2 Corinthians9
1Leq tarnêêng têêng yaauq đóng leq nôôq manưih huuiq, hơq ađô nek chiên xưa raai buôn aku phaai xaraq đóng adhi anó.2Ơi aku n'nal rau ravang lóóm ưng adhi anó, nek rau hơq aku xal mat adhi anó palơq nôôq đu huuiq Chuôq dhiq Ma-xê-đoan kơi, akóón dhơn Chuôq dhiq A-chaai ơi ravang lơơi tââq mưi kamó loom, lơq lóóm rââm kiêng ưng adhi anó ơi bhơơl chut bơk ngaai lơh.3Bơơi aku ơi kayua nôôq adhi anó tôôh, buôn paraaq pajơơr ưng nôôq yi leq adhi anó yươq bâân aluôt luh-luông kalóóng nôôq rau ađô, hơq đóng adhi anó ve chóóm ravang lơơi kơi aku ơi praaq.4La kah, la bơơr pe nak adhi anó đu huuiq dhiq Ma-xê-đoan ve chóóm vôôiq palơq aku lơq lêi rau kah ravang lơơi dhiq adhi anó, nek nôôq yi bâân kachiit mat, achêk nek kah ơi praaq tơk adhi anó, tââq rau grâ lóóm ađek ưng nôôq yi.5Đóng hayơq aku ơi kanóq kayua chut nôôq adhi anó ađek nek tarnêêng kơng bhlơng, hơq đóng piđó ve chóóm vôôiq loom palơq adhi anó lơq ravang lơơi kaliim kliim ơi hươq ađô ưng adhi anó, buôn ve rau ravang lơơi ting kơi ađek kơi mưi phươk liêm, hơq óóq kơi tarnêêng pa-eep.6Mat lââng, aku praaq rau ađô: ngaai chóói kơi kuôq kaniêq nek e xóót kơi kaniêq, lơq ngaai chóói dhiq nôôq phươk liêm nek e xóót dhiq nôôq phươk liêm.7Ting chanak tapôông đóng ting kơi ađêi ơi kanóq loom kalóóng lóóm, kah yuur vaaih tââq rau ranguôq lóóm môôiq tââq rau pa-eep raan, Ơi Yaang Pleng nh'nhơr manưih bhuui lóóm tapôông đóng.8Hayơq Yaang Pleng ve kataai têêng dyóp ơơn phươk xưa raai dhiq adhi anó, buôn taluôn luôn kalóóng dyóp rau, taai ve dyóp bhơt rau kơng đươi, adhi anó ve chóóm xưa raai kalóóng dyóp tarnêêng liêm.9Kơi ve xaraq: “Ngaai xaraai karvaan poor jóói, ngaai pađơơp nh'xóóng đóng manưih ngeeo, nek rau bhơt liêm ađó dyơq lóóiq đóng patơk nh'chró.”10Mat lââng, Yaang blah đóng kaliêng m'ma leq manưih chóói lơq beng buôn têêng tarmông e pei đóng kơi xưa raai, e têêng kaliêng m'ma ưng adhi anó grơơt lơh, lơq e têêng nôôq pô pale ưng rau bhơt liêm dhiq adhi anó bơk lơh,11xók bâân xưa raai kalóóng bhơt dyóp rau buôn bhơt lóóm bhươh rông, nek rau đââng tơk paraaq ma-ơơn Yaang Pleng tââq nôôq he,12taai tarnêêng têêng yaauq ađô eh mơ nek ngi đóng padyóp nôôq rau kiêng ưng nôôq manưih huuiq liêm, hơq dyơq têêng đóng xưa bhlaai palơq bơk paraaq ma-ơơn Yaang Pleng,13xók bhi haanh Yaang Pleng đươi rau ngi lêi ưng tarnêêng ađô ganơơm dhiq rau đơơp huuiq dhiq paraaq yuur praaq ưng adhi anó nek palơq taruuih liêm ưng Chuôq Paq Manưih lơq lóóm bhươh rông kalóóng mađó madhiq đóng leq piđó lơq đóng dyóp ngaai,14palơq kalóóng paraaq gavơh nhan ưng piđó leq adhi anó, lóóm nh'nhơr đương rââm adhi anó taai ơơn phươk liêm bhươh yaal ưng Yaang Pleng dhiq adhi anó.15Rau ma-ơơn tapôông leq Yaang Pleng taai kaliim kliim kah n'nal mơ móón ưng Ađó!
FAR EAST BROADCASTING COMPANY