêng kalóóng sôôq nôôq tarnêêng ađek?”33Nôôq manưih Jo Thaaiq ââi bóóp Ađó: “Nôôq yi kah glơm dhơl amei taai tarnêêng liêm, bơơi taai matu praaq chôlô, lơq taai amei, nek mưi manưih dhiq katiêk, dyơq tư đóók ađêi nek Yaang Pleng.”34Chuôq Jê-su ââi palơq piđó: “Kalóóng gani ưng nôôq pe, eh dhơq ve paraaq bâân xaraq kơi ađô: ‘Aku praaq: “Nôôq akóón nek yaang”’ kah alua?35La Ađó đóók piđó, nek nôôq manưih đu paraaq ưng Yaang Pleng tơk palơq, nek yaang (lơq Bha-aar Yaang Pleng kah chóóm bâân m'peq pahư),36hơq kơi nôôq pe móón palơq Yaang đu Yaang Pleng ơi pantua lơq đu kayua mót kalóóng hóng katiêk kơi ađô: ‘Amei praaq chôlô,’ taai aku móón: ‘Aku nek Akóón Yaang Pleng’?37La Aku kah dyơq têêng nôôq tarnêêng ưng Ama aku, nek óóq huuiq aku.38Bơơi la aku dyơq têêng, đóng dhơ nôôq pe kah huuiq aku, nek phaai huuiq nôôq tarnêêng achêk, đóng nôôq pe ve chóóm n'nal lơq bhluuch kơi Ama kalóóng Aku, lơq Aku kalóóng Ama.”39Kơi ađek, piđó vil tabâân kơi kóóp Ađó, hơq Ađó xooq tââq têi piđó.40Mưi chu dyơq, Ađó val chô hót tóór tôôh karuung Jô-đen, tơk dhiq đu laloom ahei Jang têêng bap-teem hayơq Ađó tơơt dhiq ađek.41Bơk manưih tơk palơq Ađó lơq piđó móón kơi ađô: “Dhơ Jang ơi kah têêng n'đó kanal chrih, bơơi dyóp rau hơq Jang ơi praaq leq manưih ađô nek dhalam.”42Lơq dhiq ađek, bơk manưih tabóq lóóm huuiq dhiq Ađó.
FAR EAST BROADCASTING COMPANY