Acts8
1Xók achêk, Saau-lơ biêh iêm lóóm tarnêêng leng chêt Ê-tiên. Kơi ađek hayơq, kalóóng tangêi ađek, mưi ganah kóóp janah gamak ơi vaaih tajơl palơq Akóón Dhơn Chuôq dhiq Jê-ru-sa-leem, dyơq tabhơt nôôq manưih xâng huuiq tablah plok xưưq Ju-đê lơq Sa-ma-ri, chapiên nôôq sưưq-đô.2Nôôq manưih bhi huuiq ơi tơp buur Ê-tiên lơq ve nhiim ka-yô gamak bhlơng đóng leq ađó.3Bơơi, Saau-lơ têêng pahư gamak leq Akóón Dhơn Chuôq. Xók bhiêk mót dyóp đong, kóóp tabhơt padruuih lơq pađiil gluh, ađó tamót piđó leq đong kanam.4Dhơ kơi ađek, nôôq manưih bâân tablah ơi vôôiq dyóp leq truuih Taruuih Liêm leq paraaq Chuôq.5Xók achêk, Phi-liip vôôiq dhuônh tơk xưưq Sa-ma-ri, ađó truuih Yaang Paq Manưih đóng piđó.6Xók achêk, manưih dhanuôr makơi lóóm chamet xâng leq rau dhơơm bâân Phi-liip pachóóm, bơơi xók xâng nôôq praaq ađek lơq lêi nôôq raman chrih đu ađó têêng.7Ơi bơk manưih kalóóng sôôq piđó bâân nôôq yaang môôp bóq, piđó ơi gluh lơh xong xók lalơu dhariêng karơ. Dyơq bơk manưih arươp lơq khuch nek ơi bâân yươq.8Xók achêk, ve rau bhuui marhaal gamak kalóóng kanóón ađek.9Bơơi mưi manưih padruuih tôôh, achak nek Si-môôn, laloom hei ơi glêh têêng magun mabhru kalóóng kanóón lơq têêng pachrih dhanuôr Sa-ma-ri, tư móón ađêi nek manưih mataai gamak,10manưih đu tabhơt piđó, tââq paniên tơk taha, maar chamet ting xâng taai móón kơi ađô: “Manưih ađô nek mataai raman ưng Yaang Pleng, nek rau bâân đóók nek Mataai Gamak.”11Xók achêk, palââng ting xâng ađó, taai kalóóng mưi ganah đươnh, ađó ơi têêng piđó chrih lêi nôôq tarnêêng magun mabhru.12Bơơi xók piđó huuiq Phi-liip, ơi bâân truuih taruuih liêm leq katiêk Yaang Pleng lơq achak ưng Chuôq Jê-su Paq Manưih, nek piđó đơơp bap-teem, tabhơt padruuih lơq pađiil.13Hayơq chênh Si-môôn kung huuiq, xók ơi đơơp bap-teem, ađó dyơq bhiêk tơơt palơq Phi-liip. N'drươh, xók lêi nôôq kanal chrih lơq nôôq tarnêêng mataai raman gamak ơi vaaih, ađó hêq lêi bhlơng.14Xók achêk, xong xók xâng kơi dhanuôr xưưq Sa-ma-ri ơi pei đơơp taruuih ưng Yaang Pleng, nôôq sưưq-đô dhiq Jê-ru-sa-leem kayua Phi-e-rơ lơq Jang tơk palơq piđó,15nek bơơr sưưq-đô đu xong xók ơi tơk, ơi gavơh nhan đóng piđó, đóng piđó ve chóóm bâân đơơp Chuôq Yaang Liêm.16Ơi Ađó biêh kah ơi dhaluônh dhiq piing mưi ngaai kalóóng sôôq piđó, bơơi piđó chapiên nek ơi bâân bap-teem kalóóng achak Chuôq Jê-su giêl.17Kơi ađek bơơr sưưq-đô lơơi têi dhiq piđó, hayơq piđó bâân đơơp Chuôq Yaang Liêm.18Xók achêk, xók lêi kơi Yaang Liêm chóóm bâân đóng tââq đu lơơi têi ưng nôôq sưưq-đô, nek Si-môôn cher jêên đóng piđó,19móón: “Nhan kung đóng aku mataai raman ađô đóng la ngaai đu aku lơơi têi, nek ađó achêk ve chóóm bâân đơơp Chuôq Yaang Liêm.”20Bơơi Phi-e-rơ móón palơq ađó: “Nhan đóng baak ưng amei tơơt kalóóng hư bil palơq amei, taai amei ngóq chóóm kơl ơơn đóng ưng Yaang Pleng palơq jêên!21Kah ve phơn môôiq ting tapâng ve rau kalóóng chiên ađô ravang đóng amei, taai lóóm amei kah ve nek dhalam tapat toom mat Yaang Pleng.22Kơi ađek, nek klôôq lóóm leq rau aak ađô ưng amei lơq gavơh nhan palơq Chuôq, kah machưng đươi ađek hơq karnóq ưng lóóm amei e bâân lơơi lơt.23Ơi aku lêi amei dyơq tơơt kalóóng mơt tang lơq taklooiq ưng rau matu lơt.”24Bơơi ââi lóóiq, Si-môôn ââi: “Nhan nôôq pe gavơq nhan palơq Chuôq klóóih đóng aku, đóng óóq mưi rau râ kalóóng nôôq rau đu nôôq pe ơi praaq ve chóóm vaaih leq aku.”25Kơi ađek, xong xók truuih đuui lơq pachóóm paraaq Chuôq, piđó val chô palâh leq Jê-ru-sa-leem, n'drươh ađek truuih Taruuih Liêm đóng bơk bhươl kanóón ưng manưih Sa-ma-ri.26Xók achêk, mưi dhơn pleng ưng Chuôq praaq palơq Phi-liip kơi ađô: “Nek yuur dyương lơq vôôiq leq charhóóng hót hóng dhiq kalơng tââq Jê-ru-sa-leem dhuônh tơk Ga-xa.” (Achêk nek dhiq bhahi bhatoong.)27Xók ơi yuur dyương, ađó yuur vôôiq, lơq lêi tôôh, mưi manưih padruuih, ađó Ê-thi-ô-bi, kuôn talêch dhơn ratơơq ưng Kaan-đaak, bhua pađiil Ê-thi-ô-bi, nek manưih biêh xók jư lêi tabhơt đong kavaan ưng amooq, ađó ơi tơk đóng bhuôih haanh dhiq Jê-ru-sa-leem,28n'drươh xók ađek, ađó xók val chô, tơơt dhiq xe axeh ưng ađêi lơq đok bha-aar paraaq taruuih Ê-saai.29Xók achêk, Yaang Liêm praaq palơq Phi-liip: “Nek tapun pađan lơq vôôiq pagriêq xe axeh ađek.”30Kơi ađek hayơq, xók ơi mut tơk, Phi-liip xâng kuôn ađô xók đok paraaq taruuih Ê-saai nek ađó móón: “Amei ve lua n'nal rau dhơơm ađêi xók đok ađek kah?”31Bơơi manưih kuôn ââi: “Ng'kơi ve aku chóóm đuôh n'nal, la kah mưi ngaai ađek e pachóóm đóng aku?” N'drươh xók ađek, ađó kayua Phi-liip bhadyaang dyók ting tơơt palơq ađêi.32Xók achêk, paleh Bha-aar Yaang Pleng đu kuôn xók đok nek kơi ađô: “Ađó ơi tađââng vôôiq pakơi trưưu tơk leq đong leng dhanah, lơq kơi trưưu akóón bơq parngau toom mat manưih chakap xok ađó, kơi ađek, Ađó kah pơơh bóóp ađêi.33Kalóóng rau takađiq, paraaq dhalam ưng Ađó bâân tapei drooih. Ngaai e truuih lóóiq dhong nooi Ađó? Ơi parmông Ađó ơi tapatââi tââq katiêk.”34Xók tapraaq, Kuôn talêch tamóh palơq Phi-liip: “Aku nhan amei đóng aku n'nal, manưih đââng taruuih xók praaq rau ađô leq ngaai — leq chênh ađêi kala môôiq leq mưi ngaai lââng?”35Kơi ađek nek, pơơh bóóp ađêi lơq tanââp tââq phơn Bha-aar Yaang Pleng ađô, Phi-liip truuih Taruuih Liêm leq Chuôq Jê-su đóng manưih kuôn achêk.36Kơi ađek hayơq, xók piđó n'drươh vôôiq dhiq kalơng, piđó vôôiq tơk dham ve đơơk tôôh, nek kuôn talêch móón: “Lêi tôôh, đơơk! Ve rau xók kajơq aku đơơp bap-teem?”37[Xók achêk, Phi-liip móón palơq ađó: “La amei huuiq palơq tabhơt lóóm amei, nek amei e bâân paq.” Kơi ađek hayơq xók ââi bóóp, manưih kuôn móón: “Aku huuiq leq Yaang Paq Manưih, đu Akóón Yaang Pleng.”]38Manưih kuôn kayua padyương xe axeh lóóiq lơq miq nhiđó maar dhaluônh leq đơơk, miq Phi-liip lơq kuôn jư lêi, hayơq ađó têêng bap-teem đóng manưih kuôn achêk.39Xók achêk, xók nhiđó ơi yuur tââq đơơk, Yaang Liêm ưng Chuôq đââng Phi-liip vôôiq, lơq kuôn talêch kah rau ve lêi ađó dyơq, manưih kuôn bhuui marhaal bhiêk vôôiq kalơng ađêi.40Dyơq Phi-liip nek bâân lêi dhiq A-xôôt, lơq xók vôôiq plok prah xưưq ađek, ađó truuih pachóóm Taruuih Liêm đóng tabhơt nôôq kanóón, đóng patơk xók ađó vôôiq tơk leq Sê-sa-rê.
FAR EAST BROADCASTING COMPANY