1 Peter3

1Nhan móón nôôq mamóóq adhi nek nôôq manưih kađiêl, kung kơi achêk, phaai huuiq bhi kayiik ađêi, đóng patơk mơ la masôôq manưih kayiik kah ting huuiq paraaq Chuôq, bơơi ve kơi tơơt cha ưng kađiêl dhơ kah pei bóóp paraaq, nek nôôq manưih kayiik achêk e bâân đơơp huuiq,2lơh xók bâân lêi tơơt mamông sek liêm kung palơq rau bhi chap ưng nôôq adhi anó,3hơq cham dhiik ưng nôôq mamóóq adhi eh rau dhiq hót nguôi klaanh xok, lơq kuuk kóng vaang, hamôôiq xơp n'đóh kun aau kadhók kayór.4Bơơi nek luônh lóóm akóón manưih hót kalóóng, palơq parliêm chaq ching ưng lóóm karnóq moor dha-iiq lơq parngau, rau ađek nek akiiq bhlơng toom mat Yaang Pleng.5Taai nôôq pađiil tabah liêm hanua hana, nek nôôq manưih patơơt lóóm rââm dhiq Yaang Pleng, kung ơi cham dhiik achak araang kơi achêk xók huuiq bhi kayiik ađêi,6kơi Sa-ra ơi xâng bóóp Ap-ra-haam xók đóók ađó nek chuôq, nôôq mamóóq adhi bâân xar kơi akóón chachau ưng ađó xók têêng liêm lơq kah paprô dhơ dharau yuur kakhin kapơn n'đó.
7Nhan móón nôôq adhi anó nek nôôq manưih kayiik, kung kơi achêk, palơq rau dyóp n'nal, kơng phaai mamông madhiq palơq kađiêl, kơi palơq kabhuh dhur lơh, dhơ kơi ađek blah paak rau bhi chap kơi manưih mađó đơơp phơn ơơn phươk liêm ưng parmông, buôn đóng rau gavơh nhan ưng adhi anó yươq bâân takajơq.
8Tatun xariêq, tabhơt kơng ve markơi lóóm karnóq, rau lóóm yươq bheq, tanhơr adhi anó paliêm, lóóm moor dha-iiq pakatưưiq lóóm,9óóq pei aak chróót aak, môôiq paraaq praaq tamôôp ââi lóóiq paraaq praaq tamôôp; bơơi palâh lóóiq, bhiêk praaq paliêm, taai adhi anó ơi bâân dhaloong tơk rau ađek, đóng adhi anó bâân đơơp phươk liêm.10Ơi, “Ngaai kiêng nh'nhơr parmông lơq lêi tangêi kaxe liêm kre phaai chơl gađơq n'taak ađêi tââq rau aak, lơq bưưr ađêi óóq praaq rau galơơk chachââr.11Manưih achêk phaai palâh tââq rau jar-ââih lơq phaai yuur têêng rau liêm. Manưih achêk phaai tabâân nhan khe liêm lơq phaai ting tapun rau ađek,12taai mat Chuôq tơơt dhiq manưih bhơt liêm, lơq katór Ađó tơơt đan paraaq gavơh nhan ưng piđó,bơơi mat Chuôq chriik lêi manưih têêng aak.”
13Ngaai nek manưih e têêng tabhrê adhi anó la adhi anó val xar nôôq manưih bhơt lóóm leq rau liêm?14Dhơ kơi ađek, dhơ đóng adhi anó patơk mơ phaai đơơp jarnah taai rau bhơt liêm, nek adhi anó alua ve phươk. Mat lââng, óóq chóóm kadrêq xâng kơi yuur kakhin ưng palââng, kung óóq chóóm kadruch katrơơl.15Hơq phaai bhi haanh liêm Chuôq Paq Manưih, nek Chuôq kalóóng lóóm ađêi, taluôn luôn ravang đóng tarnêêng tar-ââi dhơ dha ngaai tamóh ng'ngơng adhi anó n'tââq đóng lóóm parââm kalóóng adhi anó,16bơơi palơq rau liêm jarleng lơq bhi chap, taai ve mưi lóóm karnóq liêm, đóng kalóóng haurau đu adhi anó bâân takaauq, nek nôôq manưih praaq tamôôp tarnơơt mamông kre liêm ưng adhi anó kalóóng Chuôq Paq Manưih phaai kachiit mat.17Ơi la nek karnóq Yaang Pleng kiêng, nek n'jang đơơp jarnah têêng liêm, lơh nek têêng aak.18Ơi taai Chuôq Paq Manưih kung ơi glêh đơơp jarnah taai matu lơt. Yaang bhơt liêm chêt klóóih manưih bhơt môôp, đóng Ađó ve chóóm đââng nôôq he tơk palơq Yaang Pleng, xók bâân chêt leq phơn achak hơq bâân têêng đóng mamông leq phơn ravaai,19kalóóng lóóm karnóq ađek, Ađó kung ơi truuih pachóóm xók bâân tơk palơq ravaai kalóóng đong kanam.20Nek nôôq manưih n'loom hei kah xâng bóóp xók rau đuôh jruôn ưng Yaang Pleng biêh đương góón kalóóng đơơi Nô-ê, dyơq xók bâân têêng m'beq jatau, hơq kalóóng jatau achêk, bơơr pe nak, ađek nek takóól ravaai, ơi bâân trôông tââq đơơk,21hơq ađôk kung nek a-ô xók đôk paq jóói adhi anó, hơq nek pheep bap-teem, eh rau tarnêêng m'peq lơơi puui anhuq dhiq achak araang, bơơi nek rau ng'ket paraaq ưng mưi lóóm kanóq liêm pakoom đóng Yaang Pleng, ve tââq mamông lóóiq ưng Jê-su Chuôq Paq Manưih,22nek Yaang, lơh xók dyók leq pleng, dyơq tơơt hót atươm Yaang Pleng, hơq nôôq dhơn Pleng, lơq nôôq Yaang ve mataai raman palơq nôôq kataai karơ maar huuiq bhi Ađó.

FAR EAST BROADCASTING COMPANY

https://app.library.bible/content/15a813fef7fefb05