Mark1
1Sơntơm Jơno Niem Yang Dŏng-klàs Jesu dê, Kon Yang Tơm Trồ.2Gư̆ptî sŏng dî cêh nơ̆m sră cro gơnoăr-hwơr Esai lah: “Lăng cĕ dô, Ăñ pơđơ cro dê̆-gơna Ăñ swà mađàp măt Mê, gô rơp was gung ma Mê;3du jơno hôi dơng nơ̆m ƀlang-càs lah: ‘Was lơs cĕ gung Yang dê, lơh tơpăt lơ̆gay gung Kơnràñ dê.’”4Jăng trôh sŏng, lơh ƀaptem nơ̆m ƀlang-càs î tơs bơtău gơnoăr ƀaptem nơ̆m jơno mbư̆ng lơi căư glài bơh jơno hồ glài.5Kơp lơgơ Juđe î lơ̆gay cro nơ̆m Jerusalem swà trôh băl ma gô gừn ƀòn gư̆n dî gô lơh ƀaptem nhòng dà măy Jôđăn tơm jơ tơs tơlôh glài sătan.6Jăng gừn cù ao bơh î sơnẵu lakđa băl î săy bơ̆t kato tĕdơ bơ̆t gô, gư̆m sa sơđah î dà kròt brê.7Gô tơs bơtău lah: “Bơtao dî gơnoăr rlo ma ăñ ndăng trôh ma-ngkơi ăñ, la Bơtao mà ăñ ơ̆ dî păl cun nteàh lơi hồ săy cơkhŏ Kơnràñ.8Ăñ lơh ƀaptem ma oh mi rôh lŏ bơh î dà, mơya Kơnràñ rơp lơh ƀaptem ma oh mi rôh lŏ bơh î Yang Hwîng Goh.”9Bră tom tơlôh nơ̆m lơ̆gay nge gư̆n, rơ̆ la Yang Jesu trôh bơh Nasaret lơgơ Galile, gừn Kơnràñ dî Jăng lơh ƀaptem nơ̆m dà măy Jôđăn.10Gừn jai jơ rơ̆, tơm jơ lôh bơh sơ dà, Kơnràñ tơmpơl lơ̆gay dăp trồ dî pẵư tơlôh gừn Yang Hwîng Goh jư răp cŭngsî Kơnràñ gư̆ptî sêm kơ̆ntơp.11Gừn du jơno tơs trôh bơh trồ lah: “Kon la kon kơñ-kơloh Ăñ dê, Ăñ niem-nùs ngăn bơh Kon.”12Ƀăt jai gư̆n, Yang Hwîng bơtrôt Kơnràñ swà mơ̆t nơ̆m ƀlang-càs.13Kơnràñ ăm nơ̆m ƀlang-càs puôn-jư̆t nge, kŏng cà Satan pơlum. Kơnràñ ăm băl î jơno puôn jư̆ng, î lơ̆gay cro gơndrơh duh bră Kơnràñ.14Ma-ngkơi jơ Jăng kŏng kơ̆p, Yang Jesu swà trôh nơ̆m Galile bơtău Jơno Niem Yang Tơm Trồ dê,15î tơs lah: “Tô̆ jơ wêl-tăl lờt, î lơgơ Yang Tơm Trồ trôh en sŏng. Păl mbư̆ng lơi căư glài î don anẵu Jơno Niem.”16Tơm jơ swà jăt tî mamằ dàlîng Galile, Kơnràñ tơmpơl Simôn î Andre, oh Simôn dê, ndăng drăng sơnñol nơ̆m dàlîng, bơh ƀòn gô la cro kơ̆p ka.17Yang Jesu tơs î ƀòn gô lah: “Swà jăt ăñ cĕ, sŏng gư̆n ăñ rơp lơh oh mi gôjîng tê drăng sơnñol cro.”18Ƀăt jai gư̆n, tơm tô̆ sŏng lơi căư wăl sơnñol lờt, ƀòn gô swà jăt Kơnràñ.19Tơm tô̆ swà dî nggùl gung te, Kơnràñ tơmpơl Jakơ, kon klo Seƀeđe, î Jăng, oh gô dê, ƀòn gô ndăng srồt sơnñol nơ̆m ahẵu.20Jơ gư̆n, ma-ngkơi jơ Kơnràñ hôi ƀòn gô, gừn ƀòn gô swà gung jăt Kơnràñ, lơi bàp gô la Seƀeđe ăm wăl nơ̆m ahẵu băl î nhẵư hê cro lơh mơn.21Kơnràñ mơ̆t nơ̆m ƀòn dơng Kapenaum, gừn khơñ ngăn, nơ̆m nge Saƀat, tơm tô̆ sŏng swà mơ̆t nơ̆m hîh jơnư̆m, Kơnràñ sơntơm bơtău.22Cro ndrăt-ndròt bơh jơno Kơnràñ bơtău, bơh Kơnràñ sŏng ƀăn bơtău ƀòn gô gư̆ptî dî jơno gơnăp-gơnoăr ơ̆-iyŏ gư̆ptî lơ̆gay cro gơnoăr cêh.23Ƀăt jai gư̆n, du hôi cro kŏng hwîng cà lơh ờs ndăng ăm nơ̆m hîh jơnư̆m ƀòn gô, gô dreo dơng,24lah: “Ơ Jesu Nasaret, ƀòn hî tom bră găy î Kơnràñ? Tom iyŏ Kơnràñ trôh lơi tơngroh ƀòn hî? Ăñ gư̆t Kơnràñ la cro găy — Bơtao Sang-Goh Yang Tơm Trồ dê!”25Yang Jesu ƀoah-đas gô, lah: “Ăm-ƀơt cĕ gư̆m tơlôh bơh cro dô!”26Sŏng gư̆n tơm jơ hwîng cà sơmprah amî gư̆n nteàh, gư̆m dreo dơng dẵư, gừn cà tơlôh bơh amî dô.27Lơ̆gay cro ndrăt-ndròt, tien gơs tom tơs băl î găp lah: “Bră dô la amơh? Du jơno bơtău mhăy jăt jơno gơnăp-gơnoăr! Tien gơs ông gư̆n e gơnoăr pơđơ ma hwîng cà gừn ƀòn gô don jăt jơno ông gư̆n.”28Sŏng gư̆n jơno bră bơh Kơnràñ khơñ ngăn lam kơp anẵu trôh lơ̆gay ƀòn tĕdơ Galile.29Ƀăt jơ gư̆n, tơm tô̆ tơlôh bơh hîh jơnư̆m, ƀòn gô mơ̆t nơ̆m hîh Simôn î Andre, băl î Jakơ î Jăng.30Jơ gư̆n, mơi bo-ua Simôn ndăng kòp dôh bĭc ăm nơ̆m cơnờng, gừn ƀòn gô khơñ ngăn tơs î Kơnràñ bơh mò.31Dơ̆ trôh en, kơ̆p iyà tê mò, Kơnràñ dŏng mò lôh, gừn kòp dôh ƀeah bơh mò, sŏng gư̆n mò sơntơm dŏng bră ƀòn gô.32Bơh gư̆n, trôh brê mhău ñô̆ng, ma-ngkơi jơ măttơnge ñăp lờt, cro iyà trôh ma Kơnràñ jơh lơ̆gay cro kòp jê î lơ̆gay cro kŏng cà lơh.33Du ƀòn dơng sŏng bơjư̆m wăl ƀăt nơ̆m mpông.34Kơnràñ sămƀeah khăi cro lơbăn-lơñô î wêl-tăl kòp jê, gư̆m tơmprơh khăi cà, mà Kơnràñ ơ̆ e gơnoăr kơp cà pẵư dẵư bơh ƀòn gô gư̆t Kơnràñ.35Nơ̆m brê tơmdrư̆m-tơmmờt, dơ̆ brê hôm ñô̆ng klư̆k, ma-ngkơi jơ sŏng lôh bĭc, Kơnràñ tơlôh makin, swà trôh nơ̆m du-anẵu ngêt-ngờt, gừn nơ̆m anẵu gư̆n, Kơnràñ hôi-dăn.36Simôn î lơ̆gay cro ăm î Kơnràñ swà jôi Kơnràñ,37gừn ƀòn gô jôi tom Kơnràñ, gừn tơs î Kơnràñ lah: “Lơ̆gay cro ndăng jôi kơnràñ.”38Kơnràñ tơs î ƀòn gô lah: “Ƀòn mơ̆n swà cĕ anẵu nde, nơ̆m lơ̆gay ƀòn tĕdơ, lơi ăñ kŭng bơtău anẵu gư̆n te. Bơh ăñ trôh la bơh bră dô.”39Kơnràñ swà trôh lơ̆gay nơ̆m ƀòn Galile, bơtău nơ̆m lơ̆gay hîh jơnư̆m lang bol î tơmprơh cà.40Jơ gư̆n, du hôi cro kŏng kòp dun trôh băl î Kơnràñ, răc-dăn Kơnràñ î cơdơn krô̆ng, tơs î Kơnràñ lah: “Dilah Kơnràñ kơñ, Kơnràñ dî gơnoăr lơh ăñ dî lơhiê.”41Gừn bơh nùs kơñ-kơloh, tơm tô̆ Kơnràñ đăư tê, Kơnràñ tơmpơ̆p nơ̆m gô, gư̆m tơs î gô lah: “Ăñ kơñ. Păl lơhiê cĕ.”42Khơñ ngăn kòp dun ha-ău bơh gô gừn gô dî lơhiê.43Ma-ngkơi jơ sŏng pẵư dẵư ƀăn krañ-cê gô, Kơnràñ khơñ ngăn e gô swà,44Kơnràñ tơs î gô lah: “Kơhea cĕ, mê bư̆ng tơs jơno găy î kơp cro găy, mơya swà cĕ, sơđah sătan î cro gơnoăr ăn jơno duh-khoai gư̆m ăn cĕ lơ̆gay jơno duh-khoai bơh bră dî lơhiê sătan, la bră mà Môise sŏng bơtău tơngkah, gư̆ptî du jơno lơh cư̆ng ma ƀòn gô.”45Mơya, ma-ngkơi jơ swà tơlôh bơh sơgư̆n, gô sơntơm tơs tơnggư̆t ma khăi cro î lam tơnggư̆t jơno dô kơp anẵu, tien gơs Kơnràñ ơ̆ mơ̆t nơ̆m du ƀòn găy dubă sơđah-să dî te, mà Kơnràñ ăm makin nơ̆m lơ̆gay anẵu ngêt-ngờt, gừn lang bol bơh kơp anẵu kŭng ndăng trôh î Kơnràñ.
FAR EAST BROADCASTING COMPANY