1A wasiso ri i lingmulus sakit, lenri: Ra taio i nemi sur in mugumugu na lotu, i nem a wakak na pinapam sakit.2A magiran a mugumugu na lotu in lenri: gong tu etakun i kis uni, in nolin kut nam ara ino, in tumarong a magirano, in warkurai bat anun a nilaun, i a ngas na musano ra a taro det urur uni, in ser gas pas a taro una nun a rumu, ma i a wakak na tene ususer.3Ma gong i tene ininum, gong i tene inaim, in tene malmal, ma gong i tene wasiso na kankan, ma gong i nem doko a mani.4I wakak sur in mugu wakak det tamtamano, ma in ususer a kum nutnutunu sur det in tarom toromi nama urur.5A musano ra ke lason sur in mugu wakak det tamtamano, ken pet lar pasi kai sur in tamtamabat a taro na lotu anun o God.6Gong taio i mugumugu na lotu ra i nukpukus matok taru kut, sako in umuman labino, ra in puku, ma din warkurai i elar nam o Satan.7I wakak sur a mugumugu i a ngas na musano ra a taro kai ra ka det ser lotlotu, det ser ru i. Ra awu, det in watung suri, ma in iru un in nukun anun o Satan.
A kum tene warut una lotu
8Lenkutkai ra torom a kum tene warut una lotu, i wakak sur det a kum ngas na musano ra a taro det ser urur un det, det in lingmulus una nundet a wasiso, gong det tene ininum ma gong det nemnem sur a labino mani.9Det in utur ukai a nurnur mulus ma a tokodos na ninunuk.10Din lar mugu tar det, ra numur, ra kataio in takun det un tu utna, din utur det maragom una pinapam na tene warut una lotu.11Torom anundet a wardain kai in lenra, det a kum ngas na wardain ra a taro det ser ru det. Gong det wasiso eno, det in tumarong a magirandet, ma det in lingmulus una kum pinapam rop.12A tene warut una lotu in nolin kut nam ara ino, ma in mugu wakak a kum nutnutunu, ma det rop una nun a rumu.13Det ra det papam wakak una pinapam na tene warut una lotu, a risandet in wakak, ma ka det in ngara sur det in wasiso puaso una nundet a nurnur una Karisito Iesu.
A kibin anundat a nurnur
14A nem na wanpat lakit torom ui, ikut a nuki lena in wakak ra an tumtumus mugu torom ui.15Ra kan nanpat lakit, u sa tasman a kum ngas na petutna ra a taro anun o God det in pami epotor tandet. A taro na lotu anun o God, a laun ino, det elar nama kum pos ma a kibin a rumu ra det udekdek a lingmulus.16A lingmulus, o God i upuaso mulusi lena, a etowo ra dat nurnur uni i labo sakit. I lenri:A Karisito i wanpat a musano,a Tokodos na Nion i upuaso i lena a Karisito i tokodos umatan o God,a kum ensel det tama i,a wasiso puaso uni i wan sarara torom a kum kamkabo taro rop,ma a susut una rakrakon bual det nurnur uni,i wan usapat ma i kis una minamar.