Matthew25
1Tîgư̆n, lơgơ Yang cŭngsî trồ rơp dî sơntu gư̆ptî jư̆t hê cro ua-drôh, la tơmpôl cro iyà đeng mơ̆n swà trôh anẵu wă-rẵu bơtô.2Mơya prăm hê cro ua-drôh nơ̆m khà ƀòn gô la mơngăl, î prăm hê cro-ua gừn jăk.3Bơh prăm hê cro ua-drôh mơngăl, ma-ngkơi jơ iyà đeng ƀòn gô swà, ơ̆ iyà dà-oềs băl î să.4Hôm tơmpôl cro ua-drôh jăk gừn iyà dà-oềs nơ̆m klŏ băl î đeng mơ̆n.5Jơ gư̆n, tài bơh cro bơtô jŏ trôh, lơ̆gay ƀòn gô sŏng gôjîng kơjơ̆ măt bĭc sŏng gư̆n bĭc lơhà.6Mơya nơ̆m nggùl măng, tom jơno dreo: ‘Cro bơtô tò! Tơlôh swà cĕ trôh anẵu wă-rẵu.’7Dơ̆ gư̆n, lơ̆gay kơp cro ua-drôh rơ̆ dî ple lôh gừn mhơ̆ wăl đeng mơ̆n.8Jơ gư̆n, lơ̆gay cro ua-drôh mơngăl tơs î lơ̆gay cro ua-drôh jăk: ‘Dăn e ƀòn hî dư̆ng-iè dà-oềs ƀòn e dê, bơh đeng ƀòn hî dê mơñ sơ̆t.’9Mơya tơm tô̆ kla dẵư, lơ̆gay cro ua-drôh jăk tơs lah: ‘Kơ̆mbrit ngăn la ơ̆ tom tăl ma ƀòn hî gư̆m ƀòn e. Niem rlo lah, swà cĕ ma tơmpôl cro brău dà-oềs mà tăc ma sătan.’10Mơya, nơ̆m jơ ƀòn gô swà tăc, bơtô sŏng trôh; gừn tơmpôl cro găy rcăng swà băl î bơtô gừn mơ̆t nơ̆m jơno ñô sa tơmhòp, sŏng gư̆n mpông dî kơl wăl.11Sŏng ma-ngkơi gư̆n, lơ̆gay cro ua-drôh năy kŭng trôh, tơs lah: ‘Ơ cro pơnhơm, ơ cro pơnhơm, dăn pẵư mpông ma ƀòn hî.’12Mơya tơm tô̆ kla dẵư wăl, cro pơnhơm tơs lah: ‘Iyŏ ngăn, ăñ tơs î ƀòn e, ăñ ơ̆ gư̆t ƀòn e.’13Tîgư̆n, păl kah-rngăl, bơh oh mi ơ̆ gư̆t nge hala jơ.14Bơh gư̆ptî du hôi cro mơñ swà wĭc, ông sŏng hôi lơ̆gay cro dê̆-gơna mơ̆n wăl gừn jao ma ƀòn gô jini-jơno ông dê.15Ông jao ma cro dô prăm talơng, cro năy bea talơng, cro nde te du talơng — kơp cro dî jao jăt jơno jăk ƀòn gô dê. Sŏng gư̆n ông khơñ ngăn swà gung swà wĭc.16Tơm tô̆ ông swà lờt, cro sŏng lăñ prăm talơng sŏng swà kă-brău khà priè jai î jôi dî prăm talơng nde.17Jăt gư̆p tîgư̆n, cro lăñ bea talơng kŭng jôi dî bea talơng nde.18Mơya cro sŏng lăñ du talơng, ma-ngkơi jơ tơlôh swà, sŏng sìa trôm nơ̆m ù gừn lăp ănpôn priè cro pơnhơm mơ̆n dê.19Jơ gư̆n, jŏ nge ma-ngkơi, cro pơnhơm tơmpôl cro dê̆-gơna rơ̆ trôh gừn katîng khà î ƀòn gô.20Ma-ngkơi jơ trôh en, Cro lăñ prăm talơng sŏng iyà prăm talơng nde, tơs lah: ‘Ơ cro pơnhơm, ông sŏng jao ma ăñ prăm talơng. Mơya dăn lăng dô, ăñ sŏng lơh tơlôh prăm talơng te.’21Cro pơnhơm gô tơs î gô: ‘Niem ngăn, cro dê̆-gơna lơbăn-niem gư̆m don-tơpăt! Mê sŏng don-tơpăt bơh khà êt bră dî jao. Ăñ rơp tơngñă mê ăm lăng khăi bră. Mơ̆t cĕ nơ̆m jơno sơhờp-sờhơn cro pơnhơm mơ̆n dê.’22Cro dî bea talơng, ma-ngkơi jơ trôh en, kŭng tơs lah: ‘Ơ cro pơnhơm, ông sŏng jao ma ăñ bea talơng, mơya dăn lăng dô, ăñ sŏng lơh tơlôh bơtăl bea talơng te.’23Cro pơnhơm gô tơs î gô: ‘Niem ngăn, cro dê̆-gơna lơbăn-niem î don-tơpăt! Mê sŏng don-tơpăt bơh khà êt bră dî jao. Ăñ rơp tơngñă mê ăm lăng khăi bră. Mơ̆t cĕ nơ̆m jơno sơhờp-sờhơn cro pơnhơm mơ̆n dê.’24Hôm cro lăñ du talơng, kŭng trôh, sŏng tơs lah: ‘Ơ cro pơnhơm, ăñ gư̆t ông, lah ông la du hôi cro krañ-cê, koh nơ̆m anẵu mơ̆n ơ̆ sêh î pêh-prăp nơ̆m anẵu mơ̆n ơ̆ sêh-prài.25Bơh kơ̆mbrit, gư̆n-jîng ma-ngkơi jơ tơlôh swà, ăñ sŏng ănpôn talơng ông nteàh ù. Dăn lăng dô, ông dî pơnah mơ̆n dê.’26Mơya dơ̆ kla wăl dẵư, cro pơnhơm cro rơ̆ tơs î gô lah: ‘Ơ cro dê̆-gơna bờk-mơsăk gư̆m alah-atà, Mê ờs sŏng gư̆t lah ăñ koh nơ̆m anẵu ăñ ơ̆ sêh î pêh-prăp nơ̆m anẵu ăñ ơ̆ păl sêh.27Tîrơ̆ gừn, bơgăy mê păl iyà lơi priè ăñ jê nơ̆m hîh ăn priè, sŏng ma-ngkơi jơ trôh, gừn ngăn la ăñ sŏng dưñ wăl priè ăñ jê gư̆m priè công.28Tîgư̆n, dưñ cĕ talơng bơh cro dô gừn dờp gô ma cro ndăng dî jư̆t talơng.29Bơh î cro ndăng dî, gừn kơp jơno rơp dî e bơtăl te — tien gơs rơp dî tơngkah-tơngkăñ. Mơya î cro ơ̆ tom dî, gừn ƀăt băl î jơno gô dî rơp kŏng dưñ tă lơ̆ bơh gô.30Gừn rơmbư̆ng cĕ cro dê̆-gơna ơ̆ kwơ gư̆n nơ̆m anẵu ñô̆ng kơnăm makin, la anẵu rơp tom jơno ñim-rèa î tơget sề.’31Hôm dơ̆ Kon-Mơnùs trôh nơ̆m jơno gơklŏ Kơnràñ gừn lơ̆gay cro gơndrơh băl î Kơnràñ, gừn jơ rơ̆, Kơnràñ rơp nggui cŭngsî sơban gơklŏ mơ̆n.32Lơ̆gay kơp lang bol rơp dî jơnư̆m wăl sơđàp măt Kơnràñ, gừn Kơnràñ rơp tơmcơlah ƀòn gô î găp, gôlơh gư̆ptî cro jư tơmcơlah belàt tơlôh bơh sơ băy.33Kơnràñ rơp lơi belàt ăm đah ma mơ̆n, hôm băy ăm đah eo.34Sŏng gư̆n, Bơtao rơp pơđơ tơmpôl cro găy ăm đah ma mơ̆n: ‘Tơmpôl cro sŏng dî Bàp Ăñ e lơnge, trôh cĕ madô hă, dưñ-lăñ cĕ lơgơ sŏng rcăng ma mơ̆n bơh dơ̆ sơm bơjîng trồ teàh.35Bơh Ăñ jơgloh, gừn ƀòn kon e Ăñ sa; Ăñ tơhiê, gừn ƀòn kon e Ăñ ñô; Ăñ la cro năc crêh, gừn ƀòn kon wă-rẵu Ăñ;36Ăñ ăm săkôh sơlơ̆ñ, gừn ƀòn kon tơngcù măư ma Ăñ; Ăñ kòp jê, gừn ƀòn kon rong-siem Ăñ; Ăñ kŏng ăm jam, gừn ƀòn kon trôh î Ăñ.’37Jơ rơ̆, tơmpôl cro tơpăt-durư̆ng rơp kla dẵư Kơnràñ, lah: ‘Khoai Yang, ƀòn kon sŏng tơmpơl Kơnràñ jơgloh mà e sa, hala tơhiê mà e ñô nơ̆m jơ găy?38Sŏng gư̆n ƀòn kon sŏng tơmpơl Kơnràñ gư̆ptî cro năc crêh mà wă-rẵu, hala ăm săkôh sơlơ̆ñ mà tơngcù măư nơ̆m jơ găy?39Gừn ƀòn kon sŏng tơmpơl Kơnràñ kòp jê hala kŏng ăm jam jơ găy mà trôh ma Kơnràñ?’40Tơm tô̆ kla dẵư, Bơtao rơp tơs î ƀòn gô lah: ‘Iyŏ ngăn, Ăñ tơs î ƀòn kon, jăt bơh kơp bră ƀòn kon sŏng lơh ma du hôi nơ̆m tơmpôl cro êt ahên lŭi anẵu lơ̆gay oh mi rôh lŏ dô Ăñ jê, gừn ƀòn kon sŏng lơh ma Ăñ.’41Pơnjăt te, Bơtao kŭng rơp tơs î tơmpôl cro ăm đah eo: ‘Swà wĭc cĕ bơh să Ăñ, ơ tơmpôl cro kŏng wac-rma, mơ̆t nơ̆m oềs miek miek sŏng rcăng lai ma càrak î lơ̆gay cro gơndrơh gô dê.42Bơh Ăñ jơgloh mà ƀòn mê ơ̆ e Ăñ sa; Ăñ tơhiê mà ƀòn mê ơ̆ e Ăñ ñô;43Ăñ la cro năc crêh, mà ƀòn mê ơ̆ wă-rẵu Ăñ, ăm săkôh sơlơ̆ñ gừn ƀòn mê ơ̆ tơngcù măư ma Ăñ; kòp jê î kŏng ăm jam, gừn ƀòn mê ơ̆ rong-siem Ăñ.’44Tơm tô̆ rơ̆, ƀòn gô kŭng kla dẵư, lah: ‘Ơ Yang, ƀòn kon sŏng tơmpơl Kơnràñ jơgloh, hala tơhiê, hala gư̆ptî cro năc crêh, hala ăm săkôh sơlơ̆ñ, hala kòp jê, hala kŏng ăm jam bơh jơ găy mà ơ̆ duh bră Kơnràñ?’45Bơh gư̆n, Bơtao rơp kla dẵư ƀòn gô, lah: ‘Iyŏ ngăn, Ăñ tơs î ƀòn mê, jăt bơh kơp bră ƀòn mê sŏng ơ̆ lơh ma du hôi nơ̆m tơmpôl cro êt ahên lŭi anẵu tơmpôl cro dô, gừn ƀòn mê sŏng ơ̆ lơh ma Ăñ.’46Tơmpôl ƀòn gư̆n rơp swà mơ̆t nơ̆m jơno lơh-glài miek miek, hôm tơmpôl cro tơpăt-durư̆ng gừn mơ̆t nơ̆m jơno jîng miek miek.”
FAR EAST BROADCASTING COMPANY