1Adina ago gira bi beika baika buni baegedi di vima maka, mina beika baika rama iniye kana bi de. Ye mina ori sisika rena lagani neineiri, bi nivakegi atafu baededi vene toga toga moi ruaka de rigo.2Makai bi ori sisika regi biri de riyadu, Sei nivakeyadi vene uru yokoi maka ini uka di mokena moi ruaka riyagadu dada, ye vegu no rofu toga de amutebigedi.3Idu ina vene yaku lagani neineiri mina ori sisika regasa ini vegu no rofu mokei ruaka regamadi.4Ini adina boromakau rumana ma gouti di dava bi vegu no toga toga koite makugi anua regedi.5Mina resi, Keriso konori digasa yomakai niyo:“Ya bi ori sisika rena ma aira mana ura de reyo,idu ya yaku roaita yokoi na rofu dogo reyo.6Ya bi vibani ori sisika renama vegu no koite makuna aira mana ada de reyo.7Mina usi na niyaka, ‘Sei, na rofu firo riyo bukari bura reyo kana,na yi beika ura reisa regikabaeyaka mini.’”8Ouresi ina yaku niyo, “Ya bi ori sisika mana, aira mana, vibani ori sisika rena ma vegu no erufuna ori sisika rena ura de resi ada de reyo.” (Idu mina bi ago gira dada rebiyainedi.)9Mina usi niyo, “Aiyo,na bi yi beika ura reisa regika deyaka mini.” Ye Sei yaku mina ouresi ori sisika rena uroro resi usi ini sanari aegika aeyo.10Ma Sei di ura dada, Iesu Keriso di roaita aira mana dudu, uru yokoi makari una tau noibanu moi akeke riyo.11Kamini Sei ma amiye utari naivo vene tau gade meda neineiri, ini naivo regika are resi ori sisika rena bi dudusa dudusa rededi; idu mina vegu bi vegu no koite makugi toga toga anua regedi.12Idu Keriso yaku uru yokoi makari meda tau noibanu rofu, vegu no di aira yokoi magasa Sei di vana rama rofu ameinu reyo.13Mirona ituari tua redo, ini tuma vene ini yuka aena sana kana rigo mamo.14Adina aira yokoi maka manari bi moi akeke rido vene toga toga moi rorobo iniye riyo.15Kamini Vima kikifa ka una rofu ninegau redo; ouresi yomakai niyo:16“Varika amiye yaku niyo mini: Mirona meda usimina bi uka ago ina vene rofu magida:Na yaku nai ago gira ini uka meko ideri ae masiini mokenari bura resi magida.”17Ka niyo, “Na yaku ina vene di vegu no ma ago gira usi dina de vegu toga dudusa de mokebigida.”18Goinari mina kana vegu no koite makuna amedori, bi kamini dudusa vegu no di ori sisika rena idana yokoi de.
Sei rofu ekaira renadi
19Mina dada, usika ourena, Iesu di dava dada ori de dudu sana kikifa dui regifa.20Mina bi vegu ruaka ameibobina di ida biri rina varuka doba una rofu ekeyo—bi iniye di roaita dudu mini.21Ye Sei ma amiye utari naivo amiye tora bi Sei di yava fafau ourefeidedo dada,22uka ramasa ori de mokena vari gira aena dudu, Sei rofu ekaira renadi; mina bi uni uka meko moi faraka resi uka di mokena no gutuna moi ruaka riyo ma ruaka iniye koru dudu, uni roaita koiteyo dada.23Vauya ga renadi, idu uni uka mokena di niogau rena ago moi gira rinadi, ini adina nitore reyo amiye bi vegu rama redo.24Ye gokai uniye uniye uka mana ma reremama buni urana niegira regi mokenadi.25Resi bedakai yaku makai rededi kana, egogo rena ferei tavoi ga renadi, idu uniye uniye niegira renadi, Varika amiye di dena meda bi besa besa ekaira redo vesifa mina duakauri.26Ini adina ago rama diba niyafa, ye gabi uni mokena dada toga vegu no ura resi rebigifa vonisi, ka bi vegu no rofu ori sisika rena yokoi de rego.27Idu Sei rofu ruda rededi vene ori dudu, kota rena ma ita yama yama resi ori kamu rego mina tua regedi!28Amiye kaere Moses di ago gira neidena de reyori, bi amiye remanu o regode di ninegau reyadi ago dudu, amiye tau yaku iriyeduka de resi umuyeyadi.29Ye mokeisa ba ide, amiye kaere moi akeke riyo, uka ago di dava moi no risi buni tora gade di Vima nifafana resi Sei di Mida ini yuka gabireri etei riyo, bi ini obini no iniye iniye moigo?30Adina una una diba amiye kaere yaku yomakai niyo, “Na yaku vegu no dairisi ini obini magida;mina obini bi nai”; resi ka niyo, “Varika amiye ini vene moi kota aego.”31Vegu amedo Sei di vanari yaregi bi ori tora gade nufa!32Senagi moi vabara riyo ma esika esika no iniye iniye moina dudu, are rei gira reyadiri meda mokefa.33Meda yokoiri ariara ya rofu nifafana resi esika ya maradi; ma meda yokoiri ya bi vegu makai reyadi vene di asini.34Adina dibura yavari amegamadi venerofu iriyeduka resi yi gugura vadumeyadiri ada dudu nimaradi, ya kaya ya diba niyadi, gugura burefe toga toga amego bi ya venesadada.35Mina dada yi mokena buni youfeidena ga refa, bi obini tora nufa dada.36Ini adina ya are rei gira regedi bi buni, ye Sei beika ura redo, ya mina regasa beika nitore reyo moigedi dada.37Adina:“Doba deri,dego amiye bi soka rego;idu bi de saka rego.38Ye nai mokena rorobo amiye yaku mokena vari gira aena dudu vegu amego;idu fufuta na mago vonisi,ina rofu uka ada de regida.”39Idu una bi diya fufuta magamadi ma moi no riyo vene di, idu bi ini uka moi vegu rigi mokena vari gira aegamadi vene di.