1 John4
1Adhi anó nh'nhơr bơk, óóq huuiq dyóp rau yaang, bơơi phaai klêêu nôôq yaang đóng lêi piđó alua kah nek tââq Yaang Pleng, taai bơk manưih đââng taruuih chachââr ơi vôôiq plok kalóóng hóng katiêk.2Ve rau ađô, adhi anó bâân n'nal Yaang ưng Yaang Pleng: n'đó yaang đu đơơp huuiq Jê-su Chuôq Paq Manưih ơi bhral kalóóng manưih ti, achêk nek tââq Yaang Pleng,3dyơq n'đó yaang đu kah đơơp huuiq Chuôq Jê-su nek eh rau tââq Yaang Pleng. Ađek nek yaang ưng đu jaklâk lóóiq Chuôq Paq Manưih đu adhi anó ơi xâng kơi dyơq tơk, lơq xók ađôk tơơt kalóóng hóng katiêk aq.4Nôôq akóón ơơi, nôôq akóón mađó leq Yaang Pleng, lơq ơi đươk lơh piđó, taai Yaang tơơt kalóóng nôôq akóón gamak lơh đu kalóóng hóng katiêk.5Piđó mađó leq hóng katiêk, taai kơi ađek, piđó móón ting manưih hóng katiêk, lơq manưih hóng katiêk xâng piđó.6Nôôq yi mađó leq Yaang Pleng. Ngaai n'nal Yaang Pleng nek xâng nôôq yi. Ngaai kah mađó leq Yaang Pleng nek kah xâng nôôq yi. Ve rau ađek, nôôq he đơơp n'nal yaang ưng paraaq dhalam lơq yaang ưng rau lơt xraang.7Adhi anó nh'nhơr bơk, nôôq he kơng phaai tanhơr palơq xóng ađêi, taai lóóm tanhơr nek tââq Yaang Pleng, lơq la ngaai nh'nhơr hơq bâân gluh n'niên tââq Yaang Pleng lơq đơơp n'nal Yaang Pleng.8Ngaai kah nh'nhơr nek kah n'nal Yaang Pleng, taai Yaang Pleng nek lóóm tanhơr.9Lóóm nh'nhơr ưng Yaang Pleng ơi bâân pakah m'pơng nôôq he kalóóng rau ađô: achêk nek Yaang Pleng ơi kayua Akóón Charlâng Mưi ưng Ađó dhuônh hóng katiêk đóng nôôq he bâân mamông ve Akóón achêk.10Lóóm tanhơr tơơt kalóóng rau ađô, achêk eh rau nôôq he ơi nh'nhơr Yaang Pleng, bơơi ađek nek Ađó ơi nh'nhơr nôôq he, lơq kayua Akóón Ađó têêng bhanuôih pók matu taai matu lơt ưng nôôq he.11Adhi anó nh'nhơr bơk, la Yaang Pleng ơi nh'nhơr nôôq he kơi achêk, nek nôôq he kung phaai tanhơr palơq xóng ađêi.12Kah ngaai glêh chalaang lêi Yaang Pleng. La nôôq he tanhơr xóng ađêi, nek Yaang Pleng bhiêk tơơt kalóóng nôôq he lơq lóóm nh'nhơr Ađó bâân liêm dyóp tơơt kalóóng nôôq he.13Ve rau ađô nôôq he n'nal kơi ađêi biêh tơơt kalóóng Ađó lơq Ađó kalóóng nôôq he, achêk nek Ađó ơi đóng leq nôôq he Yaang Liêm Ađó.14Nôôq yi ơi lêi lơq kung dyơq truuih đuui kơi Ama ơi kayua Akóón têêng Chuôq Paq ưng hóng katiêk.15Dhơ dha ngaai đơơp huuiq kơi Chuôq Jê-su nek Akóón Yaang Pleng, hơq Yaang Pleng bhiêk tơơt kalóóng manưih ađek, lơq manưih ađek tơơt kalóóng Yaang Pleng.16Nôôq he ơi n'nal lơq ơi huuiq lóóm nh'nhơr đu Yaang Pleng ve kalóóng nôôq he. Yaang Pleng nek lóóm nh'nhơr, lơq ngaai bhiêk tơơt kalóóng lóóm nh'nhơr nek bhiêk tơơt kalóóng Yaang Pleng, lơq Yaang Pleng bhiêk tơơt kalóóng manưih ađek.17Ve ađek, lóóm nh'nhơr ơi bâân têêng đóng liêm dyóp palơq nôôq he, buôn đóng nôôq he ve rau mưng lóóm kalóóng tangêi xêi matu, taai kơi Ađó nek ng'kơi hơq nôôq he kung nek kơi achêk kalóóng hóng katiêk ađô.18Rau kakhin kapơn kah chaq ching kalóóng lóóm tanhơr, palâh lóóiq, lóóm tanhơr dyóp liêm m'peq lơơi rau kakhin kapơn, leq nguôi, taai rau kakhin kapơn bóq palơq jarnah. Dyơq đu kakhin kapơn biêh kah ơi bâân dyóp liêm kalóóng lóóm tanhơr.19Nôôq he nh'nhơr taai Yaang Pleng ơi nh'nhơr nôôq he laloom.20La ngaai móón kơi ađô: “Aku nh'nhơr Yaang Pleng,” bơơi geet adhi anó ađêi, hơq ađek nek đu praaq chachââr. Ơi đu kah nh'nhơr adhi anó ađêi nek manưih ađêi chóóm lêi hơq ađó achêk kah chóóm nh'nhơr Yaang Pleng nek Yaang ađêi kah chóóm lêi.21Alua, nôôq he đơơp gani pachóóm ađô tư tââq Ađó, ađek nek ngaai nh'nhơr Yaang Pleng hơq kung phaai nh'nhơr adhi anó ađêi.
FAR EAST BROADCASTING COMPANY