Mema Itatama Use, God Ne Sonembare Dae Benunu Siseri.
1Arie God, ni namane imboe use namane de atai fati fefetusesi.Ni namanekena janje ekoko use iriasi. Avata oroko mo, dubo jama edo jovereghe, namane jighaso erore!2Nine eteso, reighi Israel eminda enda daradara ghuse, sasarigedo betira betira ari usira.Enda benbanghuse embebegerira. Ava sedo oroko ava, aso, fa nunda ari fatonga ava are!3Nine eteso, namanekena roera fakarago siroriri, mema teriago beká eretafera.Namanekena uvu fakara mutari geteso, namane teteteghuse ya foa gheraera.4Evetu genembo ni igheghi eraera, aikena tataya refira ava darigaoro dae sise,ninda sonembada tano jigheso eretira.5Ninda natofo dubo buraesa ava,nange darakena darige jebugaetera ava kotise resena, namanenda benunu ningi!Ningido, ninda fakina tomanakoimi namane saghimbe, bu darige jebugaore!6God nunda tafaroro kambo kakarago aminda irise sisira,“Reighi Sekem nane sosighi e budo, tano ghoredo, nanda natofokena soro vesa arena.Enda uvu ghajughu tevisa Sukot seraera, ábarago nane sosighi e budo, tano ghoredo, soro vesa arena.7Gilead frovensi mo, nandari, a kotugo Oro Manasseh ningiaminda anumbirera, ábarago nanda tofori.Ephraim ondi da jokáda mo, nanda isoro embo sirorudo refera,kotugo Judah ondi da jokáda nanda kini (king) sirorudo refera.8O Moab mo, nanda uvu dimbu gutari agha dae ererurena.A kotugo natofo Edom da vasa nanda tofori.Ata anoso goroghusena amo, nanda yoyovari, aimi imbara ururono irarira.Filistia embo da enda sosighi e ruruse, na sosighi e bari da kuvai koko fuge resena.”9Arie God, na mave unumbari ya Edom embo da reighi begaya beká Sela, karo iti kinkanghusera,aminda beje terareni? Na mave giti jighi bu ya aminda teredo sosighi areni?10Arie God, ni namane mo, imboe beká usesi, ai?Arie God, ni namaneda isoro embo tataya ari dae yarera, ni yaresa, ai?11Arie! Sonemba futuru, gitofude isoro aore! Evetu genembokena sonemba bari sarera amo,beká eni jo sirorari bae arera.12Namonde God sonembururari tataya arera amo, gitofu de sosighié atai duboda fafatigarera.Amo nune namondeda gitofu firirighari, du fafasarera.