Káyisan15
1Fiye innene cuk alacana pikee píyisan penfakat péenimaam. Simaleekoo isak niŋ súsupak insiyekan hítaapanu ha isak niŋ súsupak sa, kaatuko hikina hiyem hikelan ha heeñaŋe ha écoopii pikelan káñiken ka kiti Pútuun pa.2Incuk waah weecuke nii kaatii kiti weeloo upunakanoolo niŋ seemak. Keesiiŋiye ka pukol kaatii ka kayem keeheeke ka élukuleen ya niŋ himuum eteyyo heememanoolee ha niŋ pafinal caacaw eteyyo. Nkayekan púkontiŋ empa Pútuun pa mpuwufanii pa.3Nkayeno caacook hícimu ha hiti Móyiis, amiikan a ati Pútuun pa, niŋ hícimu ha hiti Císaacii ca, nkasok:“Ateeteyo Pútuun pa piti sempe sa púlooŋ,pawenali penfakat, apan mpíhin an apiŋaŋo!Amansa ya ati púlunta pa,pítin pa pitii peecoonoole mpitempo!4Ateeteyo, ayme atafeyi,náamakiyan caacawi?Kaatuko awe lamayi yem eekuule,apan púlunta pa púlooŋ éfipikey mpíkilipo hátikini,kaatuko páhinali peecoonoole pa píyisaneeyisan.”5Pamuusal eehuu insincan, incuk alacana ékuut ya enfakat ya, eeyekane ya sínankiin sa súsupak sa la písiyool pa empa Pútuun pa mpiliile pa niŋ pakan etempo mpikiicee la, néepankinee páhantuwa la sampanee la.6Simaleekoo isak niŋ súsupak sa seeyekane sa hítaapanu isak niŋ súsupak sa, ínsifulii la sampanee la. Insísoolo wañ weekuule nuumiñal, kaafaal kiti sanoo nkicenkee ti púsus etenso.7Fiye ukee ti waah wa upaakiil wa weeyem wa kaloŋa nuuwufan simaleekoo sa isak niŋ súsupak sa sipool sanoo isak niŋ súsupak seemeeŋe niŋ káñiken ka kiti Pútuun pa, peeyem pa kaloŋa fo cancowiyaaw púley.8La sampanee la inkoonool niŋ háaputa héefulii ti hamake niŋ sempe sa siti Pútuun pa. An ayinaat pinako la sampanee la fo ta hítaapanu ha isak niŋ súsupak sa hiti simaleekoo sa isak niŋ súsupak sa nihipaye ta.
Wycliffe Bible Translators, Inc.