Acts12
1Xók achêk, leq kamó kaxe ađek, bhua Hê-rôôt pei têi janah chanaaq masôôq manưih kalóóng akóón dhơn Chuôq.2Xók achêk, ađó ađek leng chêt Ja-kơ, anó ưng Jang, palơq bhươt.3Kơi ađek hayơq, xók lêi kơi tarnêêng ađô nek rau iêm lóóm palơq manưih Jo Thaaiq, ađó ađek kung val kayua kóóp jư Phi-e-rơ (hơq nôôq chiên ađek val vaaih leq nôôq tangêi ưng bhiêk Beng Kah Piêng),4lơq xong xók kóóp jư Phi-e-rơ, ađó ađek ơi đóng król leq đong kanam, pajaau đóng puôn kabhuh linh jư lêi ađó, kanóq đââng pagluh ađó toom dhanuôr xong Bhiêk Jalơh.5Kơi ađek nek, dhơ Phi-e-rơ xók takról kalóóng đong kanam, bơơi rau gavơh nhan nek dyơq bâân têêng mưi kơi nhan bhel palâh leq Yaang Pleng ơi đóng ađó taai akóón dhơn Chuôq.6Xók achêk, leq xók Hê-rôôt ravang đââng ađó gluh xêi, chênh hayum ađek, Phi-e-rơ xók bêch bhlưa bơơr chanak linh, ơi takađaai palơq bơơr tarlêi xiêng, xók ađek nôôq linh đương jư hót laloom palóng xók đương jư đong kanam.7Lêi tôôh, mưi dhơn pleng ưng Chuôq bhral dyương hót tóór ađó, brương dyóól kalóóng buông takról. Xók achêk, xong xók tapeh leq bharêêu Phi-e-rơ, dhơn pleng payuur ađó, móón: “Nek yuur pađâh,” lơq nôôq tarlêi xiêng ađó n'tôq tââq têi.8Xók achêk, dhơn pleng praaq palơq ađó: “Nek tư n'dret tarveng lơq đâq dheep ưng amei vaq.” Kơi ađek hayơq, ađó têêng i kơi ađek. Dhơn pleng kung praaq palơq ađó: “Nek xơp aau nguôi ưng amei vaq lơq ting aku.”9Xong xók gluh leq nguôi, ađó ting manưih achêk hơq ađó ơi kah n'nal kơi tarnêêng xók bâân têêng taai dhơn pleng nek lalua bơơi ađó bhiêk ngóq nek xók lêi mưi rau tapalêi.10Xók ơi vôôiq lalơh nôôq kabhuh linh đương jư đu laloom, hơq thưưq bơơr, nhiđó vôôiq tơk palóng kariing palơq bhaxêi đââng mót leq kanóón, hơq ađó tư tarlóng đóng nhiđó. Xong xók gluh leq nguôi, nhiđó vôôiq dhuônh leq mưi kalơng lơq dhơn pleng n'drươh xooq tââq ađó.11Xók ađêi kala ơi meh lóóiq, Phi-e-rơ praaq: “Alua, xók ađô aku hayơq n'nal kơi Chuôq ơi kayua dhơn Ađó lơq paq jóói aku gluh tââq têi Hê-rôôt, palơq dyóp rau đương rââm ưng manưih Jo Thaaiq.”12Lơq n'drươh, xók ơi n'nal kơi ađek, ađó vôôiq tơk leq đong Ma-ri, amêêq ưng Jang, bâân đóók nek Maak, đu dhiq ađô ve bơk manưih huuiq Chuôq bâân krong nhoom lơq xók gavơh nhan.13Xók achêk, xók ađó takóq palóng kariing, mưi dhơn ratơơq pađiil, achak Rô-đơ, bhadyaang pađan đóng ââi.14Xók bâân n'nal dhariêng ưng Phi-e-rơ, hơq taai bhuui sương, ađó ơi kah lóng palóng, bơơi lóóiq mut leq kalóóng, ađó truuih praaq kơi ađô: “Phi-e-rơ xók dyương dhiq palóng.”15Dhơ kơi ađek, piđó móón palơq ađó: “Amei xươl aq.” Bơơi ađó bhiêk praaq makơi chiên avaaih kơi ađek. Kơi ađek hayơq, piđó móón: “Ađek nek dhơn pleng ưng ađó achêk.”16Bơơi, Phi-e-rơ bhiêk takóq, lơq xong xók lóng, piđó lêi ađó lơq maar kadrêq lêi.17Xók achêk, xók ơi pei têi katah đóng piđó parngau, ađó truuih lóóiq đóng ng'kơi hơq Chuôq ơi đââng ađó gluh tââq đong kanam. Lơq N'drươh, ađó pató: “Nek truuih lóóiq nôôq tarnêêng ađô đóng Ja-kơ lơq đóng nôôq adhi anó.” Hayơq gluh leq nguôi, ađó vôôiq tơk mưi dham lââng.18Xók achêk, xók ơi brương, ve đu nhôôn nhaauq kah katưưiq kalóóng kabhuh linh taai tarnêêng ơi vaaih đóng leq Phi-e-rơ.19Dyơq Hê-rôôt, xók ơi kayua chêk lêi manưih hơq kah lêi, xók tamóh xong kabhuh linh đương jư, ađó ađek kayua leng piđó. Lơq xong xók vôôiq tââq Ju-đê dhuônh tơk Sê-sa-rê, ađó ađek tơơt lóóiq dhiq ađek.20Xók achêk, ađó ađek xók kabhróónh dhanuôr Ti-rơ lơq dhanuôr Si-đôôn. Kơi ađek hayơq, piđó pajươk vôôiq xóng piđó lum ađó ađek, lơq xók ơi đuôh pei lóóm Ba-la-tuut, nek kuôn đan griêq ưng bhua, piđó nhan paliêm taai xưưq piđó bâân kơl tarmông tââq xưưq ưng bhua.21Bhêêl achêk, leq tangêi ơi ravang, xong xók xơp aau bhua lơq tơơt dhiq tanơơt, Hê-rôôt praaq karơ toom piđó.22Xók achêk, dhanuôr lalơu karơ: “Achêk nek dhariêng ưng mưi yaang, eh rau ưng akóón manưih!”23Hayơq n'drươh ađek, mưi dhơn pleng ưng Chuôq vei ađó ađek ơi taai ađó ađek kah tapôông rau cha-iil tabah leq Yaang Pleng, lơq xong xók ka-ai m'mreh janah, nek ađó ađek pat parhââm.24Dyơq taruuih ưng Yaang Pleng bhiêk vaaih karơ lơq n'dhương bơk.25Tatun ađek, Ba-na-ba lơq Saau-lơ val chô tơk Jê-ru-sa-leem, xók ơi paxong tarnêêng têêng yaauq ưng ađêi, ting đââng Jang ting vôôiq, manưih bâân đóók nek Maak.
FAR EAST BROADCASTING COMPANY