1 Timothy1
1Phaau-lô, sưưq-đô ưng Jê-su Chuôq Paq Manưih ting paraaq kayua ưng Yaang Pleng, Chuôq Paq nôôq he, lơq ưng Chuôq, nek Chuôq Jê-su Paq Manưih, lóóm parââm ưng nôôq he,2pagơơi đóng Ti-mô-thê, akóón lalua ưng aku klóóng lóóm huuiq: Nhan akóón bâân ơơn phươk liêm, rau ayô ka-er, yươq rauha tââq Yaang Pleng nek Ama lơq Jê-su Chuôq Paq Manưih, Chuôq nôôq he.3Kơi bhêêl vôôiq kalơng tơk Ma-xê-đoan, aku ơi bhơơl chut akóón tơơt lóóiq dhiq Ê-phê-sô buôn akóón ve chóóm truuih móón nôôq manưih tôôh kah pachóóm taruuih đu lââng,4kung óóq katiêu lóóm tơk nôôq chiên kah makoq machak lơq nôôq bha-aar dhong nooi đươnh điêq, nek nôôq rau đââng tơk rau tarkaai tarlak, lơh nek tarnêêng jư lêi đong Yaang Pleng, nek tarnêêng tââq lóóm huuiq.5Bơơi kanóq kaniêng ưng paraaq kayua ađô nek lóóm tanhơr avaaih gluh tââq lóóm sek chadhah, lơq lóóm kanóq liêm nek palơq lóóm huuiq yươq galơơk pathê,6hơq mưi phơn manưih, taai lơt kanóq kaniêng, ơi palâh lơơi buôn malóóm tơk tarnêêng xêi tapraaq ngôôk ngaak,7kiêng têêng manưih pachóóm gani, xók kah n'nal eh mưi nôôq paraaq ađêi praaq hơq dyơq leq nôôq rau ađêi praaq panhit.8Dhơ kơi ađek, nôôq he n'nal kakơi gani nek liêm kre la akóón manưih pei vech ađó kơi pâng dhalam,9taai n'nal rau ađô, ađek nek gani kah chóóm yuur tavaaih đóng manưih bhơt liêm, hơq đóng đu kah ve gani lơq kah xâng bóóp, đu kah charnap lơq matu lơt, đu kah ve taruuih liêm lơq praaq chôlô, đu leng akonh lơq leng akan, đu leng manưih,10đu têêng taniêt, đu vah-va, đu kóóp dhiêt baan manưih, đu praaq chachââr, đu truuih đuui galơơk, lơq dhơ dharau ngaai đu lââng tajơl huông palơq rau pachóóm pató liêm kre,11dhalam kơi Taruuih Liêm cha-iil tabah ưng Yaang Pleng phươk liêm, nek rau đu aku ơi bâân pajaau đóng.12Aku ma-ơơn Yaang đóng kataai karơ leq aku, hơq nek Jê-su Chuôq Paq Manưih, Chuôq nôôq he, taai Ađó ơi lêi aku nek đaang huuiq ganơơm, xók patơơt aku leq tarnêêng têêng,13dhơ n'loom hei aku nek đu praaq chôlô, têêng mahaai, lơq grô jar-ââih, bơơi aku ơi bâân kayô ka-er taai dyơq bhêêl kah n'nal rau, aku ơi têêng vôôiq kalóóng rau kah ve lóóm huuiq.14Bơơi, ơơn phươk liêm ưng Chuôq nôôq he nek taluôn lóng xưa raai nek palơq lóóm huuiq lơq lóóm tanhơr kalóóng Jê-su Chuôq Paq Manưih.15Taruuih liêm ađô nek đaang huuiq lơq đaang pơh đơơp tabhơt, ađek nek: “Jê-su Chuôq Paq Manưih ơi bhral kalóóng hóng katiêk buôn paq manưih matu” hơq kalóóng ađek aku nek đu têêng akoq.16Dhơ kơi ađek, aku ơi bâân kayô ka-er, taai ơi taai ađôk, achêk nek buôn Jê-su Chuôq Paq Manưih ve chóóm têêng pakah tabhơt lóóm jruôn parngau kalóóng aku, đu matu lơt nek tââm, kơi mưi rau pakah leq nôôq manưih e huuiq dhiq Ađó buôn bâân rau mamông taluôn nh'chró.17Nhan rau bhi chap lơq cha-iil tabah chô leq Bhua ưng dyóp klaang đơơi, nek Yaang Pleng mưi giêl kah bil, kah chóóm lêi, patơk nh'chró taluôn luôn. A-meen.18Ti-mô-thê, akóón aku, aku pajaau paraaq kayua ađôk đóng akóón, ting nôôq paraaq manưih đââng taruuih n'loom hei leq akóón, buôn đươi piđó, akóón ve chóóm ruul tơk kalóóng ganơt tarjơl liêm kiiq,19xók kadhâng jư lóóm huuiq lơq lóóm karnóq liêm, hơq mưi phơn manưih, taai jơl m'peq, ơi têêng klêch bil lóóm huuiq ađêi,20kalóóng nôôq ađek nek Hi-mê-nê lơq A-lek-xan-đơ, nek nôôq manưih đu aku ơi pajaau đóng Sa-taan buôn đóng piđó ve chóóm bâân pató pachóóm đóng kah praaq chôlô.
FAR EAST BROADCASTING COMPANY