Acts28
1Xók bâân yươq rau ha, nek bhêêl ađek nôôq yi bâân n'nal kơi kôông ađô bâân đóók nek Maan-tơ.2Chadrươh ađek, dhanuôr xưưq ađek pơh yaauq nôôq yi paliêm n'tua lơq kaxu, tââq piđó ơi pơh yayar tabhơt nôôq yi palơq kơi kơm óih taai mưi ganơt bó xók tơk lơq taai khau.3Bơơi xók Phaau-lô ơi karong mưi gabê óih lơq m'peq leq óih, nek mưi panong kaxênh karviêng, xong xók laai lơh tââq dhiq puih, ơi pươr mưng dhiq têi ađó.4Bhêêl achêk, xók dhanuôr xưưq ađek bâân lêi akóón anaaq pươr dhiq têi ađó, piđó móón xóng ađêi: “Manưih ađô lalua nek dhươm leng manưih, nek manưih hơq dhơ bâân trôông tââq taxiiq, bơơi rau bhơt liêm kah đóng mamông.”5Tatun ađek, xók ơi takróh akóón anaaq leq óih, ađó ơi yươq ve rau bhrê.6Dhơ kơi ađek, piđó biêh ngóq ađó ravang bâân eh hamôôiq parmat kalơm chêt. Bơơi xong xók piđó chamet lêi bhluuch mưi gral đươnh lơq lêi kah ve rauriq chrih vaaih palơq ađó, nek xók ơi dhơ karnóq, piđó móón ađó nek mưi yaang.7Bhêêl achêk, tơơt parah ađek nek nôôq dham katiêk ưng takóh kala kôông, achak Bup-li-u, nek manưih pơh yayar nôôq yi, ơi pơh yaauq mưi kơi liêm kre kalóóng pe tangêi.8Xók achêk, chiên yuur vaaih ađek nek ama ưng Bup-li-u xók bêch haliêt achak taai bâân ka-ai kahiir lơq ka-ai kroong, nek Phaau-lô, xong xók vôôiq mót lum abhươp lơq gavơh Chuôq, lơơi têi dhiq abhươp, ơi payươh ka-ai đóng abhươp.9Kơi ađek hayơq, xong xók rau tarnêêng achêk yuur vaaih, nôôq manưih lââng dhiq kôông bâân ka-ai kung vôôiq tơk lơq bâân payươh ka-ai,10hơq piđó kung ơi bhi chap nôôq yi palơq rau bhi chap gamak bhlơng, patơk mơ xók yuur vôôiq taxiiq, piđó đââng kliim bơk rau koom đóng rau chóóm đươi ưng nôôq yi.11Xók achêk, lơh pe kaxe, nôôq yi yuur vôôiq dhiq mưi beq jatau ve chan a-ô Đi-ôôt-ku-ri, tââq A-lek-xan-ri-a, ơi kađơu nil ha-ót dhiq kôông.12Xók bâân tơk jrơm dhiq Si-ra-ku-sơ, nôôq yi tơơt dhiq ađek pe tangêi.13Tââq ađek yuur vôôiq taxiiq, nôôq yi vôôiq đan tơk Rê-gi-uum, hayơq mưi tangêi tatun, taai dhiiq chrhóóng hót hóng yuur vaaih, nôôq yi ơi vôôiq tơk Pu-tê-ô-li tangêi ađek xong ađek,14ađek nek dhiq hơq xong xók lum maphơn adhi anó, nôôq yi ơi bâân mââl nhan tơơt lóóiq palơq piđó kalóóng tapól tangêi, lơq bhiêk kơi ađek, nôôq yi vôôiq tơk Rô-ma.15Tââq ađek, xók xâng truuih tơk nôôq yi, nôôq adhi anó ơi vôôiq tơk vaar talum mat palơq nôôq yi tơơt dhiq Chơơq Ap-bi-u lơq Pe Đong Buôn Baan, xók bâân lêi piđó, Phaau-lô ơi ve bâân mưng lóóm huuiq, ma-ơ Yaang Pleng.16Kơi ađek hayơq, xók nôôq yi ơi mót leq kalóóng kanóón Rô-ma, Phaau-lô chóóm pheep tơơt n'tua mưi ađó palơq mưi chanak linh đương jư ađó.17Xók achêk, chiên yuur vaaih lơh pe tangêi ađek nek ađó đóng kayua nôôq manưih nek nôôq takóh kadhâng koq kalóóng dhanuôr Jo Thaaiq ting vôôiq. Hayơq xók piđó ơi krong madhiq, ađó móón palơq piđó: “Nhan móón nôôq pe, nôôq adhi anó, dhơ yươq têêng rauriq jơl lóóiq dhuôr manưih hamôôiq gani takóh ưng ama abhươp nôôq he, bơơi tââq Jê-ru-sa-leem aku bâân kóóp đââng kơi manưih matu lơt kalóóng têi manưih La Ma,18hơq chênh piđó, xong xók tamóh aku, biêh kanóq paloh rathaai đóng aku taai yươq ve mưi matu lơt kơi chóóm chêt lââng tơơt dhiq aku.19Bơơi taai manưih Jo Thaaiq praaq jơl, aku phaai kaauq đââng leq Xê-xa, dhiq xók kah ve kanóq kaauq patu dhanuôr ađêi.20Kơi achêk, ơi taai ađek, aku ơi kayua nôôq pe tơk, đóng talum lơq praaq chiên. Ơi taai lóóm rââm ưng I-sơ-ra-êên, hayơq aku ơi bâân taxiêng ađô.”21Dhơ kơi ađek, piđó móón palơq ađó: “Nôôq yi kah rau đơơp bha-aar xaraq rauriq leq amei tââq Ju-đê, kung kah ve adhi anó ngaai lââng tơk truuih môôiq móón dhơ dharau môôp leq amei.22Bơơi nôôq yi lêi buôn tameng xâng tââq amei rau dhơơm amei karnóq, taai leq kabhuh ađô, rau bâân n'nal tơơt dhiq nôôq yi ađek nek ađó bâân jơl plok dyóp dhiq.”23Kơi ađek hayơq, xong xók đóng tangêi leq ađó, nek bơk manưih lơh ơi pơh palơq ađó dhiq dham tơơt ưng ađó, hơq tââq yayóng đóng patơk habu hayum, ađó truuih đuui palơq piđó, palơq truuih đuui leq katiêk Yaang Pleng, chadrươh ađek pachô piđó leq Chuôq Jê-su miq gani Môôi-se lơq nôôq manưih đââng taruuih.24Dhơ mưi phơn manưih đơơp huuiq nôôq rau bâân praaq pakah, bơơi nôôq lââng nek kah huuiq.25Xók achêk, xók ve rau tarkaai xóng ađêi, piđó yuur xooq xong xók Phaau-lô móón mưi rau, kơi ađô: “Tââq Ê-saai manưih đââng taruuih, Chuôq Yaang Liêm ơi praaq dhalam palơq abhươp avuôq ưng nôôq pe,26kơi ađô: ‘Phaai vôôiq tơk leq dhanuôr ađô lơq praaq: “Xók xâng, nôôq akóón e chóóm xâng, hơq nôôq akóón dhakơi kah n'nal, lơq xók lêi, nôôq akóón e lêi, hơq nôôq akóón dhakơi kah rau chóóm n'nal.”27Taai lóóm dhanuôr ađô val xar kakơu tiêl, katór piđó kơi ngóq kah xâng, lơq mat piđó nek kaxir kiêr, bóh ve bhêêl ađek, piđó ve chóóm lêi palơq mat, bâân xâng palơq katór, lơq chóóm n'nal palơq lóóm, hayơq piđó ve chóóm val lóóiq, lơq Aku e payươh đóng piđó.’28Kơi ađek hayơq, rau bâân n'nal phaai ve dhiq nôôq pe, ađek nek rau paq jóói ađô ưng Yaang Pleng ơi bâân truuih pakah đóng nôôq dhanuôr katiêk lââng, lơq piđó e xâng.”29[Xók ađó móón xong nôôq praaq ađek, nôôq manưih Jo Thaaiq yuur chô, ve rau tarkaai gamak dhiq m'pơng kalóóng piđó.]30Xók achêk, ađó tơơt dyóp bơơr kamó kalóóng dhanong đong vaq ưng ađêi, lơq pơh yaauq tabhơt ngaai dhơơm vôôiq tơk palơq ađó,31xók truuih pachóóm leq katiêk Yaang Pleng lơq pachóóm rau dhơơm leq Chuôq, nek Jê-su Chuôq Paq Manưih, palơq tabhơt lóóm nhóól, yươq talum rau hadhơơp kajơq.
FAR EAST BROADCASTING COMPANY